الجمعة، 30 أبريل 2010

صحبه ورد



انا النهارده مبسوطه قوى  عارفين ليه؟؟؟

عشان كنت مع احلى صحبه ورد

مش حقول مع احلى ناس انتوا فعلا ورد 

وورد بلدى بريحه حلوه قوى

انا كنت معاكم يا احلى ناس عرفتهم فى حياتى

كنت مع الناس اللى دخلت  عالمهم من سنتين

و بحمد ربنا انى عرفتهم سواء فى البلوجات او فى الحقيقه

انا النهارده كنت فى لقاء الخير 

لقاء البؤجه اللى اول مره بحضره السنه دى

و بفتخر انى حضرته و شاركت فيه كمان

لو حتكلم عن الورد قصدى المدونين

لازم ابدأ الكلام بكبير القعده و اللى مقعدش لحظه واحده على حيله

خالد همس الاحباب

مش حتكلم عن ذوقه و ادبه و طيبته اللى مش محل نقاش هنا خالص

انا بس حتكلم عن تفانيه فى عمل الخير

و تعبه فى شيل البؤج الكتيره و الكبيره اللى الناس كانت بعتاها

و اهتمامه بينا و بمضايفتنا رغم كل االلى وراه

و الورده التانيه النهارده طبعا

فاتيما

اللى مبقتش بعرف اوصفها

مش محتاجه وصف مش كده 

هيا فوق الوصف و الله

عامله زى الام اللى ولادها بيجوا يزوروها و بوجودها البيت 

بيبقى مفتوح دايما

و مش حقول غير انها عندها قدره غريبه فى توزيع الاهتمام على 

كل البشر اللى بتبقى موجوده حواليها

من غير ما تهمل حد منهم

و عايزه اشكرها كمان على المعلومات الجميله

 اللى عرفتها عن القطط و  تربيتها النهارده

مشكرين يا حاجه و دايما كده مستفيدين منك

الورده التالته النهارده طبعا 

داليا قوس قزح

اللى على الرغم من انها مقعدتش غير دقايق

 بس كانوا ليهم طعم و لون مميزين بضحكتها الحلوه و حضنها الدافى

الورده الرابعه النهارده 

ام بتول

اللى ابسطت النهارده انى اتكلمت معاها 

و اعتقد اننا بقينا اصحاب لان ده شيىء يشرفنى جدا و الله

و اللى كان معاها بتول بنتها الرقيقه الهاديه قوى

ربنا يوفقك يا قمر فى امتحان السبت اللى بعد الجاى

الورده الخامسه

كيااااااااااااااااااااارا

بنوتى القموره اللى كل يوم بتزيد غلاوه عندى

انتى النهارده كنتى عامله طعم للقعده بضحكتك الحلوه

و خفه دمك الشقيه و المثاثات اللى هرتينا بيها

بحبك يا بنوووووووته

الورده السادسه

ميراااااااااااااااااااااا

الشعنونه اللى مبطلتش رغى من ساعه ما وصلت

و اللى ضحكت عليا و قالتلى مش جايه و هيا كانت فى المترو و جايه فى الطريق

و طبعا لازما و لابد اسيحلك و اقول انك كبيتى القهوه عليا

و كنتى ناويه تكملى و تحمينى بالكركديه

بس ربنا ستر

انتى سكره يا مرموره مهما حاولتى تعملى فيها حد جد

و انا كمان بحبك قوى

ربنا يجمعننا دايما على خير

الورده السابعه و التامنه

وليد كنج توت و مراته السكره بوبو

اللى طلعت بلدياتى و حبيبتى و كفاءه

هيا و ابنها الشقاوه عمر

مش حنسى ابدا تعبكم معانا النهارده و انكم وصلتونا معاكم للنادى

و مش حنسى رغيى مع بوبو السكر اللى مبسوطه قوى انى اتعرفت عليها النهارده

بس للاسف نسيت اخد تليفونها عشان نبقى ننقى رز فى اوقات الفراغ

الورده التاسعه

شريف باشا 

 متكلمناش كتير بس باين قوى انك حد راقى و ذوق

و ان كان ده برضه  باين من تعليقاتك و كتاباتك المميزه

ربنا يكرمك دايما

الورده العاشره

مصطفى ريان

شاب ثائر اللى مبطلش خناق مع ميرا من اول ما وصل

ههههههههههههههههههههههههه

انت طيب قوى يا مصطفى و ربنا دايما يفوقك لانك حد يستاهل النجاح

الورده الحداشر

ابوحميد 

مهما قلت مش هكفيك كلام

كفايه تعبك و اهتمامك و توصيلنا من النادى لغايه العربيه

من كلامنا النهارده بان ان حضرتك حد ذوق و مثقف

ربنا يوفقك دايما و يخليك لاسرتك وولادك

الورده الاتناشر

لريييييييييييييم 

اللى كانت اكتشافى النهارده

رغم اننا تقريبا بنتكلم كل يوم الا انى اما شوفتك

حسيت انك رقيقه قوى و ضحكتك حلووووووووووه قوى

كلك على بعضك بجد حلوه

انا مبسوطه قوى انى شوفتك النهارده

و ان شاء الله تتكرر كتير بعد كده

الورده الثالثه عشر

لمنووووووووووونه 

 حبيبتى

اللى كافحت النهارده عشان تشوفنى 

صحيح جت قبل ما امشى بربع ساعه

بس بجد كانوا احلى ربع ساعه

البنوته دى طيبه قوى يا جدعان

و حنينه و صوتها حلوووووووووو قوى و جميل كده

و شكلها فى الحقيقه احلى بكتيييييييييييييير من الصور

بحبك يا منووووووووووووووونه و ربنا يكرمك يا قمر

و اشوفك عروسه منوره بيتك قريب جدااااااااااا

مش حنسى طبعا 

وليد الدوغرى هيا و ظروفها

ملحقتش اتكلم معاه كتير بس برضه ليه ورده كبيره

عشان جه و كمان عشان عريس و لسه خاطب جديد

مبروك يا عم و ياريت تبقى تعزمنا على الفرح

شفتوا بقى الورد كان كتيييييييييير ازاى

انتوا احلى و الله كمان من الورد

ربنا يخليكم دايما سباقين فى الخير

و مبسوطين فى حياتكم لان اللى بيزرع خير اكيد حيلاقى خير


بحبكم يا احلى ناس






الأربعاء، 28 أبريل 2010

انا جايه يا بشر

من منطلق انى نفسى اشوفكم و اتعرف عليكم

من منطلق ان اللى شفتهم قبل كده وحشونى جدا

اعلن من مكانى هذا انى جايه لقاء بؤجه الخير يوم الجمعه

و ربنا يمنع الموانع و اقدر اشوفكم كلكم




ندااااااااااااء هاااااااااااااااام


الى دكتوره ستيته

حبيتى و قريبتى

نفسى اشوفك قوى و معنديش

غير يوم واحد

يارب تقدرى تيجى و اشوفك

عشااااااااان خاطرى انا

الاثنين، 26 أبريل 2010

امووووووووووووت و اعرف








يوم الخميس اللى فات كان من الايام القليله

اللى جوزى قعد فيها فى الصيدليه معايا

دخلت واحده ست عايزه كريم فرد شعر
 اشترته و مشيت

ساعه كده و جت بتورينى الكريم نتيجته ايه فى شعرها

المهم جوزى قاعد و هيا المفروض محجبه و هيا مصره تفك الايشارب

و تورينى نتيجه الكريم

و انه نشف شعرها شويه و حاسه بملمس غريب فى الشعر

المهم انا لميت الدور معاها و قلتلها الكريم فى الاول بيعمل كده

و بعد كده عادى بيبقى كويس




راحت قالتلى انا عايزه حمام كريم للشعر و كريم تستعمله لشعرها

برضه اشترت و مشيت

شويه جت هيا و اختها و بتقولى الكريم بتاع الفرد بايظ و بوظلى شعرى

اكيد ده منتهى الصلاحيه

و حمام الكريم ملمسه غريب و عايزه  ارجعه

طبعا انا العرق الصعيدى اللى فى دماغى ضرب

و اتعصبت عليها لان تواريخ الصلاحيه للعلب كويسه جدا

لا و الهانم تقولى هاتى العلب الفاضيه عشاناعرف اشتكيكم بيها

قلتلها بينى و بينك تواريخ الصلاحيه بس لا اكثر و لا اقل

المهم هيا اتعصبت و انا اتعصبت

لقيت جوزى قام و دخل فى النص

و اهدى يا دكتوره مش كده و انا مصره ازعق

راح مزعق فيا و قاللى كفايه بقى

طبعا انا كرامتى وجعتنى قوى و رحت سايباهم و طلعت فوق



طبعا انا سيبتهم يتكلموا و يكملوا خناق

و بعد شويه لقيتهم بيرنوا عليا و لقيت

الست بتعتذرلى فى التليفون و هيا فى غايه الاحراج

طبعا انا انبسطت انها عرفت غلطها و اتأسفت



بس بصراحه بينى و بينكم حاموت و اعرف

هما اتكلموا فى ايه و انا مش موجوده

مش غيره و الله هو بس فضووووووول

و حتى لو كانت غيره حقى و لا مش حقى؟؟؟


الجمعة، 23 أبريل 2010

حبيبتى من ضفايرها طل القمر








انا بحب عمار الشريعى قوى


و بحب كل الحانه و اغنياته

خصوصا اللى بيشارك فيها بصوته

كمان كل اغنيات فرقه الاصدقاء

بصراحه كلها احلى من بعض

متعرفوش اذا كانت اغنيات عاطفيه

و لا وطنيه و لا ايه بالضبط

كل حد بيسمعها بمفهوم غير التانى

زى اغنيات منير تماما

كمان الاغنيات اللى جت فى افلام

الرائع الراحل عاطف الطيب

اللى لسه لغايه دلوقتى محدش

قدر يملا مكانه

النهارده انا اخترتلكم الاغنيه دى

لانى بموووووووت فيها

و خصوصا ان بعد بكره عيد تحرير سينا

كل سنه و احنا مصريين

كل سنه و احنا حاسين ببعضنا

و قلوبنا على بعضنا

كل سنه و احنا بنخاف عليها

كل سنه و هيا ضامانا لحضنها


و يارب السنه الجايه تبقى فووووووووووووووق

قولوا معايا

آميييييييييييييييين

الثلاثاء، 20 أبريل 2010

حاحب نفسى



حبى نفسك شويه يا علا و كفايه اهمال ليها

هيا تستاهل انك تحبيها شويه اكتر



الكلام ده سمعته اليومين اللى فاتوا كتير

اصل انا بقى مشكلتى انى باهتم باللى حواليا قوى

و اما يكون حد من اصحابى فى مشكله

سواء كان من القريبين قوى او البعاد شويه

تلاقونى فضلت افكر فى المشكله دى و اسبابها

و ازاى ممكن اساعد فى حلها

الموضوع ده بيجى على اعصابى قوى

و خصوصا لو مقدرتش اوصل مع صاحب المشكله لحل

ساعتها باحس بالعجز و الفشل و انى متضايقه و مخنوقه

بس لو ربنا وفقنى لحل ببقى فى حاله غير الحاله

ببقى مبسوطه و فرحانه و طايره



المصيبه بقى اما تساعد حد فى حل مشكلته

و تتعب معاه لغايه ما تحلوها

و فى الاخر تلاقيه هو نفسه مش حاسس انه فى مشكله 

قد ما انت حاسس عشانه

و تلاقيه بيكرر نفس الغلط بنفس الخطوات

بنفس الطريقه  لا و ايه عاااااااااادى جدا

و لا كأنه بيغلط

ساعتها بقى باحس بالغيظ و انى ضيعت وقتى مع حد

ميستاهلش المساعده و لا العون


بيتعبنى كمان ان فيه صنف من البشر

اول ما تخلص حاجته ليك و احتياجه ليك

يقلبك و يطنشك و لا كأنه يعرفك

من الاخر ميعرفنيش غير عشان مصلحته

بس برضه عشان مبقاش ظالمه

فين ناس بمجرد انك تفكر فيهم 

و تهتم بيهم و تحاول تساعدهم

بيشيلوهالك جميله 

و يحاولوا يردوا جميلك فى اى مناسبه

سعيده كانت او حزينه

سعيده كانت او حزينه


انا بقى تعبت فعلا و بجد

و حاحاول اهتم بنفسى شويه اكتر

و احبها اكتر

و حاحاول احب نفسى شوي
زى ما قالولى بس مش معنى كده انى حابقى انانيه

لا انا بس حاهتم بنفسى شويه اكتر من اهتمامى بيكم

حاهتم انى اريح اعصابى و ابعد عن اى توتر

انا و الله بحبكم كلكم 

بس فعلا علا محتاجه منى شويه حب اكتر

الأحد، 18 أبريل 2010

يا براكينك يا ايسلندا






كلنا طبعا سمعنا و شفنا موضوع بركان ايسلندا

و عرفنا موضوع الرماد اللى ملا الجو هناك 

و عطل حركه الملاحه الجويه من العالم كله لبريطانيا و العكس

و اللى اضطر انجيلا ميركل مستشاره المانيا للهبوط بالطياره بتاعتها 

فى البرتغال و اكمال الرحله لالمانيا بالقطار لنفس السبب



الموضوع ده اما فكرت فيه حسيت انه حيبقى ليه تأثير بيئى حيمتد 

اثره و يوصلنا ان اجلا او عاجلا

دلوقتى البركان ده مكانه فى وسط التلج اللى فى القطب الشمالى

طيب اما درجه حراره الارض اللى تحت التلج دى حترتفع 

نتيجه انفجار البركان

التلج طبعا حينصهر و بدرجه كبيره و بمعدل سريع

طبعا ده حيؤدى الى ارتفاع منسوب المياه فى المحيطات

و البحار ..............جميل

و طبعا ده حيؤدى الى ارتفاع معدل النحر فى الاراضى المطله على البحار و المحيطات 

دى

و بالتالى نقص الرقعه الارضيه فى العالم

و اللى المفروض كان ليها معدل ثابت و مدروس وفقا لاحصائيات

و دراسات قديمه بس بالنظر اللى حاصل دلوقتى المعدل حيبقى اسرع


و طبعا عندنا فى مصر حنتضرر من الموضوع ده جامد جدا

فى اسكندريه و منطقه الدلتا اللى هما من الاول مصدر القلق المصرى 

من ظاهره النحر فى الكام سنه اللى فاتت


انا كل كلامى اللى كتبته ده نتيجه تفكيرى الخاص و البسيط

معرفش اذا كان صح و لا غلط

و لو حد عنده معلومات عكس كلامى يتفضل يقولها

او يضيف حاجه تؤيد كلامى

اهلا و سهلا بيه

السبت، 17 أبريل 2010

انا عايزه اعيش فى كوكب تانى+ تحديييييييييييث




تحديث تانى


البقاء لله

سكره جدتها اتوفت امبارح يا جماعه


و سبحان من له الدوام








تحديث هام قوى جدا خالص




مبرووك يا ميرا (وووومن )   مبروك كمان يا توفى افتتاح المدونه الجديده 


يارب تكون فاتحه خير عليكم كلكم ان شاء الله










مجتش على حد منكم لحظه حس فيها انه مخنوق



و مش عايز يبقى وسط الناس و عايز يبقى لوحده



اكيد عدت علينا كلنا 



انا المود بتاعى دلوقتى هو مود اغنيه كوكب تانى لمدحت صالح

نفسى فعلا اروح اعيش فى مكان بعيد عن اى حد و اى حاجه

يا اما الدنيا اللى حواليا ربنا يكرمها و تتغير للاحسن

محدش بيحب يعيش وحده

بس ساعات الظروف بتحكم

و نفسيه الانسان بتقفل

و تبقى مش متقبله اى حد

للاسف انا كده دلوقتى

بس تفتكروا الكوكب التانى حيبقى احسن؟؟؟




الأربعاء، 14 أبريل 2010

كيف تجد محفظتك الضائعه؟+تحديييييييث




تحديث


طبعا ملحقتوش ترتاحوا منى

انا الحمد لله رجعت تانى و ربنا يمنع الموانع و منبعدش

بس اليوم الا كام ساعه اللى فاتوا عرفونى قيمه ناس كتير مكنتش اعرفهم قوى قبل كده

و اولهم و على راسهم منونه درويش القمر

اللى سهرت تلم البوستات بتاعتى من النت و عملتى مدونه تانيه كامله هيا و ساره القمر

ربنا يخليكى ليا يا منى و يا ساره و ميحرمنيش منكم ابدا

بشكر كمان واندا و فاتيما و ريم القمر ام الرقه و الذوق كلهم

كمان بشكر زهراء الاسكندرانيه الجدعه اللى بحبها و باموت فيها

كمان البت كيارا بنوتى القموره اللى باحس فعلا انها بنتى

مع انها هيا الاكبر منى و بكتييييييير

احم احم


اسيبكم بقى مع البوست






يا مدام...........يا استاذ......................يا انسه

لو حد منكم لا قدر الله يعنى الشر بره و بعيد محفظته اتنشلت منه

حيعمل ايه؟؟؟؟؟؟؟؟؟؟؟؟


حد لمض يطلع و يقوللى و دى عاوزه نباهه يعنى

طبعا حيروح القسم يبلغ عنها و يعيطلهم شويه

و يعمل محضر رسمى بالمحتويات

و مووووووووووووووت يا حمار اذا لقيوها

و ادى دقنى لو شافها تانى


انا بقى بقولك يا سى لمض



نوووووووووووووووو........غلط

و لو عايز تتأكد اسمع منى الحكايه دى

واحد صاحب جوزى محفظته او الشنطه الصغيره اللى بيمسكها فى ايده اتسرقت

و هو فى محطه البنزين

طبعا راح القسم يقولهم انه معاه الرقم المتسلسل بتاع الموبايل

و ممكن يعملوا تتبع يشوفوه فين


الظابط اتعدل و بصله بقرف و قاله

فاكر نفسك هشام طلعت مصطفى حضرتك

عشان نعملك تتبع لموبايلك

اجرى يا شاطر العب بعيد



و عمااااااااااار يا شرطه بلدنا


ناس نصحوا الراجل انه يستعين بالقيادات الكبيره اللى بتسرح النشالين

هههههههههههههههههههههههههههههه

اصل الشنطه كان فيها فلوس وورق مهم و كارنيهات و موبايل

وصل للناس دول و دوروا معاه و لم يتوصلوا لحد فى منطقتهم اخدها


لغايه ما ربنا ساق فى طريقه واحد صاحبه

قاله روح اسأل فى مكتب البريد

الراجل بص ليه بصه هبله كدهنظام ماله العبيط ده


الراجل قاله متستغربش الحراميه بعد ما بياخدوا

اللى عايزينه من المحافظ المسروقه بيرموها فى صندوق البريد

الراجل مكدبش خبر و راح فعلا مكتب البريد

لقى الاف المحافظ موجوده و مش لاقيين اصحابها

فضل يدور معاهم لغايه مالقى محفظته

طبعا من غير فلوس و لا موبايل

و دفعوه رسوم على الكارنيهات اللى فيها

طبعا بالمقارنه بتعب انه يطلع كارنيهات بدالها

اى فلوس لا تذكر

اظن بقى اى حد منكم محفظته اتسرقت قبل كده عرف حيعمل ايه و يروح فين



اظن عدانى العيب و قزح

و محرمتكمش من حاجه خاااااااااالص

اتصبحوا بالخير