الثلاثاء، 23 يونيو 2009

السبت، 20 يونيو 2009

تلات تيجان و البقيه تأتى

اولا ازيكم جميعا انشاء الله و بحمد الله و اخيرا حاجاوب على التاج اللى هو 3 فى 1

و كانوا اتبعتولى من كوكيتا و يوميات شاب منوفى و طعميه سخنه

من انت و ما الذى تفعله هنا؟

انا واحده عاديه جدا و مش محتاجه اعرفكم اسمى لان معظمكم عارفه و اللى مش

يعرفه يستعين بصديق و موجوده هنا عشان ايه؟؟؟؟؟ده بيتى و اعمل فيه اللى يعجبنى

اكتب ,اشخبط ,ازعق براااااااااحتى مش بيتى و انا حره فيه

بس انا هنا باجى عشان افش غلى من حاجات كتير مضايقانى او اسجل اعجابى بحاجه

كويسه شوفتها و ببقى مبسوطه قوى اما اشوف رأيكم فى افكارى

اسرائيل تقصف كل جنوب ممكن بحثا عنك اى شمال ستقصد؟

طبعا اسكندريه اولا لان ماما و بابا هناك و فرصه اقعد معاهم

ثانيا لانى باعشق اسكندريه و هواها و بحرها و ناسها وكل حاجه فيها لانها رائعه بكل ما

فيها خصوصا السمك و الارز باللبن بالايس كريم و الفطير

طبعا حسيتوا من كلامى انى باحب الاكل ايوه باحبه بس يكون فى اسكندريه

اى مكان تانى مالوش طعم فعلا

انت مكلف بحذف حرف من حروف اللغه العربيه اى حرف ستختاره و لماذا؟

اولا لغتنا حلوه و جميله و نبقى بنظلمها لو حذفنا منها اى حرف و ياريت نتمسك

بيها لانها هويتنا و تاريخنا و بلاش نبقى زى القرع و نتمنظر بكام كلمه انجليزى

و لا فرنساوى عارفينهم

لو قدر لك ان تدخل السجن فما هى القضيه التى تتمنى ان تدخل بها اليه؟

قضيه فك شفرات القنوات المشفره و خصوصا الرياضيه عشان الذل اللى الناس بتتذله

مع كل بطوله دوليه سواء للقدم او التنس او اى بلا ازرق

او قضيه طبع الكتب الغاليه و بيعها باسعار زهيده عشان الناس تقرا و تستفيد

مع الاعتذار لحقوق الملكيه الفكريه

بالمناسبه مت اكتشفت نفسك؟

اكتشفت نفسى و انا بجهز الصيدليه لان جوزى دايما مشغول فانا اللى عملت الورق و

و الضرايب و السجل و التصريحات و كل المشاوير الكتيره اللى كانت محتاجاها

و بعد كده تعبت قوى لغايه ما بقى فى ناس بتيجى مخصوص لينا مع العلم ان حواليا

صيدليات كتير ساعتها حسيت انى قويه و اقدر اسد فى المواقف الصعبه

عشان كده انا باعتبر الصيدليه دى بنتى لانى تعبت قوى فيها و هيا اللى عرفتنى

الطاقه الكامنه اللى جوايا

على مفترق الطريق لافتتان واحده تقول(الى حلمك) و الثانيه تقول(الى ما لم يحلم بيه بشر)

طبعا حاختار حلمى لانى من غيره تبقى عيشتى و حياتى بلا معنى او هدف

بجمله واحده فقط اكتب تعريف لكل كلمه من الكلمات الاتيه

الوطن:اى مكان بالاقى راحتى فيه حتى لو كان اوضه صغيره اكيد هو ده وطنى

الام:انكار الذات و التفانى فى خدمه الغير و التضحيه دى صفات الام اللى انا اعرفها

الليل:الهدوووووووووووء و السكينه و السهر مع الصحبه الحلوه وده طبعا مش دايما

و مش على طول

الحب:عمله نادره اللى يلاقيها يبقى لقى خاتم سليمان اللى هوا اصلا خيال بس

مش علمى

امريكا:الساحره الشريره و العجوز الشمطاء و اللى بتتزوق دلوقتى عشان تحاول تقنعنا

انها بقت الساحره الطيبه و على العموم افلح ان صدق

المرأه:نص الدنيا و سر الحياه و من غيرها الرجاله ميسووش بصله( تعصب بقى)

الصمت :زمان قالوا الكلام من فضه و السكوت من ذهب بس يبقى سكوت للتفكير

و التركيز مش سلبيه و خوف و جبن

الانترنت:هو كلمه السر زى افتح يا سمسم كده اللى خلتنا نعرف كل غريب و عجيب و

جديد اثناء حدوثه و محدش اتعود عليه يقدر يستغنى عنه

من الاخر ادمان العصر الحديث

اختر منصب و اتخذ قرار

نفسى ابقى رئيس جمهوريه نفسى ليوم واحد بس و القرار اللى حاخده

انى اخد اجازه من اللى حواليا لمده يوم واحد برضه و لو انهم حيوحشونى

و حارجع قبل اليوم ما يخلص

قيس ،عنتره،جميل هم الذين يقولون شعرا و ليلى و عبله و عزه (صموت)

لماذا هذا التغييب للمرأه؟؟؟؟

لان قيس باشا و عنتره بيه و جميل افندى عشان يقولوا شعر عايزين ياكلوا

ملوخيه و فراخ و يحلو بكريم كراميل و يحبسوا بشاى و ليلى و عبله و عزه

يا عينى فى المطبخ معكوكين بيعملوا الاكل يبقى حيفضوا امتى يكتبوا شعر

ان تكون مطلوبا لارتكابك جريمه خير من الا تكون مطلوبا على الاطلاق

هل تتفق مع هذه العباره ؟؟علل؟؟

اتفق ماتفقش ليه الصيت و لا الغنى بس متبقاش القضيه مبيدات مسرطنه و لا عباره

و لا قتل زوزان تميم يعنى من الاخر الاعدام مش تخصصى بعد كده كله عادى

الى اين تمضى كلمات الحب بعد ان نقولها؟

الى ودن واحد من اتنين اما واحد يسمعها و تأثر فيه و يعملها فيديو كليب

او واحد بياكل و مش فاضى و بالتالى تدخل من هنا و تطلع من هناااااااااك

و ياريت دايما نلاقى اللى يقدر كلامنا

هل تجد علاقه بين المرأه و قطاع الطريق؟؟؟

وراء كل حرامى قاطع طريق امرأه طمااااااااااااااعه

هذا فراق بينى و بينك متى و لمن تقولها؟

اقولها لكل اللى ميقدرش تعبى و مجهودى عشانه و يستخف بمشاعرى ساعتها اقوله

بالسلااااااااااااااااامه

كيف هو الغد؟

على حسب يعنى لو تعبنا علشانه اكيد حيبقى احلى بكتيييير من امبارح و النهارده

لكن لو نمنا و كسلنا حيبقى منيل بستين نيله

انا اتأخرت قوى فى حل التاج ده عشان كده اعتقد انه مر على ناس كتير بل مر على كل

الناس و اللى معداش عليه يتفضل يجى ياخده و بالهنا و الشفا

الأربعاء، 17 يونيو 2009

اه يا قاسى يا مفترى



الراجل فضل صابر صابر و عمال يقول عدى ياليله بس لقى انه مفيش فايده راح هابدها الكف جابها الارض

و ده جزاء كل من تسول له نفسه و ميسمعش كلمه ماما تقولها

الاثنين، 15 يونيو 2009

النكته دى.............جديده

تحديييييث

مبرووووووووووووووووووك

لمنتخب مصر الرجاله

فرحتونا و شرفتونا و رفعتوا راسنا

و خصوصا زيدان عريس المنتخب

تحيه ليكم كلكم




فى محافظه اسوان و اثناء امتحانات الثانويه العامه الحاليه

جاء ترشيح مدرس كفيف للمراقبه فى اللجان على طلبه الثانويه الممتحنين

المدرس اعترض و قابل الباشا المسئول راح قايل احنا مالناش دعوه

ده الامر الواقع و لازم تنفذه و تدخل لجنتك

المدرس رفض الدخول لانه المفروض يراقب الطلبه و يمنعهم يغشوا

طب حيشوفهم ازاى؟؟؟؟؟؟؟؟؟؟؟؟؟؟؟؟؟؟

و لاثبات حاله راح القسم و قدم بلاغ رسمى بموقفه و سببه

و ربنا يكرم الجميييييييييع

الأحد، 7 يونيو 2009

اقترب الحلم من الضيااااااااااااااع

الحمد لله اقترب الحلم من الضياع و بالمناسبه السعيييييييييييده دى

احب اوجه الشكر لكل من اسهم و سيسهم فى ضياعه

بصراحه اللعيبه كلهم لم يدخروا وسعا عشان المباراه تخرج كده و اكتر من كده

كمان لولا شذوذ لاعب مارق منهم هو محمد ابو تريكه المعروف عنه دائما

ميوله لاسعاد الجماهير المصريه و ده المفروض انه خروج عن خطه المباراه

و هناك انباء عن توقيع اقصى العقوبه عليه بسبب فعله الخااااااااارج

شكر خاص جدا للحضرى باشا على جهوده العظييييييييييييييييمه من اجل اسعاد

الجماهير العرييييييييييييضه(الجزائريه طبعا) لان المصريين وحشين بطبيعتهم

و الله يا جماعه اى حاجه هتتقال هنا مش حتوفيكم حقكم خااااااااااالص

حسبنا الله و نعم الوكيل

و الله انا رأيى اننا نبعتهم دارفور

لانه اما النصر و اما الشهاده

النصر الحمد لله ضاع

يمكن تلحقوا الشهاااااااااااااده

الجمعة، 5 يونيو 2009

حقنة البنج !!!!!!!!!


طول عمرها حنونه و طيبه و جامعه حبايبها حواليها لا عمرها اشتكت و لا كلت و لا ملت
مرت سنييييييييين و الست الطيبه قايمه بواجبها مع ولادها و قريبها و جيرانها كمان
و عمر ما حد قصدها و خذلته ابدا لكن العمر بيجرى و الصحه كلت و الجسم مسكته العله
راحت للدكاتره شخصوا حالتها انها مرض خطير منتشر فى معظم جسمها نتيجه اهمالها من زمان
فى العلاج لانها كانت بتستخسر فى نفسها عشان توفر لولادها حاجاتهم
كل ما الايام تعدى الحاله بتتأخر اكتر و كل شويه يجيبولها دكتور من المتلمعين بتوع اليومين دول
و عندك بقى تحاليل و اشاعات و ادويه تتحسن الحاله كام يوم و بعدين ترجع اوحش من الاول
كل مره يتكرر نفس السيناريو و المرض عمال ينتشر و يستشرى فى هدوء قاتل سارقا معه صحتها
و عافيتها و ذكرياتها الحلوه كلها
طبعا اهلها بدأوا يزهقوا و اللى كان بيزورها كل يوم بقى يوم و يوم بعد كده كل اسبوع كل شهر حسب التساهيل
هيا طبعا حزينه لان ولادها نسيوها و اهملوها و حزينه على صحتها و عمرها اللى ضاع هدر
فجأه ظهر فى البلاد البعيده طريقه جديده فى العلاج و قالولها على الدكتور بتاعه
جريوا اهلها على الدكتور بالتليفونات و الفاكسات يتحايلوا عليه عشان يعالجها
و بعد توسلات و محاولات تنازل الدكتور و تواضع ووافق يجى لغايه عندها يزورها
طبعا فرشوا ليه الارض رمل و ترحيب و استقبال و احسن الفنادق
طبعا الدكتور ده ميفرقش كتير عن اللى قبله بس كل ميزته ان لسانه حلو و بيعرف يلمع نفسه
راحلها الدكتور و كشف و قرر علاج قال عليه جديد و اول مره يستخدم و راح يتكلم معاها و ينفخ فيها
ويحسسها انها قويه و سليمه و المرض اللى عندها بسيط و علاجه سهل و انه مش محتاج غير عمليه بسيطه
وافقت و فى العمليه كل اللى عملهالدكتور انه اداها حقنه بنج وسابها نايمه شويه و لما صحيت طبعا
اشتغل معاها بالمسكنات و المخدرات القويه و هيا فاكره انها خلاص خفت و نسيت مرضها و عاشت الوهم
المرض بينتشر و لسه حينتشر اكتر و هيا للاسف مش حاسه بيييييييه خاااااااااااااالص
و كل مايقابلها حد تحكى و تتحاكى عن شطاره الدكتور اللى جاى من بلاد بعييييييييييييده
مش عارفه حتفضل نايمه و متخدره لغايه امتى؟؟؟؟؟؟؟؟؟
كل املنا ان حد يجى يفوقها و يعرفها ان مرضها مالوش علااج غير بعمليه كبيييييييييييره قوى
خطيره ايوه بس هياالوحيده اللى حتقدر تشيل كل العلل اللى مليتها
امتى حيجى الحد ده الله اعلم!!!!!!!