السبت، 17 مايو، 2008

التطور الطبيعى للحاجه الساقعه


يوم الجمعه عجبنى جدا مقال فى صفحه حب البنات فى الدستور و كانت كاتباه حنان الجوهرى
المقال يمثل التطور الطبيعى للحاجه الساقعه قصدى للجواز و حسيت ان من واجبى كزوجه حاليه
انى اوعيكم كزوجات قادمات علشان تحسوا بخطوره ماانتم مقدمون عليه و للاسف بارادتكم
الحره و دون اجبار من احد
المقال بعنوان اما انا
لم يتبقىسوى شهرو3 اسابيع بما يعادل 51 يوما على زفافى السعيد و لا حول و لا قوه الا بالله
فاضل يا دوبكشهرين و اسبوعين من دلوقتى على صدمتى بالواقع الاليم و اكتشاف المعنى الحقيقى
للجواز من مسئوليه البيت و الزوج البرنس و محاوله توفيق الاوضاع بين البيت و الشغل و رسم ابتسامه
زى بتاعه كلوس اب وقت تقديم العشا
فاضل تقريبا 6 شهورو اسبوع من دلوقتى لبدء اول خناقه حقيقيه بينا حاميه الوطيس الم هدومى بعدها
و اطلع على امى اضرب لى هناك تلات و اربع و خميس لحد ما ييجى يصالحنى و يشيل الشنطه مره اخرى
فى طريق العوده لساحه المعركه
فاضل سنه و شهر على ما ابقى حامل فى التالت و قرفانه من كل الاكل و عصبيه و زهقانه و مش عايزه اخلف اصلا
عشان طموحى و شغلى و البتاع الدرل اللى بيلبسوه زى البرميل ده
فاضل يا دوبك سنتين و ابدأ الاحساس بانى ام فاشله و زوجه مهمله فى نفسها و ابدأ الشك فى ان جوزى
له علاقه تانيه و بيخوننى و اروح اتخانق معاه و اصرخ منه و من ابنى و من البيت و اقعد اعيط
و ييجى يطبطب عليا و ينزل يجيب لنا اتنين كيلو موز و علبه جبنه
فاضل ست سنين و البس العبايه السودا و الشبشب ابو صباع و اروح افاصل مع البياع على اتنين كيلو سمك
و اتفرج على صورى ايام ما كنت صحفيه
شفتوا كل ده هيا عارفه انه حيحصل لها و مع ذلك مقدمه على الجواز برضه
و هوه ده اللى جايبنا ورا اننا مبنسمعشى النصيحه
و حتى اللى بتعرف الخطر فين مبترضاش تنصح غيرها من منطلق و اشمعنى
انا اللى اتدبس وحدى خليهم يدوقوا و يشربوا من نفس الكاس
وعلى الباغى تدور الدوائر

هناك 12 تعليقًا:

خمسة فضفضة يقول...

السلام عليكم ورحمة الله وبركاته

ههههههههههههههههه

حلوه علي الباغي تدور الدوائر دي

خلتيني مت من الضحك
هههههههه

عاوزه اقولك ان مافيش حاجه في الدنيا دي مضمونه والزواج بالذات
ومش معني ان فيه مئات ولا آلاف حصلتلهم نفس الحاجه في نفس الوقت يبقي اكيد ولازم ده اللي يحصل لاي حد هايتجوز

كل ده راجع للنصيب
ليه بتفرض انها ها تتخانق مع زوجها ولا هاتسيبله البيت
او هاتبقي ام فاشله او حتي مش هاتهتم بمظهرها
كل ده لسه في عالم الغيب ومانقدرش نحكم ععليه وكمان طالما حطت اديها علي المشكله يبقي احتمالات تجنبها كبيره جدا



سلام

Wael يقول...

ههههههههه

ده ايه التفاؤل ده !!!!!

ومع ذلك معاكى حق الجواز هو المطب الوحيد اللى بنقع فيه بكامل اختيارنا وقوانا العقلية .

مع اعتراضى على العنوان لان الزواج سيبقى للابد التطور الطبيعى للحاجه السخنه مش الساقعه D: , احتمال بعد كده يسقع ولا حاجه .

nice post

Ashraf يقول...

اظن ان الجيل الحالى من الزوجات غير جيل امهاتنا طبعا(اعتقد دى نظرة كل زوج)ومع ذلك ياسيدتى ويا كل سيده متزوجه او هتتزوج ممكن تضعى نفسك مكان زوجك (او الراجل مننا) وفكرى بعقلية الزوج لثوانى (او لدقائق حتى) لمحاولة وجود وضع او حلول او بدائل وسط حتى تستمر العلاقه والايام بدل ماتتعزبى وتعزبى المسكين معاكى
زوج غلبان

رئيس جمهوريه نفسى يقول...

السلام عليكم
طب والى هى قالته فى المقال هل هو القاعده كل الحجات دى والخناقات بتتوقف على نوع العلاقه بين الزوجين ومدى التفاهم ما بينهم وبين بعض
فمش شرط انى الخناقات تحصل
موضوع الحمل والدريل .... الخ دى ماليش دخل فيها

Miss. Sosa يقول...

ههههههه
حلو اوي البوست ده
بس مين الست اللي كاتبة المقال ده وانا هحرمها تمسك قلم تاني ؟ :D

يا معشر النساء .. انتم غراب قوي (مش غربان)
يعني لو مااتجوزتوش تقعدوا تولولوا وتندبوا حظكم ولو اتجوزتوا تشوفوا نفسكم علي بعض وتفتكروا نفسكم من المصطفين الاخيار وان اللي مااتجوزوش دول ناس معلولة او مشلولة :D
ولما ربنا يسهلهكم وتتجوزوا ويتأخر حملكم شوية تقعدوا تولولوا وتندبوا ولما ربنا يكرمكم بالبنت تقولوا فين الولد ولما ربنا يكرمكم بكل حاجة تقعدوا تولولوا وتشتكوا من شغل البيت ومسئوليته يعني بالله عليكم اشهدوا علي نفسكم ده يرضي ربنا ؟!
مفيش رضا خالص يعني ؟!

طيب هقول نصيحة صغيرة لكل ست تسول لها نفسها انها تشتكي من الجواز
تخيلي نفسك ربنا خد منك جوزك وابنك هتقولى طبعا بعد الشر ايه فقرك ده هقولك الله مش هم دول اللي قارفينك في عيشتك هتتشائمي مني هقولك عرفتي اد ايه انك متناقضة ومابتحمديش ربنا !!

اللهم لك الحمد على نعمة الرضا

Appy يقول...

ههههههههههه لا لو كده هخلع من اولها
بس هو فعلا بيتعامل على انه برنس بس ولا بيهمنى انا هروضه ههههههههههه
وشكلى هضرب لا بصى لازم تبقى الحياه هاديه شويه
لان بالتكهنات دى بجد محدش هيتجوز وكلنا فينا عيوب بس المهم السيطرة عليها

rtrcbh يقول...

السلام عليكم ورحمه الله وبركاته
جزاكم الله خيرا على نقل هذا المقال الذى جعلنى اضحك كثيرا وانا اقراه
ولاول مره بصدق هقول لاحدتفضل بزياره مدونتى
حتى ترى الوجه الجميل للحياه الزوجيه والعائليه
والسلام عليكم ورحمه الله وبركاته
اخوك
د/احمد جمال

mohamed يقول...

لالالالا حياة زوجية مثاليه جدا ربنه يطمنك

tarek alghnam يقول...

اختى الكريمة
بوست رائع
تعرفى مشكلتنا اننا نأخذ الحياة بنظرة حياتية فقط وننسى الاخرة لو تعلم الاخت المقبلة على الزواج انها داخلة على جهاد لصبرت وكافحت
.. نعم جهاد فالمراءة فى بيتها تعدل جهاد الرجل فى المعركة نفس الاجر
فلماذا لاتتزوج ولماذا لاتسعد نفسها وزوجها وتبنى بيتها بالكفاح والعمل والحب والمودة والرحمة
تقبلى تحياتى
على فكرة انا متزوج وانصح الشباب بالزواج لان الزواج يداوى كثير من امراض المجتمع ولكن بشروط ميسرة واهمها الاخلاق
تقبلى تحياتى واسف للاطالة
واتمنى تشريفك مدونتى المتواضعة
ودمتى بود

mayada يقول...

ههههههههههههههههه
جميله علي الباغي تدور الدوائر دي
هو كاس باين وداير علي الكل
هي بطيخه باين ياتطلع قرعه ياتطلع حمرا ياتطلع نص نص كل واحد وحظه بقي

Foxology يقول...

هههههههههههههههههههههههههههههههههه

يا خبر ابيض

طيب مهو برضه نحن معشر الشباب المقدمون على الجواز لينا نفس الأفكار ... احم احم مش قصدى كلنا يعنى :))

تحياتى :)

صيدلانيه طالعه نازله يقول...

خمسه فضفضه:الحمد لله اننا قدرنا نضحكك
حتى لو كان بالطريقه المؤلمه دى
و فعلا كل حاجه قسمه و نصيب
و المكتوب على الجبين لازم تشوفه العين
"""""""""""""""""""""""""""""""""""
وائل:المفروض الجواز يسقع فى الحر و يسخن فى الشتا حسب الطقس
ههههههههههههههه
""""""""""""""""""""""""""""""""""
اشرف:لو كل ست حطت نفسها مكان الراجل بتاعها يبقى كلنا حيطلع لنا شنبات
وياريت الراجل كمان يحط نفسه مكان الست و يجرب يوم واحد بدالها
و نشوف مين اللى حيعيط
سلااااااام
"""""""""""""""""""""""""""""""""""
الى سوسه:فعلا زى ما انتى قولتى محدش بيرضى بحاله
بس المثل بتاعك كان قاسى شويه
و على العموم ربنا يوفق الجميع و يدى كل واحد اللى نفسه فيه
""""""""""""""""""""""""""""""""""
الى ابى:اهلا يا عروسه
و ما عاش اللى يضربك
و ياريت نستنى شويه و نشوف مين اللى حيروض مين
ههههههههههههههههه
""""""""""""""""""""""""""""""""""
الى رئيس جمهوريته:ايه رايك ان موضوع الدرل ده هوه اهم ما فى البوست
و الباقى كله بعده
و الخناقات دى اهم حاجه فى الجواز
امال الناس تعرف انهم متجوزين ازاى
"""""""""""""""""""""""""""""""""
ابو يحيى و ادم:ربنا يهنيك بحياتك و ولادك يارب و يديم عليك السعاده
""""""""""""""""""""""""""""""""
الى محمد:لا شكر على واجب واحنا فى الخدمه
"""""""""""""""""""""""""""""""""""
الى طارق الغنام:انا موافقاك على كل كلامك
و اللى انا كتبته ده كان كلام مكتوب فى صفحه نوعا ما كوميديه و ده ميدلش على طريقتى او طريقتها فى الحياه
و نورتنى
""""""""""""""""""""""""""""""
مياده:اليومين دول يا قمر البطيخه يا تطلع قرعه يا تطلع قرعه انتى و حظك
نورتينى يا جميل
""""""""""""""""""""""""""""""""""
فوكسولوجى:يبقى خالصين كل واحد و ليه افكار مشرقه جدا عن الطرف التانى
و محدش بقى يزعل
""""""""""""""""""""""""""""""