الاثنين، 5 مايو، 2008

اه يا رجله ...اه يارجله

ازيكم ياجماعه ...اخباركم ايه...اعتذرعن الانقطاع نظرا لظروف امتحانات


البيه الصغير اللى حياخد بكالريوس سنه اولى ابتدائى


مكنتش حكتبلكم حاجه اليومين دول بس واحده صاحبتى اتصلت بيا و حكتلى حاجه


قلت تشاركونى فرستى


صاحبتى دى من اسبوع كده اتصلت و قالت ان جوزها رجله واجعاه قوى و مش


بينام منها و مش عارفه هيا كمان تنام و كل شويه يصحيها و يقول لها رجلى وجعانى


طب و بعدين؟؟؟


اخر اما زهقت سألتنى على اى دوا يخففه المهم قلت لها عليه بس الندله راحت اشترته


من صيدليه تانيه شفتوا اخر الشهامه


المهم بعد ما جابت الكريم المسكن بدأت احداث فيلم ادعكى يا بنتى...ايدك حنينه على


مفاصلى...اه..اه..اه


و بما ان مفيش تحسن راحوا للدكتور الدكتور بقى فضل يكشف عليه و يتكلم معاه


طلع اللى عنده يا جماعه عرق النسا مش عارفه جاله منيين!!!!!!!!جايز عدوى


و الدكتور قعد يقوله ان الالم متقسم 10 درجات و ان اللى عنده ده من الدرجه 9


و اللى بعده على طول الم الاورام و الحاجات الوحشه دى و ان علاجه الوحيد


هو الراحه و الراحه التتتتتتتتتتاااااااااامه و الى هنا انتهت القصه


اللى غايظنى انى لاحظت ان الرجاله جسمهم غالى عليهم جدا الواحدصباعه يتخربش


يجرى جرى يحط مطهر و مرهم وبلاستر عشان قال ايه الجرح ميتلوثش


و الواحده مننا يبقى صباعها مقسوم نصين من السكينه و تغسله بسرعه و تجرى تكمل


الطبيخ عشان البيه ميزعلش مش حاجه تغيظ!!!!


اما الالم ده من الدرجه التاسعه يبقى الم الولاده من الدرجه الكام؟؟؟؟؟اكيد 100


و مع ذلك الست بتتحمل و فيه ستات مش بيطلع لها صوت طول الولاده


و الله لو راجل كان فطس


الست تبقى سخنه و تعبانه و تقوم تصحى ولادها و تلبسهم و تفطرهم و توديهم المدرسه


و البيه نايم و اما يصحى و تكون هيه لسه راجعه وطالعه السلم جرى يبصلها بقرف


و يقول لها فين الفطار ؟؟اتأخر ليه؟؟


يا جماعه ده مش تحيز للستات و لا حقد على الرجاله لا سمح الله هوه بس تعبير عن


غيظ من بعض المواقف اللى تبان صغيره بس جواها معانى كتيره


و كل اللى عايزه اقوله فى الاخر


رحمه بالستات اللى انتوا مش عارفيين قيمتهم


هناك 15 تعليقًا:

أم أحمد يقول...

حطيتي ايدك علي الجرح
بجد المسألة دي غايظاني
الست بتتحمل بلاوي ولواتكلمت يقولولها
جوزك يحبك عفية
ماتشتكيش قدامه
أومال أشتكي لمين بس ؟
ربنا مع ابنك ويارب ياخد الشهادة الكبيرة

خمسة فضفضة يقول...

السلام عليكم ورحمة الله وبركاته

ربنا سبحانه وتعالي خلق المراه بقدرة تحمل اكبر بكتيييييييييييير اوي من الراجل وده السبب في انها بتقدر تستحمل آلام الحمل والولاده اللي اقوي راجل في الدنيا مايقدرش يتحملها

ربنا معاكي ويعدي الامتحانات علي خير ، مش عاوزين مساعده

سلام

Miss. Sosa يقول...

والله عندك حق .. غالبا هم القوارير واحنا قدر الفول

وبعدين الراجل له وظيفة واحدة لكن الست فبتشتغل نظرا لغلاء المعيشة وبتشتغل في البيت شغالة وخدامة ومدرسة وممرضة ولو اشتكت او اتكلمت تبقى زنانة ومزعجة

يارب صبرنا

Anonymous يقول...

سيداتى (مش عارف هل ممكن اعلق)
طيب ماهو الراجل له من الجسام الثقال التى لو قيست بمنظور سعادتها هيقسم وسطها بعد الشر من عليها وعلى حواليها وربنا يعطيكم موفور الصحه والعافيه ويخليكم لينا -وراء كل عظيم امراه اعظم منه- وشكرا

واحد من الناس يقول...

انتى مالك زعلانه اوى كده ليه..
آلا يكيفيكى فخراً ان دى المهمه اللى ربنا خلقك علشانها انك تخلفى وتربى الأجيال.. وكله بجزاءه وربنا هيكفئك على كده.. مافيش جدال ان الستات دلوقتى تعبانين كده لأنهم بلإضافه لشغلهم بره البيت مع الراجل سواسيه مطالبين برضه بعدم الإهمال فى بيتهم وعيالهم..
وبصراحه بقى انا شايف ان المكان الطبيعى للست هو البيت...
تقولوا عليا رجعى، متخلف ..هو ده الدور الرئيسى والأهم للست....وسلام

Anonymous يقول...

جيد جدا

Anonymous يقول...

جيد جدا

Anonymous يقول...

v.good

الجواز و سنينه يقول...

و الله يا بنتى يكفينا فخرا اننا هانخش الجنه بخدمتنا لهم
و بعدين همه فعلا عليهم مسؤليه ربنا يكون فى عونهم
كفايه انك ممكن ما تشتغليش و تريحى فى البيت و هو مكلف شرعا انه يلبى متطلباتك
برضوا ربنا يكون فى عونهم خصوصا فى العصر ده
و دمتى سالمه

بطوط حبوب يقول...

بصى انا ادعى للى هياخد دكتوراه فى اولى ابتدائى وانتوا وكل الى تعرفوه يدعيلى
اظن قسمه بالتساوى
بما ان الراجل دايما بيكون كويس والست بستحمل
ههههههههههههههه

Wael يقول...

لا حول ولا قوة الا بالله O:

يعنى حتى وحنا عيانين برضو مش عاجبين ؟؟؟

مش كفاية انه عرق نسا ؟

يعنى متسمى على اسمكم

يعنى الالم مركب D:

Foxology يقول...

ربنا يوفق الباشمهندز فى البكالريوس بتاع اولى ابتدائى وعقبال الدكتوراة ان شاء الله :)

والله تحمل الألم بيبقى عملية نسبية واكيد انتى عارفة كدة يا دوك :)

لكن مفيش شك والعلم اثبت فعلا ان قدرة المرأة على تحمل الألم اكبر من الرجل اى خدمة شهادة فى صفكم اهى :))

تحياتى :)

صيدلانيه طالعه نازله يقول...

ام احمد:ماشى بيحبك عفيه بس تكون القوه دى حقيقيه مش مصطنعه دى الواحده بتروح تنيم ولادها بتنام قبلهم
من كتر التعب
و فى الاخر اما تشتكى يقولها هوه انتى على طول تعبانه كده
بزمتكش ظلم برضه
===================================
الى د/خمسه فضفضه:انا معاكى فى كل اللى بتقوليه بس شويه رحمه برضه
و على العموم شكلك يا جميل لسه فاضى و مروق نتقابل بعد كام سنه كده و نشوف رأيك اتغير و لا لسه
و شكرا على المساعده و شايلينك للتقيله
===================================
Miss sosa:بعد الشر عليييييييينا
ده هما اللى بلاليص كمان مش قدر
لنهم مش بيقدروا النعمه اللى معاهم
اما كنت مسافره من يومين و لمده 24 ساعه بس كان لايص بالعيال و بيتصل بيا عشان افهم الولد مسأله حساب فى التليفون
شفتى قد ايه و فى الاخر يقولوا انتوا بتعملوا ايه زياده
كل عند الله و اللى عنده مش بيضيع
==================================
الى غير معرف:طبعا ورا كل عظيم واحده بتزقه لقدام ما هو لو مبسوط فى البيت حيلزق و مش حيروح الشغل شفت بقى القرف ليه فايده ازاى
هههههههههههههههههههه
==================================
الى واحد من الناس:ياعم انت اللى زعلان و بتزق كمان
انا عارفه ان الجزاء عند الله فوق مش على الارض
و حكايه الشغل دى نحب دلوقتى و بعد مووووجه الغلاء الشديده دى الرجاله رأيهم فيها ايه
ياترى الست تتستت فى البيت و لا تخرج تشتغل و تجيب العيش بالمره و هيا جايه و لا لا
و ياريت الرد سريعا
==================================
الى غير معرف :شكرا للاهتمام
==================================
الجواز و سنينه:و الله يا شيخه انتى اخلاااااق و اخجلتينى
يا فرحه الرجاله بيكى
تحياتى
==================================
بطوط حبوب:ربنا معاك و شد حيلك
و حادعيلك و انا بادعى لابنى
شفت المساواه
ههههههههههههههههه
==================================
وائل:قصدك ايه يعنى ؟؟؟!!!
ان احنا مرض شكرا ياعم جه خيرك
انا حصلت عليك كل المدونات النسائيه
كل اللى يدخل عندك المدونه يعمل عليها
flag و نشوف مين بقى الاقوى احنااااا
و لا انت؟
شفت الافترا بقى
==================================
foxology:شكرا على التعاطف و حسنتك حتوصلك على حسابك فى سويسرا
هههههههههههههه
=================================

الجواز و سنينه يقول...

ههههههههههههه
قريت ردك لجوزى علشان يحس بالنعمه اللى هو فيها
ليكى تاج عندى تعالى خديه

مصري بالغربة يقول...

انا عايز اقولك واقول لكل البنات والستات

اولا ده هوه دوركم في الحياة وهو مراعاة رب الاسرة الا وهو الرجل

تربية الابناء والعناية بهم , ورعاية الاسرة جميعا ده شيئ مش سهل وعشان كده رسولنا الكريم قال للصحابي

امك ثم امك ثم امك ثم ابوك

الا يكفيكم ذلك

الا يكفيكم ان الجنة تحت اقدام الامهات

وبعدين الزوج عليه الف مسئولية ومسئولية كفاية انه مطالب شرعا بالانفاق على الاسرة بالكامل ورعايتها

وتلبية جميع احتياجتها وف الزمن اللي احنا فيه ده مش سهل ابدا

يا ريت لو الستات تفوق شوية وتراعي ربنا في اجوازها واسرتها اكتر من كده

ومحدش يتريق لو لاقي رجل مرض وعنده عرق النسا

يعني وهو عرق النسا ده جاله من ايه يعني مهو من تعبه وشقاه طول اليوم عشان يوفر للاسرة حياة كريمة او بس حياة مستورة في الزمن ده

حتبقوا انتم والزمن والحكومة على الرجالة كمان

ده حتى حرام