الأربعاء، 22 أبريل 2009

اكتئاب ما بعد اللعب

عااااااااااااااااااااااااااااااااااا انا باطلب و بسرعه قوات تحكيم دوليه و ياريت تبعتولى معاهم

قوات لحفظ السلام .....واحد طيب منكم يسألنى ليه كل ده اقولكم عشان ولادى و عشانى

انا كمان تسألونى ليه تانى قوووووم انا اضطر احكيلكم حكايتى من طقطق لغايه مانوصل

بقى ......احنا الاسبوع ده كنا فى اكتوبر و طبعا بما اننا فى اكتوبر يبقى لازم نروح

هايبر و كارفور عادى يعنى بمجرد ما ندخل يبدأ الباشا الصغير و السوسه اخته الزن

عايزين نروح اللعب يعنى يتفرجوا يعنى على اللعب يقوم جوزى يبدأ ينبه تتفرجوا

بس من غير ما نشبط فى حاجه ماااااشى يبصوا لينا بقرف و يقولوا ماشى

نسيبهم فى اللعب و نبدأ احنا جولتنا و شويه و نرجعلهم نلاقيهم ضاربين بوز اجارك الله

منه

مالكم يبدأ الاستاذ عايز لعبه مش عارفه ايه دى جميله قوى و يفضل ماسكها

اقوم ارد عليه طبعا برقه عشان فى ناس جنبى و انا من جوايا نفسى اعلقه فى السقف

بعدييييييييين يا حبيبى لأ دلوقتى بقى ده هوا اللى بيرد قبل ما اكمل الاقى السوسه

الصغيره

جايبه لعبه بيبى ب300 جنيه و عايزاها و برضه زعلانه من قبل ما اقول لأ حتى ليه

مش عارفهو يزعقوا بقى انتوا مش بتحبونا اشمعنى احنا مش بنجيب لعب كتير زى

الناس

و طبعا بابقى ماشيه بعيد عنهم قال يعنى مش تبعى و الزعيق ده مش ليا خاااااااااالص

رحنا كارفور الاستاذ عايز بلاى ستيشن 3 ب3000 جنيه طب يا حبيبى مينفعش

2 لا انا عايز 3 طب اجيب منين انا ده انا لو جبته حاعلقه بدل النجفه من فرحتى

و شويه و الاخت عايزه مايوه دخلنا محل ديزنى لقيت المايوه 50 سم 165 جنيه

اه و الله العظيم لما بقيت حاعيط من الفرسه و الغيظ

نيجى ساعه الغدا اللى عايز مكرونه و اللى عايز سمك و اللى عايز جلاش طبعا

امال نتخانق ازاى و نعيط على ايه ؟؟؟؟؟؟؟؟؟؟

خرجنا مره و روحنا نجيب ايس كريم عايز ايه يا حبيبى ؟

عايز شكولاته و فانيليا و

و انتى يا قمر ؟؟؟؟ عايزه مانجه خلاص روحت جبت له اللى عايزه و هيا مانجه و

فراوله

زعلت بقى انا قلت مانجه بس جبتى فراوله ليه

هو بقى زعلان اشمعنى انتوا الوان كتيره و انا لا

طبعا السوسه بعد ما لقت اخوها متغاظ بدأت تحب اللى معاها و تغيظه بيه

انا بقى اللى قربت اخبطهم فى بعض هما الاتنين من الغيظ

فى العربيه بقى ضربتنى ,اى زنقنى ,عضنى مش عارفه انام منه

و هكذا تمضى بنا الرحله فى خناق و زعيق و عياط

هاااااااااااااااااااااااااا حد بقى عنده حل سريع للى انا فيه ده و اوعوا تقولوا لى التفاهم و

الحنان و الكلام الهابط ده لاحسن اخبطه بالبلاى استيشن 3 اللى لسه مجبتوش

انا عن نفسى حاقدم طلب للمولات انها تحظر بيع اللعب و تلغى المحلات اللى توجع القلب

دى و بسرعه و الاااااااااااااااااانتوا بقى الجانيين على روحكم

و قد اعذر من انذر

الأحد، 12 أبريل 2009

لاااااااااااااااا تعليق


بقالى كام يوم عايزه اكتب حاجه جديده و لاول مره من فتره يبقى عندى كذا موضوع حيرانه بينهم
و الحمد لله قدرت احسم امرى لصالح الموضوع بتاع الصوره دى بس موضوع النهارده
مش على الصوره دى بالضبط يعنى لكن عن المدارس برضه
معتز الدمرداش فى تسعين دقيقه من كام يوم عرض كليب تووووووووووووووووحفه
لكل عشاق النوادر و العجائب يلحقوا يحجزوه عشان معتز خلاص قرر يسلم باسبقيه الحجز
الكليب بدأ بحلقه كبيييييييييره قوى ولاد و بنات و اييييييييه لمه كبيره و يظهر انه احتفال او مناسبه
سعيده لشخص ما و تأتى المفاجأه ان اللى بترقص فى النص طالبه لابسه الزى المدرسه
و طبعا الكاميرا تجولت فى المنطشقه عشان توضح لنا ان الكارثه و المسخره دى بتحصل فى حوش
المدرسه وورانا علم مصر مازال يرفرف خفاقا على ارض مصر الحره
طبعا دلوقتى المعقدين منكم بيقولوا رقص فى المدرسه و قلبتوا حواجبكم و احوليتم و بقكم طلع نار
زى التنين المفترس من عندى انا بلاش انفعال عشان مش كويس علشانكم
فجأه بقى اخ فاضل من زملاء الاخت الفاضله برضه اللى بترقص اتبرع و شال الكوفيه بتاعته ووطى
عشان يحزم زميلته ماهو مدام رقصت تبقى ترقص صح و احسبها صح تعيشها صح
كل ده بيحصل و مفيش ناموسه جت قالتلهم بتعملوا ايه
المشهد التانى فصل و سبوره و مدرسه محترمه بتكتب عنوان درس و مالا يقل عن 5 بنات ماسكين
شعر بعض و ضرب و عض و شلاليت اه و الله بنات بتضرب بعض بالشلاليت و المدرسه
مستمره فى كتابه العنوان على السبوره ولا كأن فيه حاجه خالص
شويه واحد اتصلت بمعتز و كانت وليه امر بنت فى المدرسه و قالت ان الكليب ده حصل فعلا
و مع كل الناس فى المدرسه و ان المدرسه دى كلها تسيب و معظم المدرسين غايبين
و التلاميذ مش بياخدوا حصص خالص و من الاخر الدنيا بايظه طب يا ستى سايبه بنت فيها ليه
قالت اصلها قريبه مننا حسيت ان كلامها خايب و عبيط
شويه و ابله الناظره اتصلت و انكرت تماما ان المهذله دى حصلت عندها
و فضلت تقول لو ده حصل و انا معرفش يبقى ماليش لزمه فى المدرسه المهم كل واحده اتمسكت بكلامها
المهم معتز سأل الناظره تعرفى المدرسه دى قالتله الصوره مش واضحه مع انها كانت واضحه جدا لكن
وليه الامر قالت دى مدرسه لغه عربيه و مرضيتش تقول اسمها.
اه نسيت اقوللكم ان المدرسه دى مدرسه تجريبيه فى مدينه نصر اسمها عباس العقاد تقريبا
و النهايه تبقى المهزله على ماهى عليه و ادى حال التعليم المتطور جداااااااااااااااااااا فى بلدنا
و لا حول و لا قوه الا بالله

الاثنين، 6 أبريل 2009

بلاش........عشااااان خاطرى


من اربع سنين ايام ما فتحت الصيدليه جديد كنت فرحانه قوى بقى و لسه متفائله
بقى و معدتش على الضرايب و لا فلوس نظافه و لا اى حاجه تجيب اكتئاب خالص
جه واحد راجل كباره كده و عايز حاجه للصداع تكون قويه عشان بنته عندها صداع جامد
المهم طلعتله علبه اقراص من نوع كويس و مش غالى فى نفس الوقت خد الدوا و شكرنى
وروح و عدى اليوم عااادى و جالى الراجل تانى يوم زعلاااااااااان
بقى اقولك يا دكتوره بنتى عندها صداع تقومى تديها دوا عملها طنين فى الاذن!!!!!
طبعا انا كنت حاموت على روحى من الضحك على المصطلح اللى هوا قاله بس الحمد
لله قدرت امسك نفسى و قلتله انا اخر طنين اعرفه هو طنين النحل
ايه بقى اللى دخله ودان بنتك قاللى هيا اول ما خدته حست بطنين و انا كبرت بقى فى
دماغى و كشرت و عايزه اعرف هيا حست بايه عرفت منه انه طنين ده اللى بيقوله
و مصره انا انى باخد نفس الدوا و مفيش نحله استجرت و جت جنب ودنى
راح قاللى لا حصل و النشره كمان كاتبه كده جوا العلبه
طبعا انا فهمت على طول انها قرت النشره و الطنين ده موجود فيها الا لازم يرجع الدوا و
انا راسى و الف سيف لا مش راجع المهم هوا مشى و مخطاش عندى تانى بس
عرفت من زميله ليا انه مدمن نشرات ادويه و عامل مشاكل مع نص صيدليات
منطقتنا بنفس الطريقه
الحكايه دى افتكرتها و انا مشغله الراديو الصبح و كان عبد الرحمن رشاد فى على جناح
الصباح بيطالب شركات الدوا انها تعرب النشرات الداخليه عشان الناس تقدر تفهمها
بمختلف مستوياتها
طبعا الموضوع ده لو حصل حيبقى كارثه على الناس لان مش كل الادويه بيبقى استعمالها
زى النشره ساعات الدوا بيستعمل عشان عرض من اعراضه الجانبيه بيبقى مفيد
فى بعض الحالات و ساعات بتبقى الجرعه اللى فيه زياده المهم فعلا الموضوع ده حيبقى
ملل و زهق لينا احنا كمان
انا فاكره ان واحده جت عندى و عمالع تقول الدكتور حمار كاتبللى دوا صرع و انا كل اللى
عند صداع و افهم فيها ان الصداع الجامد قوى الدكاتره بيعتبروه نوع من التشنجات
عشان كده بيكتبوا الدوا ده
و اللى مره جت تقوللى ان عندها ازدواج فى الرؤيه بعد الدوا و طبعا قريت النشره و لقيت
الكلمه مكتوبه كده بالضبط فيها
يا استاذى المذيع العزيز موضوع النشره العربى دى حيكون اذى للمريض اكتر من الدوا
نفسه فبلاش عشان خاطرى الاقتراح المهبب ده
و يا شركات الدوا اوووووووووووووووعوااا تسمعوا كلامه رافه بنا و حمايه لكم من
القضايا االى حتترفع عليكم
مقدمه الالتماس صيدلانيه طهقانه و زهقانه من الاقتراحات