الاثنين، 25 فبراير 2008

الصديقه سوسو

اثناء قيامى بأرذل واجباتى المنزليه الا و هى نشر الغسيل اخترقت اذنى اصوات غريبه و مدافع كلاميه مش فاهمه منها و لا كلمه و نقاش حاد بللاوندى وبضرب بعينى كده لاكتشف ان الصينيين وصلوا بسلامه الله و احتلوا البيت اللى جنبنا

باليل لقيت سيف ابنى السوسه طالع يقوللى بابا بيكلم واحده حلوه تحت ولسه حانزل اشوف مين دى لقيته بيرن عليًه وبيقوللى كلمى و لقيتها واحده من المحتلين الجدد و ابتسمت لها ابتسامه الضرايرو بدأنا رحله الطلبات
اول حاجه طلبت منى اكتب لها عنوان بيتها فى عشر ورقات لاصحابها علشان يوروها لسواق التاكسى علشان يوصلهم لان العربى بتاعهم ضعيف و الانجليزى موصلش عندهم لسهوبعد ذلك قالت لى شكرا و مشيت.
شويه لقيتها جايه مع واحده صديقه زى هى مابتقول و قالت الانبوبه بتعمل فسسسسسسسس و بعد نقاش طويييييييل اتفقنا انها تشترى منظم جديد وطبعا كان الطلب الجديد انى اكتب لها ورقه بعنوان المحل وسالتنى التاكسى ياخد كام و يبدو من السؤال ان ليها ذكريات سوده مع التاكسيات وشيوا بعد ما سابوا عندى حاجات كانوا شارينها
بعد شويه دخلت صديقه اخرى منهم عايزه تشترى حاجات من الصيدليه و فضلت تقارن الاسعارو اما لقيت ان العبوات الكبيره اوفر اشترتها
وشاورت على ورق التواليت "دى كام"رديت 1,75 بصت لى و ظهرت السواسه هو 1,5 بس و حاخد 6 يعنى يكون ارخص عشان كتير ابتسمت ابتسامه صفرا و سكت اهى برضه ضيفه و دفعت الحساب و باى باى
و سالت الصديقه بعد ما رجعت بالمنظم انتى بتشتغلى ايه قالتلى لسه قال يعنى من كتر الشغل فى بلدنا
و كانوا معجبين جدا بشادن بنتى وكل مايجوا يدوها شيكولاته اصلها فيها ملامح منهم و بصراحه كل ما يدخلوا عندى و الناس تشوفهم يجوا يشتروا اى حاجه علشان يتفرجوا عليهم و يسألونى بتتفاهمى معاهم ازاى و بفكر اجيب واحده منهم تشتغل عندى و نلم بيها الزباين بدل الركود اللى احنا فيه و اهى التجاره شطاره و لتكن
الصديقه سوسو

الخميس، 21 فبراير 2008

و ضاع العمر يا ولدى

الواحد بعد ماعينيه عميت من المذاكره 5 سنين وبقاله 10 سنين متخرج اكتشف انه

معملش حاجه فى دنيته خالص و بقيت بقول فى سرى يا ريتنى فشلت

فى دراستى و بقيت لاعب كوره اهم الناس كلها نسيت مشاكلها و قرفها و فضلت فرحانه

معاهم وليهم و شالتهم فوق دماغها و ادوهم ملايين داخليا و خارجيا و مع ذلك عند اول

محطه بداوا ينطوا من القطر و اولهم حامى العرين الحضرى

بعد ماتش الكاميرون التانى الحضرى كان بيرقص و بيطلع لسانه ومعرفتش ساعتها

\لمين اتاريه بيطلعه لينا احنا و احنا بهبلنا مصدقين حكايه اسم مصر و الانتماء و ا

لحاجات الكبيره دى

من هذا المنطلق انا بفكر اطلع ابنى لعيب كوره و طول ما انا قاعده حا اقول له يابنى

امسكلك كوره وذاكر بدل ماتفشل و تطلع دكتور زى امك و ابوك و تقعد زيى فى صيدليه

للى يجى يقولك عايزه بربع ريفو ولا اللى يجى يفاصل ويقولك بكل سماجه ورزاله مفيش

خصم عشان خاطرنا

الأربعاء، 20 فبراير 2008

اول يوم تدويين ياجماعه


ابسم الله الرحمن الرحيم

اخيرا ياجماعه انشاناها بعد ماطلعت عنينا طبعا محتاجه تظبيط بس انشاء الله كله جاى و دعواتكو معانا