السبت، 29 مايو 2010

للاسف حقيقه




الخبر للاسف قريته فى الشروق المصريه

و للاسف حسيت لما قريته بالقهره و الغيظ

اخيرا و بعد طول غياب المصريين حسوا

انهم مقصرين تجاه اخواننا الافارقه

فقرروا يبعتوا وفد من اساتذه طب العيون

و عملوا حوالى 500 عمليه للمرضى الكينيين

طبعا الراجل راجع بيقول ان الكينيين انتقدوا قله المساعدات المصريه

للافارقه بالمقارنه باسرائيل اللى على طول معاهم و بتساعدهم

و طبعا ده مش لله فى لله و لا محبه و لا كتر فلوس

الراجل الكينى قال للدكتور المصرى انتوا فرحانين قوى بال500عمليه

اللى عملتوهم مع انه قليلين بالمقارنه باننا بنمدكم بشريان الحياه

و طبعا هما قصدهم على النيل





المصيبه بقى ان الدكتور المصرى قال انه دخل على عميد احدى الكليات الكينيه

لقيه حاطط علم اسرائيل جنب علم بلاده و اظن الرساله واضحه قوى و المعنى باين جدا

الدكتور قال ان اسرائيل شغاله شغل جامد قوى فى دول افريقيا 

و للاسف حكومتنا المصريه نايمه فى العسل و مش حاسه بالمصيبه اللى خلاص بقينا 

فى وسطها فعلا و ربنا يستر و نعرف نطلع منها

لانى حاسه ان توقيع بعض  الدول على اتفاقيه اعاده توزيع حصه ماء النيل

مش خارج بره اسرائيل اللى بتحلم من زمان بالنيل و و ان ميته توصل لغايه عندها

الموضوع ده بيبين قد ايه اسرائيل بقت تقريبا محتله كل افريقيا 

عن طريق سيطرتها على مقدرات الدول الفقيره هناك اقتصاديا و معنويا

بلد زى اثيوبيا اسرائيل بقت محتكره مشروعات الرى و الكهرباء فيها



ياريت الناس اللى عندنا يفوقوا و يعرفوا هما واقفين فين بالضبط

قبل ما يصحوا فى يوم يلاقوا النيل اخره اسيوط زى ما الخبراء قالوا

طبعا انا اكتر واحده مش حتضر من الموضوع ده

انا بس خايفه عليكم انتم

اه و الله

الأحد، 23 مايو 2010

انا مبسوطه

 بقالى فتره مش عارفه اكتب حاجه و لا

عارفه ارد عند حد و ياريت عشان خاطرى

متزعلوش منى


بس حصل حاجتين حلوين قوى و حسيت

انى نفسى تشاركونى فيهم يمكن تبسطكم

معايا

اول حاجه قريت خبر فى الجرنال جايز

 يكون قديم وقريتوه و جايز اول مره تعرفوه

شاعرنا الكبير عبد الرحمن الابنودى قرر

انه يتبرع بالصالح من اعضاء جسمه للتبرع

بعد وفاته

اول اما قريت الخبر ده انبسطت قوى و

حسيت ان بلدنا لسه فيها ناس محترمين و

يستحقوا مننا اننا نجاهر

باحترامنا و تقديرنا ليهم

طول عمرى من ساعه ما فهمت يعنى ايه

شعر و انا بحبه و باحترمه و زادت غلاوته

 عندى

اما التقيت بيه اثناء زيارته لاسوان و كنت

وقتها فى اولى ثانوى و اتكلمنا فى الادب و

الشعر

لانى كنت وقتها حافظه اشعار كتير ليه و

 بصراحه هو شخصيه طيبه قوى و بسيطه

جدا

بس بعد اللى قريته حسيت انه انسان يستحق

ان نفخر بيه

و ياريت كل الناس المشهوره و المحبوبه

زيه تعمل زى ما عمل لان الخير اما بيجى

 عن طريق الناس دى

بيبقى باين و مميز و بيشجع الناس انها تعمل

 زيهم

و انا من هنا عايزه اقوله

بنحبك يا خال




الخبر التانى اللى عايزاكم تشاركونى

فيه  .......الحمد لله النهارده تم افتتاح المسجد

 الموجود فى العماره اللى ساكنه فيها

قد ايه كان قلبى طاير و انا سامعه اذان

العصر طالع منه و قد ايه دعيت لكل اللى

 اعرفهم

بس خصيت بالدعاء حبيبتى  و اللى فرحت

قوى انى سمعت صوتها ايمان قنديل

صاحبه مدونه كلام نسوان

ربنا يكمل شفاكى يا حبيبتى و ترجعى 

منورانا زى زمان و نرجع نتلم عندك مع كل

 بوست جديد تكتبيه

قد ايه الخير جميل و عمله سهل قوى و مع

كده اثره بيبقى كبير و رائع

انا بشكر كل اللى شارك باى صوره و

طريقه علشان المسجد ده يظهر و يبقى كيان

حقيقى محسوس

ربنا يجعله فى ميزان حسنات الجميع

آمين يارب العالمين

الخميس، 13 مايو 2010

كل سنه و انتى تيما يا طماطم و كل سنه و انتى قمر يا ريم


بووووووووووووووووم

طاااااااااااااااااااااخ

هييييييييييييييييييييييييه

النهارده يا جماعه عيد ميلاد تيما طماطم طمطومه


عشان كده انا من  بدرى عماله افرقع بالونات


و اضرب ديناميت


اذا كان عاجبكم بقى


و اللى بيخاف و لا ودانه بتوجعه يبعد بعيد


عشان النهارده كله من ده


تيما يا قمر

انا مشفتش حد  زيك و لا حاشوف


لام اللى زيك و اللى شبهك انقرضوا يا امى من زماااااااااااااااان


و بما انك كبرتى سنه


معلش بقى يا حاجه دى حقيقه و لا مفر منها


اسمحيلى اقولك


سنه راحت بالسلامه


سنه جايه بابتسامه


و بادعوكى انك تودعى  الهم و الغم


لمده يوم واحد


و ان كان امنيتى انك تودعيها العمر كله


يارب دايما معانا ووسطنا و فرحانه بينا  و معانا


بحبك يا طمطم


امووووووووووووووووووووووه


كل سنه و انتى تيما يا طماطم




و لحسن حظنا ان معانا فى نفس اليوم


عيد ميلاد قمر المدونات و ست الحسن


ريم هانم اللى اول مره اشوفها كان يوم البؤجه


بس و الله كنت حاسه انى اعرفها من زمان


بنكلم بعض كتير و بنرغى و ننقى رز اكتر و اكتر


بس يوم البؤجه قربها اكتر و اكتر


كل سنه و انتى سكره و طيبه و جميله


كل سنه و انتى طيبه و مبسوطه


و فرحانه بكنزى و كرمه


و يبطلوا يطلعوا عينك فى المذاكره


كل سنه و انتى معانا و ووسطنا و متبعديش عننا ابدا



بحبك يا ريم




و بالمناسبه دى انا جبت اكبر تورته لقيتها قدامى و مليانه ورد جميل 


عشان هيا جايه لاحلى وردتين


و احب اعرفكم بقى ان كلها 15 يوم و تردوهالى


احم احم 


و احب اعرفكم ان الاول من يونيو يوم تاريخى


حصل فيه تغيير كلى و جذرى فى تاريخ البشريه

جمعاااااااااااااااااء


و الحدق يفهم


ياللا بقى كلنا نقطع التورته و كله يلحق ياخد نصيبه


و الغايب مالوش نايب


كل سنه و انتوا و احنا طيبييييييييييييييييييييييييييييين






الجمعة، 7 مايو 2010

امس و اليوم و غدا




تمنيت لو اجهل ما حدث بالامس و اعلم ما فى الغد


بل اوافق حتى على ان اظل اعمى عما يحمله الغد


بشرط ان يختفى الامس تماما


اوافق على ما هو اقل


ان يشرق الصبح فاعيش يومى وحده


و قد غابت من ذهنى كل الذكريات


اى ترتيب مريح للحياه ان نعيش اليوم


دون ازعاج الامس و الغد معا



بهاء طاهر


واحه الغروب

الاثنين، 3 مايو 2010

يا ترى حترمى ايه؟؟؟





يوم الخميس اللى فات اتقدمت الساعه حسب التوقيت الصيفى 


ساعه بحالها

و بكده يبقى ضاعت مننا و من عمرنا ساعه كامله للاسف مش 


حترجع تانى

يدخل حد لمض انا عارفاه كويس و يقوللى عاااااااااااادى يا ما 


ضيعنا و حنضيع

اقوله انا بقى لااااااااااااا يا سى لمض تفرق قوى

اما احنا نضيع بمزاجنا مااااااااااشى لكن الساعه تتسرق مننا 


عينى عينك كده

اهو ده اللى لا يونكن ابداااااااااااااااااااا

الساعه دى كان ممكن لو شويه ستات مع بعضها كانوا نقوا فيها 


رز للصبح

و لو شويه رجاله كانوا قضوها شيشه تفاح فى القهوه و رجعوا 


بيوتهم اخر مزاااااااااااج

و لو شويه عيال كانوا طحنوا بعض فى البلايستيشن و بلاها مذاكره و قرف

بذمتكم مش الساعه دى ضاعت من غير فايده اهو

انا بقى بعد الساعه دى ما اتحذفت من عمرنا فكرت فى فكره كده

يا ترى حد منكم وقت الساعه دى ما ضاعت من عمره فكر كده و 


قال

ياترى ايه اللى نفسى احذفه من حياتى و يروح مع الساعه اللى 


راحت

اكيد كلنا عندنا حاجات مضايقانا من نفسنا قوى

عيوب.........عادات سيئه.............مشاكل

حاجات و حاجات وحاجات

لو تخيلنا ان عندنا باسكت كبير و حنرمى فيه حاجه من عندنا

من جوانا يعنى

يا ترى يا هل ترى حتكون ايه؟؟؟و ليه؟؟؟

انا حبدأ بنفسى

انا اول حاجه حرميها و بسرعه صراحتى الزايده عن الحد

اللى الباشا جوزى بيسميها هبل و عبط

و بصراحه ساعات كتير بوافقه على كلامه

بس برضه مش بقدر ابطل الصراحه دى

ياترى انتوا بقى حترموا ايه فى الباسكت؟؟؟؟؟؟؟؟؟؟؟؟؟؟