الخميس، 20 مارس 2008

ياترى مين فيهم؟



ياترى فى رأيكم مين هى الام المثاليه؟


هل هى اللى جوزها مات و رفضت تتجوز بعده و قفلت بابها عليها وربت ولادها لغايه مابقوا اللى مهنس و اللى دكتوره ؟

ولا هى الست اللى كلنا بنشوف زيها قاعده بشويه فجل على الرصيف و تفضل قاعده لغايه اما يخلصوا و بعدين تشترى


الدوا لجوزها المريض اللى كان فواعلى وو قع من على سقاله و من ساعتها راقد و هى اللى بتصرف عليه وعلى العيال


ولا هى الست اللى جوزها عاطل بمزاجه و موراهوش غير الادمان و هى يعينى بتشتغل فى البيوت علشان تصرف عليه


و اول اما ترجع يضربها و ياخد كل اللى معاهاو يروح يشترى بيه السم الهارى اللى بيشربه و لا يشمه


ولا هى زوجه الاب اللى اتجوزها علشان تربى العيال لما امهم ماتت و سابهم امانه لها و هى صانت الامانه و ربتهم


احسن من امهم الاصليه وو صلتهم لبر الامان


و لا هى البنت اللى بتشتغل فى قريه sos و اللى مسئوله عن رعايه و تربيه مجموعه اطفال منهم الرضيع و الاكبر


شويه و اللى يوم ماتغيب يرفضوا ياكلوا لغايه ما تيجى و ميعرفوش غيرها يقولوا له ياماما من حبهم فيها


ولا هى الاخت الكبيره اللى ابوها و امها ماتوا و سابوها و اخوتها الصغار لوحدهم فى الدنيا و هى ربتهم كلهم


و رفضت تتجوز او تعيش حياتها غير لما كلهم اتجوزوا و فرحت بيهم


اعتقد ياجماعه كل دول يستحقوا اللقب الجميل ده و عن جداره و استحقاق بس هما اللى بيحبوا يعملوا فى هدوء


و صمت و انكار ذات



تحيه لكل ام فى عيدها و تحيه لكل اب اضطرته ظروفه ان يحل محل الام


و اثبت جداره و تفوق فى موقعه الجديد


و اقول لهم جميعا كل سنه وانتم طيبين

السبت، 15 مارس 2008

الاشكيف المخيف



امبارح كان الجمعه و زى كل جمعه نزلنا بعد صلاه الجمعه نشترى حاجات
الاسبوع


بعد ما خلصنا مشاويرنا و مروحين مرينا جنب السينما الكباره اللى عندنالقينا فيها

فيلم جديدالا و هوSAW4 و نظرا لادمانى انا وكل اسرتى للافلام الخويفه زى بنتى

بتسميها قصدها المرعبه بسرعه رحت حجزت التذاكر و دخلنا الفيلم

من اول الفيلم مابدأ و حسيت انى عايزه انزل تحت الكرسى من الفزع

يا جماعه ده مش فيلم رعب ده دم لمجرد الدم و اكتشفت ان GRUDGE 1&2

افلام كرتون جنبه الفيلم اوله ناس بتشرح واحد ميت و بيفتحوا بطنه كانهم بيفتحوا فرخه ينضفوها

ويطلعوا مخه يوزنوه و بالصدفه البحته يلاقوه بالع شريط كاسيت و مسجل عليه تعليمات لشخص بالصدفه

برضه يكون هو اللى بيشرحه............شفتوا كل حاجه مدروسه و متظبطه بالمللى

الفيلم مشى لغايه الاخر بنفس الدم و العنف مش الرعبو لقيت ولادى جنبى آخر انسجام

بصراحه اتضايقت من نفسى لانى خليت ولادى يشوفوا العنف ده كله بهذه الصوره المكثفه

واللى دفعت فلوس علشان يشوفوها

و للاسف هى دى الثقافه اللى الغرب بيصر انه يصدرها لنا دائما و اما بيحاول البعض

انه يطبقها بيقولوا عليه همجى و ارهابى و مختل مع انهم اللى معلمينه ده

و للاسف احنا اللى بنرفع الواطى و نخليه فوقنا دايما بانبهارنا به و تقليدنا الاعمى له

دون تفكير


خرجت من السينما عندى صداع و زهق اما ولادى كانوا مستمتعين و بيقارنوه باللى



شافوه قبل كده..........يمكن علشان انا كان اخرى الاشكيف و ابو رجل مسلوخه؟؟؟؟؟؟؟؟؟؟؟؟؟؟

الاثنين، 10 مارس 2008

النبى عربى




الموضوع النهارده قبل ما يمس غيرى بيمسنى انا شخصيا و حاسه بيه جدا وهو تعليم و لادنا فى مدارس اللغات

انا عارفه اهميه اللغه العربيه و ضروره دراستها باهتمام و تركيز و هو الشيء غير المتوفر فى مدارس اللغات


بس فى نفس الوقت المدارس الحكوميه مفيش فيها تركيز لا على العربى ولا غيره مجرد ايام بتتقضى و بالسلامه


و الفصول فاضيه فيها من دلوقت لان المدرسيين غايبيين و كل اهتمامهم بالدروس الخصوصيه


وده طبعا بسبب ضعف الرواتب حتى بعد الكادر اللى صاحبه ارتفاع فظيع فى الاسعار و تلاقى الفصل فيه 60 طالب و محدش عارف حاجه فى اى حاجه


انا ليه جاره بنتها فى مدرسه حكومى بيكتبوا الانجليزى بالعربى علشان يحفظوهشفتوا الخيبه


بالنسبه لمدارس اللغات بقى

فيه اهتمام اكتر و متابعه و متلاقيش مدرس بيضرب طالب ليس خوفا من انه حيرد الضربه ليه و لكن احترام متبادل حتى ولو كان ظاهريا


تلاقى فى يوم لمقابله المدرسه للوقوف على مستوى اولادنا و ممكن المدرسه تشرحلنا ازاى نوصل المعلومه بنفس طريقتها تجنبا للخبطه للطفلطبعا ياجماعه الغالى تمنه فيه


لكن وأأأأأأأأأأه من كلمه لكن ابنى مش بيعرف الارقام بالعربى خالص و ميعرفش يعنى ايه زائد و ناقص


كل ده يعرفه بالانجليزى فقط و اما بيشوف كراسات اخته اللى لسه فى الحضانه بيقعد يسأل دى ايه يقصد الارقام


و لما يروح يشترى حاجه مش بيبقى عارف الباقى كام


كمان فى امهات بتفضل تتكلم طول اليوم مع اولادها بالانجليزى و ناسيين العربى تماما اللى المفروض ان احنا نهتم بى اكتر علشان نعادل تركيز المدرسه على اللغات الاخرى

و احب اقول لهم كلمونا عربى يا جماعه












السبت، 8 مارس 2008

نار نار

من يومين رجع جوزى من الشغل و اثناء الغدا حكالى حكايتين اصعب من بعض

الحكايه الاولى اثناء مشيه فى احد الشوارع فوجىء بواحده ست بتجرى بسرعه جدا و واحد تانى بيجرى وراها و

بيصرخ يا حراميه و فجأه راحت راميه عبوه زيت 3 لتر لورا و بسرعه لفت شمال و اختفت

اتاريها دخلت سوبر ماركت تشترى حاجه و خبيتها بين هدومها لولا احد الزباين نبه الراجل ان الست سرقت الزيت

ما كنش خد باله

الحكايه التانيه اتحكتله فى الشارع ان واحد كان بيجرى ورا حرامى سرق منه حاجه و جرى عارفين ايه هيه

الحاجه؟10 ارغفه عيش تخيلوا الضابط اما مسك الراجل اللى سرق العيش الراجل قاله انا بقالى 3 ايام مش عارف اجيب عيش لولادى

راح الضابط مطلع 2 جنيه تمن العيش و اعطاهم للمجنى عليه و ساب الاتنين يمشوا

الحكايه الاولى السبب الرئيسى فيها الاسعار اللى نطت نطه كبيره قوى و محدش قادر يقف قصادها و بقت عامله

زى القطر فى سرع تحركها و الناس للاسف بقت واقفه عاجزه مش عارفه تعمل ايه

و الحكايه التانيه طبقا بسبب طابور العيش اللى بقترح يعملوا نقابه للى واقفين فيه علشان تديهم معاش فى حاله

العجز او الاصابه



السبت، 1 مارس 2008

تعاطفا مع غزه

اقروا لهم الفاتحه

مفيش فايده

النهارده يا جماعه حتكلم عن موضوع غايظنى و اكيد غايظ ناس كتير زيى الا وهو موضوع العيش او بالنحوى الخبز
من زمان وإحنا جنب بيتنا مخبز عيش بلدى من العادى ابو شلن و بالرغم من وجود ريحه غريبه و طعم اغرب الا
انه كان بيخلص من الساعه10 صباحا ازاى مش عارفه و تمر ايام و سنين و مع ظهور موضه العيش السياحى
يتم افتتاح واحد جنبنا وكان الرغيف فيه ماشاء الله خمسه و خميسه فى عين الحسود قااااااااااااااااااااااد الطبق
لاولونه من جوه ابيااااااااااااااااض و ريحته تحفه وزى مابيقولوا يتاكل حاف والناس فرحت بيه و على الرغم
انه ب10 ساغ بس الناس كانت بتشتريه على اساس انه بيتاكل كله ومش بيترمى زى التانى
و فجأه اثناء هوجه ان الدعم حيتلغى و مش عارف حيروح فين تحول شكل الرغيف بتاعنا و بقى ياعين امه
مسخره اتسحل وبقى قد كحكه العيد المسكوعه ناس قالوا خلطوا عليه ذره شامى فجربت اديه للفراخ مرضيوش يكلوه
ناس قالو حطوله حديد علشان الانيميا اللى عند الناس ياعم عالجوه هوه الاول قصدى الرغيف طبعا
و مع ذلك قربته من المغناطيس مالذقش فيه المهم اتوكس و خلاص و مبقاش بيشبع حد الا الصديقه سوسو جارتنا
الجديده الصينيه لانها small sizeو ان كنت اعتقد انها بتخطط تنزل لنا عيش صينى قريبا فى الاسواق
ماركه...........كيتوهيشو