الأربعاء، 24 فبراير 2010

نفسى ابقى يسرا !!!!!!!!!

نفسى ابقى يسرا

اوعوا مخكم يروح لبعيد و تفتكروا انى عايزه ابقى زيها شكلا

نووووووووووو طبعا

انا راضيه بنفسى كده و الحمد لله و اهو قضى اخف من قضى

انا اصلى دايما اشوف يسرا فى مسلسلاتها ست قويه جدعه يعتمد عليها

تقع فى كل مشكل و مشكل و بذكائها و شطارتها تقدر تخرج منهم باقل خساير ممكنه

انا مش باقول ان انا ضعيفه لا الحمد لله نوعا ما قويه

بس انا عايزه ابقى اقوى

بس انا نفسى ابقى زيها طاقه نور لكل اللى حواليا

اقدر اساعد اصحابى و انصحهم

عايزه اما حد يعتمد عليا فى حاجه اكون قد توقعاته فيا

نفسى اما اوعد حد بحاجه مهما حصل اقدر اوفى بوعدى

نفسى مهما قابلتنى صعوبات فى حياتى متكسرش

ممكن اقع بس اقدر اقف تانى و الملم نفسى جوه نفسى و ابدأ من جديد

نفسى ابقى قويه و انا باربى ولادى و اطلعهم هما كمان عندهم روح التحدى

نفسى اقدر ارضى كل اللى حواليا من غير ما اخسر رضايا عن نفسى

نفسى اما اوصل لنهايه حياتى اقدر اقف و انا واثقه من نفسى و اقول

انا كنت ناجحه


عرفتوا بقى ازاى نفسى ابقى يسرا






الاثنين، 22 فبراير 2010

ليه بنعمل كده




حد منكم جرب يبص فى المرايا فجأه كده

حيلاقى منظر غريب قوى

حيلاقى نفسه مكشر و زعلان من غير سبب واضح

طب مجربش يسأل نفسه هو مكشر ليه

ليه الحزن بقى دايما ساكننا

ليه بنتعمد نجرح اقرب الناس لينا مع اننا بنحبه

لييه بقينا قاسيين و متعصبين حتى على ولادنا

ليه اما نحس اننا غلطانيين مش بنعترف بغلطنا

لا و كمان بنكابر و نعمل نفسنا مش شايفيين خالص

ليه اما بنلاقى حد ناجح و محبوب بنغير منه و نكرهه

ليه منفكرش نبقى زيه بدل ما نفكر نهدمه

ليه بنضيع احلى ايام حياتنا فى زعل و خصام

ليه دايما بنغدر باللى يآمنا

و نآمن للى متاكدين انه ميستاهلش

ليه بنخاف على طول و من غير سبب

و نقول الدنيا غداره

مع ان الغدر دايما بيبقى من الناس

مش من الدنيا

ليه بنخاف نفرح من قلبنا

و اما بنفرح

نقول اللهم اجعله خير


من الاخر ليه بقينا كلنا متناقضات و سلبيات

و مع كده مش شايفينها

و ماشيين كده فى الدنيا



ياريت كل واحد يدور جواه و يشوف

اللى انا قلته ده صح و لا غلط

الجمعة، 19 فبراير 2010

ترويض النفس






نفسك اذا اطعتها فيما تحب اوصلتك الى ما تكره



و اذا اجبرتها على ما تكره افضت بك الى ما تحب

الأربعاء، 17 فبراير 2010

صيدلانيه......و حاطق


بصراحه انا النهارده بعد ما احتفلت اليومين اللى فاتوا و فرقعت البالونات

قلت اتكلم جد شويه

طبعا كلكم عارفين انى صيدلانيه و من الشرفااااااااااااااء كمان

الشرفاء دول اللى هما مبيبعوش اخضر و لا احمر و لا حتى موووووووووووف

اللى هما بيشيلوا هم آخر الشهر من اول ما يجى اوله

اللى هما اقصى طموحهم فى الحياه انهم يدفعوا حساب طلبياتهم كله كاش عشان ياخدوا الخصم الاضافى

اللى بيقلقوا اما يشوفوا محصل الكهربا معدى قدامهم عشان الفاتوره حتبقى غاليه



الكلام ده بقوله للصيادله الجداد و اللى زعلانين قوى ان القانون الجديد زود مساحه الصيدليه

و اشترط اجراءات صحيه زياده

انا عايزه افهمهم ان الصيدليه الصغيره اللى مساحتها محدوده مش جايبه همها

ده للناس اللى ماشيه صح فما بالكم بقى اما المساحه تتضاعف

ده حيترتب عليه كهربا زياده

خشب زياده فى تنفيذ الصيدليه

ضرايب زياده لان المساحه الاكبر فيها بضاعه اكتر اكييييييييييد

انا رايى ان الصيدلى اللى يتخرج يفكر فى مجالات جديده

يعنى الدعايه و التسويق

يشارك فى مركز طبى مع حد من زمايله

يشتغل مدير فى الصيدليات التانيه و يروح يشتغل مش ياخد الفلوس و يقعد فى البيت

و ميبقاش عارف الناس اللى واخده اسمه دول بيعملوا ايه و المسؤليه فى الاخر على المدير مش الصاحب

ليه تعكوا نفسكم فى مشروع و الله و الله لو حسبتوه حتلاقوه خسرااااااااااااااااان


انا شخصيا لولا ان الصيدليه فى بيت حمايا كان زمانى قفلت من زمان

او مفتحتش اصلا من الاول


انا عارفه ان امل كل صيدلى جديد اما يتخرج انه يفتح مشروعه الخاص بس عن تجربه منصحكمش


الموضوع مش محتاج اعتصام او مظاهره

الموضوع محتاج اننا نفكر صح و نلغى الفكره الاصليه

ساعتها هما اللى حيرجعوا فى كلامهم


يا جماعه ده بين كل صيدليه و صيدليه بقى فيه خمس صيدليات

و كله بقى شغال بنظام سرقه العيانين من العيادات و توظيف اطفال ياخدوهم لغايه الصيدليه

و طبعا ده متوقع فى ظل الكثره العدديه الكبيره فى الصيدليات


ياريت تفكروا و تحسبوها صح عشان ترتاحوا بجد



الأحد، 14 فبراير 2010

حبيبتى كبرت


حبيبتى كبرت و بقى عندها سنتين


السنتين دول معناهم انها بقت بنت شقيه و شعرها ديل حصان صغير و جميل

و انها خلاص بطلت تحبى و تتسند على الحيطه

و بقت بتجرى زى الحصان الرهوان


و انها بقى عندها سنان تقدر تعض بيها اللى يضايقها و ينرفزها

و كمان بقت بتتكلم زى اللبلب و تقدر ترد على حد يتطاول عليها

و كمان تقدر تقول كلمه حق لو اتطلبت منها


بنتى اللى بتكلم عليها دى هى مدونتى حبيبتى

انا فاكره اليوم اللى جوزى قعد يقنع فيا انى اعمل المدونه دى

و يقوللى انتى اسلوبك حلو و فرصه تقدرى تتعرفى على ناس جديده


و تتعرفى على افكار ناس تانيه

و يظهر كان فعلا عنده حق

لانى خلال السنتين دول اتعرفت على احلى ناس و اجمل ناس

و مش عارفه لو كانت الدنيا مشيت من غير ما اعمل المدونه كان حيبقى شكلها ازاى

و احب بالمناسبه دى اهنى كل الناس اللى بيحتفلوا معايا فى نفس التوقيت بعيد ميلاد مدوناتهم

و اوجه كام كلمه لكام حد بحبهم



الجواز و سنينه
انا بحبك قوى يا دودو و عمرى ما حانسى انك اول حد عبرنى و رد عليا فى مدونتى




داليا قوس قزح
مشفتكيش غير مرتين بس فرقوا معايا كتير بس اتكلمنا اكتر و حنفضل نتكلم لغايه ما يحين الاجل ان شاء الله

و حشتينى يا داليا و ياريت ترجعى لينا



مفروسه هانم
انا بحبك قوى و عمرى ما اقدر انسى اللى بتعمليه معايا اما بنشوف بعض



ستيته
انتى حد جميل قوى و نفسى اشوفك جدا



آبى
حتوحشينا و ربنا يفرحك دايما و يارب تعقلى بقى و تتهدى



فاتيما
تعبتك قوى النهارده و يارب يتردلك تعبك ده يوم رجوع يوسف باشا بالسلامه


يا جماعه تيما هى اللى عملتلى الحفله دى كلها لانى من الاخر معرفش اعمل حاجه خالص
(قصدها العك دا انا اللى عكيتووووو ...انا تيما )



كل
المدونات و المدونين


انا من غيركم و من غير اراءكم ما اسواش حاجه خالص


كلكم محل حبى و احترامى و تقديرى

و ياريت كلنا نحب بعض و نخاف على بعض

و يارب يبعد عننا كلنا الغير معرف الرزل اللى منعرفش هو مين

بحبكم كلكم و كل سنه و انتوا

و احنا و كلنا طيبين




الجمعة، 12 فبراير 2010

المتجوزين بيشجعوا كيت كات ....وانا مش معاهم







الاغنيه اللى فوق دى باهديها لكل الشباب و الشابات المرصوصين

على الكبارى فى مصر المحروسه من اسوان لاسكندريه

و اللى فى الوقت ده من كل سنه بيخلوا مصر حمرااااااااااااااااااااااا

من كتر الورد الاحمر و الدباديب و القلوب اللى بيشتروها

و اقولهم كل سنه و انتوا طيبين بمناسبه عيد الحب

ممكن كمان اهديها للمخطوبين و العرسان الجداد لغايه ما يشرف اول بيبى

بعد كده حيدخلوا فى مرحله غير دى خااااااااااالص

هههههههههههههههههههههههههه

اما المتجوزين القدام اللى زى حالاتى و حالات كتير من المدونين الشرفاء

فاهديلهم مشهد من فيلم احلى الاوقات بيجمع بين هند صبرى و خالد صالح

و اللى فيه بيتناقشوا حول جدوى بوكيه الورد و الفرق بينه و بين كيلو الكباب

اظن بقى المشهد ده هو التطور الطبيعى للرومانسيه المصريه الحقه

و بصراحه الراجل فى اخر الفيلم بيشترى الورد و الكباب مع بعض

و ده برضه انتصار للمرأه و لقضيتها المعاصره

خلاص خلصنا اهداءات


امبارح بقى و انا قاعده مع جوزى كده و راسمه ابتساااااامه عريضه على وشى

بقوله بكل رقه و هدوء و رومانسيه حتجيبلى ايه بمناسبه الفلانتين يا جمييييييييل

قاللى اولا الفلانتين ده بدعه

طبعا تعبير وشى اتقلب فى ثانيه و رجعت لحالتى الطبيعيه

طبعا هو استشعر الخطر المحدق به.......حلوه المحدق به دى

و قاللى حجيبلك شيكولاته كادبورى من الكبيييييييييره قوى و الفها بورق احمر شيك و فيونكه

و سكت شويه كده و قاللى لا خليها كيت كات من الكبيره و كده كده هيا ورقتها حمرا و نوفر اللفه والفيونكه

و نقسمها كل واحد مننا ياخد بار منها و بالهنا و الشفا يا عمرى

طبعا انا اللى خلانى سكت انه قال يا عمرى و دى مش بتتقال كتير الصراحه


ايه ؟؟؟؟؟؟؟؟؟سامعه حد بيضحك ياريت تمنعوا الضحك

لان الموقف ميضحكش خااااااااالص الصراحه



مره تانيه بقولكم

كل سنه و احنا كلنا بنحب بعض

الثلاثاء، 9 فبراير 2010

انت وحشتنى قوى



طول عمرنا كنا مع بعض و مفترقناش

لغايه دلوقتى و رغم الوقت اللى عدى لسه فاكره اول مره شفتك

استغربتك شويه ...........غيرت منك شويتيين..........بس حبيتك قوى

عمرنا ما كنا مرتبطين ببعض ظاهريا

بس وقت الجد كنت بلاقيك راجل بجد

طول الوقت كنا بنتخانق و نشد فى شعر بعض

و اقول امتى بقى اخلع من هنا و اسيبك زى monkey cut

بس دلوقنى انت واحشنى قوىىىىىىىىىىىىى

كل ما افتكر خروجاتنا فى اسكندريه و قعدتنا فى ماكدونالدز محطه الرمل

افضل اضحك لغايه عينيا ما تدمع من اللى كان بيحصل فيها




طول عمرى كان نفسى احضر فرحك زى كل البنات و افرح بيك

بس انت ركبت دماغك و عملته بره


كان نفسى ابقى اول واحده تشيل مريم و عاليا اول ما يشوفوا الدنيا

بس حتى دى ماكانش ليا نصيب فيها

نفسى اسمع كلمه عمتو كتير و ازهق منها لكن للاسف

حتى دى باسمعها يومين تلاته من السنه للسنه

زى هلال العيد



الى الدكتور يامن الساكن فى جده

و اللى مش باشوفه غير يومين فى السنه

عايزه اقولك


انت وحشتنى قوى


الاثنين، 1 فبراير 2010

اوقات



اوقات يا دنيا معاكى بعيش

و ساعات مبفهمكيش

و انتى و لا فاهمانى

اوقات بحس اننا مجروح

عايش حلاوه روح

و دمعتى محاوطانى

صابر على اللى بيجرالى

و انت لا ليكى عزيز و لا غالى


***************************

اوقات فى عز العتمه باشوف

و ساعات باموت من الخوف

و غصب عنى بدارى

باحلم يعدى عليا الليل

من غير عذاب و لا ويل

و تحسى مره بنارى


***************

اوقات بتاخدى اعز الناس

و اقول نصيب و خلاص

و اصبر على احزانى

اوقات بحب قلوب بتبيع

و فى الف لحظه بضيع

و برضه مش حسانى

*****************************

انا باحب الاغنيه دى قوى

عشان كلامها و عشان محمد فؤاد كان حاسسها قوى و هو بيقولها

يا ترى حستوها ازاى و فكرتكم بايه اما سمعتوها؟؟؟؟؟؟؟؟؟؟؟؟؟



الاغنيه مهداه لكل الناس اللى بحبها

و خصوصا الزعلانين

منى بقى ؟؟؟؟؟؟من غيرى؟؟؟؟؟؟

المهم هيا ليهم

و اقولهم مش مستاهله و الله