الثلاثاء، 1 يونيو 2010

الفرق بين سندريلا ما قبل الامير و ما بعده









بقالى فتره طالع عينى فى الصيدليه لان معنديش حد يساعدنى و

 بقالى تقريبا من قبل رمضان

و انا قايمه بجداره و استحقاق بدور سندريلا

طبعا سندريلا قبل ما تتجوز الامير حضراتكم يعنى باكنس

الصيدليه و اوضبها و اعمل كل حاجه

اه و الله  العظيم كل حاااااااااااااااجه بالمعنى  الواضح و الصريح

للكلمه

طبعا كانت فيه محاولات انى اجيب مساعده ليا و خلال سنتين

اكتر واحده طولت معايا كانت ست شهور

اللى حيسمع و لا يقرا الكلام ده اكيد حيقول انتى اللى مفتريه ولا


شريره و بتيجى على الغلابه

لا خااااااااااالص و الله ده انا طيبه جدا و الفيصل بيننا الميزان

يعنى نوزن اللى حيشتغل اول ما يجى و قبل ما يمشى و نشوف

الفرق

ههههههههههههههههههههههههههههههههههههه

انا اصلى و الله بادلع اللى يشتغل عندى اخر دلع و بجد و بحق و

حقيقى

و الموضوع ده بيغيظ جوزى منى جداااااااااااااااااا بس هو بصراحه كده كده متغاظ

فاما يبقى بسبب احسن من اما يبقى بلا اسباااااااااااااااب

من شهرين واحده صاحبتى  جابتلى بنت تشتغل و قالتلى دى غلبانه و طالبه فى مدرسه

و ظروفها وحشه و شغليها بعد الدراسه تكسبى فيها ثواب و ان شالله تديها خمسين جنيه

اهو اكسبى فيها ثواب و خلاص

ماشى يا ستى هاتيها و ربنا يسهل

المهم جت يوم واحد و جوزى اتفق معاها انها تاخد 120 جنيه و ده رقم كبيييييييير قوى

نظرا لانها متعرفش الالف من كوز الدره فى الصيدليه

بعد ماروحت بشويه لقيت الليدى والدتها بتتصل و

زعلااااااااااااااانه قوى ان المبلغ قليل جداااااااااااااااا

و انها عايزه كمان بدل اكل و بدل مواصلات و كان ناقص تقوللى بدل مظهر 

طبعا انا اول اما قالتلى كده انا قلتلها و الله دى امكانياتنا و اللى نقدر عليه

لسه بقى حتحكى انها معروض عليها انها تحترف فى الاهلى و لا الزمالك

انا بقى اختصرت و قفلت التليفون اصل الحكايه بجد مش طالبه حرقه دم و فرسه





من يومين عدت عليا دكتوره فى الجامعه جارتى

يا دكتوره  مش عايزه حد يشتغل عندك ؟؟؟؟قلتلها اكيد عايزه

قالتلى فيه صيدلانيه غلبانه قوى و محتاجه الشغل جدا و اللى حتقوليلها عليه حتعمله

قلتلها بس انا مش محتاجه صيدلانيه خالص انا محتاجه واحده تساعدنى فى التنظيف و الترتيب

لا اكثر لا اقل قالتلى هيا راضيه بأى حاجه المهم تشتغل

قلتلها برضه انتى قوليلها انا عايزه ايه لأنى باتكسف اما الاقى حد جامعى و اطلب منه انه ينضف او يكنس

بأحس انها تقيله قوى و جارحه مع ان معظمهم مش لاقى شغل و مستعد يعمل اى حاجه

المهم جت بعدها بشويه و معاها البنت  و لقيتها بتقوللى  حضرتك حتدينى كام؟؟؟

طبعا انا استغربت السؤال اللى جه قبل حتى ما تعرف الشغل المطلوب منها ايه

طبعا سألتها الدكتوره قالتلك انا عايزه منك ايه الاول؟؟؟؟

قالتلى انا ممكن اساعدك فى اى حاجه الا الكنس و التنضيف!!!!!!!!!!!!!!!!

قلتلها و الله انا مش عايزه منك اى حاجه غير الكنس و التنضيف

انا اصلا مش محتاجه دكاتره و لا صيادله لأكتشف انها كمان دكتوره بيطريه مش صيدلانيه

و الدكتوره اللى جابتك عارفه انا عايزه منك ايه و اتكسفت تقولك


مش عارفه ليه حسيت نفسى شريره و مفتريه بس بصراحه انا بتغاظ قوى

من اللى يبقى محتاج شغل و مش لاقى ياكل و يتكبر على النعمه اللى جاياله

انا فى محطات البنزين و محلات الاكل السريع بشوف شباب زى الورد

يفرحوا شكلا و اخلاقا و بيشتغلوا بأيديهم و سنانهم عشان يرتقوا بحياتهم

و الناس دى انا بأحترمها قوى لانها مش بتقول لا انا خريج جامعه و لا الكلام العبيط

اللى مش يأكل عيش خالص ده



على الرغم انى تعبت لوحدى فى الصيدليه و خلاص جبت اخرى و سلمت النمر

الا انى عايزه اما اشغل حد اشغل واحده عايزه تعيش و تتعب عشان تتعلم مش اى حد و خلاص


وياريت بقى و لو فيها غلااااااااااااااااسه

ايه ده هو انا غلسه و لا حد يقدر يستجرى يقول انى غلسه......اه بحسب

اى مدون او مدونه من اسيوط و ضواحيها و على الساده المقيمين خارجها مراعاه فروق التوقيت

يعرف اى بنت عايزه تشتغل فى صيدليه و تتعلم و تفهم عشان فى الاخر تاخد اللقب زيها زيى

يتفضل يجى المدونه و يقوللى لانى فعلا على الاخر و تعبت و زهقت و روحى بقت فى طرف مناخيرى



انا زهقت فعلا من دور سندريلا قبل ما تتجوز الامير او بعد ما

اتطلقت منه

و نفسى و منى عينى انى امثل دورها فى المرحله اللى فى النص

يعنى الفرح و الشوز الضايعه و الفساتين و الشياكه

و كده يعنى.....و اعتقد انه من حقى

مش كده و لا ايييييييييييييييييييييييييييييه؟؟؟؟؟؟؟ 


هناك 61 تعليقًا:

سومه...مجنونه فى بلد عاقل يقول...

للاسف يا حبيبتى والله لو كنتى فى مصر كنت بعتلك واحده تنضف وتكنس وكويسه جداا وجامعيه وبتشتغل فى البيوت كمان بس اسيوط دى صعب قوى الله يعينك

MR.PRESIDENT يقول...

ازيك يا دكتر .. عامله إيه اتمني اتكوني بخير .. المبلغ قليل يا دكتر علي فكره .. بس الحل بسيط .. دور علي حد يجي ينضف الصيدلية بس 3 أو 4 أيام في الأسبوع واليوم مثلا ب 5 جندي طبعا هيا مش هتاخد في ايديها ساعة ساعة ونص دا لو عندها ضمير في حالة الصيدلية متوسطة .. عموما .. يارب تلاقي بغيتك .. ويكون واحده محترمة .. ترضي وانتي تكريميها ..
دا عشان ما تعدش معاكي في الصيدلية ..

علي فكرة امي كانت بتدور علي حد يساعدها وجم 2 ام وبنتها كانت بتاخد علي مسح الشقة 10 جندي .. وكان مسحها علي رأي أبويا تلويط .. تبل الخرقة وتلوط .. سابتنا رغم تقديرنا ليها .. بس لله لله مكناش بنطقها جوانا .. وكل خايف يقول .. ربنا رزقنا بأم وبنتها شايفين أمي في التنضيف ..

يا رب تلبسي الفستان والجزمة والأمير بقي يخرج معاكي خروجة ملوكي ..

قادر يا كريم ..

هوبتي يقول...

ههههههههههههههههههههههههههههههههههههههههههههههههههههه
يا حبيبتي يا دكتوره الله يكون في عونك بجد ويصبرك

مهموهـــــــة يقول...

ههههههههههههههههههههههههههههههه
يا قلبي ما تعملي اعلان في الوسيط

صدقيني هتلاقي الناس طوابير قدامك

المهم عايزة رايي ؟؟

هاتي واحدة فلبينية او سيريلانكية و صدقيني هتكنس و تنضف و تبيع و تطلع تطبخ و تنضف البيت و ممكن تاخد 100 جنيه بس

ربنا يقويكي يا رب و يعينك
يا رب

و ان شاء الله تلاقي اللي يساعدك في الشغل يارب

واحشااااااااااااااااااااااااني ناني ناني ناني ناي

بجد و الله يا قلبي نفسي اكلمك اوي و على فكرة انتي في بالي خالص و اوعي تفتكري اني مطنشة بالعكس و الله حتى اسالي زهراء انا بعتلك سلام معاها

ربنا ما يحرمنيش منك يا قلبي

خالص حبي و تقديري

Wanda يقول...

:-) ده بوست العيد الميلاد :-)

بمناسبة التنظيف يا لولة ارجعلك فيه بكرة بعد الامتحان ده حدوتة عندى :-)

بس خلينا فى سندريلا
بقى الهانم قاعدة جانب المدفاءة و بتحلم بالامير :-))) و الجزمة الاقزاز و الدنيا حر ؟؟؟

لسه حنحلم ؟؟ يا لولة انت تسحبى الامير من ايده و تسلميه الممسحة و ...:-))) و تقوليله مقاس الجزمة بدل ما تغلبيه :-)))))))))))

لولة انا مستعدة اجيى و اساعد و مش عايزة مرتب احنا تحاسب على الميزان
حتزودينى كام كيلو ؟؟؟ فى مدة ادى ايه ؟؟؟ مع التحديد ان الزيادة تكون متانسقة :-)
ماشى ؟
ده خارج اتفاقية التورتة

star in the sky يقول...

يوووووووووووه

تصدقى برده مش هقول متغاظة ولا حاجة بس بقول لماما بيزنس از بيزنس
اصل بيتعاملوا كانهم من غيرهم الصيدلية هتوقف
بيتساااالوا اووى


تصدقى نفسى اعيش تجربة الشخص اللى مرمطة بجد اصل بحسه بيعلم الحياة فعلا وبيحسس الواحد بقيمة القرش اللى بيكسبه ويتعلم ازاى يحافظ عليه ويقايل ناس كتيرة ويعيش مواقف مختلفة


بس للاسف معرفش حد عاوز يشتغل

فاتيما يقول...

ايه دا ؟؟؟

سندريلا إتطلقت ؟!!!!

محدش قالى ؟؟!!

طب كنتوا بلغونى الخبر
عشان اتفشخر شوية
ان الحزب بتاعنا
انضمله ناس حلوة اهو


بتهرجى و الله



بس انا متفقة مع بسام
مستر بريزدنت
خلى الايام محدودة
لأن المبلغ دا على فكرة
ممكن واحدة تاخده ف يومين شغل
ف بيوت مثلا
خالتشى عندها حد بينضف
بتطلع عينيها و بتاخد تقريبا
زى ما قال بسام 100 جنيه ف اليوم لأن شقتها واسعة
و يا ريت خالتى بتعرف تلاقيها
الست بتجيلها على مزاجها هيا
مش حسب حاجة طنط ليها

م اللآخر عشان منصدعش السندريلا
قبل الجواز يا ست انتى

ربنا يعينك و تلاقيها
ان شاء الله

بوسات
و حضونات



و تعالى هنا

دا بوست ينكتب
يوم عيد ميلادك برضو؟؟!!

يعنى بدل الرومانسية
مع دكتور اشرف
و الاحتفال مع العيال
و زى كدا الحركات

جايبة سيرة المقشات

وش بيهرش
و موش فاهم

كيــــــــــــارا يقول...

فين عيد ميلادك ؟؟؟؟

خواطر شابة يقول...

هنا في بلادي هناك اشخاص يعملون باليوم تتفقين معها وتأتي مثلا في الصباح لساعة أو أقل مدة تنظيف الصيدلية وترتيبها وتغادر بمعنى لاترتبط بدوام كامل وهي في اليوم الواحد تمر على عدد من المكاتب والصيدليات بالتالي مجموع حصيلة اليوم يكون طيب وكافي بالنسبة لها ويبقى لها الوقت الكافي لرعاية اسرتها وبيتها لاأعرف ان كان هذا ممكنا عندكم لكنه حل جيد لو طبق
تحياتي وودي

الزهرة البرية يقول...

صحيح يا دوك ايه الحكاية ومش عارفة ليه الدكتور متغاظ منك فى حد فى عيد ميلاده يعمل كده طيب احنا ونستحمل يعنى قلباها على الناس كلها كده خلاص ياستى احنا هنتضامن ونبعت لك واحد مننا كل يومين يساعدك شوفى انتى بقى ومش هناخد فلوس بس طبعا يعنى المصاريف بتاعة السفر عليكى وكمان لينا نصيب فى التورتة ولا اييه ( وش بيغمز)

دمتى بكل الخير والسعادة

سمع هوص (Abo 3li) يقول...

اسيوط اسيوط اسيوط... هشوف وارد عليكي...
ياسندريلا..
بس 120 جنيه؟؟؟ مش قليل شوية... بحبحي ايدك شوية... وكله بثوابه...

Sharm يقول...

سندريلا بعد الامير تنتقل من كونها خادمة مشردة الى انها اميرة ..
فقط لانها سندريلا !!
اما عدلات و فتكات و فوزية و فتحية فيجب ان تتغير حياتها الى الاسوأ طبعا !

adel يقول...

ياحماتي
اسمها سينجيبلا
وكانت من بولاق
ومتجوزتش امير
اتجوز الواد عصام نصة الهجام

لـــولا وزهـــراء يقول...

سندريلااااااااااااا


سورى اقصد علااااااااااااااا

نعم يا دكتوره عاوزه ايه حضرتك واحده تكنس وتنظف ليه ان شاء الله ما تعملى انتى الشغل ده بنفسك يا بنتى
اقولك على حاجه الواحد لما يبقى عنده مشروع بتاعه هو بيحس انه زى ابنه او بنته ومش بيحب اى حد يجي يعمل معاه حاجه
بصى يا سندريلا يوووه اقصد يا علا لما باشتغل فى التنسيق والله يا بنتى فى حاجات اقف اعملها بنفسى طبعا زمانك بتقولى فى سرك ايه البت التافهه اوى اوى دى ماشى يا ستى الله يسامحك علشان بس النهارده يوم ميلادك مش هاتكلم يا علا انا شغلى فى بعض الاحيان بيكون محتاج رجل يعمله يقف يركب حاجه او يعمل حاجه ومع ذلك اعملها بفرح

خدى نصيحه صغيوره اعملى انتى بنفسك كل حاجه علشان تبقى سندريلا اللى خطفت كل القلوب وبعدين لو محتاجه حد بجد اعرف واحده ساكنه فى الشارع اللى وراكم ممكن ابعتها لك الصبح بس استحملى رغيها ممكن وقتها انتى هتتركى الصيدليه وتيجى تعيشى هنا فى البكس


زهــــــــراء
صديقة سندريلا الانتيم

resalatye يقول...

ربنا يوفقك وتﻻقيها وتترحمى من التنظيف وتلعبى دور سندرىلا المرحله اللى فى الوسط
وربنا يوفقك

ELMOSTAFZ يقول...

المحلات بالذات بتكون محتاجة تنضيف دايما خصوصا لو كان محل الزباين رايحة جاية عليه...أنا اشتغلت من فترة ف محل اكسسوارات كمبيوتر و كنت بكنس و امسح كل يوم مرتين ، ده غير الانتباه للزباين ف نفس اللحظة..كنت بعاقب نفسي علي أخطاء صدرت مني أكتر ما كنت بشتغل عشان فلوس...و أخدت ف آخر الشهر 300..بس رأيي انك تديري مكانك بنفسك ده أفضل بكتير ، الكنس و المسح كل يوم هايكون روتين معتاد و ف خدمة شغل الصيدلية و مش هاتحسي بتعب مع الوقت...
لكي تحياتي و ما يلزم...

Ramy يقول...

قال اية وانا فاكر ان هكون فى الصفوف الأمامية
دا انا جيت بعد ما الحفلة خلصت (: (:

اعتقد يا دكتورة ان انتى تجيبى حد ينضف ايام معينة

بس انا ملاحظ ان انتى عاوزة حد يتعلم علشان تقدرى تسبيلة الصيدلية اوقات

فدى حسب احتياجاتك

هتحددى ايامك

ههههه

والسلام ختام

Alaa Salim - علاء سالم يقول...

السلام عليكم

على فكرة المشكله دي مشكله عامه مش عندك بس
اللي عايز يشتغل دلوقتي في مكان عايز يروح يبقى رئيس مجلس إدارة أو عضو منتدب أو سفير
وممكن يبقى فعلا محتاج الشغل ولما يلاقيه يتكبر عليه
مع إن الشغل مهما كان شرف والإنسان اللي بيشتغل أي شغلانه أفضل بكتير من العاطل حتى لو كان معاه دكتوراة

dr.lecter يقول...

انا لو مكانك كنت اقولها عنك انت هكنس وامسح واسيق وانت اقعدي زي البرنسيسه

قلم رصاص يقول...

"لسه بقى حتحكى انها معروض عليها انها تحترف فى الاهلى و لا الزمالك"

الحته دي ضحكتني جدااا
ههههههههههههههههه

بس اقولك حاجة يادكتوره

البنت الدكتوره البيطريه اللي كانت هتشتغل معاكي في الصيدليه ، بأمانه صعبت علي شويه .. مش عارف ليه
راس مال مصر من شبابها في خطر
ربنا يعديها على خير

المهم ربنا ييسر لك الامور وتلاقي البنت اللي تساعدك في الصيدليه
بس ارفعي المرتب شويه ونافسي الحكومه
هههههههه

تقبلي مروري وتحيتي

momken يقول...

بصى يا دكتوره

انتى عاوزة مساعده
ولا عاوزة عامله نظافه

الموضوع مختلف

لو عاوزة مساعده يبقى لازم تعملى حسابك انها هتاخد مبلغ محترم يعنى فى المتوسط خمسميت جنيه لانها ببساطه هتبقى دكتوره بدون شهاده
وكمان انتى روحك فى ايدها بمعنى ان فلوسك هى امينه عليها فلازم عنيها تبقى مليانه
واعتقد ان خمسميت جنيه ده مبلغ معقول فى الاول ولو مازدش بعد كده هتتعلم عندك وتروح صيدليه تانيه بخبرتها الى اكتيبتها من عندك بمرتب اكبر وتتحولى انتى لمركز تدريب مساعد صيدلى فى اسيوط وضواحيها

وهى هتتعلم ترتب الصيدليه وتستلم من الموردين وتفرغ الادويه حسب الترتيب الابجدى وتتعلم تبيع وكمان تربى زبون للصيدليه وكمان تنظف المكان

اما حضرتك لو عاوزة عامله نظافه تمسح وتنضف بس يبقى عليكى وام سيد الى بتمسح السلم بتاع العماره عندك
انتى ممكن تتفقى معاها تكنس مرتين فى اليوم وتمسح يوم بعد يوم او زى ما تحبى

ودى ممكن تكلفك حوالى خمسين جنيه فى الاسبوع

انا مش من مكتب المخدماتى
لكنى مخضرم فى البحث عن شغلات
لان الست ولدتى ربنا يكرمها بتستهلك خدمات كتير جدا

فلازم حضرتك يا دكتور تتنزلى عن جزىء من ارباحك وتعملى بادجت للحجات دى

وسيبك بقى من موضوع الاكل والشرب والكلام ده
لان ده شغل مش شئون اجتماعيه


تقبلى تحياتى

الجواز و سنينه يقول...

اولا كل سنه و انتى طيوبه يا لولى
و ثانيا عجبنى اوى تعليق ممكن
تحفه بجد
(:
و فعلا حلل الموضوع صح
بس هو عرف منين ان ام سيد بتشتغل عندكم فى العماره
ده على اعتبار انهم اكيد بسموا سيد

همه دلوقت بطلوا و بيسموا اسماء تايه خالص
بس اكيد لسه واحده منهم برضوا مسميه سيد
هههههههههههههههههه

المهم يا اوختى
كل سنه و انتى طيبه و مش واقته خالص اللى انتى بتقوليه ده على رأى فاتيما

انا عارفه ان الناس اللى مش فى المدن الكبرى بيدوا المرتبات دى
لان جارتى اللى طالعه نازله برضوا جايبه مؤهلات بس مش بطرى
و بتديهم 150 جنيه
بس بيكتروا شويه مع الوقت
بصى احنا لازمنا وقت علشان نفهم اللى عندنا انهم لما يشتغلوا كويس ده هايعود عليهم
يعنى عليمها ازاى تكسب زبون
علشان لو بعتوا كتير مثلا المرتب هايزيد حاجه كده تشجعها انها تشتغل كويس
لانها ممكن تشتغل بالمرتب ده و تطفشلك الزباين و ساعتها انتى اللى خسرانه و هيه كده كده هاتاخد 120 جنيه بتوعها
يبقى لاء قوليها لو نسبه المبيعات كترت هاينوبها من الحب جانب مثلا
و ربنا يديكى اللى فيه الخير

أبو حميد يقول...

معلش يا دكتورة فى ناس كده مابيقدروش النعمة
طيب تصدقى إن فى قهوة بقعد فيها مع أصحابى معظم اللى بيشتغلوا فيها مؤهلات عليا
وفى واحد صاحبى البنت اللى بتنضفلهم البيت ليسانس أداب ومثقفة بس مش لاقية شغل ومحتاجة الفلوس فبتنضف فى البيوت

الرزق الحلال مافيهوش عيب.. العيب فى دماغتنا إحنا
سلميلى على الدكتور والولاد
صحيح.... أخبار الورد إيه؟

Foxology يقول...

الحقيقة مطلبك صعب خصوصا ان فعلا ناس جامعيين كتير بيستخسر انه يضيع تعبه وتعب اهله فى كنس ومسح

ربنا يسهل الاحوال

تحياتى

ويكا يقول...

ههههههههههه

هو لا اللى بيدور على شغل لاقى ، ولا اللى عايز حد يشتغل لاقى ؟؟؟!!!!!

دى حاجه فعلا من عجايب البلد دى ......

الغريب ان انتى مش الحاله الوحيده اللى كده يا دكتور ...... الموضوع ده منتشر فى مصر اوى .........

Single Mummy يقول...

عزيزتى علا
سيبك من التنضيف والصيدلية والسندريلا ولو سمحتى غمضى عينك......ايوة الشمعة الحلوة دى بتاعت عيد ميلادك
كل سنة وانتى بألف خير

فتاه من الصعيد يقول...

هههههههههههه

انا دخت الدوخه دي قبلك وشفت من الدلع كتييييييييييييييير


ربنا يوفقك بقا :)

تحياتي

Mark Hogan يقول...

شوفى يادكتورة, أنا عايش فى أوربا بقالى زمان ودخلت مدونتك معرفش ازاى, ولأنى مانزلتش مصر من سبع سنين تقريبا, وقبلها تخاطيف كدة, وأهلى كمان كلهم هاجروا, حنيت للبلد وسنينها وقريت حاجات كتير واتذكرت حاجات كتير واستمتعت بصراحة بحكاياتك وطريقتك فى سرد المواضيع بالعامية المصرية.
المهم قريت حكاية الصيدلية واتخيلت حياتك شكلها إيه انت وجوزك المتغاظين من أى حاجة بتغيظ, ولأنى ماقدرش اساعدك, أو افك غيظتيك, قعدت احسب فى الفلوس, ودخلت فى حيص وبيص, 50 جنيه؟ 125 جنيه؟ فى الشهر؟ ولا فى اليوم؟ والا فى الساعة ؟, قعدت احسبها باليورو, اتجننت, لا مش ممكن, فيه حاجة غلط, إقرا تانى, قريت, مش ممكن, مش معقول, حد يفوقنى, حد يقرصنى, حد يدينى بوكس فى نفوخى, وبطريقة لا إرادية خبط دماغى فى الحيطة اللى جانبى, حيطة خفيفة بتفصل بين مكتبى ومكتب مراتى, لزوم التركيز, وعشان مراتى لما تحب ترغى, ترغى مع الحيطة, المهم الحيطة دى فرقعت من خطة دماغى, ولأول مرة أعرف إن دماغى ناشفة كدة.
قلت الله يجازيكى يادكتورة, أنا إيه اللى دخلنى عندك بس؟.
ياربى؟ هو انا يوم ماحن لمصر, تحصللى مصيبة؟.
ماعلينا, كل مشكلة وليها حل وكويس ان مراتى مش فى البيت, ولو سمعت بالحكاية دى, هاتشك فى قوايا العقلية, ومش بعيد ترحلنى على أسيوط عدل.
نزلت بسرعة اشتريت خامات لتصليح الحيطة اللى ضربت, ومراتى عارفة انى غاوى نقاشة ومولود فى بقى سكينة معجون دهب, فا مش هاتستغرب, وفعلا دخلت من برة قالتلى انت كل شوية تهد وتبنى؟, وطبعا ماتعرفش حكاية دماغى الناشفة ولا حكاية الصيدلانية اللى طلعتلى من الكمبيوتر.
ما علينا بعد ماصلحت الحيطة ودهنتها وعملت فيها كام حركة كدة عشان احلل الشغلانة قدام مراتى, قعدت حسبت التكاليف, لقيتها تطلع كدة بالجنيه حوالى 600 جنيه, تصدقى؟ كنت هاقوم اخبط دماغى فى الحيطة تانى :) :)
فيه حد ياعالم ياخد المبالغ دى فى الشهر؟؟؟
دا أنا فاكر من سنتين واحد اعرفه فى مصر, قال لى إنه بياخد 3000 جنيه فى الشهر ومش عارف يعيش, قوليلى يادكتورة, هى أسيوط ليها عملة تانية وانا معرفش؟, يعنى مثلا الجنيه الأسيوطى ب 20 جنيه مصرى؟ والا الأسايطة ما بيطيؤش حاجة اسمها فلوس؟.
وحياتك, خلليكى حنينة فى الرد عليا, عشان بس الحيطان اللى فى البيت, ودماغي اللى مش حمل خبطة تانى.
حقيقى, حبيت المدونة بتاعتك, سلام

يــوم جــديد يقول...

معلش يا سندريلا يا حبيبتي
كلنا لها
يعني انتي دلوقتي بقيتي سبع صنايع صيلانية طالعة نازلة كانسة ماسحة قاعدة قايمة

بس أحب إقولك وأحبطك وأكسر مجاديفك إن الشوز الضايعة مابقتش تنفع خلاص يا لولتي
الأمير هيقول لك لسه هندور هاتي واحدة فري سايز :)

richardCatheart يقول...

هههههههههههههههههههههههههه
والله الله يعينك هو انا لو ماكنش المشوار من اسيوط لسكندريه يهد كنت جيت انا اولى

وهاخليهالك فله شمعه منوره

لاء انت مش شريره بس هما العيال اللى عايزين اعلى اجر ممكن تشتغل حاجه اقل
بس قوللها هاديكى 500 جنيه هاتاكل الدنيا وتطلع على البيت كمان تنضفه

بس طبعا انت بتتعملى فى حدود امكانياتك واحتياجاتك من اللى هايشتغل هما مابيبصوش لدا هما للاسف عايزين مكتب وكمبيوتر
اللى بتشوفيه فى محلات الكشرى والكلام دا
بيبقو وصلو لاجر كويس او معقول غير كده بيكونو اتمرمتو فى شغل كتير وفهمو اللى فيها

معلش يا لالا ان الله مع الصابرين
وربنا هايكرمك باذن الله
طيب اقولك الاسهل انقلى اسكندريه
وانا اظباتك يا جميل ههههههههه

تحياتى لسندريلا القادمه

صيدلانيه طالعه نازله يقول...

سومه...مجنونه فى بلد عاقل

ربنا يخليكى يا سومه و يكرمك
دعواتك ربنا يحلها من عنده


منورانى

صيدلانيه طالعه نازله يقول...

MR.PRESIDENT

كل الصنف ده بتاع مصلحتك اولا زى الضرايب كده
بس المبلغ اللى انا قلته ده كان حاجه مبدئيه يعنى اول شهر و بعد كده اكيد حيزيد
و كل ما حتتعلم اكيد حتزيد فى الرقم

صيدلانيه طالعه نازله يقول...

هوبتي

ربنا يخليكى يا هوبتى يا حبيبتى
بس الضحكه الطويله دى مش باين فيها تعااااااااطف خااااااااااااالص

وضحى بسرعه و الا

منورانى

صيدلانيه طالعه نازله يقول...

مهموهـــــــة

و الفلبينيه دى حتاخد 100 جنيه فى اليوم و لا فى الساعه

وضحى بسرعه يا مها هانم يا صاحبه الافكار الفللى

صيدلانيه طالعه نازله يقول...

Wanda

شكلك داخله على طمع يا ونون
حتتحاسبى بالميزان
ده غير التورته
و غير الميه اللى عايزه تتفاوضى على سعرها
و بعدين لو اديت الامير الممسحه تفتكرى انه مش ممكن يلبسنى الجردل باللى فيه؟
افكارك و اقتراحاتك تودى فى داهيه

صيدلانيه طالعه نازله يقول...

star in the sky

طبعا انتى اكتر واحده متعايشه مع مشكلتى و حاساها عشان صيدليه مامتك

و عايزه تتمرمطى و تتعلمى اتفضلى يا اختى
بس الجدع اللى يكمل للاخر

صيدلانيه طالعه نازله يقول...

فاتيما

هيا فى الطريق انها تطفش و تلم هدومها و تنط فى المالح من التعب و الغيظ

و الله يا تيما مش لاقيه حتى للايام المحدوده

دعواتك بقى ربنا يحلها من عنده

صيدلانيه طالعه نازله يقول...

كيــــــــــــارا

عيد ميلادى صابه الوبا يا كركر
و كفايه انتوا عملتوه
اكتر من كده يبقى طمع

بوثه بقى

صيدلانيه طالعه نازله يقول...

خواطر شابة

هيا الفكره حلوه قوى
بس مش كتير فى مصر
بس انا جاتللى واحده قبل كده بنفس النظام ده بس مش استمرت كتير

ياريت تنتشر هنا الفكره دى لانها مريحه نوعا ما

منورانى

صيدلانيه طالعه نازله يقول...

الزهرة البرية

يا سلاااااااااام
كل اللفه الطويله دى عشان عشان التورته
ما تقولى كده من الاول
و بعدين انا عليا السفر و الاقامه و كله
بس انتى تنورينى

صيدلانيه طالعه نازله يقول...

سمع هوص (Abo 3li)

المبلغ ده مبدئيا لغايه اما تتعلم
يعنى اول شهر و بعد كده بيزيد مع الوقت

المفروض ان ده منطقيا يتفهم و مش محتاج انى اقوله

صيدلانيه طالعه نازله يقول...

adel

و الله يا عادل
دايما انت تجيبلى اخر الاخبار
منتحرمش يا كابتن

صيدلانيه طالعه نازله يقول...

Sharm

و الله الكل بيتغير للاحسن
الا انا مطحونه وواخده على دماغى

صيدلانيه طالعه نازله يقول...

لـــولا وزهـــراء

انا برضه بحب اعمل كل حاجه بنفسى

بس انتى بتعملى الحكايه دى مره و لا اتنين كل فين وفين
لكن انا كل يوم
و بصراحه تعبت و اتخنقت
و جبت اخرى و مبقاش عندى تانى

دعواتك بقى

صيدلانيه طالعه نازله يقول...

resalatye

يارب
لاحسن انا تعبت خلاص
و عقبال ما يجى دور سندريلا اللى فى النص
حيكون المخرج زهق و جاب للدور بطله تانيه
هههههههههههههه

منورانى

صيدلانيه طالعه نازله يقول...

ELMOSTAFZ

ان شاء الله
دعواتك بقى ربنا يدينى القوه و الصبر

منورنى

صيدلانيه طالعه نازله يقول...

samy

انا عاوزه حد يشتغل الاتنين مع بعض
و ان شاء الله ربنا يسهل و الاقيها

دعواتك

صيدلانيه طالعه نازله يقول...

aa Salim - علاء سالم

دى مشكله الشباب فى بلدنا
مش لاقيين ياكلوا و مع كده مش عايز يشتغل غير رئيس مجلس اداره او رئيس وزرا ان امكن

مشكله فعلا و للاسف ملهاش حل

صيدلانيه طالعه نازله يقول...

dr.lecter

انت بتقول فيها
اللى قبلها اما كانت بتتعب او بتعيا كنت بخليها تروح و اكمل انا الشغل
و ياريته تمر فيها فى الاخر

ماعلينا
نورتنى

صيدلانيه طالعه نازله يقول...

قلم رصاص

و الله لو كنت سمعتها و انت بتكلمنى
كنت قولت انى حاشغل ابوتريكه عندى

و الله المرتب ده بدايه و بعدين هيا كانت حتيجى اربع ساعات بس
لانها حتيجى بعد المدرسه
يعنى المرتب ده فوق فوق اكبر احلامها


منورنى

صيدلانيه طالعه نازله يقول...

momken

و الله انت شكلك من مكتب المخدماتى و حتقسم معاه كمااااااان
هههههههههههههه

انا عايزه حد يبقى الاتنين مع بعض
و المبلغ اللى حطيته ده كويس بالنسبه للمنطقه عندى و كل اللى حواليا مشغلين اللى عندهم بنفس الرقم بعد ما اتعلموا
انا بقى حديهولها كبدايه
يعنى بعد شهر حيبقى اكتر
و بعد سنه حيزيد تانى
و كده يعنى
و بعدين انا اللى بيمسحلى السلم
سيد نفسه مش امه حضرتك

نورتنى

صيدلانيه طالعه نازله يقول...

الجواز و سنينه

اهلا اهلا يا ست هانم
منورانى و الله
انتى مبتجيش ليه مش تبقى تيجى

انتى كلامك صح المرتب فعلا بيزيد مع الوقت و طبعا اكيد بفهمها انها كل ما حتهتم بشغلها كل مع العائد عليها حيزيد

دايما فاهمانى يا قمره
و تعيشى ليا و تنورينى دايما

صيدلانيه طالعه نازله يقول...

أبو حميد

انت كلامك صح العيب فى دماغتنا احنا و فى نظرتنا للشغل الحلال

احنا كلنا كويسين الحمد لله
و الورد بقى نسألك انت عليه
مش كده و لا ليك رأى تانى
و شكلى لو سألت مراتك لا حيطلع فيه ورد و لا حاجه
و انك بتقول كده بس عشان تهدى النفوس
هااااااااااا
اسألها و لا تعترف بنفسك؟؟؟

صيدلانيه طالعه نازله يقول...

Foxology

انا اصلا مبحبش اجيب جامعيين حتى لو هما
وافقوا
لانهم بيصعبوا عليا و بتكسف اطلب منهم انهم ينضفوا او يكنسوا

صيدلانيه طالعه نازله يقول...

ويكا

و الله فعلا يا ويكا
هو هم يضحك و هم يبكى
الشغل موجود و الناس اللى مش راضيه

منورنى

صيدلانيه طالعه نازله يقول...

Single Mummy

و الله اللى انا فيه و التعب كله خلانى انسى عيد الميلاد
الحاجات دى بحس فى بعض الاوقات انها رفاهيه

ميرسى يا جميله على المعايده و على الشمعه الجميله دى

صيدلانيه طالعه نازله يقول...

فتاه من الصعيد

ايه ده هو انتى بلدياتى و كمان زميله كفاح
طب تعالى بقى جنبى
هههههههههههههههه


منورانى

صيدلانيه طالعه نازله يقول...

Mark Hogan

اهلا اهلا بأبناء المهجر
نورتنى يا فندم
و شرف ليا ان الحنين لمصر جابك مدونتى

الحسبه اللى انت حسبتها متنفعش معانا خالص
لأن المستوى المادى اللى عندك ميمشيش معايا و لا مع مصر كلها
و الا كنا حنبقى فى حال غير الحال

و الاسايطه مبيكرهوش الفلوس و لا حاجه
بس المنطقه اللى انا فيها مستواها كده فى المرتبات و كل اللى مشغلين ناس بيتعاملوا بنفس الارقام و انا بدأت من حيث انتهى الاخرين
يعنى بدايتها عندى احسن من المرتب النهائى لبعض العاملات

و بعدين يعنى ايه مراتك ترحلك على اسيوط عدل
هيا اسيوط بقت منفى و عقاب و لا ايه؟؟؟

ادينى رديت عليك بالراحه و لا اتنرفزت و لا اتعصبت خاااااااااالص

شرفتنى و يارب اشوفك هنا كتير

صيدلانيه طالعه نازله يقول...

يــوم جــديد

يعجبنى فيكى التفاؤل الزائد و النظره المستقبليه المشرقه
ههههههههههههههه

نورتينى

صيدلانيه طالعه نازله يقول...

ichardCatheart

يعنى لو جيت اسكندريه حتيجى تساعدينى؟؟؟

اعتبر ده وعد؟؟
ده شرف ليا اصلا يا جميله

و بعدين فعلا انا عايزه حد بالمبلغ اللى يتناسب مع امكانياتى و ظروفى
و اه اه لاء لاء

ربنا يسهل و الاقيها
دعواتك يا جميله
و سلميلى على اليكس و على بابا و ماما بتوعى

amirelhob يقول...

ربنا يوفقك فى انك حققى حلمك وتقى اللى يساعدك فى الصيدليه وبجد صعبتى عليا ن صعب اوى لما ندور على حد يساندنا ونلاقى الكل
عايش الدور واللحظه ولا كأن احنا اللى هنشغل معاها مش هو اللى هيتشغل معانا
معلش مبحبش اقول يشتغل عندنا او نشتغل عندو عشان بتبقى تقيله اوى

ومن قلبى بتمنلك كل خير وسعاده وصحه وتوفيق وفرح وابتسامه تدوم يا رب طول العمر