كل سنه و انتوا مبسوطين

فاضل كام ساعه و تيجى الساعه 12 بالليل و نبدأ سنه جديده

سنه نتمنى تكون سعيده و احسن من اللى قبلها

لاحسن اللى قبلها شفنا منها كتييييييييييير

الوحش فيها بصراحه كان اكتر من الحلو

مقدرش اوعدكم انها تبقى احلى من اللى فاتت

ياريت نحاول نخليها حلوه و لو بالعافيه

كل سنه و انا و انتوا و الكل طيبين

حقك علي انا

طبعا كلكم سمعتم الاغنيه دى قبل كده او سمعتوها هنا و عرفتم قصه الاخت دى اللى هيا انغام

الست بقالها سنين مخاصمه اللى بتحبه و مش بتكلمه و مع ذلك بتموت فى دباديب سعادته

نفسها ترجع تعيش معاه تانى و فى نفس الوقت كرامتها واجعاها على الغلط اللى ارتكبه فى حقها

و مش قادره تسامحه عليه رغم الوقت الطويل اللى عدى عليهم

نرجع ليا و ليكى و ليها لو انتى بتحبى حد و مرتبطه بيه ايا كان الارتباط

و اتشك فى قلبه و جرحك جرح صعب انك تنسيه بسهوله او تغفريه له

ياترى حتتقمصى منه و تقاطعيه و تكرهيه و تلعنى اليوم اللى شفتيه فيه

ولا حتسامحيه و تقولى عفا الله عما سلف

و لا حتعملى زى الاخت دى و تفضلى تتقطعى بحبه و تتعذبى من فراقه

و تضيعى عمرك فى الخصام ونفسك تكلميه بس كرامتك مش سامحه خاااااااااالص

انا عن نفسى يا اما اخاصم نهائى و امسح الصفحه من حياتى

يا اما اسامح و ارجع ليه تانى

لكن نظام عينى فيه و اقول اخيييييييييه ده تضييع وقت و اهدار لعمرنا و سنينه اللى ربنا انعم علينا بيه عشان نعيش

سعداء مش نتعذب و نعذب غيرنا

فيا كل واحده مقموصه من واحد عندك اختيارين يا ترجعيله و تفكى القمصه

يا تنفضيله و انا اجوزك سيد سيده

الهوانم بقى رأيهم ايه؟؟؟؟؟؟؟؟؟

امبارح و انا باتصفح المدونات لفت نظرى موضوع كاتباه الدكتوره ستيته كان اسمه مذكرات حبيبه زوج

اللى يدخل ياريت يقراه الاول و بعدين يرجع تانى عشان نسأل سؤالنا بقى للهوانم

لو حضرتك و لا حضرتك مشغوله و عندك طموحاتك العلميه و المعمليه المستفزه و طبعا ده كله كان على حساب جوزك

و طبعا هو كان معترض و متذمر على اهمالك ليه و دايما فى خناقات و مشاكل و فجأه لقيتيه اتحول و بقى سعيد و مبسوط

و مقدر تعبك و مجهودك و كبر دماغه على الاخر مع ان الظروف هيه هيه و مفيش حاجه اتغيرت من ناحيتك

طبعا انتى مسكتيش و سألتى و عرفتى انه على علاقه بواحده تانيه و ان الواحده التانيه دى هيا سبب تحوله للاحسن

من ناحيتك و انه فى طريقه للجواز منها مع احتفاظه بيكى عشان العشره ,عشان الولاد المهم انه مصر انك تفضلى معاه

يا ترى رأى حضرتك حيبقى ايه ساعتها؟؟؟؟؟؟؟؟؟؟؟؟؟؟؟؟؟

ياترى حتثورى و تقلبى الدنيا و تهديها على دماغه و دماغها و تقولى انا و من بعدى الطوفان و انى زى الفريك ما احبش شريك

مع العلم ان اهمالك و انانيتك هما اللى ادوا لكده

و لا حتسكتى و تقولى و فيها ايه مادام بقى هادى و مبسوط معايا و الخناقات قلت يبقى يا اهلا بها و مادام قايم

بالبيت و العيال و مطالبنا يبقى مفيش مشكله خااااااااااااااالص

الموضوع ده خاص بالستات اه بس برضه مسموح برأى الرجاله لأن كل وجهات النظر مطلووووووووووووبه

الموضوع بجد عجبنى قوى و كان لازم نشوف كل وجهات النظر و ده المطلوب دلوقتى

كل سنه و انتوا و اللحمه بخير

كل سنه و انتوا طيبيين جميعا

و عيداضحى مبارك ان شاء الله

و ان شاء الله السنه الجايه نكون جميعا فى الحج

ربنا يحقق للكل امانيه و يبقى سعيد دايما و فرحان

و ياريت متكتروش فى اللحمه عشان صحتكم مش عشان غاليه و لا حاجه لا سمح الله

مره تانيه كل سنه و انتوا بالف صحه و سعاده

مش معقول

بعد كل اللى عرفناه من شهود العيان بعد مهزله السودان و كم البلطجيه اللى كانوا موجودين

عايزه اعرف حاجه واحده بس الناس اللى راحت دى معظمها مخطاش ماتش كوره قبل كده

و لا يعرفوا يشجعوا و لا نيله يبقى ايه لازمتهم هناك وايه كمان رايحيين ببلاش يعنى فسحه

الجزائر كانت باعته ناس تاكل الحديد و تاكلنا و بالمره تشجع و باعتاهم ببلاش و احنا بنلم 2500

من اللى عايز يشجع عشان يبقى تشجيع و سبوبه فى نفس الوقت

الناس اللى سافرت مع الحزب الوطنى ابو بلاش يعنى كلهم ناس شيك حاطه بارفان و مانيكير و فورمه الشعر آخر حاجه

طبيعى اى حد يقول للناس دى بخ حتجرى فما بالكم بالسنج و المطاوى

على رأى سعد الصغير هما باعتين ناس بومبونى و رقه على الاخر لو كانوا بعتوا الالتراس

و ولاد البلد كانوا كلوهم و قطعوهم

خالد الغندور قالها فى دريم اللى المفروض ان البلد تبعت المشجعين الحقيقيين اللى بيشجعوا كوره من 20 سنه كده

مش الناس المتلمعه اللى بدأت تعرف الاستاد و التشجيع فى امم افريقيا القاهره 2006 بتوع الزمامير

و الطراطير و التشيرتات الحمرا

ده مش ذم فى الناس دى ولا حاجه بس الناس التانيه بتشجع بجد و مستعده تاكل اللى قدامها عشان فريق

بلدها يفوز يبقى هما اللى يستاهلوا السفر

اخواننا التانيين عايزيين يسافروا يبقوا يسافروا على حسابهم و من حر مالهم

ده من ضمن اسباب المصيبه اللى حصلتلنا هناك مش السبب الاساسى

الناس دول خدونا على خوانه و بهدلونا و عملوا اللى نفسهم فيه و زياده

المطلوب دلوقتى اننا ناخد حقنا و بسرعه

لان كل يوم بيعدى بيقلل من اهميه الحدث

عايزيييييييييييييييييين رد رادع

خلااااااااااااص كرهتها

لو هيا دى الرياضه خلاااااااااص كرهتها و مش عايزه اعرفها

لو دى اخلاق الرياضيين و الرياضه مش عايزه اشوفها

كل شويه احاول افكر نفسى ان ده ماتش كوره مش حرب من اجل الشرف و العرض و

العرووووووووووبه

عشان خاطرى بطلوهاااااااااااااااااا مدام مش قدها

حاسه انها حرب بجد

حسبنا الله و نعم الوكيل

ربنا يرجع ولادنا و اهلنا بالسلامه ياااااااااااااااااااارب

شكرا ليكم مهما حصل

مهما حصل فى الماتش ده

حنفضل نقول لكم شكرا لانكم اسعدتونا كتير قوى

ربنا معاكم و قلوبنا كلها بتقول يااااااااااااااااااارب

تحبه عااااااااااده و لا مخصوووووص؟؟؟؟؟؟

طبعا اول ما تشوفوا سؤالى ده حتفتكروا انى حاعزمكم على كشرى و باسألكم شطه و لا صلصه

لا طبعا انتوا مخكم راح لبعيييييد خالص ......مش انا اللى اعزم على كشرى انا اخرى شندوتش طعميه

و من غير سلطه كمان عشان الامراض

شوفوا بقى احنا عندنا واحده قريبتنا دخلت كليه الطب السنه دى و مامتها من فرحتها بيها رفضت انها تسأل حد من القرايب

عن عظم بشرى عشان البنت تذاكر عليه تشريح و قالت اااااااابدا انا بنتى تاخد عظم مستعمل نوووووووووووو

انا لازم اجيبلها عظم عالزيرو وارد ترب بلدنا (اصل احنا عيله بتشجع الصناعه المحليه)

المهم وصت كام واحد من معارفها و قرايبها انهم يشتروا ليها هيكل كامل (ياللا شالله ما حد حوش)

الراجل غاب كام يوم و رجع لها يسألها عايزاه عاده و لا مخصوووووووص الست يا عين امها انزهلت و مفهمتش

راح مسهلها الموضوع شويه عايزاه من ابو 25 و لا 70 طبعا الست قبل ما تختار المخصوص ابو دقه و شطه

كتير و كتر الورد الراجل لحقها و قالها 25 و 70 يعنى 25000 او 70000

بصوا انا معرفتش باقى القصه و لا حبيت اعرفها لانها متوقعه انا بس اطمنت ان الست لسه عايشه

مجتلهاش سكته قلبيه و لا مصيبه تانيه

اييييه رأيكم بقى فى القصه دىىىىىىىىىىى انا شخصيا حاكتب تنازل عن جثتى بعد موتى لولادى

يتصرفوا فيها براحتهم و شوفوا بقى اذا كان شويه العظم ب70000 يبقى لو باللحم كمان حتبقى بقد ايه

شوفوا انتوا كيلو اللحمه بكام دلوقتى و احسبوها و انا من ناحيتى حكتر اكلى خالص عشان الوزن يزيد

و البيعه تبقى مجديه و اهى تفك ازمه للعيال فى زماننا الحلو بالزياده ده

سؤال و ياريت حد يقولى ايه الفرق بين العاده و المخصووووص يعنى العاده كان من عامه الشعب

موظف يعنى و لا من اولاد الشوارع و المخصوص من اعضاء المجلس الموقر و لا كان وزير سابق

مش عارفه !!!!!!!!!!! و ياريت اللى يعرف يتصل على 09009999999 و ليه جمجمه هديه

و كاااام صباااااااااااااع

كتر خيرهم و الله!!!!!!!!!!!!!!!!!!!

اولا و قبل ما انطق بأى كلمه و لا اكتب اى حرف اسمع زغروطه حلوه كده على غرار زغرطى ياللى انت مش معانا

لأن اللى حاقوله اصلا ما ينفعش معاه غير اللطم و بما انه حرام يبقى حنكتفى بالزغاريط

اولا احب اعرفكم ان مدرسه ابنى و بنتى كانت من المدارس المحترمه اللى ما اشتغلتش ايام و ايام

لأن احنا اصلا الفصل مش اكتر من 40 طفل فى العادى و انما وزعت العيال على فصول اكتر

و بالتالى ابنى و بنتى كانوا زعلانين لانهم اتفركشوا هما و اصحابهم و ضاعوا فى غيابات المدرسه

بينى و بينكم انا كنت فرحانه لأن ابنى مكانش هو اصحابه اصدقاء عاديين و انما عصابه بالمعنى الحرفى للكلمه

من النوع اللى يجبر اى مدرسه انها تنتحر و هيا مرتاحه الضمير لانه مفيش امامها حل تانى

الواد من كام يوم راجع مبسوط و مزأطط على الاخر .............فيه ايه يا وااااااااااااد؟؟؟؟؟؟؟

قال الميس قالت لهم انه خلاص حنرجع لفصولنا العاديه و بنفس الكثافه و اليوم الدراسى حيرجع يطول

تانى زى زمان و كل ده عشان فى اسيوط مفيش حالات ظهرت و احنا بقى مالناش دعوه اشمعنى احنا

اللى ميطلعش اسم بلدنا فى التلافزيون يعنى احنا اقل من القاهره و اسكندريه و لا حتى سوهااااااااج

اللى كل شويه يطلع اسمهم و يقولوا ان عندهم حالات..................

طبعا الكلام عجيييييييييييب و غرييييييييييييييييب و المصيبه انى اكتشفت ان الكلامده حيتطبق حتى على المدارس

اللى الفصول فيها 50 و 60 يعنى الكل فعلا متكاتف من اجل اظهار حالات

من يومين جت عندى الصيدليه واحده موظفه فى مديريه التربيه وا لتعليم و بسألها هما حيرجعوا المدارس

بالنظام القديم عشان مفيش حالات ضحكتو قالتلى قلبك ابيض!!!!!!!!!!!!!!!

دول عملوا كده عشان المدارس اشتكت ان معظم اولياء الامور مش راضيين يدفعوا المصاريف عشان

المدارس كده كده حتقفل و مش حيكملوا و انهم بيخلوا العيال غايبيين عشان ميدفعوش و جايبين لهم كتب خارجيه

بيذاكروا منها و خلاص..................قوووووووووووووم ايه تفتق ذهن المسئولين انهم يرجعوا الدراسه عاااااااااااادى

خاااااااااااااالص عشان الاهالى تضطر تدفع المصاريف و بعد كده المدارس طبيعى كلها حتقفل على شهر 12

اييييييييييه رأيكم بقى فى النصاحه و الدهااااااااااااااااااااااء الصعيدى دول ...اللى عايز شويه يجى يغرف

بس و النبى يبقى يجيب حلته و لا طبقه معاه عشان احنا اطباقنا و حللنا بالعدد على قدنا

بصراحه انا بعد ما سمعت السبب الحقيقى انذهلت و معرفتش اقول حاجه خاااااااااااااالص

و ادينى مستنيه الرجوووووووووووووووع الكبير و الظهوووووووووووووووووور العظيييم للحالات القادمه

و بينى و بينكم العداد و ان شاء الله تنجح اسيوط انها تمثل نفسها تمثيل مشرف فى سباق انفلونزا الخنازيييييييييير

و يحتل اسمها الصداره زى ما المسئولين عايزين

كل سنه و انتووووووا...................

كل سنه و انتوا مطلعين عينى

كل سنه و انتوا مطلعين حسى للجيران

كل سنه و انتوا مخلينى اشد شعرى من الغيظ

طبعا كلكم عرفتوا انا قصدى على مييييييييين

النهارده عيد ميلاد ابنى سيف التاسع و بكره عيد ميلاد بنتى شادن السادس

شوفتوا التنظيم ...و بكده نبقى وفرنا تورته و حفله

بس هيا فعلا جت كده لوحدها و مش مقصوده

مش عارفه الايام عدت بسرعه عجييييييييييييييبه كده ازاى

كل اللى انا فاكراه اما سيف اتولد انى كان كل املى انى انام ساعتين على بعض

و كان كل اللى يزورنى اسأله هو انا حانام امتى؟؟؟؟؟؟؟؟؟؟؟؟؟؟؟

و كان كل ما حد يقوللى عقبال ما تخاويه ابصله بقرف يعنى انا مش عارفه انام من واحد

اجيب التانى..............ايه الغباء ده

المهم عدت 3 سنين و الست شوشو شرفت بس البت يصراحه عوضتنى عن ايام

السهر و كانت بتنام بالست ساعات مره واحده و تصحى ساعه و تنام تانى تلات

ساعات لدرجه انى فكرت اعرضها على دكتور شوفتوا الهبل

المهم السنين عدت اهوا و برضه منمتش

لانى بقيت اصحى لاسباب تانيه خاااااااااالص

يعنى على كوره بدل ما تدخل الجون تدخل الاوضه و فى دماغى عدل

على خناقه على الكمبيوتر و ضرب و صريخ و عياط

سيف ضربنى ،شادن زقتنى و حاجات من هذا القبيل

بس برضه اكيد الدنيا من غيرهم كانت حتبقى غييييييير شكل يعنى مختلفه

و اكيد كنت حابقى قليله الادب و مش متربيه

لانى معاهم اتعلمت الادب و اتربيت من اول و جدييييييييييييييييييييد

كل سنه و انتوا طيبين يا قمرااااااااااااااااات

مبسوطه انى منهم

اولا كل سنه و كلكم طيبين و بخير و صحه و سعاده و كل حاجه حلوه

انا النهارده مش عارفه اكتب ايه و ازاى نفسى اكتب مبسووووووووووووووووووووووووووطه من اول البوست لاخره

انا حاكتب عن افطار المدونين صحيح متاخر اسبوع بس عذرى انى كنت عيانه من يوم الافطار و كمان معنديش نت فى القاهره

اليوم ده اتحقق فيه حلمى و شفت اصحابى اللى ارتبطت بيهم سنه و اكتر

اول اما دخلت شفت فاتيما و ده طبعا حدث مهم لان الانسانه دى فعلا طلعت و الله زى ما تخيلتها و اكتر حتى فى الشكل

انسانه طيبه و لذيذه و محترمه و متتخيلوش كم الناس اللى كانت بتيجى تسلم عليها و لا اللى كانوا بيتصلوا على تليفونات

ناس تانيه عشان يكلموها و حظى الاحلى انها كانت جنبى فى الافطار و مبطلناش ضحك و هزار انا و جوزى و سيف و

شادن ولادى اللى حبوها قوى لانها حنينه قوى بجد يارب يرد غيبه يوسف ابنها و يكون معانا فى فطار السنه الجايه

انشاء الله و كلنا كنا حريصين اننا ندعى فى الافطار ان ربنا يرجعه ليها تانى

كان معانا على نفس الترابيزه وليد عارفه مش عارف ليه اللى كان شخصيه جميله برضه و هاديه فى نفس الوقت

حكينا معاه كتير و بان من كلامه انه شخصيه متميزه جدا و طيب و ذوق جدا جدا

اللى حكايه بقى و كانت اكتشاف ليا هيا سومه مجنونه فى بلد عاقل اللى اول ما عرفت انى صيدلانيه خدتنى بالحضن

و كاننا نعرف بعض من زماااااااااااااان و مبطلناش نتكلم انا و هيا و فاتيما معظم الوقت و كان نفسى اشوفها تانى

خصوصا انها جارتى فى اكتوبر بس انا خدت انفلونزا شديده بعد الافطار ضيعت معظم الاجازه

كمان اتعرفت على مصطفى ريان شاب ثائر و هو ولد طيب قوى و مثقف و على طبيعته قوى فى الكلام

و انبسطت قوى انى شوفته برضه

شوفت كمان دعاء مواجهات و بصراحه مكنتش متخيلاها كده خاااااااااااالص بس هيا طلعت لذيذه و حبوبه قوى

و مبطلتش كلام مع الكل

كمان ميرا اتعرفت عليها هناك و كيكى عوو بس متكلمناش مع بعض كتير بس باين عليهم انهم حبوبين و شخصيات جميله

كمان اتشرفت قوى انى شوفت ايناس نهر الحب اللى كانت جايه من بورسعيد عشان اليوم ده

طبعا شوفت آبى بتنجانى اللى طلعت اكتر بتنجانيه مما كنت اتخيل بعد شخصيه تسحرك من اول ما تشوفها

من شقاوتها و خفه دمها و شعننتها بس للاسف مشيت بدرى عشان كان وراها غسيل زى ما قالت

هههههههههههههههههههههه

كمان اتعرفت على خيخه الجدعه اللى مش خيخه خالص و لا تقرب للاسم بصله متكلمناش كتير بس الجدعنه

بتبان من اول نظره و بيتحس بيها و كان معاها شاهى

شفت ناس كتييييييييييييير و قوى و عشان اتعرف عليهم كلهم عايزالى كااااااام فطار تانى عشان اعرفهم

طبعا الاكلام المخصوص قوى يبقى من حق داليا قوس قزح و خالد همس الاحباب اللى مقعدتش معاهم خااااااااااالص

مش لانهم مجوش لا بس عشان هما كانوا شايلين الليله من اولها على كتافهم و لغايه ما مشيت الساعه تسعه

ما كانوش حطوا لقمه فى بقهم عشان ينظموا قعدتنا و يطمنوا على كل حاجه ماشيه تمام التمام

و كفايه ان خالد اما عرف انى ماشيه و مكلتش الحلو بتاعى فوجئت انه جايبلى انا و جوزى و الولاد

اطباقنا لغايه عندنا و بصراحه حركه بسيطه بس بينت مدى الذوق اللى بيتمتع بيه

ربنا يباركلهم بجد لان اللى قريته عن انجازهم فى اليوم ده يخلينى اتشرف انى انتمى للناس دووووووول بجد

صحيح انا مشاركتش معاهم سواء ماديا او معنويا بس بجد بانجازهم ده اتعلمت منهم كتير قوى

ناس كتير شوفتها و اللى اتعرفت عليهم اقل من اللى موجود بكتييييييييييييييير و اكتشفت انى معرفش ناس كتير من المدونين

بس اوعدكم انى حاتابع اكتر من الاول لان الناس دى فعلا تستحق

ياااااااااااااااااااادى المصيبه

مش عارفه اقول ايه و لا اكتب على ايه بس الخبرين اتحف من بعض و نوعا ما شبه بعض

شاب و امه و ابوه اتهجموا على بنت كانت ماشيه فى الشارع مع والدتها و جردوها من هدومها و اغتصبوها امام الناس

و خلاااااااااااااااااااااااااص

واحده فى الكويت جوزها طلقها و قرر يتجوز تانى راحت مولعه فى خيمه الفرح و مشيت

صحيح 43 واحده ماتوا بس الحمد لله العروسه نجيت

بس مفيييييييييييش مشكله

فى الخبر الاول حسيت ان الخبر بيتكلم عن حادثه حصلت فى الصحرا مش فى وسط شارع

بس عينى اتخبطت فى كلمه وسط الناس و امام الماره

طيب الاخوه الماره دول محدش منهم السائل اللى بيجرى فى عروقه خلاه يتنحرن شويه و يحاول

انا باقول يحاول مش مهم ينجح انه ينقذها و يخلصها من السفله دول

المصيبه انهم عملوا فيها كده عشان رفضت الجواز من ابنهم اللى ارتكب معاهم الجريمه

و طبعا عشان ينقذ نفسه بعد كده حيقول انه مستعد يتجوزها و ده كل مناه و مبتغاه من الاول

و طبعا البنت حتكون مضطره انها تقبل بعدالفضيحه اللى حصلت دى

طب الموضوع التانى...........يعنى ايه واحده اتطلقت تروح تحرق فرح طليقها؟؟؟؟؟؟

طب الناس المعزومه ذنبها ايه انها بدل ما تفرح تموت محروقه او تقضى باقى عمرها مشوهه

ذنبهم انهم راحوا الفرح طبعاااااااااااااااااااااااااا

و فى التحقيق تقول مكنتش متخيله ان ده كله حيحصل !!!!!!!

طب كانت متخيله ايه بقىىىىىىىىىىىىىىى

مش عارفه فعلا ؟؟؟؟؟؟؟؟؟؟؟؟؟؟؟؟؟؟؟؟

المثل زمان كان بيقول كل شيىء بالخناق الا الجواز بالاتفاق

بس دلوقتى ما بقاش كده ده بقى بالخناق و نظام غصب عن عين اهلك حتتجوزينى و الااااااااااااااا

بذمتكم مش مصيبه فعلا الزمن اللى بقينا فيه ده

ياللا ما علينا ..........................

قبل ما امشى اقولكم كل سنه و انتوا طيبين و رمضان كريم و سعيد و مليىء بالحسنات و المغفره انشاء الله

عيشوا شويه مع انغام

بصراحه زى ما كان 1000 مبروك مسك الختام للموسم الصيفى

ياريت كلنا نغسل وداننا بصوت انغام الرائع اللى بصراحه مسمعتش زيه لغايه دلوقتى

و تليها بالنسبه ليا شيرين عبد الوهاب

بس احقاقا للحق حرام نظلم انغام و شريطها الرائع و نحطه فى مقارنه مع اى حد الصيف ده حتى لو كان الهضبه شخصيا

1000 مبروك من قلبى فعلا

" ان تكون الغائب الحاضر خير من ان تكون الحاضر الغائب"

بهذه الكلمات الجميله اختتم احمد حلمى فيلمه الجديد 1000 مبروك الذى يعتبر امتداد

لافلامه التى تمزج الكوميديا مع الدراما و التى تجعل المتفرج ليس مجرد متلقى

لشويه زغزغه تضحكه و يمشى و هو مش فاكر الفيلم كان فيه ايه

الفيلم مقتبس من الفيلم الجميل جداground hog day و جرى تمصير الفكره

باسلوب رائع و جميل فعلا

الفيلم بيدور حول احمد الذى يعمل فى البورصه و الذى يستعد لزفافه فى اليوم التالى

و يتعرض لحلم اثناء نومه ينتهى بموته فى حادث سياره و يصحى من نومه

ليجد الحلم يتحقق امامه و يحاول ان يغير من الاحداث حتى يتجنب النهايه المفزعه

و لكنه يفاجأ انه داخل حلم لا ينتهى و يتكرر يوميا

فيحاول ان يغير واقعه حتلى يتجنب الاشياء السلبيه ليكتشف اثناء حلمه

سلبياته التى لم يكن يراها من قبل من انانيه و حب للذات و سلبيه جعلت اهله

لا يشركونه معهم فى مشاكلهم و لا مشاعرهم و لا اسرارهم و جعلت اخته تخاف منه

و لا تحبه و تخفى عنه مجرد انها فتحت الكمبيوتر بتاعه و استخدمت النت

و انها تحب صديقه المقرب

يستيقظ احمد فى النهايه و يبدأ تغيير الواقع الحقيقى و الاقتراب من اهله

و لمس مشاعرهم و الاعتذار بشكل ايجابى عن اخطاء الماضى

ظهر ده بوضوح فى مشهده مع اخته اثاء مشاهدته لفستانها الجديد

كانت مشاعره جميله و رقيقه و حنونه مع اندهاش اخته الشديد منه و لكن

مع حنانه الواضح بدأت تتكلم معاه و تسأله ايه رأيك فى المكياج

بل تمادت و اعترفت له بحبها اللتى كانت تخفيه عنه

نهايه الفيلم كانت مأساويه صحيح و لكن كانت توضيحيه لمدى تغيير البطل و ان كان

مبالغ فيها

الفيلم فعلا جميل و احمد حلمى عمل شغل حلو فيه فعلا و يحسب له انه استعان بوجوه جديده

كثيره فى الفيلم ان لم يكن كلهم لانى فعلا معرفش اسم و لا حد منهم

جميل قوى ان الانسان تجيله فرصه انه يغير من نفسه للاحسن حتى لو فى اخر لحظه

بس الوحش انه ميمسكش الفرصه دى و يسيبها تهرب منه لان الحياه فعلا قصيره

و جميل قوى ان الانسان يسيب ذكرى حلوه ليه و هو غايب عن انه يكون موجود بس

مالوش اى اثر ايجابى

1000000 مبروك يا حلمى مش 1000 بس