الأحد، 25 مايو 2008

استرها معانا يارب



من كام يوم كده و انا فى المطبخ زى كل يوم و مشغله الراديو سمعت تقرير منظمه الاغذيه العالميه


و البنك الدولى عن ازمه الغذاء و اللى للاسف مش عندنا بس لا دى فى العالم كله


المنظمه حذرت ان مخزون الغذاء العالمى اصبح يادوب يكفى العالم كله خمسين يوم بس اذا تمت عداله التوزيع


يعنى اذا كل واحد فى العالم خد نصيبه زى التانى و ده طبعا مش بيحصل


كمان قالوا ان 37 دوله معرضه خلال الفتره القادمه لمجاعات شديده و ده فى اغلب الاحيان بيؤدى الى حروب طاحنه


من اجل الغذاء و الماء


التقرير ذكر ان الارتفاع العالمى الشديد فى اسعار الاغذيه هو احد الاسباب الرئيسيه لهذه الازمه الطاحنه


حذر التقرير ايضا من المضاربه فى اسعار الاغذيه و التى تؤدى حتما الى ارتفاع الاسعار اكتر و اكتر و تؤدى الى


التلاعب بمقدرات الشعوب اللى هيه مش ناقصه اصلا


حذروا كمان الدول الصناعيه الكبرى اللى بدأت التغلب على مشكله ارتفاع اسعار البترول بأنها تنتج وقود حيوى


و ده بيكون عن طريق المحاصيل الزراعيه زى القمح و الذره و ده طبعا ادى الى نقص هذه المحاصيل و ارتفاع


الاسعار و خلى معظم الدول الفقيره مش قادره تشتريها


ايه رأيكم بقى بعد كل ده مش حاسيين ان بطنكم كركبت و لا حاجه انا شخصيا سمعت الكلام ده من 4 ايام


و من ساعتها و انا مصره اكتبه فى بوست


يا جماعه احنا لازم فعلا نرشد استهلاكنا جامد جدا يعنى نقلل استهلاكنا من العيش و الرز و المكرونه


و الحاجات اللى مش مهمه قوى بلاش منها و نحاول نستغنى عنها


انا شخصيا كنت ساعات اسيب عيش كتير بره التلاجه لغايه ما يبوظ بس من ساعه ازمه العيش الواحد بقى يطلع رغيف


اتنين بالكتير و اما يخلصوا نطلع غيرهم و هكذا فى الارز برضه بحاول اعمل شويه على القد بالضبط و يوم بيوم


و حسب الحاجه


و الله اسعار اللحمه اللى ضربت فوق دى احنا السبب فيها مين قال ان الناس مش لاقيه تاكل شوفوا اللحمه بقت


بكام؟ و مع ذلك تلاقى الناس قدام الجزارين طوابير طوابير و لا يوم الحشر و ده اللى يغيظ فعلا


يعنى لو طنشنا الجزارين قد اسبوع كده و اللحمه باظت عندهم حيرخصوا اللحمه زى الجزم و الامور ساعتها حتتظبط


مش حنموت من غير لحمه اسبوع يعنى فيه ناس عايشه من غيرها العمر كله و محصلش لهم حاجه


لازم كمان الحكومه تشجع الفلاحيين على زراعه القمح بمكافآت مجزيه جدا علشان نقدر نوفر شويه بس من دولارات


شرا القمح الهندى و الامريكى و الصينى


تخيلوا الامارات اللى كلها صحرا باعتالنا منحه مش عارفه قد ايه قمح شوفتوا الخيبه اللى بالويبه


يا جماعه الخطر قادم و حقيقى و لازم نحس بيه و نستعد له و نربط الحزام اكتر واكتر


و نتعود على الحرمان بمزاجنا بدل ما يجى الوقت اللى نبقى مجبورين عليه


لازم نحس بغيرنا و نساعدهم و بدل ما تاكل و حدك يا سيدى انت وولادك حط شويه اكل صغيريين فى كيس


و حطهم فى التلاجه و كل اكله اعمل كده و بعد كده اى جيران غلابه ليك و جنبك تقدر تديهم الاكل ده


و الله حتبسطهم قوى و حتحس انك مبسوط اكتر لانك عملت حاجه كويسه و شاركت غيرك فى اكلك


لو كل بيت عمل كده و الله مفيش حد حيبات جعان بعد كده و البركه حتحل علينا


و ساعتها ربنا حيستجيب لدعانا اما نقول


استرها معانا ياااااارب

السبت، 17 مايو 2008

التطور الطبيعى للحاجه الساقعه


يوم الجمعه عجبنى جدا مقال فى صفحه حب البنات فى الدستور و كانت كاتباه حنان الجوهرى
المقال يمثل التطور الطبيعى للحاجه الساقعه قصدى للجواز و حسيت ان من واجبى كزوجه حاليه
انى اوعيكم كزوجات قادمات علشان تحسوا بخطوره ماانتم مقدمون عليه و للاسف بارادتكم
الحره و دون اجبار من احد
المقال بعنوان اما انا
لم يتبقىسوى شهرو3 اسابيع بما يعادل 51 يوما على زفافى السعيد و لا حول و لا قوه الا بالله
فاضل يا دوبكشهرين و اسبوعين من دلوقتى على صدمتى بالواقع الاليم و اكتشاف المعنى الحقيقى
للجواز من مسئوليه البيت و الزوج البرنس و محاوله توفيق الاوضاع بين البيت و الشغل و رسم ابتسامه
زى بتاعه كلوس اب وقت تقديم العشا
فاضل تقريبا 6 شهورو اسبوع من دلوقتى لبدء اول خناقه حقيقيه بينا حاميه الوطيس الم هدومى بعدها
و اطلع على امى اضرب لى هناك تلات و اربع و خميس لحد ما ييجى يصالحنى و يشيل الشنطه مره اخرى
فى طريق العوده لساحه المعركه
فاضل سنه و شهر على ما ابقى حامل فى التالت و قرفانه من كل الاكل و عصبيه و زهقانه و مش عايزه اخلف اصلا
عشان طموحى و شغلى و البتاع الدرل اللى بيلبسوه زى البرميل ده
فاضل يا دوبك سنتين و ابدأ الاحساس بانى ام فاشله و زوجه مهمله فى نفسها و ابدأ الشك فى ان جوزى
له علاقه تانيه و بيخوننى و اروح اتخانق معاه و اصرخ منه و من ابنى و من البيت و اقعد اعيط
و ييجى يطبطب عليا و ينزل يجيب لنا اتنين كيلو موز و علبه جبنه
فاضل ست سنين و البس العبايه السودا و الشبشب ابو صباع و اروح افاصل مع البياع على اتنين كيلو سمك
و اتفرج على صورى ايام ما كنت صحفيه
شفتوا كل ده هيا عارفه انه حيحصل لها و مع ذلك مقدمه على الجواز برضه
و هوه ده اللى جايبنا ورا اننا مبنسمعشى النصيحه
و حتى اللى بتعرف الخطر فين مبترضاش تنصح غيرها من منطلق و اشمعنى
انا اللى اتدبس وحدى خليهم يدوقوا و يشربوا من نفس الكاس
وعلى الباغى تدور الدوائر

الأحد، 11 مايو 2008

التاج لمين


النهارده جالى التاج التانى فى حياتى من ساعه ما بدأت التدوين

و ده اسعدنى جدا و التاج ده من مدونه جواز و اتجوزنا

و التاج اللى قبل ده كان من مدونه بونجو و يوكى

و للاسف انا الفتره اللى فاتت كنت مش فاضيه خااااااااااالص

نظرا لسفرى المتكرر ودخلنا فى امتحانات ابنى بعدها

فمقدرتش ارد و النهارده عشان ميزعلوش منى حأرد

عليهم مع بعض و ياريت ميزعلوش منى

عشان اتكلم عن نفسى دى صعبه جدا بس هأحاول

1-اولا انا واقعيه و مش بحب احلم كتير باحب افكر فى الحاجه اللى ممكن تتحقق بسهوله و

من غير مشاكل و اما بتتعقد نفسى بتتسد منها بسرعه

2-عصبيه جدا و ممكن اى حد يستفزنى بسرعه

3- باحب ولادى جدا بس بطريقتى يعنى محبش حد يزعق لهم او يضربهم حتى لو كان

باباهم

4-بحب اصحابى جدا و محبش حد يتكلم عليهم بحاجه وحشه امامى

5-اما بحب حاجه بتحمس لها جدا و ده بيجى على حساب حاجات تانيه ساعات

6-بحب شغلى جدا و نفسى اهتم بيه اكتر بس للاسف ظروف البيت و الولاد لا تسمح

7- بحب اعمل الاكلات الصعبه زى المحاشى و الحجات التقيله و ماليش فى الحلويات

8-اما بحب بحب جدا و اما اكره برضه جدا

9-باحب السهر جدا بس بسبب المدارس و المذاكره بقيت بانام قبل الكل

10-بحب السفر جدا بس يكون بالعربيه لانى خلااااااص اتعقدت من القطارات

اهدى التاج الى 1- فاتيما صاحبه مدونه روح قلب ماما
2-مدونه كيت كات
3-مادى صاحبه مدونه غارقه فى الافكار
4-امواج صاحبه مدونه امواج
5-بطوط حبوب

الاثنين، 5 مايو 2008

اه يا رجله ...اه يارجله

ازيكم ياجماعه ...اخباركم ايه...اعتذرعن الانقطاع نظرا لظروف امتحانات


البيه الصغير اللى حياخد بكالريوس سنه اولى ابتدائى


مكنتش حكتبلكم حاجه اليومين دول بس واحده صاحبتى اتصلت بيا و حكتلى حاجه


قلت تشاركونى فرستى


صاحبتى دى من اسبوع كده اتصلت و قالت ان جوزها رجله واجعاه قوى و مش


بينام منها و مش عارفه هيا كمان تنام و كل شويه يصحيها و يقول لها رجلى وجعانى


طب و بعدين؟؟؟


اخر اما زهقت سألتنى على اى دوا يخففه المهم قلت لها عليه بس الندله راحت اشترته


من صيدليه تانيه شفتوا اخر الشهامه


المهم بعد ما جابت الكريم المسكن بدأت احداث فيلم ادعكى يا بنتى...ايدك حنينه على


مفاصلى...اه..اه..اه


و بما ان مفيش تحسن راحوا للدكتور الدكتور بقى فضل يكشف عليه و يتكلم معاه


طلع اللى عنده يا جماعه عرق النسا مش عارفه جاله منيين!!!!!!!!جايز عدوى


و الدكتور قعد يقوله ان الالم متقسم 10 درجات و ان اللى عنده ده من الدرجه 9


و اللى بعده على طول الم الاورام و الحاجات الوحشه دى و ان علاجه الوحيد


هو الراحه و الراحه التتتتتتتتتتاااااااااامه و الى هنا انتهت القصه


اللى غايظنى انى لاحظت ان الرجاله جسمهم غالى عليهم جدا الواحدصباعه يتخربش


يجرى جرى يحط مطهر و مرهم وبلاستر عشان قال ايه الجرح ميتلوثش


و الواحده مننا يبقى صباعها مقسوم نصين من السكينه و تغسله بسرعه و تجرى تكمل


الطبيخ عشان البيه ميزعلش مش حاجه تغيظ!!!!


اما الالم ده من الدرجه التاسعه يبقى الم الولاده من الدرجه الكام؟؟؟؟؟اكيد 100


و مع ذلك الست بتتحمل و فيه ستات مش بيطلع لها صوت طول الولاده


و الله لو راجل كان فطس


الست تبقى سخنه و تعبانه و تقوم تصحى ولادها و تلبسهم و تفطرهم و توديهم المدرسه


و البيه نايم و اما يصحى و تكون هيه لسه راجعه وطالعه السلم جرى يبصلها بقرف


و يقول لها فين الفطار ؟؟اتأخر ليه؟؟


يا جماعه ده مش تحيز للستات و لا حقد على الرجاله لا سمح الله هوه بس تعبير عن


غيظ من بعض المواقف اللى تبان صغيره بس جواها معانى كتيره


و كل اللى عايزه اقوله فى الاخر


رحمه بالستات اللى انتوا مش عارفيين قيمتهم