يوم تحفه

اولا كل سنه و انتم جميعا بخير و لو انها متأخره قوى بس و الله الكمبيوتر كان فيه حاجه مش مضبوطه

بس الحمد لله اتصلح النهارده حاحكى لكم عن يوم تحفه قضيته فى العيد فى القاهره



طلعت فى دماغى انا و جوزى اننا نعزم اخواته معانا على رحله للقاهره فى العيد و الحمد لله ان الموضوع



اتظبط بسرعه و سافرنا تانى يوم العيد بالليل و يوم الخميس قررنا نروح دريم بارك



بالصراحه الجو فى اليوم ده كان تحفه و انا اول مره اروح هناك فكنت مستمتعه من قبل حتى ما اشوف



اى حاجه المهم دخلنا و اول حاجه دخلناها قطار الظلام و بعد ما وقفنا فى الطابور فوجئنا بامه لا اله الا الله



منتظره دورها و فجأه بدأ تخلف الشعب المصرى و لقينا شويه شباب و بنات بينطوا الاسوار



علشان يركبوا الاول طبعا بدأ الناس يعترضوا و ظهر الشهم اللى بدأ يشتمهم و انطلق سيل الشتائم



و هما عادى عادى و بيضحكوا الى ان قال لهم يا فلاحين و هنا انفجر البركان و هاتك ياضرب و دم و



ستات بتصوت و مسخره و فين و فييييييييييييييييين لما جه الامن و خدوهم بره بعد حوالى 10 دقايق شتيمه



و ضرب المهم ركبنا و المشرف نزل بنتى الصغيره و قال مش ينفع قال و انا كنت زعلانه



و بدأ القطر و عينك ما تشوف الا النور ناس تصرخ و ناس تصوت الست اللى جنبى دخلت القطر محجبه



طلعت بشعرها مش عارفه المعجزه دى حصلت ازااااااااااااااى هههههههههههههههه



المهم خرجنا و بنات اخت جوزى قرروا يركبوا الصاروخ وفضلوا يقنعونى اروح معاهم



قلت ابدا انا عندى عيال عايزه اربيهم يمكن انجح و لكنى اشك بصراحه منظر الصاروخ يوجع القلب



المهم ركبوا و نزلوا مبسوطين و فضلنا نتمشى ووصلنا لديسكفرى و دى عباره عن دايره مثبته فى عامود



و العامود بيتحرك على الجانبين بالاضافه لدوران الدايره واتهفيت فى دماغى و قطعت تذكره معاهم



و فضلنا مستنيين و الزحمه كتيره يمكن ساعه راح جوزى صارخ فيا انه زهق و يلا اطلعى المهم عملت



مؤدبه و خرجت و اتمشينا شويه و بعدين رجعنا تانى كان دورنا لسه برضه مجاش المهم اتحايلنا



على عمو اللى بيدخل الناس لغايه ما دخلنى و ياريتنى ما دخلت اللعبه بدأت و لقيت نفسى كأنى فى الخلاط



اه و الله العظيم ده اقل وصف للى حصل الدنيا كلها بدأت تلف و اللى كان فوق بدأ يبقى تحت و الحركه

بدأت تبقى سريعه قوى و الدنيا مش برد لا تللللللج فضلنا كدا يمكن 5 دقايق و انا بقى غمضت عينى

و سبت اللى يحصل يحصل فى الاخر الحمد لله لمست الارض تانى و جوزى بيحكى ان شوزات الناس

كانت بتطيربره المكان خالص و الناس نزلت تدور عليها ههههههههههههههه

نزلنا بنتطوح و بنضحك و مش حاسين باى حاجه و البلاهه مرسومه على وشوشنا

اليوم كان خلص و روحنا و بدأنا نفكر حناكل ايه المهم طلعنا على اول الصحراوى و اتغدينا

و حجزنا سينما و كان فيلم الداده دودى لياسمين عبد العزيز هو ظريف و خفيف يعنى فيلم عيد يبسط الناس

المهم الفيلم خلص و احنا خلاص هلكانين من اليوم الطويل ببص ادامى الاقى القمر طلع فجأه فى وسط

السينما و بصراحه من زمان و السينما المصريه مالهاش غير قمر وااااااحد حسين فهمى تخيلوا بقى

اشوفه بعينى و بينى و بينه مفيش تلاته متر المهم ماكانش حد واخد باله و اول اما قلت الناس سمعونى

و جرى عليه وهاتك يا صور و انا من صدمتى كل اللى قدرت اعمله انى عملتله بااااااااااى راح ابتسم

بشقاوه شاب فى العشرينات و عمللى بااااااى و الناس اتلمت و اتصوروا و عقبال ما قررت اتصور

كان قرر يمشى هوا و لقاء سويدان المدام الجديده له هى حلوه بس هوا على الرغم من انه قرابه السبعين

بس كله حيويه و نشاط و شباب اكتر من المدام و الله و بصراحه ده كان احلى ختام لاحلى رحله

عملتها فى حياتى بصراحه اليوم كله كان تحفه و كلنا ابسطتنا بس لو كنت اتصورت مع سحس كان التاريخ

بالنسبه ليا بدأ يتكتب من جديد و جايز كان ممكن يكتشفنى كموهبه فذه مستفذه

بس حنقول اييييييييييييه بقى ارزااااااااااااااااااااااااااااااق

عاااااااااااااااااااااااااااااااااااااااااااااااااااااا

انا و بسبس و بس

بصوا بقى يا جماعه حاحكى لكم حكايه و

عايزاكم تلاقولى حل ليها ربنا يخليكم

و ميوقعكمش فى زنقه ابدا قادر يا كريم

من كام يوم كده بعد الولاد ما ناموا خرجت

انا و جوزى نجيب شويه طلبات

و انا فى السوبر ماركت بعد ما اشتريت

طلباتى عينى لمحت تلاجه الايس كريم باضرب بعينى كده لمحت حبى الاول و الاخير نايم جواها اللى هوا طبعا

ايس كريم ميجا (طبعا ده اعلان لنستله على المتغطى كده و مش مشكله نتحاسب فى الاخر)هههههههههه

قلت يا بت دلعى جوزك و اهو سته جنيه مش خساره فيه رحت اشتريته و رحنا ناكله على الكورنيش

و اهى فرصه نحب فى بعض شويه بعيد عن اولادى اللى فى البيت

لسه باكل اول قطمه لقيت قطه ما اعرفش طلعت منين اقل ما يقال عليها انها قمر و تحسوا انها الاميره المسحوره

بتاعه حكايات زمان شعرها اصفر و عينيها تحفه وباين يا روحى كانت جعانه قوى

فضلت تلف حوالينا و تطلع لسانها و تتمسح فيا انا و جوزى بطريقه غريبه و انا طبعا قلبى رهيف مش يستحمل

رحت كسرت حته من شيكولاته الايس كريم اللى هوا مش اى ايس كريم و رميتها لها على الارض راحت جاريه

عليها و فضلت تلحس فيها و راحت واكلاها كلها و بدأت تتمسح فيا تانى طبعا جوزى و لا عبرها

كل اللى قدر يعمله انه صورها الصوره اللى فى اول البوست دى و كمل اكل تانى

انا بقى كلت شويه و سبت حته فى العصايه و رميتها لها كلت فيها شويه و بعدين كان فيه شباب معدى زى الغاره

كده راحت خافت منهم و جريت و اختفت دى كانت القصه

المشكله بقى من ساعه الحكايه دى و انا حاسه بحاجات غريبه بتحصل اولها ان فيه كلب فى الشارع عندنا كل

شويه

الاقيه داخل جوه الصيدليه يعنى ابقى برص دوا او بوضب حاجه اتلفت الاقيه فى وشى طبعا اول مره صرخت بس

بس بعد ما اتكرر بقيت اهشه بس و هوا يمشى يظهر حس ان اللى بيعمله غلط بقى ينام جنب باب الصيدليه

بالضبط ابقى باتكلم مع حد على الباب يروح قايم وواقف جنبى و بعد ما ادخل يرجع ينام مكانه

فى قطه بتدخل تنام فى جنينه المنور عندنا مبقتش تخاف منى خالص ابقى داخله العماره الاقيها داخله معايا

عادى كده بلا خوف او خشى و ساعات تستنى اما ادخل و تدخل ورايا و اما ابقى جايه متخافش

زى القطط التانيه و تفضل واقفه باصالى كده و لا تتحرك خطوه انا برضه اما الاقيها استناها تدخل و بعدين اقفل

الباب يعنى بقى بيننا احترام متبادل مبنى على تكافؤ الفرص

هههههههههههههههههههههههههههه

ايه رايكم بقى فى الحاجات اللى بتحصل دى واللى بدأت الاحظها اليومين دول كتير

اظاهر ان القطه بتاعه الميجا دعتلى و قالت الاهى و انت جاهى يحبب فيكى قططه و كلابه قادر يا كريم

و اظاهر برضه ان الدعوه رشقت

فوائد قوم عند قوم فوائد

عملها اوباما و فاز يارجاااااااااااااااااله و يا ستاااااااااااااااااات

كمان عشان محدش يزعل بصراحه الواحد فرح له خالص كأنه حد

من العيله الكريمه تمااااااااااااااام و الحمد لله ان حرقه دمنا عليه

ما راحش هدر و فرح و فرحنا معاه بس المهم يتمر فيه و يفضل

مفرحنا على طووووول و مينكدش علينا زى الموكوس اللى قبله اللى ما يتسماش

سود الله وجهه

و يارب يحس بشعور الاقليات و الاكثريات المضطهده دائما فى العالم و يحاول انه يكون

سبب شعورهم بالامان و لو حتى كام شهر بس

على العموم هو وشه سمح و شكله طيب و ابن حلال و ربنا يبارك فيه و يبقى اسم على

مسمى

طبعا بعد الباشا ما فازكل الدنيا هللت و عمت الافراح الديار و الساقع اتفتح و الشربات اتبل

طبعا و احنا فى ديك الساعه لما باراك ابن الحاج حسين اوباما يبقى رئيس امريكانا سخصيا

فى وسط هذه الافراح العارمه اختفت حاجات كتيره كانت قارفانى يوميا

اهمها بالنسبه لى مغامرات الاخت المرحومه سوزان هانم تميم و اللى بصراحه كانت

وصلت لمرحله مذريه و مخجله

مالنا احنا و مال تقرير الطب الشرعى حيفرق معانا ايه لما نعرفه يعنى ؟؟؟؟؟!!!!!!

ايه اللى استفدناه لما عرفنا انها عامله عمليات تجميل و لا انها حاطه خصلات صناعيه

و لا السليكون اللى حطاه كام كيلو ؟؟؟؟؟؟!!!!!!!

هل اللى عرفناه زودنا فى المرتب و لا رخص اسعار السكر و الزيت؟؟؟؟؟؟؟؟

طبعا ولا حاجه من دى حصلت بس الحمد لله اتلهينا شويه كتييييييييييير فى الهيافه

و شاركنا فى انتهاك حرمه انسانه هى الان فى زمه الله و ربنا بس هو اللى المفروض

يحاسبها مش احنا

فى وسط كل ده كان فى انسان تانى فى الجهه الاخرى من العالم بيكافح عشان يقول انه

موجود و عشان يفتح الطريق قدام ناااااااااس كتيييييييييير قوى زيه و بغض النظر

عن اننا معاه او ضده هو مثل يستحق الاحترام و التقدير

و ياريت يطلع عند حسن ظن العالم كله و يحسن الصوره اللى بقت للاسف وحشه قوى

مبرووووووووووووووووووووووك اوباما

اوعوا تنسوا

يسعدنى و يشرفنى ان ادعوكم للاستماع لحلقه برنامج انت تسأل و الكمبيوتر يجيب

يوم الاحد 2/11 الساعه 9و عشره صباحا

و العاقبه عندكم فى المسرات

تلغرافيا:علا محمد اسيوط

و الله و عملوها النسواااااااااااااان

اولا انا النهارده جايه مخصوص عشان اهنى الحريم الصعااااااااااايده كلهم بالحدث

السعيد

و انا البوست اللى فات عماله اقول البنات مقهوره و مش عارف ايه و الناس ترد على

البوست و تقول البنات الصعايده ملهومش رأى و لا اراده

النهارده افتح الاهرام الاقى واحده صعيديه تبعنا يعنى قال ايه قتلت ذئب شوفتوا الجبروت

و الافترا لا و كل صوابع من ايديها الاتنين و جرح رقبتها

و فضل يقطع فيها تلات ساعات كامله و فى الاخر حشت رقبته بالمنجل اللى بتحش بيه

البرسيم و بعدين نقلوها المستشفى فى حاله سيئه و النهارده كاتبين انها بقت كويسه

و حالتها استقرت غالبا نفسيتها هيا اللى كانت سيئه من منظر الفقيد المغدور به

و المصيبه ان عمرها 55 سنه يعنى مش شابه صغيره و صحتها مساعداها

لا دى على اعتاب الستين و جابت الذئب الارض بلمس الاكتاف و حش الرقاب

و الله الست دى بميت راجل و فعلا هما دول الصعايده الجدعان اللى يعرفوا يدافعوا عن

نفسهم فى احلك المواقف

الكارثه فى انها فضلت تستغيث بالناس و تصرخ وسط الزراعات و لا حد سأل فيها

و قال عاملين رجاله بشنبات و كله كان خايف يقرب منها

هيه دى الست الصعيديه اللى تشرف بجد و اللى اتربت على القوه و الجدعنه

مش الخوف و سلب الاراده و الانكسار و اللى تقدر تدافع ع نفسها و عن اللى حواليها

كمان

صقفه كبيره قوى لبخيته قاهره الذئااااااب

معاهم و لا عليهم

وحشتووووووووووووووووونى جدا و مش لاقيه حجه ابرر بيها غيابى المره دى

غير المدارس و المذاكره و الحاجات الغلسه دى بس اوعدكم الغياب ده مش حيتكرر

تااااااااااااااااااااااااانى

كل سنه و احنا كلنا طيبين على كل المناسبات اللى فاتتنىو اللى جايه كمان

احتياطى لاحسن اكون مش موجوده ساعتها

اللى استفزنى النهارده و خلانى اجى اكتب بسرعه حكايه غاظتنى جدا من يومين

كنت فى الصيدليه و دخلت ام و معاها بنتين صغيرين و طلبت ببرونه صغيره

علشان البنت اللى فى الحضانه معرفش ليه مع ان عندها سنه و نص

المهم انا جبت واحده حمرا و واحده صفرا راحت هيا سألت البنت تحبى اى واحده

البنت اختارت الحمرا و كانت فعلا حلوه المهم اخدتهاو سكتت و مفيش دقيقه

و لقيتها بتقوللى لا خلاص هاتى الصفرا

ليه يا ستى ؟هيا الحمرا فيها مشكله و لا حاجه ؟ قالتلى لا بس انا مبحبش العيال تمشى

كلامها عليا!!!!!!!!!!!!!!!!!!!!!!!!!!!

مش عارفه اقولكم انا بصيت لها ازاى ساعتها و قلبت وشى و قلت لها و ايه مشكلتك

لو سيبتيها تختار يعنى ده حينقصك ايه ردت و قالت عادى عشان يعرفوا ان مش كل اللى

يطلبوه ياخدوه ده يبقى دلع

رحت انا رديت و اما تبقى طالبه رأيها فى حاجه و بعدين اما تختار تقولى لا ده يبقى

اسمه جنان مش حتخسرى حاجه لو سمعتى رأيها لان ده بيساعد على تكوين شخصيتها

راحت اخدتها و هى متضرره و قالتلى عشان خاطرك انتى بس

و حكتلى انها كانت بتشترى شنطه لبنتها اللى فى الحضانه و البنت اختارت تويتى

و بعد ما اشترتها و روحت نزلت تانى و رجعتها و اشترت واحده وش اسد عارفين

شبه الاسد بتاع شاهد ما شافش حاجه مفيهوش اى رقه و لا طفوله لا ده مرعب

و ده كله بس علشان رأى البنت ميمشيش و بس

دى كانت الحكايه و من ساعتها و انا مستغربه و متضايقه ان الناس دى ربنا سلمها

امانه ناس كتيييييييييييييييييير غيرها مش لاقيييين ضفرها و مع ذلك كل همهم انهم يعقدوا

ولادهم و يحطموا نفسيتهم مع ان حاجه بسيطه زى دى ممكن تفرحهم و تبنى شخصيتهم

صح و تخليهم يقدروا ياخدوا قرارات صح مستقبلا فى حياتهم

امهاااااااااااااات كتير زى الست دى و بجد نفسى يبقى فيه تقييم نفسى للشباب

قبل و بعد الزواج علشان يعرفوا مدى اهليتهم لتربيه الاولاد مستقبلا علشان

متجيش ام تعمل فى ولادها اللى انا حكيته من شويه

و الله بعد ما مشيت فضلت اقول ربنا يشفى و يرحم من كتر غيظى و فرستى

ياريت تريحونى و تقولوا لى انا غلطانه و لا ايه؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!

تجيبها كده تجيلها كده مفيش فايده.....بااااااااااااااااظت خلاص

النهارده بجد مش عارفه موضوع محدد اكتب فيه لان اللى شايلاه فى قلبى كتيييييييييير و معبى

مش عارفه اتكلم عن رمضان اللى خلاص بدأت تباشيره تظهر من ساعه ما كنت فى القاهره

و لا عن المدارس اللى لمست على نفس السلك بتاع المصاريف زى رمضان لا اكتب ايييييييه بالضبط

بدأت بقالى يومين اشترى حاجه المدارس للولاد و اهو بند نخلص منه هوه و مصاريف المدرسه

قبل ما ندخل على رمضان و طلباته الكتيره نوعا ما

بصراحه ذهلت من اسعار اللبس بتاع المدارس السنه دى يعنى انا قلت اوفر و جبت للولد

بنطلونين و قميصين بس و اهو عنده قمصان من السنه اللى فاتت كويسه و الجاكت زى الفل

و مع ذلك دفعت 170 جنيه امال لو كنت بعزقت كنت دفعت كام؟؟؟؟؟!!!!!!!مش عارفه و الله

اما الشنط و الشرابات و الشوزات فده يعتبر نثريات و ان كانت غليت كتييييييييييير هيه كمان

ده غير مصاريف المدرسه السنه دى انا عندى اتنين و ما حبكش الضرايب تتفرض على المدارس الخاصه

الا السنه دى ياربى ادينى حدفع 3000 و شويه و ياريت فى الاخر بيلاقوا شغل بس اهو برضه عشان اما

يفكروا يهربوا على ايطاليا فى فلوكه مخرومه يعرفوا يقولواHELP اماااااااااال احنا بنعمل لبكره برضه

مش عارفه و الله الناس اللى بتجيب عيال كتيره دى بتعمل ايه فى الايام دى وقال حماتى و قرايبى يقولوا لى

كل شويه هاتى عيل تانى و كفايه طب دول مش حاسين بالدنيا اللى ولعت ولا ايه مش عارفه بجد

انا ساعات بحس ان الواحد كان جاب واحد بس و كفايه بس ارجع و اقول الحمد لله دول برضه نعمه من عند ربنا

اا رمضان و مصاريفه انا عامه رمضان مش بيختلف قوى فى نوعيه الاكل عندى الا لو كانت عندى عزومه مثلا

اما ايامى العاديه بيزيد طبق شوربه و العصير اللى اساسى عندنا قمر الدين مشروبنا المفضل

و شويه حاجات قليله قوى زياده جنبه و الباقى زى اى يوم

المشكله ان الحاجات ضربت قوى لفوق فى السعر يعنى الحاجات اللى كنا بنجبها ب100 جنيه بقت 300

يعنى اقل حاجه حجيبها حاحس انى مبذره و مسرفه

حاسه انى اتخنقت و انا باحكى و مش عارفه اقول ايه تانى

نطلع بقى من نص رمضان بقى على لبس العيد اللى بقترح انه يتلغى السنه دى خاااااااااااااااالص

لانه بدعه و كل بدعه ضلاله و كل ضلاله فى النااااااااااااااار

من كل اللى انا قلته نطلع بأيه ؟؟؟!! ان المدارس لازم تتأجل لغايه بعد العيد عشان الناس

تاخد كل خبطه فى دماغها بتركيز و تدوخ شويه و تقوم تتخبط باللى بعدها

لكن كل الخبطات مع بعض لا الناس ساعتها حتموت من اول مره و مش حتلاقوا حد تخبطوا فيه بعد

كدهليه بقى؟؟؟؟؟

لان الخبط فى الميت حراااااااااااااااام

وكل سنه و انتم مخبوطين

يووووووووووه

قصدى بخيييييييييييييير

اكتوبر اللى بعدتنى عنكم

اخيرا رجعت اكتب تانى و الله اللى كان باعدنى عنكم الشديد القوى و القوى جدا كمااااااااااان

الفتره اللى فاتت سافرت اكتوبر عشان اوضب شقتنا الجديده فى اكتوبر و كلى اشراق و تفاؤل

و اقبال على الحياه

من ساعه ما دخلت الشقه و انا اتقلبت سندريلا بكل ما تعنيه الكلمه من مسح و كنس و تنفيض

خدت يومين مع النجار اللى كنت جايباه معايا خوفا من افترا النجارين الاكتوبريين و طبعا

كنت واقفه معاه انا و جوزى لما اتطحنا و اتفرسنا من برود الاستاذ و هدوءه الزائد عن الحد

الحمد لله خلصت النجاره بكل مشتملاتها و قلت يا مسهل ادينا حنبدأ الاجازه لكن هيهاااااااااااااااات

هيهاااااااااااااااااااات

اثناء وجود النجار لاحظنا بعض التسريب من الحنفيات فاتصلنا بالباشا السباك

اللى اسمه مكتوب على العماره و جه صلح حاجات بسيطه اول يوم و لهف 50 جنيه و مشى

اتصلنا بيه بعد يومين عشان يركب السخان و يظبط التواليت اللى كان بيمشى هوا و الحوض لوحدهم

و فين و فين لما تم المراد من رب العباد و خلصنا السباكه ده بعد ما لهف 500 جنيه تانيه

طبعا كنا محتاجين تلاجه رحنا هايبر مش لقينا النوع اللى عايزينه و كسلنا نروح كارفور

واحد ابن حلال (ارشدنا) على محل كبير متخصص فى الاجهزه الكهربائيه

و اكيد كل الاكتوبريين عرفوووووه و فعلا لقيناها هناك و اشتريناها لنكتشف بعد كده انه اغلى من السوق

بحوالى 70 جنيه يالا حار و نار فى جتته طبعا كان نفسى مووووووووووووووووت اكتب لكم يومياتى

و مغامراتى اول بأول من هناك بس للاسف اكتشفت ان تليفونى الهوائى مينفعش يدخل على النت

و حاولنا نمد وصله من الراجل بتاع النت بس كان عايز يدفعنا 350 جنيه تمن البوستر عشان مش فيه

حد غيرنا فى العماره مشترك طبعا جوزى كبر لان احنا كنا خلاص مسافرين و مش مستاهله

فياريت اللى عنده واسطه فى سنترال الحى السادس يشوفلى حل فى موضوع النت ده و له الاجر و الثواب

فضل من الاجازه كام يوم كده سافرت اسكندريه يومين بس و بكده تكون خلصت الاجازه

كان نفسى اشوف ابى و مفروسه و المفقوعه و خيخه و باقى اعضاء نقابه المدونات الحريمى طبعا

بس للاسف مفيش نصيب بس اوعدكم انى اعزمكم على حفل قص شريط افتتاح الشقه

قرييييييييييييبا جدا جدا جدا و ياريت كل اللى يجى يجيب معاه حاجه نكمل بيها اللى ناقص فى الشقه

و اهو من قدم شيء بيداه التقاااااااااااااه و هنيااااااااااااااالك يا فاعل الخير و الثواااااااااااااااااااااب

قبل ما انسى احب اوجه الشكر لابى على اهتمامها و سؤالها عليا صحيح كنت خلاص رجعت بس

كفايه انها افتكرتنى و سألت عليا.

اكل العيش مر يا ناااااااااااااااس

يرقد امامكم فى هذه الصوره فرفور افندى الذى سولت له نفسه اقتحام بلكونتنا

و هو لا يعلم ما يخفيه له القدر من انتقامنا و الذى غالبا ما يكون شديد و مكلف

كما ترون فى الصوره.

الحكايه بدأت لما دخلت البلكونه انشر غسيل و لقيت الفقيد بيجرى قدامى

طبعا جوزى مخلوصهوش الاهانه الشديده اللى وجهها لى فرفرو عدم احترامه

ليا و دخوله بلكونتى من غير استأذان.

راح داخل البلكونه و جاب المصيده و راح جايب ذره مشوى

بايت من يومين و نشف و حطه فى المصيده و سابه شويه ونسينا الموضوع

بالليل بقى سمعت خروشه و كركبه فى البلكونه دخلت بسرعه اشوف ايه اللى

بيحصل لقيت العجل طب يا رجااااااااااااااله و لقيت فرفور صغير تانى

واقف جنبه بيواسيه و طبعا جرى اول ما شافنى بس على مييييييين

ليه دور و جاى قريب و كله قسم و نصيب

احنا بقى بعد ما بنصيد الفار مش بنعرف نموته بس بتتجلى ساديه جوزى العزيز

انه بيتبع معاه سياسه التجويع لغايه ما ينتحر وحده و ده اللى حصل

الفار يبدو انه كان جعااااان جدااااا و ده كان السبب انه يلاقى هذا المصير

الاسود انه اول ما شاف الذره اتهبل عليها و ده اللى مخلاهوش ياخد باله من

المكيده و دخل غرفه الاعدام برجليه

و طبعا الصوره اللى فوق دى بعد تنفيذ حكم الاعدام بالتجويع حتى الموت

و لما مات مات و هوا حاضن كوز الذره و هو يعلنها واضحه

دره ....دره حتى الموت

الرساله دى بقدمها لكل من تسول له نفسه دخول بلكونتى حتى لو فى الحلم

و يعرف ان ورانا رجاله و يعرف برضه ان الصعايده ميسبوش حقهم ابدا

و قد ازعر من انذر

ياااااااااااااااارب

يارب كلمه صغيره قوى بس لو عدينا كام مره بنقولها فى اليوم الواحد نلاقيها كتيييير قوى

و انا فى العربيه مع جوزى من يومين لقيت حد كاتب على الحيطه جمله هى "بس قول يارب"

و ابتسمت قوى اما شويه ولاد عدوا جنبها و راحوا قايلين بصوت عااالى يااااااااااارب

وفكرت و قولت كام واحد فى بلدنا بيقول يارب كل يوم و ليه

ياترى هل هو طالب الثانويه العامه اللى ذاكر و تعب طووووووووول السنه و اهلوا صرفوا عليه و فى

الاخر كانت صدمته كبيره لما عرف ان الامتحانات اتسربت و ان خلاص الروس اتساوت و اللى ذاكر زى

اللى ماذاكرش و خلاص مبدأ تكافؤ الفرص انعدم و ان البقاء للى يدفع ثمن الامتحان و يعرف يشتريه؟؟

ولا هو المريض اللى حالته تعبانه قوى من السرطان اللى دمره و الكبد اللى هده و بيدعى ربنا يشفيه

و ينتقم من اللى ملوا البلد بالمبيدات المسرطنه و الادويه المغشوشه و شركات الادويه اللى همها

المكسب الكبييييير بدون النظر لظروف المريض و حالته الماديه؟؟؟؟؟

ولا هو الموظف الغلبان اللى على الرغم من زياده مرتبه 30% لفى نفسه برضه مش عارف و لا لاحق

يعمل حاجه لانه بيخلص المرتب برضه يوم10 بالكتير و الحاجه من حواليه بتغلى فى اليوم الواحد

مرتين و تلاته و هو مش عارف ليه و ازاى و مطالب ولاده مش بتخلص و هو مش عارف

يلاقيها منين و لا منين؟؟؟؟

و لاهم الشباب اللى نفسه يتجوز و مش عارف لارتفاع اسعار الدهب و الخشب و الشقق

اللى اسعارها انفجرت بسبب ارتفاع اسعار الحديد و الاسمنت و الاراضى

وطلبات اهالى البنات المغالى فيها و اللى رفعت نسبه العنوسه فى بلدنا لارفام غريبه و عاليه جدااااااا؟؟؟

و لا هى الام اللى نفسها تربى ولادها صح و تطلعهم ناجحين و محترمين و مش قادره

بسبب السلوكيات الغلط اللى بتحيط بالاطفال من كل جانب و تخليهم عرضه للانحراف فى كل وقت

و كل مكان؟؟؟

ولا هي انا اللى مش ملاحقه اعمل شغل البيت و لا شغل الصيدليه و لا ادفع الضرايب و لا فواتير\

الكهربا

و لا الضرايب العقاريه و لا فلوس النظافه اللى مش بتحصل ابدا و لا ارجع الدوا اللى باظ و مش عارفه

ارجعه ازااااااااى و حاسه ان الدنيا مكركبه فوق دماغى و مش عارفه اعمل ايه؟؟؟؟؟

كلنا فعلا محتاجين نقول يارب علشان يساعدنا ويعيننا على الدنيا الغريبه اللى احنا عايشين فيها دى

قولوا كلكم معاااااااااايااااااااااا

يااااااااااااااارب

هذا ما جناه على ابى

ياترى ايه مواصفات الاب الكويس فى رأيكم ........هل هو الحنين قوى اللى يفضل

يبوس ولاده و يلاعبهم و ميقولش لحد فيهم

ده غلط و ده صح.

و لا هو الاب الجد اللى طول ماهو قاعد يدى تعليمات و اوامر لاولاده كانهم فىالجيش او

فى معتقل.

ياترى هوا الكريم بهبل مع ولاده يعنى يديهم فلوس من غير حساب من غير ما يسأل ليه

و ازاى

و لا لازم يزنقها عليهم لغايه ما يخنقهم.

امبارح كنت فى عزاء عند احد قريباتى ابنها اتوفى و عمره 28 سنه طبعا مش بعترض

لان ده امر الله

لكن الولد ده اكتشفت انه كان مدمن قبل مايتوفى وان سبب وفاته كانت نتيجه اصابته

بفيروس فى المخ

و ده اكيد له علاقه بالادمان لانه اكيد كان بيتواجد فى اماكن موبوءه اللى بيتوفر فيها

الزفت اللى بياخده

و انا فى البيت فضلت افتكر الولد ده كان عسول جدا و هو طفل كنا نحب نتفرج عليه و

هوه بيلعب و بيتكلم

لانه كان لمض و كلامانجى زى كل اللى فى سن 5 سنوات.

وبعد ما كبر شويه وبدأ يعى الحياه كان الام و الاب بيتفننوا ازاى يدلعوه هوا

و اخواته كلهم

الدلع ده بيتمثل فى الفلوس اللى من غير حساب و القعده فى النادى ليل نهار من غير

رقيب او حسيب

الدش و النت اللى فى كل اوضه فى البيت و كل واحد يجيب صحابه و يقفل عليهم الباب

من غير ما حد يسألهم انتوا بتعملوا ايه.

اللى زاد و غطى ان الاب اتجوز واحده تانيه على امهم الست اللى وقفت جنبه و نضفته و

عملته بنى ادم

و ده طبعا كان متوقع منه لانه كان عايز واحده صغيره يتعايق بيها فى سفرياته الكتيره

للخارج

بس اللى مش متوقع انه اهمل ولاده تماما لانه يا عينى كان مشغول لشوشته مع

السنيوره الجديده

و اللى جابتله طفل صغير خلاه يصدق انه لسه نغه و صغير و يجى منه و هو اللى تجاوز

الستين

طبعا السيناريو اللى انتوا عارفينه حصل الولاد قاطعوا ابوهم و التفوا حوالين امهم اللى

للاسف حاولت تكسبهم

اكتر عن طريق الفلوس الزياده و طريقه علشان تعرفوا مين بيحبكوا اكتر.

البنات اتجوزوا و كل واحده بقت فى بيتها اما الولاد كل واحد فيهم خد طريقه

الصغير اللى فيهم و اللى كان اكتر واحد متدلع و اكتر واحد محتاج توجيه الاب لم يجد

غير ام ضعيفه

مجروحه من الاب و عايزه اللى يطبطب عليها و مش مستعده تعمل اى حاجه غير

الولوله على حالها

طبعا ما خدتش بالها ان الولد فيه حاجه بتتغير و لم تأخذ بالها غير بعد ما اعراض

الادمان المشهوره ظهرت عليه

و طبعا الاب تخلى عنها و عنه و قالها ادى اخره التربيه الغلط و رفض انه يشارك فى

الصرف على ابنه

على الرغم من انه يشغل وظيفه مرموقه و مستريح ماديا.

مشيت الامور معرفش ازاى لغايه ما الولد تعب و دخل غيبوبه لغايه اما اتوفى.

و انا داخله الجنازه افتكرت آخر مره شوفته كانت فى فرحى و كان بيرقص مع اصحابه و

كله اشراق و حيويه و حب للحياه

و للاسف كل ده ضاع مع الوقت و خلال 10 سنين كان فى القبر

دخلت الجنازه اللى كنت انا داخلاها و عينيه مدمعه لقيت الناس عااااااااااادى امه عادى و

اخواته كذلك

و السيد الوالد الفاضل كان تحت فى الصوان قال ايه راااااااجل و بيتقبل العزا فى ابنه بعد

ايه؟!!!!!!!!!!!!!

و حسيت ان موت الولد فعلا كان راحه لهم هما قبل ما يكون راحه ليه بس ياترى حيكون

راحه لضميرهم

من العذاب و التأنيب على الامانه اللى فرطوا فيها

يا كل اب متسيبش ولادك جريا وراء نزوه هتكلفك كتيييييييير و اولهم ولادك لان دول اهم

مكسب فى حياتك

و يا كل ام الحب ميبقاش دلع زياده و فلوس و تسيب و ميبقاش انى اسيبهم كده فى الدنيا

من غير رقيب او حسيب


اعتقد ان الرساله وصلت


و انا لله وانا اليه راجعون

الريس خالد حرب

خدنا الاجازه خلاص و بدأت السينما تنزل

افلام الصيف الجديده و صاحبتكم بقى مدمنه

سينما يعنى مفيش فيلم بينزل الا و بيمر عليا

بدا الموسم عندى السنه دى بفيلم

"الريس عمر حرب"

الفيلم ده جديد المخرج خالد يوسف او بمعنى

اصح تحفته الجديده بعد كل افلامه الرائعه

السابقه.

الفيلم بيدور فى عالم صالات القمار و ما يحدث فيها بالتفصيل الممل و ان كان ما يعيب الفيلم هو مشاهد الجنس الكثيره

و الصارخه و على الرغم ان الفيلم للكبار فقط لم اكن اتصور ان ارى كل هذه المشاهد الخارجه مقارنه بفيلم آخر

للكبار مثل "عماره يعقوبيان"او "سهر الليالى"و الاتنين كانوا للكبار فقط

الفيلم كان فيه سميه الخشاب و غاده عبد الرازق و هانى سلامه الذى لولا وجود خالد صالح فى الفيلم لكان هو البطل

المطلق له لان الفيلم كان على اسم شخصيه خالد صالح لكن مشاهد هانى سلامه اكتر و ان كان معظم مشاهده راحت فى

البحلقه بعينيه كعاده هانى سلامه دائما و ربنا ما يقطعله عاده ابداااااااااااااااا

اما بقى خالد صالح فكان تحفه الفيلم بجد ايه الراجل ده مش ممكن الموهبه دى كلها

الراجل ده عنده قدره انه فعلا ينسيك هو مين فى الاصل و لا تتذكر الا انه الريس عمر حرب

قوه فى الاداء و كمان بسهوله من غير تكلف او تشنج ,نظرات عينيه فى الفيلم كانت مرعبه و قويه و كلها ثقه

اضافه على ان قوه القصه و الدور جعلوا تمثيله اقوى حتى من دوره فى "هيه فوضى "

هوه كان دوره صاحب صاله القمار القوى الشخصيه الصارم الذى تثار حوله الاساطير و التى تذيد قوه شخصيته و

غموضها و مش حاحكى حاجه تانى عشان محرقش الفيلم للى عايز يشوفه.

بصراحه خالد صالح يستحق جائزه عن هذا الدور بجد و الايام حتثبت انى على حق

ياريت يا جماعه كل اللى راح الفيلم يجى يقوللى هو معايا و لا ضدى فى الرأى انا شخصيا ارفع لخالد صالح القبعه عن

هذا الفيلم.

و نتقابل انشاء الله مع الفيلم الجاى

يا اهل الطب ارحمونا ربنا يرحمكم

فاكرين صاحبتى اللى جوزها كانت رجله واجعاه بعد ما خفت شويه رجعت وجعته تاااااااااااااااااانى

راح للدكتور تاااااااانى اللى قرر يكرمه المره دى و يحوله يعمل اشعه من اللى بيتدفع فيها ميااااااااااات

الراجل و الله مكدبش خبر و راح ساحب المودام بتاعته معاه وراح مركز الاوشاعه الكباره اللى عندهم

ودفع يمكن 350 جنيه و جتله واحده سنيوره كده و قالتله بصوت حونين اتفضل اقلع هدومك و البس الروب

وطبعا نفذ كلامها زى الالف و بعد كده دخل عمل الاوشاعه و فضل فى الطاحونه قصدى اوضه الاشعه حوالى 30 دقيقه

بعد كده قالتله الاموره اتفضل بره لغايه الرابورت قصدى التقرير اما يطلع

و بعدشويه جابتله الاوشاعه و مشى

تانى يوم راح للدكتور يوريه الاشعه اللى كان مكتوب فى تقريرها كوارث ملخصها ان الاستاذ خلاص بقى ضهره شرك

و ان الفقرات لبست فى بعض و شويه كوارث مفهموهاش

المهم الدكتور قاله ان التقرير ده لو صح انت تاخده و تطلع على العملياااااااااااااااات عدددددل

بس الدكتور كان مصر ان التقرير ده فيه حاجه غلط لان تشخيصه مش متتطابق مع التقرير

و فضل يقلب فى الظرف قوووووم يلاقى ايه بقى ؟؟؟؟؟؟؟؟؟؟؟؟؟؟؟؟؟؟؟؟؟

ورقه جوه الظرف عليها اسم مريضه تانيه عندها نفس الالم و مطلوب لها اشعه على نفس المكان

نفهم من ده ايييييه؟؟؟؟؟؟؟؟؟؟؟؟؟؟

اللى فهمه الدكتور ان التقارير اتبدلت و ان كل واحد خد تقرير التانى

طبعا جوز صاحبتى رجع المركز و حكى للدكتور الموجود الحكايه اللى خد الموضوع على كرامته قوى

و راح واخد الاشعه معاه و بعدين اختفى شويه و رجع وقاله انت اشعتك طبيعيه بس فيها حاجه بسيطه كده

و سابه و اختفى لمده تيجى 45 دقيقه لما جوز البت قرب يتأسف لهم انه جه اصلا و حاول يفهمهم انه مش جاى

يتخانق معاهم و انه جاى عشان الست اللى خدت التقرير الغلط حرام لان حالتها تعبانه و التقرير بيقول عكس ذلك

و هما و لا كأن

و شويه و طل عليهم الداكتور الكوباره و معاه البشاره و قاله ابسط يااااااااااااااااااااااااااعم مفيكش حاااااااااااااجه

و جابله تقرير جديييييييييد كل حاجه فيه نورمال يعنى كوووووووووووووله تومااااااااااااااااام و مفيش مشاااااااااكل

خاااااااااااااالص و الدنيا حلواااااااااااااااااااااااا و بينكى على الااااااااااااااخر

و قاله ايه بقى انه عشان دكتور قصده على جوز صاحبتى فالمصطلحات قلقته شويه و بذلك يبقى الجهل نعمه

اما المريضه التانيه يااااااااااااااااااااااه انتوا لسه فاكرينها دا انا نسيتها

ربنا يتولاها بقى هى و اللى زيها

استرها معانا يارب

من كام يوم كده و انا فى المطبخ زى كل يوم و مشغله الراديو سمعت تقرير منظمه الاغذيه العالميه

و البنك الدولى عن ازمه الغذاء و اللى للاسف مش عندنا بس لا دى فى العالم كله

المنظمه حذرت ان مخزون الغذاء العالمى اصبح يادوب يكفى العالم كله خمسين يوم بس اذا تمت عداله التوزيع

يعنى اذا كل واحد فى العالم خد نصيبه زى التانى و ده طبعا مش بيحصل

كمان قالوا ان 37 دوله معرضه خلال الفتره القادمه لمجاعات شديده و ده فى اغلب الاحيان بيؤدى الى حروب طاحنه

من اجل الغذاء و الماء

التقرير ذكر ان الارتفاع العالمى الشديد فى اسعار الاغذيه هو احد الاسباب الرئيسيه لهذه الازمه الطاحنه

حذر التقرير ايضا من المضاربه فى اسعار الاغذيه و التى تؤدى حتما الى ارتفاع الاسعار اكتر و اكتر و تؤدى الى

التلاعب بمقدرات الشعوب اللى هيه مش ناقصه اصلا

حذروا كمان الدول الصناعيه الكبرى اللى بدأت التغلب على مشكله ارتفاع اسعار البترول بأنها تنتج وقود حيوى

و ده بيكون عن طريق المحاصيل الزراعيه زى القمح و الذره و ده طبعا ادى الى نقص هذه المحاصيل و ارتفاع

الاسعار و خلى معظم الدول الفقيره مش قادره تشتريها

ايه رأيكم بقى بعد كل ده مش حاسيين ان بطنكم كركبت و لا حاجه انا شخصيا سمعت الكلام ده من 4 ايام

و من ساعتها و انا مصره اكتبه فى بوست

يا جماعه احنا لازم فعلا نرشد استهلاكنا جامد جدا يعنى نقلل استهلاكنا من العيش و الرز و المكرونه

و الحاجات اللى مش مهمه قوى بلاش منها و نحاول نستغنى عنها

انا شخصيا كنت ساعات اسيب عيش كتير بره التلاجه لغايه ما يبوظ بس من ساعه ازمه العيش الواحد بقى يطلع رغيف

اتنين بالكتير و اما يخلصوا نطلع غيرهم و هكذا فى الارز برضه بحاول اعمل شويه على القد بالضبط و يوم بيوم

و حسب الحاجه

و الله اسعار اللحمه اللى ضربت فوق دى احنا السبب فيها مين قال ان الناس مش لاقيه تاكل شوفوا اللحمه بقت

بكام؟ و مع ذلك تلاقى الناس قدام الجزارين طوابير طوابير و لا يوم الحشر و ده اللى يغيظ فعلا

يعنى لو طنشنا الجزارين قد اسبوع كده و اللحمه باظت عندهم حيرخصوا اللحمه زى الجزم و الامور ساعتها حتتظبط

مش حنموت من غير لحمه اسبوع يعنى فيه ناس عايشه من غيرها العمر كله و محصلش لهم حاجه

لازم كمان الحكومه تشجع الفلاحيين على زراعه القمح بمكافآت مجزيه جدا علشان نقدر نوفر شويه بس من دولارات

شرا القمح الهندى و الامريكى و الصينى

تخيلوا الامارات اللى كلها صحرا باعتالنا منحه مش عارفه قد ايه قمح شوفتوا الخيبه اللى بالويبه

يا جماعه الخطر قادم و حقيقى و لازم نحس بيه و نستعد له و نربط الحزام اكتر واكتر

و نتعود على الحرمان بمزاجنا بدل ما يجى الوقت اللى نبقى مجبورين عليه

لازم نحس بغيرنا و نساعدهم و بدل ما تاكل و حدك يا سيدى انت وولادك حط شويه اكل صغيريين فى كيس

و حطهم فى التلاجه و كل اكله اعمل كده و بعد كده اى جيران غلابه ليك و جنبك تقدر تديهم الاكل ده

و الله حتبسطهم قوى و حتحس انك مبسوط اكتر لانك عملت حاجه كويسه و شاركت غيرك فى اكلك

لو كل بيت عمل كده و الله مفيش حد حيبات جعان بعد كده و البركه حتحل علينا

و ساعتها ربنا حيستجيب لدعانا اما نقول

استرها معانا ياااااارب