الأربعاء، 31 مارس 2010

عيون




اعرف عيون هيا الجمال و الحسن

و اعرف عيون تاخد القلوب بالحضن

و اعرف عيون مخيفه و قاسيه

و عيون كتيره باحس فيهم كلهم بالحزن


و عجبى




صلاح جاهين

السبت، 27 مارس 2010

هيا فعلا كيميا






على طول الحياه.........بنقابل ناس

و نعرف ناس..........و نرتاح ويا ناس عن ناس


عبد الحليم قالها زمان

و بصراحه هيا فعلا حقيقه

كتير قوى نقابل ناس لاول مره فى حياتنا

و من اول مقابله بينا و بينهم بتحصل كيميا ايجابيه

ايجابيه دى معناها اننا نحس ان الناس دى نعرفها من زمان

و نلاقى الكلام بيننا و بينهم بقى كلام من القلب

من غير نفاق و لا زواق و لا مجامله

كلام طبيعى مش متظبط و لا متنظم

نحس انهم حد قريب قوى

مع انهم كانوا اغراب من دقايق قليله

و خلال فتره قليله قوى بيبقوا قريبين مننا جدا

و غاليين عندنا و عزاز علينا

و نحس بغربه ووحشه اما منلاقيهمش جنبنا

و ندور عليهم فى وقت شدتنا

و طبعا بنلاقيهم دايما قريبين مننا وواقفين جنبنا

اكتر من اهلنا و ناسنا



و ساعات بقى العكس هو اللى بيحصل

نقابل ناس تحصل بينا و بينهم كيميا سلبيه

يعنى بمجرد ما نقابلهم بتحصل قفله

يعنى بالعربى كده بيحصل تنافر و تباعد

من غير مبرر او سبب واضح

و مهما حاولوا و حاولنا نقرب و نتكلم

مش بنلاقى فايده خاااااالص

قفله بمعنى قفله



الحالتين ممكن يحصلوا لاى حد و مع اى حد

بدون مبرر او سبب

يعنى مش عيب فيا او فيك

و لا ميزه فى حد و مش موجوده فى التانى

هيا بس

مجرد كيميا







الأربعاء، 24 مارس 2010

لحظه صدق





استيقظت من نومها على مداعبه اشعه الشمس لعينيها


كانت قد نامت فى الامس دامعه العينين باكيه


اثر نقاش حاد ادى الى مشاجره بينها و بينه


لم يكن الشجار بالشيىء الجديد عليها


و لكنها عندما استيقظت وجدت


اثار دموعها مازالت تبلل وسادتها


كانت تشعر انها مريضه لا تقوى على الحركه


فهى عندما تكون حزينه تشعر كأن هناك


من يكسر فى عظامها و يمسك برقبتها


فيخنقها و يفقدها القدره على التنفس




عندما فتحت عينيها وجدته قد استيقظ قبلها كعادته دائما

و ان كان حريص كل الحرص على غير عادته على ايقاظها

ربما بسبب شعوره بالذنب على ما حدث بالامس

و ربما لادراكه انها لم تنم حتى الصباح من شده التوتر و الغضب



حاولت ان ترسم ابتسامه كاذبه على وجههاو هى تلقى عليه تحيه الصباح

لكنها لم تستطع فهى دوما لم تكن تستطيع ان تظهر عكس ما تشعر


اما هو فقد كان يحاول ان يتكلم معها كأن شيئا لم يكن

محاوله منه ان ينسيها ما حدث بالامس

و كأنه يعتذر بطريقه غير مباشره



سارت فى طريقها للخروج من الغرفه و اثناء مرورها اصطدم

وجهها بالمرآه

نظرت لها بدهشه بالغه و كأنها تتساءل من تلك التى تنظر لى

كأنها تنكر معرفتها لهذا الوجه الحزين المتجهم

تساءلت لماذا؟؟؟؟؟؟؟؟؟؟؟؟

لم اكن يوما حزينه !!!!!!!

فى احلك ظروفى و اقساها كنت دائما متفائله و اضحك

و استهين باحزانى و اعلو عليها و ساعات كثيره اسخر منها




سرحت فى مرآتها و تساءلت

هل الفراق هو الحل؟؟؟؟؟؟

هل التضحيه بايامنا الجميله المشتركه شيىء سهل

كانت تتذكر لحظاتهما الجميله سويا

اول لقاء بينهما

اول لمسه حانيه منه

لحظه احتضانهما لاول طفل لهما

فرحهما سويا بكلمه ماما و بابا منه

لحظااااااااااااااااااات كثيييييييييييييييييييره

من الصعب نسيانها

لحظاااااااااااااااااااااااات كفيله ان تجعلها تتمسك بحياتها

و لا تهدمها فى لحظه غضب


مضى من الوقت دقااااااااااااااااااااائق سرحت فيها مع ذكرياتها

افاقت من غفوتها على صوت طفلتها تناديها

ماما

لحظتها فقط ابتسمت ابتسامتها الساحره و اشرق وجهها بالسعاده

و احست ان هذه حياتها و لا يمكن ان تعيش غيرها

ففى نفس الوقت كان زوجها قد اقترب منها و احتضنها

قائلا

سامحينى

السبت، 20 مارس 2010

ربيه بدل ما تسيبيه








النهارده يا جماعه كلامنا حريمى شويه كتييييييير

بس برضه الرجاله ممكن يأنسونا و يتفضلوا معانا

البنوتات الامورااااااااات اللى معانا هنا

الكلام النهارده ليكم انتوا اكتر



لو حضرتك بتحبى وواقعه فى الحب لشوشتك

و اللى حضرتك بتحبيه

بيحبك ........اه

بيموت فيكى...................اكييييييييييييد

بيعشق التراب اللى حضرتك بتمشى عليه..........................و ماااااااااااله

طول النهار بيشعر فيكى و هاريكى قصايد من الغزل العفيف و الغير عفيف........................و ايه يعنى


بس رغم كل ده الباشا عينيه زايغه

يعنى تبققى بتبصى على فستان فى فاترينه و تلاقى عينيه لفت على اول سنيوره معديه قدامه

لما تدخلوا مع بعض اى مكان تلاقى نظراته ماشيه مع الفساتين اللى معديه


طب ايييييييييييه بقى؟؟؟؟؟؟؟؟؟؟؟؟؟؟

يا ترى حتتعاملى معاه ازااااااااااااااااى؟؟؟؟؟؟؟؟؟؟؟؟؟؟؟

حتعملى نفسك مش واخده بالك و تطنشى خاااااالص حفاظا عى كرامتك


و لا حتمسكى فى رقبته كل ما تلاقيه بيبص على واحده و تعمليله جرسه و فضيحه كل شويه

و تتمنى لو معاكى مسمار عشره سنتى تدبيه فى عينيه الاتنين


انا عن نفسى باحس ان الراجل اللى زى ده راجل غلبان آخر حاجه

و يا حرااااااااااام مكشووووووووف على الاخر فى كل تصرفاته

طب بذمتكم لو هو من النوع الخبيث مش كان يعرف يدارى تصرفاته

بالعكس دى كل حركاته و تصرفاته واضحه و على عينك يا تاجر

ومن وجهه نظرى المتواضعه ان الراجل اللى زى ده بقى كده

عشان ملقاش ست تحتويه و تحبه بطريقه مختلفه و متميزه

تخليه ينسى الدنيا كلها و يبقى معاها هيا و بس




طب يا ترى الحل اييييييييييه؟؟؟؟؟؟؟؟؟؟؟؟

معتقدش انك حتغمى عينيه بايشارب و تمشى فى الشارع جاراه من ايده عشان ميبصش لحد

الحل انك لازم تتكتكى و تفكرى و تدبرى كويييييييس قوى

ازاى تلفتى نظره ناحيتك انتى و بس بكل طريقه و اى طريقه ممكنه و مستحيله كمااااااااااااااان

و طبعا الطريقه حتختلف من راجل لتانى و كل واحد حسب شخصيته و اهتماماته

يعنى بيحب الاغانى احفظى يا ستى الاغااااااااااانى كلها و افضلى غنيله طول النهار

بس ابعدى و النبى عن اغانى شعبوله عشاااااااان العكوساااااااااات

بيحب السفر و الرحلات و الخروج سافرى و اخرجى و اجرى معاااااااااااه لغايه ما تقعى انتى

و هو من طولكم من التعب

بيحبك هاديه و ساكته و ماااااااااااااله اسكتى

بس السكوت اللى من دهب مش السكوت السلبى العبيط اللى يخنق و يغيظ

لكن اهم حاجه لا تراجع و لا استسلاااااام


لازم تتعبى عشان تحافظى على حبك يا بت انتى و هيا

مش عيب ان عينيه زايغه

مش عيب انه شقى و بيحب التغيير

العيب انك تستسلمى و تسيبى اللى بتحبيه عشان عيب بسيط زى ده


طب تصدقوا بالله انا باحس ان العيشه مع راجل زى ده حتبقى لذيذه قوى

لان الست اللى حتعيش معاه حتبقى عينيها فى وسط راسها

و على طول مهتمه بنفسها و بتدور ورااااااااااااه و بتلف معااااااااااااه

عشان مش يبص كده و لا كده



و ساعتها لا حتحس بفراغ و للا ملل

بالعكس حتبقى حياتها


تشويق و اثاره و متعه

الجمعة، 19 مارس 2010

كل سنه و انا و انتوا و هما طيبين+تحديييييييييث



تحدييييييييييييييييث مهم



بعد فرز اوراق التصويت و فى اطار من الشفافيه اللا متناهيه

نعلن الان نتيجه مسابقه الام المثاليه للمدونين و المدونات

و قد اسفرت نتيجه التصوييييييييييييييت عن فوز فاتيما هانم باللقب

و بصراحه يا تيما انتى تستاهليها بجد

انتى حد جميل فعلا

و تستاهلى مننا كلنا كل حب و تقدير

لانى باشوفك فعلا زى الام اللى بتلم ولادها كلهم

و بيفضل البيت مفتوح بحسها طول ما هيا عايشه

باحبك يا امى








انا النهارده طبعا حتكلم عن عيد الام

الام طبعا كلنا عارفيين فضلها علينا و مش محتاجه كلام

لان اى كلام بجد حيبقى مكرر و مش جديد

انا النهارده حاتكلم عن نفسى و عن الناس اللى قابلتهم فى حياتى

و حسيت ان كل واحده منهم امى بجد بعد امى الحقيقيه

و بصراحه كلهم اتعرفت عليهم هنا و بيننا

يعنى مدونين فى وسطنا

او بالاصح مدونات

استفددت منهم و اتعلمت

اخدت منهم نصيحه جميله

طبطبوا عليا فى وقت كنت محتاجه فيه للطبطبه

عقلونى بكلامهم الجميل اللى كنت باقراه عندهم او بكلام مباشر منهم

طبعا لو حاتكلم عن امهات التدوين بالنسبه لى

اولهم طبعا




ماما فاتيما

معلش بقى حاكبرك شويتين بس والله ده اللى انا حاساه

و اذا كان ربنا خد منك يوسف و حرمك منه

فاعتقد انه اداكى بداله ناس كتير قوى بتمووووووت فيكى و بتحبك

و ده كان فى مصلحتنا احنا قبل ما يكون فى مصلحتك

انا باحبك قوى يا تيما و متخيلش يوم فى دنيتى من غيرك


ماما ستيته

مفيش مره دخلت عندك الا و استفدت حاجه جديده

مفيش مره اتكلمت معاكى الا وسكت خالص عشان استفيد من كلامك

مفيش تعليق قريته ليكى فى اى مدونه الا و اتعلمت منه حاجات و محتاجات


ماما داليا قوس قزح


اتعلمت منك ازاى اقرا اللى بين السطور و انى اتعلم احكم على الناس صح

و انى اسمع نصيحه الناس حتى لو حتضايقنى فى الاول بس اكيد حاستفيد منها فى البعيد

انتى وحشتينى قوى يا دوللى و كل سنه و انتى طيبه




واحده مفروسه

انا بحبك بجد و مش عارفه انا اتعلمت منك ايه بالضبط

بس انا بحبك و باحترم رايك ووجهات نظرك فى كل نواحى الحياه


اصغر ام ليا بقى البت البنوته زهراء



محللتى النفساويه اللى بحبها و باموت فيها

و دى اجدد صديقاتى بس بجد اتعلمت منك كتير قوى و شكلى لسه حاتعلم منك اكتر و اكتر

بس انتى بجد حد عاقل قوى قوى فى دنيا كلها مجانين

ربنا يكرمك بجد و يديكى اللى تتمنيه



انتوا بقى مين الشخصيه اللى قابلتوها

فى حياتكم و حسيتوا فيها انها ام تانيه بعد الام الحقيقيه

عايزاكم تحكوا عنها و ازاى استفدتوا منها

و ايه اللى خلاكم تحسوا معاها بالامومه



كمان عايزاكم تختاروا الام المثاليه للمدونات كلها

كل حد يجى يقول هيا مين و سبب اختياره ليها ايه



اسيبكم انا تحكوا و ترغوا براحتكم خالص

و مستنيه اشوف كلامكم كله

كل سنه و انتوا طيبين

الجمعة، 12 مارس 2010

اخييييييييييرا عينى رشقت



بصوا بقى انا معترفه انى حقوده و شريره و نفسيتى سوداااااااا على الاخر

انا النهارده جايه و الشماته ماليه قلبى على الاخر

امبارح ماسكه الجرنان ابص فيه و مش لاقيه غير الاعلانات الممله

باضرب بعينى الاقى عنوان راااااااااااااااائع

قال ايه كارلا برونى بتنفى ان ساركوزى خانها

لوووووووووووووووووووووووووولى

طالما نفت الموضوع يبقى حصل يا معلم و حتلعب يا حمااااااااااااااده



اخيرا شهر العسل بين كارلا هانم و ساركوزى باشا خلص

و ان شاء الله حنقعد جنب الحيطه و نسمع الزيطه

طبعا كل النشرات الاخباريه ووكالات الانباء جابوا الخبر

و غالبا شمتانين زيى و اكتر

و بيتسابقوا عشان يلتقوا بكارلا هانم و يشوفوها و هيا مكسوره و زعلانه

و المذيعه سألتها الا قوليلى يا اختى و احنا ستات زى بعضينا و متتكسفيش

الا صحيح سى الاوستاذ بتاعك بص بره و بيعاكس البت شفيقه بيئه الفرنساويه

انا يا اختى مشفتش حاااااااااااجه دى الناس هيا اللى بتقول و انتى عارفه بقى كلامهم كتيييييييير

راحت كارلا هانم بصتلها و رمت شويه الشعر لورا و العرق الايطالى نقح عليها

و قالتلها نوووووووووووووووووووووو

جوزى زى الخاتم فى صباعى و عمره ما يبص بره لانه مش ملاحق على اللى جوه

و بعدين احنا متفقين ان العصمه فى ايدى و اى غلطه بوكس و على الشارع

و الشقه من حق الزوجه

امال انا خدته مصر قبل كده ليييييييييييه عشان اتعلم منهم النصاحه الحريمى على اصولها

و بعدين انا طول عمرى مروضه رجال و عدى عليا اللى يضرب ساركوزى ده بالشوز الاولد

بس النفس بقى و العين اما تعمى



المذيعه ردت عليها بس المفروض يا اختى متاخذنيش يعنى تفكرى و تفهمى

اللى يسيب ام عياله بعد ما وقفت جنبه و كبرته و خلته رئيس لفرنسا

و يروح لحته بت معصعصه متزعليش منى بس دى الحقيقه يعنى

يتخاف منه و معروف انه مالوش امان

و لا ايييييييييييييييييييييييه؟؟؟؟؟؟؟؟؟؟؟؟

و بعدين يا اختى المفروض تكونى عرفتى مدام روحتى مصر

ان ديل الكلب عمره ما يتعدل و لو علقوا فيه قالب

و المفروض برضه تفضك من حكايه الازياء و الاغانى و المسخره اللى انتى فيها دى

و تهتمى بالاستاذ بدل ما يبص بره و تبقى جرسه و فضايح

انا يا اختى بانصحك و انتى و دماغك بقى



هههههههههههههههههههههههههه

ده كان الحديث التخيلى اللى تخيلته بعد ما قريت الخبر

و طبعا كان بالفرنصاااااااااااااوى و طلعت عينى عقبال ما ترجمته

انا اصل الست دى كانت غايظانى على الاخر تقولوا حقد تقولوا غيره

قولوا زى ما تقولوا

المهم انى فرحانه فيها

و شكلها حتنسى الغنا و الرقص و تتهد و تتجه للسياسه

زى صاحبتها هيلارى كلينتون

و بكره نشوفها وزيره خارجيه قد الدنيا


و مش بعيد تتحجب و تقعد فى البيت



كانت معكم لولا هانم الشريره من امام المجلس القومى لحقوق المرأه الفرنسي