الأحد، 31 يناير 2010

جانا الهوا جانا....جدو خلص على غانا




ووووووووووووووووووووووووووووووووووه

هييييييييييييييييييييييييييييييييييييييييييييييييييه

مبروووووووووووووووووووووووووووك

و الكاس بقى معااااااااااااااناااااااااااااااااااااا


جانا الهوا جانا.....................و خلصنا على غانا


و احب اهدى الاغنيه دى للدكتور علاء صادق

و كل اللى زيه


مبروك لينا كلنا

الخميس، 28 يناير 2010

عملوها الوحووش......ياريتنى كنت معاهم

تحديث اهم من اللى قبله



الف مبروووووووك للرفيقه نيجيريا على احرازها المركز التالت لسابع مره



و هاااااااااارد لك للشقيقه الجزائر و الحمد لله برضه على المركز الرابع


و اهو احسن من مفيييييييييييييش






تحديييييييييييث مهم

ياريت الاخوه الفنانين اللى خافوا يروحوا يشجعوا مصر فى ماتش الجزائر

مش عايزين نشوفهم بقى خااااااالص فى ماتش غانا لاننا قرفانين منهم

و كفايه علينا الرجاله الموجوده هناك من الاول



و الله ما لقيت احلى منك احط صورته


تسلم و تعيش يا ابو كريم يا جميل


كل الماتشات اللى فاتت كووووووووووم و النهارده كوم لوحده


كل اللى حيحصل بعد كده مش مهم


المهم اللى حصل النهارده



عملوها الوحوووووووووووووووووش...........عملوها الابطاااااااااااااااال




ياريتنى كنت معاهم


مبروووووووووووووووك يا مصر




الأربعاء، 27 يناير 2010

للاسف صح


انضم الفنان الجميل ذو الصوت الاجمل محمود ياسين





و الفنانه الرقيقه هند صبرى الى حمله جمع التبرعات لضحايا زلزال هايتى


حد لمض يجى يقولى قصدك جمع التبرعات لضحايا السيول فى اسوان و سيناء

اقوله لا يا خفيييييييييييف

ضحايا هايتى




و لا تعلييييييييييييق

الاثنين، 25 يناير 2010

منتخبنا فريق الاحلام






مبروك لفريقنا الرائع الفوز الكبير النهارده


مبروك علينا و لينا الفرحه


فريقنا بجد يستاهل انه يفرح


ياريت كل اللى شتم و غلط فى فريقنا


ينقطنا بسكاته شويه


ياريت كل اللى غلط فى الحضرى يرجع يعتذرله و بسرعه


طبعا لغايه الماتش الجااااااااااااااااااااى



ياريت كل الدكاتره و البشوات و اللواءات و الجهابزه خبراء الكوره



فى الوطن العربى



يتكتموا شويه و كفايه اللى جرى





الجمعة، 22 يناير 2010

و انضمت آبى .....اخيييييييييرا






اى حد ممكن يتخطب و يتكتب كتابه عااااااااااااااادى جدا

و طبعا المفروض ان احنا اللى نتصل نباركله

لكن اما العروسه تتصل بيا عشان اباركلها دى بقى ساعتها

متبقاش غير


آبى الجميله

دايما كنت اقولها امتى تتدبسى زينا عشان اشمت فيكى

و بصراحه البت كانت روحها رياضيه و اتصلت بيا

عشان اشمت فيها

و انا من هذوها المكان بقولهااااااااااااااااااا



مبرووووووووووووووك يا قمره

و الحمد لله المغفلين زادوا اتنين


البوست القديم شغااااااااااااااااال زى ما هو بس مينفعش منباركش للقمر

الأربعاء، 20 يناير 2010

بلاها ناديه ......خد اليسا






طبعا كلنا سمعنا شريط اليسا الجديد انا عن نفسى حاسه انه حيكون البوم 2010


الا اذا انغام حبت تنكد عليها و تنزل البوم جديد ساعتها لو انغام غنت ريان يا فجل


حتبقى الاحلى تعصب بقى لبنت بلدى و اللى مش عاجبه يقول


احلى حاجه فى اليسا السنه دى هى الحالات الجديده اللى بتقدمها فى الاغانى بتاعتها


لا و ايييييييه الصراحه المتناهيه


يعنى من اول الشريط و بتحلف للباشا بتاعها انه وحشها فى يومين بس وحشه سنيييييييين


و يظهر انه معبرهاش راحت مغنياله عبالى حبيبى و فضلت تحكيله انها حتدلعه و تهننه


و تلبسله الابيض و الشفتشى و توريه من اصناف الدلع كل شى بس يكتب عليها


و الناس تعرف و ساعتها حتلبسله الابيض و تبقى ليله


و يظهر انه اتغاظ من الزن بتاعها راح هابدها كف على ام وشها


تسكت اليساااااااااالا طلعت علينا تعيط و تنوح انه عمال يصالح و يتاسف و يبوس الايادى


عشان تصالحه و تسامحه بعد ما ضربها و هيا على كلمه واحده


ماخدووووووووش يا بابا وشكلها حتمووووووووت عليه


و شويه و لقيتها كشفت راسها و بتدعى عليه و بتقول امرى لربى و هو عطول


بياخدلى حقى و مهما يطول


طبعا الشريط فى كام اغنيه تانى فى النص و بعدين افتكرت بصرااااااااااحه و الحق يتقال


اغنيه تحفه بجد قمه الرومانسيه و الاداء بتاع اليسا فيها رائع


ندخل بقى على الاغنيتين اللى عاجبنى اكتر حاجه


بيستحى طبعا اغنيه فى نظرى جميييييييله قوى


بس المشكله ان الواد هو اللى بيستحى و الست اليسا عماله تجر الكلام


من بقه مش طالع طفت النور عشان يحكى فى العتمه و الواد يا عين امه


لساااااانه متلجم مش قادر ينطق


قمه البجاحه الصراحه


بناااااااات اخر زمن


ههههههههههههههههههههههههههههههههههههه


بعد كل اللى حصل فى الالبوم كله الواد طلع ندل و صايع و سيحلها فى المنتقه


و الشارع كله و قالهم يا ناس دى بت


بارده و رزله و مالهاش لازمه


و طلعت ياروح امها تعيط و تقوله مصدومه............بجد


و بعدين يعنى مش يستر على البنيه و بلاش التسيييييح ده


بس هيا برضه اغنيه جديده فى قصتها و اسلوبها و من احلى اغانى الالبوم







من كل اللى قلته نطلع بايه على رأى خيخه


ان اليسا كبرت و عقلت و فهمت


و عاااااااااااااااااايزه تتجوز او بالبلدى كده بتدور على عريس


و اللى شايف نفسه كفاءه يعنى و يقدر يستر البت و يستتها و يهننها


يتفضل و له الاجر و الثواب عند الله

الثلاثاء، 19 يناير 2010

حتى انت يا نظيف!!!!!!!!!!!!!!!!!!!!!!

طالعتنا امبارح وسائل الاعلام المحليه و الدوليه المنوفيه منها و الدمياطيه

ان احمد نظيف كبير الوزراء عندنا حيكتب كتابه الشهر الجاى و الدعوه عامه و حتبقى لمه

مبرووووووووك يا سيدى و عقبال البكاااااااارى

لووووووووووووووووولى و الشربات عليا

اللى حارقنى فى الموضوع ان السنه اللى فاتت زى دلوقت تقريبا

كان فى لقاء فى التى فى و دموعه سالت انهااااااااارا على فراق المرحومه

اللى كانت زوجته و حبيبته و شريكته فى الكفاح

اللى شالته و استحملته ايام القفر الدقه لغايه ما بقى الباشا الكبير

يقووووم كل ده يروح فى سنه واحده لا و يعلن فى التلفزيون و الجرايد

و يجيب لعياله مرات اب تذلهم و تكسر نفسهم

طبعا الكلام ده بما انه انطبق على نظيف اكيد دى نظريه البشوات بتوعنا احنا كمان

كل واحد من الرجاله اللى تموت ستاتهم من تانى يوم يبدأ يحلم بمراته و هيا لابسه ابيض فى ابيض

و انها فى الجنه و نعيمها و بالتالى اما يشوفها فى المنام تبقى رؤيا على طول

يومين كمان و يبدأ يحكى انها جاتله فى المنام و سألته عامل ايه يا سبعى من بعدى

و مين بيأكلك انت و العيال و مين بيحميهم و مين بيفليهم

و مين بيحطلك القطره فى عينك قبل ما تنام

و انها مشيت من الحلم و الدمعه فاره من عينها

كام يوم تانى الفقيده تجيله فى المنام و جايبه معاها صوره لواحده اول حرف من اسمها عدلات

جارتهم اللى عينه منها من زمااااااااااااان و الحمد لله انزاحت الغمه دلوقتى و مبقاش فيه مشكله

طبعا كل يوم حلم و طبعا دى رؤيه و الرؤيه امر من فوووووووووق

على الاربعين يكون هو بقاله اسبوع متجوز و المدام جاتله برضه و قالتله بلاش تطلع عليا القرافه يا خويا و انا عندى كل حاجه

و خلى فلوسك لمراتك و عيالك

و خلااااااااااااااااااص اتنست الغلبانه و ربى يا خايبه للغايبه

بذمتكم مش ده السيناريو بتاعكم كلكم مش نظيف بس!!!!!!!!!!!!!!!!!

السبت، 16 يناير 2010

امشوا ورايا و رزقنا على الله

بما انى نكدت عليكم البوست اللى فات كان لازم البوست ده ارجعلكم بمشروع يفيدنا كلنا

من كام يوم قبضواعلى عصابه للمتسولين فى الازبكيه كانوا 25

شخص من ستات و رجاله و اطفال و الست منى الشاذلى الله يكرمها جابت فى البرنامج

كراسه الحسابات بتاعه البيج بوس بتاعهم

الكراسه مليانه حسابات و ارقام اقل بنت من الشحاتين بتجيب فى اليوم 200 جنيه

واخدين بالكم انتوا و غيروا و لا تحسدوا حضاراتكم

فيه بنات فى اليوم الواحد بيجيبوا 900 جنيه و الف جنيه

الباشا كان بيحط فلوس الشحاته فى مكاتب البريد و كل يوم فى مكتب عشان

محدش يكشفه و لا يشك فيه و حسابه فى فرع واحد بس 400 الف جنيه

ده غير باقى الفروع

فى اليوم الواحد كان بيحط فى حسابه 4000 جنيه بعد خصم الاكل و الشرب

و تمن ادوات التنكر و ايجار الكراسى المتحركه من الاخر مشرووووووووووووع

مربح جدا

و من هذا المنطلق انا قررت اقفل الصيدليه و افتح مركز شحاته معتبر

و حاضم فيه النوابغ من مختلف التخصصات عشان منبقاش محتاجين حد من بره

و بوجه ندااااااااااااء لكل طبيب و صيدلى و مهندس و كل واحد حب و لا طالشى

قصدى اتعلم و لا اشتغلشى او اشتغل و مخدشى انه ينضم للفريق بتاعى

و متخافوش حدلعكوا على الاخر يعنى الاكل من التابعى او جاد يعنى معتبر

على الاخر اصل لو جبتلكم من كنتاكى حنلفت الانظار و حنثير شكوك احنا فى غنى عنها

على الاقل فى المرحله الاولى

و على كل من يرغب فى الانضمام يجى و يسجل اسمه و مقاس الهدوم و الشوز

اماااااااال عشان يونيفورم الشحاته يبقى مظبوط

انا احب اللى يشتغل معايا يبقى على سنجه عشره و متنسوش لو اتمسكنا حتبقوا فى وشى

و محبش حد انا ياكل وشى و يعايرنى بموظفينى

مستنيه تملوا الابلكيشن و تنضموا

ملحوظه:سعر الابلكيشن 100 جنيه و الانترفيو هيعمله معاكم العميد ميكليتو طبعا

من منطلق ادى العيش لخباااااااااااازه

و رزقى و رزقكم على الله

الاثنين، 11 يناير 2010

مخنوووووقه........بجد

مخنوقه و قلقانه جدا و طبعا عارفه ليه .......بس مش مهم السبب لانى مش هنا لمناقشته

لو الواحد فى اى وقت مات ده طبعا شيىء وارد و ممكن فى اى وقت الموت الحقيقه

الوحيده فى حياتنا بعد الميلاد و الانسان مش حيخلد فى الارض غير باعماله

طيب واحده زيى عندها اطفال صغيرين حتخاف من ايه؟؟؟؟؟؟؟؟؟؟؟

باخاف ولادى يصحوا من نومهم ينادوا عليا و ميلاقونيش

باخاف يبقوا عايزين يفطروا و ميلاقوش حد يفطرهم

باخاف بنتى تبقى عايزه تغير هدومها عشان تروح المدرسه

و تسرح شعرها و برضه تدور عليا و متلاقيش رد

باخاف تيجى الامتحانات عليهم و ميلاقوش حد يقولهم ذاكروا يا عيال

باخاف يبقى فى خطر من اصحاب وحشين ممكن يضروهم و ميلاقوش حد ينصحهم و يزعقلهم

و يضربهم كمان عشان مصلحتهم

بخاف حد يزعلهم و دموعهم تنزل و ميلاقوش حد يحضنهم و يمسح دموعهم

بخاف يبقى نفسهم فى حاجه و يتكسفوا يقولوا لحد عليها

بخاف اصحابهم فى اى وقت ميبقوش اصحابهم ..........ازاى يعنى مش عارفه

بخاف....بخاف .....بخاف

انا عارفه ان باباهم موجود ان شاء الله لو انا اختفيت

بس بصراحه الاب حاجه و الام حاجه تانيه خالص

انا مش خايفه من الموت و الله ..........انا بس خايفه عليهم من بعدى

الجمعة، 8 يناير 2010

اين انتى يا لووووووووولى





لولى ده اسم الدلع بتاع ليليان طبعا حينط حد منكم و يسألنى تطلع مين ليليان دى؟؟؟؟

ليليان دى صديقه عزيزه عليا جدا من صديقات الطفوله

طبعا من اسمها باين انها مسيحيه اتعرفت عليها و انا فى اولى اعدادى و استمرت

صداقتنا لغايه ما خلصنا كليه صيدله هيا سقطت سنه و انا كملت على طول

طول الفتره دى و احنا اصدقاء قوى و قريبين جدا من بعض

ايام الاعياد سواء عيد الميلاد او القيامه كنا بنغيب زيها من غير ما تبقى اجازه رسمى

و ايام اعيادنا كانت بتشترى هدوم جديده و شوز جديده و تخرج معانا

كل ايام العيد و كانها واحده مننا بتعيد زينا بالضبط

ماكناش نعرف مين مسلم و مين مسيحى غير من شويه براويز على الحيطان

اللى عنده صور يبقى مسيحى و اللى عنده قرآن يبقى مسلم

فاكره قوى لغايه دلوقتى ساعه حفله المدرسه و كنا مع بعض فى المسرحيه

و خدتنامعاها البيت و طلعت رنجه من التلاجه و قعدنا نشويها على البوتجاز

و اكلنا مع بعض و رجعنا المدرسه و طبعا الرنجه اشتغلت و بدأ النوم و التناحه

تحل علينا كلنا و الاستجابه بتاعتنا بقت صفر

و كل اللى يسألها عملتى فيهم ايه تضحك و نضحك كلنا معاها بس ضحك ببلاهه كده

كلنا طبعا عارفينه

دخلنا الكليه مع بعض و فى المدينه الجامعيه عرفنا يعنى ايه اديان مختلفه

اما لاقينا اداره المدينه بتخلى المسيحين منفصلين عن المسلمين ليه مش عارفه

بس فضلنا اصحاب و نتقابل و احنا نازلين و احنا راجعين

فى وقت الاكل و طبعا فى اوقات السفر كنا بنبقى عصابه كبييييييييييره

فيه اللى بيسبقنا من القاهره و المنيا و اللى بيركب من اسيوط و اللى بيحصلنا من قنا

ايااااااااااااااام فعلا تحفه و مش حتتكرر

مفتقداكى يا لوووووووووولى جدا

آخر حاجه عرفتها عنك انك اتجوزتى الولد اللى كان بيحبك من ايام ثانوى

و كنتى قارفانا بانك مش طايقاه رزل و الله غلس هو فاااااااااكر نفسه مين

و فى الاخر طلعتى مقرطسانا كلنا و اتجوزتيه و معرفتش طبعا اخلص تارى

منك لغايه دلوقتى لانى ببساطه مش لاقياكى و لا عارفه اوصلك

وحشتنى جدا و مش عارفه الاقى زيها تانى

و مش قادره اقول غير الله يرحم الاب و الام و يجازى الاب و الام بالخير

اللى قدروا يطلعوا ولادهم كده

الحكايه دى موجهه للى بيقول علينا قال ايه بنكره بعض

كل سنه و احنا كلنا طيبين و مع بعض