الاثنين، 6 أبريل، 2009

بلاش........عشااااان خاطرى


من اربع سنين ايام ما فتحت الصيدليه جديد كنت فرحانه قوى بقى و لسه متفائله
بقى و معدتش على الضرايب و لا فلوس نظافه و لا اى حاجه تجيب اكتئاب خالص
جه واحد راجل كباره كده و عايز حاجه للصداع تكون قويه عشان بنته عندها صداع جامد
المهم طلعتله علبه اقراص من نوع كويس و مش غالى فى نفس الوقت خد الدوا و شكرنى
وروح و عدى اليوم عااادى و جالى الراجل تانى يوم زعلاااااااااان
بقى اقولك يا دكتوره بنتى عندها صداع تقومى تديها دوا عملها طنين فى الاذن!!!!!
طبعا انا كنت حاموت على روحى من الضحك على المصطلح اللى هوا قاله بس الحمد
لله قدرت امسك نفسى و قلتله انا اخر طنين اعرفه هو طنين النحل
ايه بقى اللى دخله ودان بنتك قاللى هيا اول ما خدته حست بطنين و انا كبرت بقى فى
دماغى و كشرت و عايزه اعرف هيا حست بايه عرفت منه انه طنين ده اللى بيقوله
و مصره انا انى باخد نفس الدوا و مفيش نحله استجرت و جت جنب ودنى
راح قاللى لا حصل و النشره كمان كاتبه كده جوا العلبه
طبعا انا فهمت على طول انها قرت النشره و الطنين ده موجود فيها الا لازم يرجع الدوا و
انا راسى و الف سيف لا مش راجع المهم هوا مشى و مخطاش عندى تانى بس
عرفت من زميله ليا انه مدمن نشرات ادويه و عامل مشاكل مع نص صيدليات
منطقتنا بنفس الطريقه
الحكايه دى افتكرتها و انا مشغله الراديو الصبح و كان عبد الرحمن رشاد فى على جناح
الصباح بيطالب شركات الدوا انها تعرب النشرات الداخليه عشان الناس تقدر تفهمها
بمختلف مستوياتها
طبعا الموضوع ده لو حصل حيبقى كارثه على الناس لان مش كل الادويه بيبقى استعمالها
زى النشره ساعات الدوا بيستعمل عشان عرض من اعراضه الجانبيه بيبقى مفيد
فى بعض الحالات و ساعات بتبقى الجرعه اللى فيه زياده المهم فعلا الموضوع ده حيبقى
ملل و زهق لينا احنا كمان
انا فاكره ان واحده جت عندى و عمالع تقول الدكتور حمار كاتبللى دوا صرع و انا كل اللى
عند صداع و افهم فيها ان الصداع الجامد قوى الدكاتره بيعتبروه نوع من التشنجات
عشان كده بيكتبوا الدوا ده
و اللى مره جت تقوللى ان عندها ازدواج فى الرؤيه بعد الدوا و طبعا قريت النشره و لقيت
الكلمه مكتوبه كده بالضبط فيها
يا استاذى المذيع العزيز موضوع النشره العربى دى حيكون اذى للمريض اكتر من الدوا
نفسه فبلاش عشان خاطرى الاقتراح المهبب ده
و يا شركات الدوا اوووووووووووووووعوااا تسمعوا كلامه رافه بنا و حمايه لكم من
القضايا االى حتترفع عليكم
مقدمه الالتماس صيدلانيه طهقانه و زهقانه من الاقتراحات

هناك 18 تعليقًا:

حسام غانم يقول...

موضوع جميل يا صيدلانية

وفيه حاجة مشابهة للكلام ده احنا بنعاني منها

قضايا التعويضات

نفس الفكرة برضه

Ashraf يقول...

وأنا بضم صوتى لك فى هذا الموضوع اللى الاطباء بيسموه(التعامل مع أنصاف المتعلمين)
يعنى المريض بيعرف يقراء بس معندهوش خلفيه طبيه
لانى كمندوب فى شركة دواء واجهت اطباء لايكتبوا دوائى علشان النشره بالعربي
و الشركات المحترمه بتكتب الاثار الجانبيه حتى لو حاله فى المليون
وهذا لايفهم صح من المريض المصرى
وايضا لاننا فى زمن التيك أوى

koketa يقول...

هى فعلا مشكلة والله عندك حق انا فاكرة ان مرة من حوالى سنة كدا الصيدلية الى تحتنا واحد عمل للدكتور بلاغ فى القسم وجت الشرطو زكانت مشكلة علشان حاجة زى كدا
شكرا ليكى يادكتورة على البوست المفيد ده

مسدس صغير يقول...

انا معاكى مليون فى المية
اهل مكة ادرى بشعابها.
احييكى على البوست الرائع
وعلى الفكرة المطروحة الجميلة بعدم ترجمة النشرة
لان لو شخص مش واثق فى الدكتور اللى بيروحلو ومش واثق فى الدوا بتاعه ميروحلووووش

فاتيما يقول...

بصى يا صوصو ...
دا دلع صيدلانية ...هاه
جو كمان جاية من الصوصوة عشان العصافير الجميلة الى إنتى زيهم بتطيرى طالعة نازلة ...
أزيك و بعد التحية
الموضوع اللى حكيتيه دا كان مسببلى ازمة لحد وقت قريب خالص ...
ازاى ؟؟
اقولك ....
خالتى كانت عيانة و قاعدة عندنا فى فترة النقاهة ...وهيا موسوسة حبتين فكل يومين تلاتة تروح لدكتور عشان شكوى شكل ..و الدكتور يكتب دوا جديد ...
تلاقى عندها أعراض جديدة ...
فتقول الدوا السبب ...
و تطلب منى أقرلها النشرة المصاحبة للدوا ... يطلع على حظى كله إنجليزى
منظرى بيبقى وحش ...و مبعفشى أعمل ايه ...
هيا الترجمة مهمة جدا و ضرورية ...
بس الاهم منها الثقافة الدوائية اللى المفروض تبقى عند المريض
يعنى يبقى ثابت و راسخ كدا إن الصيدلى و الطبيب هما ادرى الناس بالدوا ...
فمنعقدش احنا كمرضى نتفذلك و نعمل فيها فاهمين الكفت و ندى العيش لخبازه أحسن ...
خالص حبى يا حبيبتى

عاشقه وغلبانه يقول...

طنين في الاذن...!!
وجاله قلب يقولها
انا من زمان بقول شعبنا ده مثقف بالاوي ماحدش معبرني
الناس مش هاتاخد الدوا لو فهموا اللي مكتوب في النشره
اي والله
ههههههههههههههههههه

Anonymous يقول...

السلام عليكم
انا صحيح ماليش في الطب والدواء وبصراحه اكتر مش بحبه.
بس انا مش معاكي على طول الخط المره ده يادك
لاني احيانا بفتح النشره علشان ادور فيها الدواء ده بيعالج ايه لاني بنسى بسرعه،او ادور على الجرعه المناسبه لما بيكون حد من عيالي عيان علشان لا اعطيه جرعه زائده فتضره
اعتقد ان الجرعه والمرض اللي بيعالجه الدواء المفروض يتعرب اما الباقي فمش مهم ان الناس العاديين يعرفوه فيخلوه بدون تعريب!!!
بنت النيل
او
نوجه

صيدلانيه طالعه نازله يقول...

حسام غانم:لو فى حاجات زى دى عندكم يبقى الله معك و ربنا يصبرك زينا
==================================
اشرف:هى المشكله فعلا فى الاعراض المريض يقراها و حاله التقمص تشتغل و تبدأ التهيؤات و المتضرر الوحيد احنا مش الطبيب طبعا لان الطبيب خلاص قبض لكن الصيدلى معاهم و يرجوا يرجعوا نص الدوا
================================
koketa:ماهيا لو وصلت للشرطه يبقى مالهاش لازمه من الاول احسن متتخيليش الوقت اللى بيعدى فى اقناع المرضى بحاجات مش تخصصى اصلا دى شغلانه الطبيب
و لو المريض راح حكى للدكتور انه راح قبل كده للصيدلى من غير كشف و وصف له دوا الدكتور يتعصب و يزعق و ايش عرف الصيدلى دول مش يفهموا حاجه
ما علينا المهم نورتينى
=============================
مسدس صغير:المشكله مش ثقه المشكله جهل الناس فى الطب و مع ذلك بيفتوا زى كل المصريين ده انا فى واحد بييجى يشترى ادويه لاولاده و معاه اله حاسبه عشان يحسب الجرعه سيادتك و افضل اجز على سنانى لغايه اما يمشى اقوله 8 نقط يفضل يحسب يطلعهم 7 يبصلى و يضحك ضحكه رذله كده قال يعنى بيحسبها بدقه و انا بتسرعى يمكن اضره
طبعا ما احنا عايزيين نبيع و بس
================================
فاتيما:بصى اولا انتى فاهمانى غلط انا مش بصوصو خالص انا طول النهار بصرخ فبلاش الفكره المتفائله دى عنى
ثانيا انتى بس ادى العيش لخبازه و اوعدك مش حاكل الا رغيف واحد بس
ههههههههههههههههههههههه
و الله يا طماطم حتى الجرعه مش لازم لان الدكتور بيحسبها حسب الوزن و الحاله اذا كانت متوسطه و لا متأخره قوى يعنى لو كل مريض حسب جرعته لنفسه مش حيستفيد من الدوا بالدرجه المظبوطه
و ربنا يبعد الدوا عنك يا جميله
================================
عاشقه و غلبانه:يا بنتى ده اقل مصطلح فيهم عندنا ازدواج فى الرؤيه و تكلس فى الكلى و هلاوس بصريه و اللى عايز ابعتله شويه مصطلحات معنديش مانع خاااالص اهو نتشارك فى حرق الدم
=================================
نوجه:ازيك و ازى البنوتات يارب تكونوا كويسين
طبعا انا عارفه الزهايمر اللى عندك من زمان و انك كنت بتنسى الحاجه و احنا لسه بنقولها ليكى و اذا كان تعريب الجرعه هوا اللى حيريحك و لا يهمك حاكلملك محسن بيه يعربها فورا
نورتينى و سلامى لكل من يسأل عنا

قلب ينبض بالحب يقول...

والله يادكتور ليكي حق في كل كلمة لان الوالدة عندها هواية قريت الروشتات وبصراحة انا بحسه اسمه ايه ده درسته في الكلية اه الايحاء يعني المريض يقرا الروشتة ويبدا بقى يجيله شوية تهيؤات تنطبق على الروشتة اصلنا شعب بيحب قوي يعيش في دور المرض ويبدا يقول حاجات يمكن مش بتحصله بس هي موجودة في الاعراض الجانبية ولو قلتيله بيتهيلك يقولك لاحتى بصي مكتوب كده انا ممؤيدة لعدم وجود روشتات بالعربي

الجواز و سنينه يقول...

و الله يابنتى مش هاعرف اقولك ده صح و لا لاء
انا ساعات بحتاج اعرف تفاصيل زياده
زى الجرعه مثلا لانها بتختلف من كبير لصغير
و فيه ناس بيكون متحرم عليها انواع معينه من المركبات
و لو عرفوا انها موجوده المفروض مش ياخدوها
اما الناس الموسوسه
فدى مشكلتهم
بس حلوه اوى طنين الاذن ده
كويس اوى انك استحملتيه
ازاى مش اخدتوا طنين دى فى الكليه
ده تسيب
ههههههههههههههه

magi يقول...

مش كل الناس موسوسه كده وبعدين النشره مهمه جدا لان احيانا بجد بتكون اعراض الدواء الجانبيه خطيره جدا

Anonymous يقول...

اقتراح خطر فى بالى:
ممكن برضه يكون فيه جزء بالعربى بس مبسط (ومن غير اثار جانبيه)
أشرف

حاجات جوايا يقول...

إزيك يا جميل أخبارك ايه ؟
كلامك منطقى
بس المشكلة لما بيبقى عندك دوا ومش عارفة ده بتاع ايه
بتبقى حاجة تخنق بجد
مهما كانت ثقافتنا فى الانجليزى مش هنفهم المصطلحات الطبية

خالص ودى
سالى

سومه...مجنونه فى بلد عاقل يقول...

ههههههه احنا برضوا جيبنا دواء الدكتور كان كاتبهولى للحساسيه بتاعه الصدر وبعدين بقرا النشره
الاعراض الجانبيه اضطراب فى القلب ارتفاع نبضات القلب مما يؤدى احيانا لتوقفه :)
مش عاوزه اقولك ع الضحك اللى ضحكته
بس اخدته عادى قولت لو مت حموت شهيده الطب المصرى:))

د. ياسر عمر عبد الفتاح يقول...

عندك حق
وبيحصل معايا كثير فى الصيدلية مواقف زي دى
خاصةً لما حد ياخد علاج ويقول فى النشرة بيعمل إضطرب فى ضربات القلب أو مش عارف
تلاقيه يرمي الدوا بسرعة من إيده ويكأنه فيه سم قاتل

الشاهد إن أصلاً شركات الأدوية مش محتاجة نصيحة حد علشان تعرب
أغلب الأدوية متعربة
وكمان الشعب بقى قرد فى الإنجليزي

Dr.A.S. black armor يقول...

طبعا دا اول مرور ليه ولن يكون الاخير ان شاء الله
انا زميل مهنة
وكلامك كله صحيح ميه فى الميه اعتقد ان الفزلكة اللى فى طبع المصريين وخصوصا مع الدكاترة والصيادلة لن تتوقف
يعنى الواحد لو جاب سباك يغير جلدة حنفية مش هايكلمه زى الدكتور او الصيدلى ويحاول بقى يبين انه ابو العريف
بجد انا اصلا باتضايق لما الاقى نشرة دا بالعربى
دمتى بخير

صيدلانيه طالعه نازله يقول...

قلب ينبض بالحب: و هو ده اللى حصل مع الراجل فعلا انه جاب المصطلح اللى مكتوب فى الروشته كما هو و عايز يقنعنى انه حصل معاه فعلا المهم مامتك ربنا يشفيها و يبعد عنها الروشتات يااااارب
==================================
الجواز و سنينه:طنين دى كانت مقرره على صيدله انتظام انا كنت انتساب جامعه مفتوحه
ههههههههههههههههههههههه
=================================
magi:الاعراض الخطيره قوى دى بتبقى مكتوبه فى الشركات المحترمه بس و بتبقى نادره جدا يعنى واحد فى المليونو الشركات دى بتعتبر من حق العميل انه يعرف الاثار دى حتى لو نادره
================================
اشرف: انت فى شركه و عليك انت هذا الاقتراح
==================================
حاجات جوايا:هو المفروض فعلا استعمال الدوا يبقى بالعربى او الانجليزى السهل
عشان الناس تفهم و الخطأ يقل
نورتينى
==================================
سومه:حلوه قد يؤدى لتوقف القلب دى و الاحلى انك كبرتى دماغك و خدتيه عادى و لا همك و كله فداء الوطن
================================
د/ ياسر: اكيد الحاجات دى بتحصل معانا كلنا و المريض فعلا بيبقى مقتنع انه حيموت لو خد الدوا و تحاول تفهمه انه نادر جدا يقولك مهوا ممكن اكون انا الواحد من المليون اللى فى النسبه دى
ربنا يرحمنا و يبعد عنا حرق الدم
=================================
Dr.A.S Black:هيا عادتنا و لا حنشتريها كل المصريين كده برم بطبيعتهم و بيتكلموا و يعرفوا فى كل المواضيع
==============================

mimi يقول...

معلش خدمة انسانية
بابا عنده صيدلية ومحتاج صيدلانية / صيدلي للعمل بها صباحا واعتبري الموضوع قيد الأهمية ارجوكي
الصيدلية في المهندسين / الجيزة
للي عاوز يشتغل فترة مسائية ممكن بردة
وشكرا لاهتمامك