الاثنين، 19 يوليو 2010

يا تلفزيوناااااااااااتك يا مصر



اليومين دول شغالين بيحتفلوا باليوبيل الذهبى للتلفزيون المصرى

و ده بيواكب الاحتفال باول ارسال للتلفزيون سنه 1960

و طبعا شغالين يذيعوا تراث التلفزيون من برامج و تمثيليات

الحاجات دى انا بعشقها قوى

انا باعشق كل ما هو ابيض و اسود

و بصراحه اللى انا شايفاه انه على الرغم من قله الامكانيات زمان

الا ان التمثيليات و البرامج كانت جميييييييله قوى

و الواحد اما يشوفها بيطلع منها بحاجه

عكس القرف اللى بنشوفه اليومين دول

كلها برامج و تمثيليات تجيب تخلف عقلى من الدرجه ااولى تكييييييييييف

امبارح كان فيه حلقه من برنامج العاشره مساء و كانت منى الشاذلى

مستضيفه محمود سلطان و كان عمال يتكلم و يحكى عن ذكرياته فى التلفزيون

قد ايييييييه الناس دى كانت محترمه و جميله

و قدرت تقدملنا حاجات حلوه قوى نفتكرهم بيها مهما الزمن يعدى

برضه فاكرينهم و بنحترمهم و نقدرهم

اللى مزعلنى قوى ان التلفزيون المصرى فى الوقت الحالى

بقى دون المستوى بطريقه تحزن و تدعو للاسى

انا ساعات بيعدى عليا شهوووووووووووور من غيير ما افكر

انى اجيب القناه الاولى او التانيه

مش بجيبها الا اما الرسيفر يعطل و ميبقاش قدامى غيرهم

و انا باكتب البوست افتكرت ماما نجوى و بقلظ

و قد ايه كنا بنفرح اما نتفرج عليهم

افتكرت هند ابو السعود و برنامج جوله الكاميرا اللى كان بيجى يوم الاحد

افتكرت نافذه حول العالم

افتكرت حكاوى القهاوى

و برامج كتييييييييييير تانى

اثرت فينا و حبيناها و ارتبطنا بمقدميها

نفسى بجد يرجعوا يعيدوا البرامج دى كلها

و فى اخر البوست احب ابعت تحيه خاصه للراحل الكابتن عادل شريف

اللى حببنا فى لعبه التنس و عرفنا بابطالها

و حكالنا تاريخ بطولاتها زى رولان جاروس فى فرنسا

وويمبلدون فى انجلترا

و يا سلام على مصطلحااااته التنسيه اللى كانت بتضحكنا

زى الكره القصيره المكيره

و الكره مستديره نتائجها احيانا قريره و احيانا مريره

و كره لا تصد و لا ترد

الراجل ده من اكتر الناس اللى اثرت فيا و حبيته و كنت

بانتظر البطولات دى عشان اسمع تعليقاته اللى كانت تجنن

الله يرحمك يا كابتن عادل و يرحم ايامك الجميله


الجمعة، 2 يوليو 2010

فى الاخر الاتنين فراق برضه







من كام سنتين تلاته اتعرفت على شخصيتين اصبحوا مع الوقت من صديقاتى المقربين




و بما اننا اتعرفنا فى البيسين فى تدريب السباحه بتاع الولاد فطبعا اتكلمنا كتير و حكينا اكتر




الاتنين اتجوزوا عن قصه حب جامده جدا




واحده منهم اتجوزت اللى بتحبه و خلفت منه بنوته زى القمر




و فى الوقت اللى كانت بنوتتهم عمرها سنه




يشاء الله ان زوجها يغرق اثناء المصيف فى مارينا و تترمل صديقتى و هى عمرها 25 سنه




اما اتكلمت معاها كنت عارفه من ناس اصدقاءنا انها ارمله بس من كتر كلامها على زوجها




و الهيام و العشق اللى بتبقى فيه و هيا بتتكلم عنه شكيت فى الموضوع كله







التانيه بقى اتجوزت اللى بتحبه رغم معارضه اهلها و خلفت بنتين




بس طلع شخص قليل الاصل




كانت بتشوفه بعينها بيفتح شنطتها و ياخد فلوس من غير اذنها و تسكت




كانت بتسمعه بيكلم واحده عرفت انه متجوزها عليها و سكتت




كل ده عشان بتحبه بس هو مقدرش الحب ده




هو كان متجوزها عشان مركز والدها كأستاذ فى الجامعه




و هو كان معيد فى نفس الكليه




المهم حصل الصدام و سرق دهبها كله




و طلع عينها على الطلاق و نفقه البنات اللى بتاخدها تقسيط




و هيا مش محتاجاها بس لمجرد انها تقرفه و تغيظه





دار بيننا فى مره كلام




كانت صديقتى الارمله بتحكى ان جوزها واحشها و انها نفسها تأدى مهمتها مع بنتها




على خير عشان يبقى راضى عنها و تقابله و هيا رافعه راسها



راحت صديقتى التانيه المطلقه قالتلها احمدى ربنا انه حرج من حياتك



و انتوا كل الذكريات اللى بينكم جميله و حلوه دى فى حد ذاتها نعمه كبيره



و تستاهل انك تحمدى ربنا عليها ليل نهار



كان ممكن ربنا يمد فى عمره سنييييييين طويله و يحصل بينكم حاجات وحشه كتير



و برضه تكون النهايه بينكم فراق يبقى انهى فراق بقى الاحسن؟؟؟؟



اما قعدت مع نفسى كده و فكرت قلت :



هو لازم الانسان اللى بنحبه يختفى من حياتنا فجأه عشان نفضل نفتكره بالحلو



طب هل ده معناه انه لو كان فضل مووجود كان اكيد حيتكره و يبقى مرفوض



طب ليه بنوصل بعض للحاله دى اصلاااااااااااااااا



ليه مش بنحافظ على بعض و على مشاعر بعض و نحاول نقرب اكتر



ليه مش بنحاول نزرع الحب من اجل الحب نفسه



ماهى شجره الحب الصغيره مسيرها تكبر و تبقى واااااااااااااحه فواحه بالحب



حاجات كتير قوى فكرت فيها بس للاسف ملقيتش اجابه على اى سؤال



لان للاسف اللى بيحصل فى الواقع شيىء تااااااااااااانى خالص غير اللى باقوله

السبت، 26 يونيو 2010

الشوارع الخلفيه


لكل منا شىء يحتفظ به و يكتمه عن الاخرين و لا يحب ان يعرفه احد غيره
شىء ما خاص جدا ....ربما كان سره او حقيقته
و نحن نمضى فى حياتنا حريصين فى الغالب على ان نكون صادقين
فلا نخدع على الاطلاق و نطلب الشىء نفسه من الذين يتعاملون معنا....
ثم.....حين يخيل الينا اننا اصبحنا واضحين و ان كل ما امامنا مستقيم و مبين و مفهوم
اذ بنا ندرك بغته ان فى الاعماق منا اشياء غامضه عديده:حكايا لم ينفذ اليها شعاع
و لم تضىء بعد.....شوارع خلفيه فى نفوسنا هى عالم بأسره غريب عنا
يعيش فيه حلم صغيرجامح لم يتحقق....نزوه ارتكبناها فى وقت ما.....احقاد مبهمه
اطماع.....انفعالات مكبوته او اى شىء اخرلا نتبينه نحن
و لكنه يحكم كثيرا من عواطفنا و تصرفاتنا دون ان ندرى
و الذى يحسب منا انه يقرأ صاحبه كأنما كتاب مفتوح يكتشف فجأه
من خلال كلمه او ضحكه او ربما دمعه ان فى صاحبه اشياء لا تزال مجهوله
تعيش و تنمو خفيه
ذلك اننا لا نصنع من نفوسنا فى الواقع غير الشكل الذى نختاره
و نحبه و نحرص على ان نظهره و يظل منا بعد ذلك مالا حيله فيه....و لا خيار
فى حياتنا حتى فى حياه كل يوم تنتشر الظلال لبعض الوقت
و عندما تسود الظلال فى حياتنا تضطرب الاشياء الثابته و تتميع الحدود....و لا حدود فى
الظلال
مقدمه روايه الشوارع الخلفيه
عبد الرحمن الشرقاوى

الخميس، 24 يونيو 2010

ريحه الحبايب

النهارده ده اول بوست اكتبه هنا فى المدونه دى

مش عارفه بجد اذا كنت مبسوطه و لا زعلانه

فرحانه و لا حزينه بس اللى اعرفه انى اضطريت اعمل كده

انا بحب التدوين قوى و مقدرش ابعد عنه لانه المتنفس الوحيد ليا

وسط الضغوط اللى عايشه فيها

معرفتش اكتب ايه النهارده و حسيت ان الاغنيه دى بتمثل حالتى دلوقت

حنين لكل حاجه فاتت.....امل فى كل جديد جاى انه يكون احسن

انا مش حاقفل صيدلانيه طالعه نازله

و فى اول فرصه حاعرف اكتب فيها حاكتب

اعذرونى فى اللخبطه اللى عملتهالكم دى بس ياريت تتابعوا المدونتين

لانى حتيجى اوقات حاكتب فى الاتنين

صيدلانيه دى بنتى الكبيره و محدش بيرمى ولاده ولا ايييييييييه؟؟؟

ادعولى ان الظروف تتحسن و الامور تبقى كويسه

و لغايه ده ما يحصل مكانى الجديد حيكون هنا معاكم ووسطكم

لانى بجد بحبكم

الاثنين، 21 يونيو 2010

ذكريات+تحديييييييييث سعيييييييييييد

تحدييييييييث مسكر بطعم الشيكولاته
************************

بكره ان شاء الله حنه البت المسكره قوى جدا خالص

سكره هانم

صاحبه مدونه سكره و بحر الحياه

و طبعا بما ان بكره الحنه يبقى بعد بكره الاربع الفرح ان شاء الله

و بما ان محمد باشا العريس حيتجوز يبقى سكره هانم برضه بالصدفه حتتجوز

و كل اللى عايزه اقوله ليها

انها تسيبها بقى من بحر الحياه الغميق ده

و تركز فى بحر العسل

و بحر الحب

المهم اى بحر غير بحر الحياه و خلاص

و شدى حيلك بقى يا سكرتى و املى البيت عياااااااااااااااااااال

عشان تشدى شعرك زينا كلنا

طبعا انا مش فتانه و مش حاقول انك قولتى ان اى مدون حيجى اخره عندى شاى

نوووووووووووووووووووو

انا مش كده خااااااااااااالص

ههههههههههههههههههههههههههه


مبروك يا سكرتى و ربنا يهنيكى و يسعدك دايما

و اللى يحبنا يا جماعه ميضربش نار

او يضرب بس بعيد عن العروسه عشان متتخضش و تقطع الخلف

مبرووووووووووووووووووك










تفتحت عينيها على ابن خالتها الذى لم تكن ترى سواه رجلا

كانت تراه الاخ و الصديق و الحبيب

كانت منى عندما تنام تحلم به و تصحو من نومها على امل لقاءها به

كان وجوده فى امريكا من اجل اكمال دراسته العليا

سبب فى تأجيل زواجهم و اجتماع شملهم فى عشهم الصغير

كانت تنتظر خطاباته على احر من الجمر على رغم من وجود الايميلات

و المحادثات عبر النت الا ان الخطابات كانت تمثل لها تواصل من نوع آخر


خالد بالنسبه لمنى لم يكن الحبيب المعتاد بل كان صديقا قبل كونه حبيبا

كانت تجلس مع نفسهاو تتذكر ايام طفولتهماو لعبهما سويا وسط الاطفال

و كيف كان دائم الخوف و الغيره عليها من الاطفال الاآخرين

و تضحك على ذكرياتهما الشقيه و المرحه سويا

رغم كل هذه السعاده كان هناك شيىء خفى يكدر هذه السعاده و يعكر صفوها

لم تستطع ان تستبينه او تدركه فى وقتها و لكنه موجود و محسوس



كانت تحادثه على النت عندما اخبرها انه ذاهب مع احد اصدقاءه فى رحله

الى احد الولايات التى لم يذرها من قبل

الحت عليه ان يطمئنها عليه عندما يصل و ان يقرأ قرآن من اجل ان يصل بسلامه الله

ودعها خالد و ذهب فى رحلته مصحوبا بدعاءها له



استيقظت منى فى الصباح على صرخات افزعتها و ان كانت قد اكدت احساسها الذى اقلقها فى المساء

تساقطت دموعها و انهارت من قبل ان تعرف ما سبب الصرخات

اصيب خالد حبيبها و حلم عمرها فى حادث اثناء سفره و لقى مصرعه فى الحادث

عاد خالد الى بلده صندوق فى بطن طائره بارده جامده

عاد جثمان مسجى ينتظر دفء ارض وطنه كى يوارى ثراها

الى الان لم تستطع منى نسيانه و نسيان ذكرياتهما الجميله معا

كانت تراه فى صحوها و منامها

و مع كل طائره  فى السماء كانت منى ترفع وجهها

 و قلبها يرفرف كالطير الذبيح من الالم

و تمتلىء عينيها بالدموع

و تقرأ لخالد الفاتحه

الثلاثاء، 15 يونيو 2010

اللى متعوزش وشه بكره تتحوج لقفاه

لو عندك علبه شامبو فيها شويه صغيرين مش عارفه تخديهم من القزازه سيبيهم مترميهمش


مسيرك فى يوم تنسى تشترى شامبو او الراجل بتاع الدليفرى يتأخر عليكى


 و متلاقيش قدامك غير الشويه اللى فى قعر القزازه


كمان برضه علبه المسترده اللى بتتعصر دى عارفينها؟؟؟


اما تحسوا انها خلصت خالص اقلبوها على وشها و سيبوها كده فى التلاجه


مسيركم فى يوم تتزنقوا و تضطروا تستعملوها و اهى بتكون فكت زنقه ساعتها


صح كلامى و لا غلط؟؟؟





الكلام ده بينطبق على حاجات كتير قوى فى حياتنا


و ممكن كمان ينطبق على البشر فى حياتهم


يعنى  مثلا نبقى بنتعامل مع حد معين فى موضوع معين فى وقت معين من حياتنا


و بالتالى بتكون معانا نمر تليفوناته و عنوان بيته و كل المعلومات عنه


لكن بعد ما المصلحه مع الشخص ده بتخلص نلاقى بعض الناس حذفوا نمر تليفونه


و عنوانه و كل المعلومات اللى عنه


طب ليه يا جماعه ما تسيبوا النمر و العناوين ما انتوا ممكن تحتاجوها فى اى


وقت من الاوقات و ساعتها حتبذلوا مجهود عشان توصلوا لصاحبها تانى


انا فى حياتى بحس ان الدنيا مش مصالح و بمجرد ما تخلص تنتهى علاقتنا باصحابها


و نرميهم فى مزبله حياتنا زى ما بنرمى علب الشامبو الفاضيه فى سله المهملات


لا الحياه علاقات بين البشر و مصالح و ناس تبعد و ناس تقرب


لكن عمر اللى بعد ما يتنسى و لا يترمى بنسيبه فى مكانه معزز مكرم


لاننا اكيد و حتما و لابد حنحتاجه فى يوم من الايام



من الاخر كده اللى متعوزش وشه النهارده حضرتك ممكن بكره تتحوج لقفاه

الجمعة، 11 يونيو 2010

المغفلين بيشجعوا الجزيره الرياضيه و التلفزيون معااااااااهم






كل اربع سنين و انتوا طيبين


بدأت النهارده بطوله كأس العالم لكره القدم


البطوله دى انا نفسى مسدوده منها و من قبل ما تبدأ


لان كل ذكرياتها معانا حزينه من اول الصفر المونديالى الشهير


اللى خدناه بجداره و استحقاق اثناء مرحله اختيار الفيفا للبلد


المنظم


و انتهاءا بموقعه ام درمان الشهيره و تأهل الجزائر للعب فى


نهائيات كأس العالم


و على الرغم ان البطوله دى المفروض المصريين لا ليهم فيها


ناقه و لا جمل


الا انى مقابلتش حد معدى فى الشارع الا و كان عمل اشتراك فى


الجزيره الرياضيه


و كمان اشتراك ماتشات كأس العالم اللى هو مبلغ تانى غير


الاشتراك الاولانى


و بعد ما كل الناس اشتركت و الجزيره لمت على قلبها قد كده


قرر التلفزيون المصرى بكل شهامه و اخلاص و تفانى


انه يشترى حقوق بث الماتشات على القنوات الارضيه


و بعد كل الملايين اللى دفعها التلفزيون المصرى قررت قنوات


الجزيره الرياضيه


بث الماتشات كلها على قناه الجزيره الرياضيه المفتوحه لكل


الناس


طب ده بقى معناااااااااه اييييييه


انا فضلت افكر و افكر ثم افكر و افكر


و ملقيتش غير فكره واحده و عايزه رأيكم فيها يا ترى صح و لا


 غلط؟؟؟


التلفزيون المصرى ليه مأعلنش انه حيشترى حق بث الماتشات


قبل ما الناس تدفع دم قلبها فى الاشتراكات؟؟؟


هما الناس دى مش مصريين؟؟؟؟ و التلفزيون اسمه التلفزيون


المصرى يعنى فيه قرابه بينهم


ولاد عم تقريييييييييييبا


ده مالوش غير معنى واحد مالوش تانى


ان التلفزيون المصرى متواطىء مع الجزيره فى القصه دى


كلها من الاول خالص


و ان الرقم اللى دفعه التلفزيون اقل بكتير من الملايين اللى تم


الاعلان عنها


و ان الموضوع كله تمثيليه رخيصه دفع تمنها الناس العاديه


الغلابه


و فى الاخر الجزيره ضربت المصريين و التلفزيون على قفاهم و


بثت الماتشات على القناه المفتوحه


و موضوع التشويش اللى حصل فى ماتش الافتتاح النهارده كان


مقصود من النايل سات عشان ينكدوا على الجزيره


بعد ما ضربتهم على قفاهم و  طلعت منظرهم زباله قدام الناس



مش عارفه انا تصورى صح و لا غلط


بس ارجع اقول فى الاخر القانون لا يحمى المغفلييييييييييين


وعوضكم على الله يا مشتركيييييييييييين


السبت، 5 يونيو 2010

حبه رومانسيه









بصراحه انا النهارده مليش نفس اتكلم خااااااالص

كل اللى محتاجاه شويه هدوء و روقان بال

و ليا مزاج قوى اسمع  اغنيه هاديه

قلت اجيبلكم جنات

يمكن تنجح و تهدى اعصاب الناس المتوتره

و المتنرفزه

اما الناس الرايقه اصلا حتاخدهم لدنيا تانيه خالص

و حتزود روقان المود



اسيبكم بقى مع جنات

الثلاثاء، 1 يونيو 2010

الفرق بين سندريلا ما قبل الامير و ما بعده









بقالى فتره طالع عينى فى الصيدليه لان معنديش حد يساعدنى و

 بقالى تقريبا من قبل رمضان

و انا قايمه بجداره و استحقاق بدور سندريلا

طبعا سندريلا قبل ما تتجوز الامير حضراتكم يعنى باكنس

الصيدليه و اوضبها و اعمل كل حاجه

اه و الله  العظيم كل حاااااااااااااااجه بالمعنى  الواضح و الصريح

للكلمه

طبعا كانت فيه محاولات انى اجيب مساعده ليا و خلال سنتين

اكتر واحده طولت معايا كانت ست شهور

اللى حيسمع و لا يقرا الكلام ده اكيد حيقول انتى اللى مفتريه ولا


شريره و بتيجى على الغلابه

لا خااااااااااالص و الله ده انا طيبه جدا و الفيصل بيننا الميزان

يعنى نوزن اللى حيشتغل اول ما يجى و قبل ما يمشى و نشوف

الفرق

ههههههههههههههههههههههههههههههههههههه

انا اصلى و الله بادلع اللى يشتغل عندى اخر دلع و بجد و بحق و

حقيقى

و الموضوع ده بيغيظ جوزى منى جداااااااااااااااااا بس هو بصراحه كده كده متغاظ

فاما يبقى بسبب احسن من اما يبقى بلا اسباااااااااااااااب

من شهرين واحده صاحبتى  جابتلى بنت تشتغل و قالتلى دى غلبانه و طالبه فى مدرسه

و ظروفها وحشه و شغليها بعد الدراسه تكسبى فيها ثواب و ان شالله تديها خمسين جنيه

اهو اكسبى فيها ثواب و خلاص

ماشى يا ستى هاتيها و ربنا يسهل

المهم جت يوم واحد و جوزى اتفق معاها انها تاخد 120 جنيه و ده رقم كبيييييييير قوى

نظرا لانها متعرفش الالف من كوز الدره فى الصيدليه

بعد ماروحت بشويه لقيت الليدى والدتها بتتصل و

زعلااااااااااااااانه قوى ان المبلغ قليل جداااااااااااااااا

و انها عايزه كمان بدل اكل و بدل مواصلات و كان ناقص تقوللى بدل مظهر 

طبعا انا اول اما قالتلى كده انا قلتلها و الله دى امكانياتنا و اللى نقدر عليه

لسه بقى حتحكى انها معروض عليها انها تحترف فى الاهلى و لا الزمالك

انا بقى اختصرت و قفلت التليفون اصل الحكايه بجد مش طالبه حرقه دم و فرسه





من يومين عدت عليا دكتوره فى الجامعه جارتى

يا دكتوره  مش عايزه حد يشتغل عندك ؟؟؟؟قلتلها اكيد عايزه

قالتلى فيه صيدلانيه غلبانه قوى و محتاجه الشغل جدا و اللى حتقوليلها عليه حتعمله

قلتلها بس انا مش محتاجه صيدلانيه خالص انا محتاجه واحده تساعدنى فى التنظيف و الترتيب

لا اكثر لا اقل قالتلى هيا راضيه بأى حاجه المهم تشتغل

قلتلها برضه انتى قوليلها انا عايزه ايه لأنى باتكسف اما الاقى حد جامعى و اطلب منه انه ينضف او يكنس

بأحس انها تقيله قوى و جارحه مع ان معظمهم مش لاقى شغل و مستعد يعمل اى حاجه

المهم جت بعدها بشويه و معاها البنت  و لقيتها بتقوللى  حضرتك حتدينى كام؟؟؟

طبعا انا استغربت السؤال اللى جه قبل حتى ما تعرف الشغل المطلوب منها ايه

طبعا سألتها الدكتوره قالتلك انا عايزه منك ايه الاول؟؟؟؟

قالتلى انا ممكن اساعدك فى اى حاجه الا الكنس و التنضيف!!!!!!!!!!!!!!!!

قلتلها و الله انا مش عايزه منك اى حاجه غير الكنس و التنضيف

انا اصلا مش محتاجه دكاتره و لا صيادله لأكتشف انها كمان دكتوره بيطريه مش صيدلانيه

و الدكتوره اللى جابتك عارفه انا عايزه منك ايه و اتكسفت تقولك


مش عارفه ليه حسيت نفسى شريره و مفتريه بس بصراحه انا بتغاظ قوى

من اللى يبقى محتاج شغل و مش لاقى ياكل و يتكبر على النعمه اللى جاياله

انا فى محطات البنزين و محلات الاكل السريع بشوف شباب زى الورد

يفرحوا شكلا و اخلاقا و بيشتغلوا بأيديهم و سنانهم عشان يرتقوا بحياتهم

و الناس دى انا بأحترمها قوى لانها مش بتقول لا انا خريج جامعه و لا الكلام العبيط

اللى مش يأكل عيش خالص ده



على الرغم انى تعبت لوحدى فى الصيدليه و خلاص جبت اخرى و سلمت النمر

الا انى عايزه اما اشغل حد اشغل واحده عايزه تعيش و تتعب عشان تتعلم مش اى حد و خلاص


وياريت بقى و لو فيها غلااااااااااااااااسه

ايه ده هو انا غلسه و لا حد يقدر يستجرى يقول انى غلسه......اه بحسب

اى مدون او مدونه من اسيوط و ضواحيها و على الساده المقيمين خارجها مراعاه فروق التوقيت

يعرف اى بنت عايزه تشتغل فى صيدليه و تتعلم و تفهم عشان فى الاخر تاخد اللقب زيها زيى

يتفضل يجى المدونه و يقوللى لانى فعلا على الاخر و تعبت و زهقت و روحى بقت فى طرف مناخيرى



انا زهقت فعلا من دور سندريلا قبل ما تتجوز الامير او بعد ما

اتطلقت منه

و نفسى و منى عينى انى امثل دورها فى المرحله اللى فى النص

يعنى الفرح و الشوز الضايعه و الفساتين و الشياكه

و كده يعنى.....و اعتقد انه من حقى

مش كده و لا ايييييييييييييييييييييييييييييه؟؟؟؟؟؟؟ 


السبت، 29 مايو 2010

للاسف حقيقه




الخبر للاسف قريته فى الشروق المصريه

و للاسف حسيت لما قريته بالقهره و الغيظ

اخيرا و بعد طول غياب المصريين حسوا

انهم مقصرين تجاه اخواننا الافارقه

فقرروا يبعتوا وفد من اساتذه طب العيون

و عملوا حوالى 500 عمليه للمرضى الكينيين

طبعا الراجل راجع بيقول ان الكينيين انتقدوا قله المساعدات المصريه

للافارقه بالمقارنه باسرائيل اللى على طول معاهم و بتساعدهم

و طبعا ده مش لله فى لله و لا محبه و لا كتر فلوس

الراجل الكينى قال للدكتور المصرى انتوا فرحانين قوى بال500عمليه

اللى عملتوهم مع انه قليلين بالمقارنه باننا بنمدكم بشريان الحياه

و طبعا هما قصدهم على النيل





المصيبه بقى ان الدكتور المصرى قال انه دخل على عميد احدى الكليات الكينيه

لقيه حاطط علم اسرائيل جنب علم بلاده و اظن الرساله واضحه قوى و المعنى باين جدا

الدكتور قال ان اسرائيل شغاله شغل جامد قوى فى دول افريقيا 

و للاسف حكومتنا المصريه نايمه فى العسل و مش حاسه بالمصيبه اللى خلاص بقينا 

فى وسطها فعلا و ربنا يستر و نعرف نطلع منها

لانى حاسه ان توقيع بعض  الدول على اتفاقيه اعاده توزيع حصه ماء النيل

مش خارج بره اسرائيل اللى بتحلم من زمان بالنيل و و ان ميته توصل لغايه عندها

الموضوع ده بيبين قد ايه اسرائيل بقت تقريبا محتله كل افريقيا 

عن طريق سيطرتها على مقدرات الدول الفقيره هناك اقتصاديا و معنويا

بلد زى اثيوبيا اسرائيل بقت محتكره مشروعات الرى و الكهرباء فيها



ياريت الناس اللى عندنا يفوقوا و يعرفوا هما واقفين فين بالضبط

قبل ما يصحوا فى يوم يلاقوا النيل اخره اسيوط زى ما الخبراء قالوا

طبعا انا اكتر واحده مش حتضر من الموضوع ده

انا بس خايفه عليكم انتم

اه و الله