الخميس، 20 مارس، 2008

ياترى مين فيهم؟



ياترى فى رأيكم مين هى الام المثاليه؟


هل هى اللى جوزها مات و رفضت تتجوز بعده و قفلت بابها عليها وربت ولادها لغايه مابقوا اللى مهنس و اللى دكتوره ؟

ولا هى الست اللى كلنا بنشوف زيها قاعده بشويه فجل على الرصيف و تفضل قاعده لغايه اما يخلصوا و بعدين تشترى


الدوا لجوزها المريض اللى كان فواعلى وو قع من على سقاله و من ساعتها راقد و هى اللى بتصرف عليه وعلى العيال


ولا هى الست اللى جوزها عاطل بمزاجه و موراهوش غير الادمان و هى يعينى بتشتغل فى البيوت علشان تصرف عليه


و اول اما ترجع يضربها و ياخد كل اللى معاهاو يروح يشترى بيه السم الهارى اللى بيشربه و لا يشمه


ولا هى زوجه الاب اللى اتجوزها علشان تربى العيال لما امهم ماتت و سابهم امانه لها و هى صانت الامانه و ربتهم


احسن من امهم الاصليه وو صلتهم لبر الامان


و لا هى البنت اللى بتشتغل فى قريه sos و اللى مسئوله عن رعايه و تربيه مجموعه اطفال منهم الرضيع و الاكبر


شويه و اللى يوم ماتغيب يرفضوا ياكلوا لغايه ما تيجى و ميعرفوش غيرها يقولوا له ياماما من حبهم فيها


ولا هى الاخت الكبيره اللى ابوها و امها ماتوا و سابوها و اخوتها الصغار لوحدهم فى الدنيا و هى ربتهم كلهم


و رفضت تتجوز او تعيش حياتها غير لما كلهم اتجوزوا و فرحت بيهم


اعتقد ياجماعه كل دول يستحقوا اللقب الجميل ده و عن جداره و استحقاق بس هما اللى بيحبوا يعملوا فى هدوء


و صمت و انكار ذات



تحيه لكل ام فى عيدها و تحيه لكل اب اضطرته ظروفه ان يحل محل الام


و اثبت جداره و تفوق فى موقعه الجديد


و اقول لهم جميعا كل سنه وانتم طيبين

هناك 20 تعليقًا:

Anonymous يقول...

ياستى كل سنه وكل أم طيبه بس هناك ايضا ابا يستحقوا الشكر
أشرف

Anonymous يقول...

كل سنه وانتم طيبين-
لو سمحت بدل عيد الاسه عاوزين عيد الاب
سيف

NOur يقول...

طبعا كل دول ( الأم المثالية ) و بجد اى ناس بتتعب أوى و بتضحى و احنا مش بنبأة شايفينهم و لما بنشوفهم بنقول يااااه .. فى كدة ..
تحية ليهم و لأمى و لأمك و لكل أم و ربنا يسعد ايامنا جميعا

محاولة لكسر الصمت يقول...

كل سنة وكل أم وأب طيبين يا رب.....بس انا هجاوبك على السؤال ......مين فيهم المثالية.ولأنك جاوبتي وقلتي كلهم يستحقوا الاحترام.فأنا ليه رأي تاني.مع احترامي لكل الناس دي..لكن الأم المثالية بجد(وفي الأوضاع العادية) هية اللي تقدر تبني اسرة صح..وتربي ولادها تربة سليمة وتخرج للدنيا وللوطن شباب يبنوا بجد..الأم المثالية هي اللي تقدر تربي بن الخطاب وبن الوليد وصلاح الدين..
لكن لو هنتكلم على الظروف الاستثنائية ففي أم أحب أضيفها(ويا ريت تقبليها في موضوعك الجميل)..الأم اللي وهبت أولادها لربنا وزغردت لما قالولها ان ابنها مات شهيد عشان يرجع حريته وبلده المسلوب......

صيدلانيه طالعه نازله يقول...

الى دواير:كنت حاكتب عنها والله بس انا كنت بكتب عن مصر اكتر

امواج يقول...

انا جوبت على اسألتك دى ياصيدلانيه فى مدونتى

قولت ان كل ابن وبنت شيفه امها ام مثاليه
وجهة نظر كل ابن فى امه
( طبعا فيه شواذ عن القاعده )
الكل عنده امه اما مثاليه
وانا امى اعظم ام مثاليه


دى الحقيقه

الام فى كل الاحوال
ال بتشقى وتتعبت وتنزل تشتغل عشان تربى اولدها ويخدو شهدات
ام مثاليه

الزوجها مات وحتى ولو ظروفها الماديه كويسه لكن شالت مسؤليه اسره كامله ونجحت فى تربيتهم ووصلو لاعلى المناصب
ام مثاليه

ام الشهيد ام مثاليه
وام البطل ام مثاليه


ياااااااااااااااااااااااااه
كتير قوى امهات مثاليات ربنا حط الرحمه والحنان جوه قلوبهم



وانا شيفه امى اعظم ام مثاليه

واحدة مفروسة يقول...

انا مع دواير فى رايها
الام المثالية هى التى تزرع المثالية فى اولادها... هى اللى تعرف تخلى ولادها يتعايشوا فى المجتمع دو ان تؤثر عليه السلبيات.....و كل سنةو كل ام طيبة .. و كل سنة و انتى طيبة ..و كل سنة و امى طيبة و بخير و بسلام....

Foxology يقول...

كل سنة وكل ام طيبة وبخير :)

الدنيا مليانة امثلة لكن الأختيار صعب

تحياتى :)

Desert cat يقول...

فعلا يا دكتورة زى ما ذكرتى هما كل اللى قولتيهم فى البوست ويستحقوا احلى تكريم
كل سنة وكل ام بالف خير
تحياتى

صيدلانيه طالعه نازله يقول...

الى غير المعرفين: عيد الاب موجود يا جماعه
يوم 13 يناير صحيح كنت اول مره اسمع عنه بس موجود
"""""""""""""""""""""""""""""""""""
الى نور:اعتقد ان الحنان و العطاء فى صمت ده حال معظم الامهات و الدنيا مليانه نماذج تضحيات كتير
شكرا لاهتمامك
""""""""""""""""""""""""""""""""""
الى موجتى الحبيبه :اوعى تعلى و تغرقينا
فعلا كل واحد امه عنده احسن ام
وكل ام بتضحى بطريقتها و حسب الظروف
اللى بتخليها تضحى
سلامى الى والدتك و لكى ايضا
"""""""""""""""""""""""""""""""""
الى واحده مفروسه:فععلا المثاليه انى اخرج جيل يتعامل بمثاليه و يتفاعل
مع المجتمع و يقدر يكون عضو منتج و فعال بس هل المثاليه بقت تنفع فى هذا الزمان هذا هو السؤال
""""""""""""""""""""""""""""""
foxology:فعلا الدنيا مليانه و اللى يعيش ياما يشوف
شكرا لاهتمامك و نورتنى
""""""""""""""""""""""""""""""""""
desertcat:التكريم اقل حاجه ممكن تتعمل لكل الامهات مش للامثله دى بس
نورتينى
"""""""""""""""""""""""""""""

Appy يقول...

والله عندك حق والست اللى تربى اولادها كويس ويطلعوا محترمين وناجحين فى مجتمعنا تستحق اللقب برضه
تسلم ايدكى على الكلام الحلو ده
وفى النهايه اعتقد ان امهات زمان اكتر امهات مثاليات

wael يقول...

الام المثاليه هي الام اللي مهما الظروف اتغيرت هي ثابته وبتحقق هدفها
ده رأيي الشخصي

داليا محمد يقول...

كل عام وكل ام بألف خير
كلام جميييييييل اوى وياريت كل ابن وابنه يقدروا اللى بيعملوه عشانا
شكرا

الجواز و سنينه يقول...

كل دول امهات و اكتر منهم كمان موجودين
و ده بيفكرنى بحديت قدسى ما معناه ان لما الام بتموت بينادى منادى فى السماء يقول له يا ابن ادم ماتت التى كنا نكرمك من اجلها فاعمل عملا نكرمك من اجله
بوست جميل زيك يا قمر

د.أحمد عثمان يقول...

كل أم تحمل لقب أم تستحق أن تكون أم مثالية
المهم أن تكون أما
لأن هناك أمهات
لا يعلمون من الامومة سوى المخاض
(ان لم تلد قيصريا)
كل سنة و كل أم طيبة
و أولهم طبعا أمي
هي الام المثالية بعيني


موضوعك جميل
تسلم ايدك

موناليزا يقول...

معك كل الحق اى امرأة تراعى الله فى معاملة الاطفال سواء كانوا ولادها او لا تستحق هذا اللقب
خالص تحياتى

Anonymous يقول...

برافو عليك . بس انت جيتي على الجرح و هو يعني لازم الأم تضحي بروحها عشان تربي عيالها وإلا ما تبقاش مثالية....
ليه ما تكونش واحدة متعلمة مثقفة و متفوقة في شغلها و في نفس الوقت ربت عيالها كويس وخليتهم أفراد صالحين في المجتمع....عايزين نرتفع بالناس و ما يبقاش الثالي دايما هو الضعيف اللي جه على نفسه عشان غيره....لأن اللي بيتنازل عن حقه لما ييجي يطالب بحقه الناس بتلومه و تعتبره متمرد أو عايز يعيش حياته و بتقولهاله كأنها جريمة.
ولا ايه رأيكم.... أرملة شابة

FaceMoon يقول...

كل ست ضحت تستاهل انها تبقى الام المثالية ومش لازم يكون فى تضحية كل ام انجبت ولادها وحافظت عليهم وطلعتهم كويسين فى الظروف المنيلة اللى احنا فيها دى يبقى تستاهل تعظيم سلام ومتهيألى مش الام بس اللى يتعملها عيد الاب برضة والاخوات الاسرة كلها تستاهل بس الأم زيادة شوية لان الام هيا اللى بتعمل المجتمع كلة

نهر الحب يقول...

الام المثالية هى الام اللى طلعت ابناء كويسين فى حق دينم ونفسهم وبلدهم

هى اللى طلعت ناس بتعرف معنى ادب واصول
فى امثلة كتير جدا للام المثالية
اللى زوجها هرب وتركها تربى ابنائها
واللى زوجها معاها وما يعرف عنهم الا اسمائهم
واللى ضحت بسعادتها
او بعملها
او براحتها
كلهم

وكل سنة وامهاتنا طيبة


تحياتى

صيدلانيه طالعه نازله يقول...

الىappy:فعلا الام اللى تربى اولادها كويس
وسط كل مسببات الفساد تبقى المراه الخارقه مش المثاليه
تحياتى لكى
"""""""""""""""""""""""""""""""""ط
الى وائل :لو على الظروف يبقى كلنا امهات مثاليات فعلا
شكرا لاهتمامك
"""""""""""""""""""""""""""""""""
الى داليا:انا دايما اقول لولادى نفس الكلام لو تعرفوا اللى بنعمله عشانكم
تشيلونا فوق راسكم
""""""""""""""""""""""""""""""""""
الى الجواز و سنينه:ربنا و الاسلام كرموا المرأه اعظم تكريم اكثر من اى دين آخر لاننا دين راقى
و ربنا يهدى الكل و كل سنه و انتى طيبه
"""""""""""""""""""""""""""""ط
الى وجه جديد:كل ام فى نظر ولادها ام مثاليه لانها تكيفت مع الظروف المحيطه
بهم و خرجتهم لبر الامان
""""""""""""""""""""""""""""""""""
الى Monaliza:اهم حاجه فى الام انها تكون متدينه و تراعى ربنا فى ولادهاو جوزها
تحياتى
"""""""""""""""""""""""""""""
الى غير معرفه:احب اقولك ان كل انسان ليه حقوق وواجبات ومن حقوقه انه يشتغل و يتفوق و يثبت نفسه و يبقى جذر صلب متعمقفى ارضه علشان يقدر يتحمل الصدمات و انا عارفه انك قويه جدا و تقدرى تتحدى اى عقبه و تقهريها و عارفه انك كمان قايمه بواجبك على اكمل وجه تجاه عائلتك الصغيره
انا لما كتبت كان قصدى الفئه المهمشه الضعيفه اللى رزقها يوم بيوم و مع ذلك ربت ولادها و نجحتهم
شدى حيلك و ربنا يقويكى على اكمال رسالتك
"""""""""""""""""""""""""""""""""""
الى وجه القمر:فعلا ظروف البلد بكت لوحدها تحدى امام كل ام و اب دلوقت
ربنا يساعدنا و يقدرنا على ما بلانا
""""""""""""""""""""""""""""""
الى نهر الحب:انا اتفق معاكى فى هذا التعريف و ازيد انها اللى قدرت تخلى و ولادها متكيفين مع و اقعهم و راضيين بحالهم
اول تعليق لكى هنا و ياريت تستمرى
""""""""""""""""""""""""""""""""