الاثنين، 22 فبراير، 2010

ليه بنعمل كده




حد منكم جرب يبص فى المرايا فجأه كده

حيلاقى منظر غريب قوى

حيلاقى نفسه مكشر و زعلان من غير سبب واضح

طب مجربش يسأل نفسه هو مكشر ليه

ليه الحزن بقى دايما ساكننا

ليه بنتعمد نجرح اقرب الناس لينا مع اننا بنحبه

لييه بقينا قاسيين و متعصبين حتى على ولادنا

ليه اما نحس اننا غلطانيين مش بنعترف بغلطنا

لا و كمان بنكابر و نعمل نفسنا مش شايفيين خالص

ليه اما بنلاقى حد ناجح و محبوب بنغير منه و نكرهه

ليه منفكرش نبقى زيه بدل ما نفكر نهدمه

ليه بنضيع احلى ايام حياتنا فى زعل و خصام

ليه دايما بنغدر باللى يآمنا

و نآمن للى متاكدين انه ميستاهلش

ليه بنخاف على طول و من غير سبب

و نقول الدنيا غداره

مع ان الغدر دايما بيبقى من الناس

مش من الدنيا

ليه بنخاف نفرح من قلبنا

و اما بنفرح

نقول اللهم اجعله خير


من الاخر ليه بقينا كلنا متناقضات و سلبيات

و مع كده مش شايفينها

و ماشيين كده فى الدنيا



ياريت كل واحد يدور جواه و يشوف

اللى انا قلته ده صح و لا غلط

هناك 61 تعليقًا:

ماما أمولة يقول...

ازيك يا حبيبتي

غياب الدين وعدم الوعي الكافي وتجاهل الصدق مع النفس وغياب الضمير

أصبحوا من سيمات هذا الزمان
فإذا عرف السبب بطل العجب

لا تتعجبي حبيبتي
واستعيني بالله

بــــ الخطاب ــن يقول...

بصراحة غلط ربنا يكون فى عونه اللى فيه زى ما انتى بتقولى كده
بس أنا رغم الجراح دايما فرحان
عمرى ماغيرت من حد وبفرح قوى لما بلاقى حد ناجح بحس انه بيعوض الناقص عندى
ياريت لوحد زى ما انتى بتقولى كده يستفاد من كلامك ويغير نفسه لأنه مش هايضر غيرها

adel يقول...

قالولي حماتك منزلة بوست
وانا قبل الرد لقيتني عطست
قولتلهم هاروح و اشوف
ولولا التعب كنت اول واحد علقت :):)
------------
ليه اما بنلاقى حد ناجح و محبوب بنغير منه و نكرهه
-------------
الجملة دي في الجووون
بس مشكلتنا اننا معتقدين ان ربنا ادي ناس معينة بس المواهب و احنا لا
ربنا خلانا كلنا متساوين
بس احنا دايما نشوف غيرنا و نفشل نشوف مواهبنا
وبنضيعها في الحقد و الغيرة و التكشيرة
-----------
سلام مخصوص لخطيبتي :)

VOltaa يقول...

صحححح

فتاه من الصعيد يقول...

اكيد صح في معظمه

بس الصراحه برضو الفطنه والرضا مفيده

الفطنه بتعرفنا اللي قدامنا

والرضا بالمكتوب بيخلينا مانبصش لحد

تحياتي

لـــولا وزهـــراء يقول...

دكتوره علا
-********-*******
هو المفروض طبعا انك كنتى علمى بس كلامك فيه فلسفه عاليه اوى اوى

اولا نحن نعيب زماننا والعيب فينا وما لزماننا عيب سوانا

ثانيا بصى والله العظيم عن تجربه شخصيه الحمد لله البسمه مش تفارق وجهى حتى فى احلك اللحظات ومع ذلك الناس كل لما تشوفنى تقولى انتى مبتسمه على ايه يعنى لا كده عاجب ولا كده عاجب اعمل ايه طيب اشد شعرى
بصى بقى طول ما احنا بعيد عن ربنا يبقى الدنيا هتبقى كاروهات اسود فى كحلى .........

معلش ده تعليق ع السريع علشان انا مشغوله شويه
لى عوده تانيه ان شاء الله

زهراء

Wanda يقول...

:-))
روق يا قمر:-))
البحر عمل معاك جذر و لا ايه :-))

ليه ؟؟؟
عادى
هذة هى الحياة

عايزة تستريحى
حطى نفسك لثانية الناحية الثانية
يعنى الغيران يحط نفسه مكان الى بيغير منه حتلاقى انه بعد ثانية مش غيران منه
خذ فى باله ان الثانى عنده حاجات ثانية كثيرة ميتحسدش عليها بس ممكن يصعب عليه كمان :-))

و لما المراية تطلعلك وش وحش
طلعلها لسانك
حتضحكى و الضحكة تنور وشك
و حتشوفى وش ثانى حلو
:-)))

عكسى الدنيا لما تعكسك
نظرية وندالية :-))

richardCatheart يقول...

طيب انا عصبيه اه بس بضحك على طول
ههههههههههه كده

بصى هى دى سمه الحياه فى كل حاجه واى حاجه
لان البشر مختلفين فى التكوين النفسى وطرق الاستقبال والارسال ياعنى
والا هانبقى فى جنه ودا ماينفعش انت عارفه

ربنا يوقع ديما فى ولاد الحلال وماتكشريش ابدااااااااااااااااا

تقبلى مرورى

http://singlemamy.blogspot.com/ يقول...

عزيزتى

عن الحزن والألم فى عيوننا وقلوبنا اوافقك تماما لأسباب يستحيل حصرها وأحيانا واللة مش هتلاقى اسباب هو الحزن كدة لما بيسكن القلوب صعب أوى إنك تتخلصى منة أما عن الغيرة والكرة للناجحين فنحمد اللة حمدا كثيرا على معافاتة لنا من امراض القلوب هذة

صيدلانيه طالعه نازله يقول...

أمل حمدي
فعلا غياب الدين احد اهم الاسباب
لان لو احنا مؤمنين صح حيبقى عندنا رضا و قناعه باللى اتقسم لينا

نورتينى

صيدلانيه طالعه نازله يقول...

بــــ الخطاب ــن

اهم حاجه الرضا و بعد كده كله سهل و بسيط
وبعدين انا مجمعه عيوب كتيره و بصراحه صعب قوى انها تتواجد كلها فى انسان واحد و الا يبقى مش انسان خالص

اهلا بيك

صيدلانيه طالعه نازله يقول...

Mo7ammed

طب الحمد لله

تحياتى

صيدلانيه طالعه نازله يقول...

adel

هو انت بتعيا زينا كده يا عادل
الف سلامه عليك
موضوع الغيره من النجاح و حزب اعداء النجاح ده اكتر حاجه بتغيظنى فى مجتمعنا
بدل ما نفرح بالناجح و نكرمه
لا نتلذذ قوى و احنا بندمره

و لو فكرنا حنلاقى جوانا مواهب كتير و قدرات خاصه بس احنا اللى مش واخدين بالنا منها

و السلام وصل خلاص
منورنا

صيدلانيه طالعه نازله يقول...

لولا وزهراء

طيب يا ست المتفائله مستنيه انا تحليلك للوضع قريب ان شاء الله
و ربنا معاكى

صيدلانيه طالعه نازله يقول...

فتاه من الصعيد
المؤمن كيس فطن
و لو فطنا حنرضى باللى معانا
كلامك صح الصح

منورانى دايما

صيدلانيه طالعه نازله يقول...

richardCatheart

يارب يبعد عنا النكد و التكشير دايما

تحياتى

صيدلانيه طالعه نازله يقول...

Wanda

حجرب حكايه عاكسى الدنيا لما تعاكسك دى

و بعدين البحر اللى عندك دى تروق المزاج يا واندا هانم و صعب انها تجيب نكد

تعليقاتك دايما يا واندا بتعليلى مزاجى

اهلا بيكى دايما يا جميله

صيدلانيه طالعه نازله يقول...

http://singlemamy.blogspot.com/

ربنا ما يسكن الحزن قلبك و لا قلب حد ابدا

ربنا يكرمك يارب
نورتينى

Tamer Nabil يقول...

انا معاكى فى كلامك

وكل ما ذكرتى واقع بنشوفة كلنا حوالينا اكيد

الموهبة بتموت عشان فاشل بالكوسة بيخد مكانها لو انتهى دة هنشوف الحالة افضل

مع خالص تحياتى

7annen يقول...

بصى مش كله صح يعنى القناعه كنز لا يفنى
ممكن مش تكون فينا كلنا بس الرضا بالمقسوم والقدر من شروط الايمان بالله

ربنا يسعدك يارب

الشاعر الفنان أحمد فتحى فؤاد يقول...

صح
إنتى بتتكلمى صح
بس ليه ؟
كم الحزن زاد ... و الهموم ثقلت و المشاكل غطت على كل الحلول المتاحة

لكن هاقولك و بصدق ... لسه فيه أمل

Ashraf يقول...

طبعا كلامك صح
ومصداق لكلامك عندى اصحاب بيحبوا يخوزقوا كل من حولهم
ممن يطلق عليهم ان مالقاش حد يأزييه بيأزى نفسه
الناس دى لم تفشل مع واحد كانوا بيحسدوا وينقوا عليه لغاية ما يصاب باذى

اعوذ بالله منهم ومن شرهم
اعوذ بالله من شياطين الانس والجن ومن شرهم

اعوذ بالله من شر خلق الله

يارب اكفينا شر انفسنا وشر خلقك

Mano يقول...

كلامك صح
بس احيانا ظروف معينة
بتحكم علينا نعمل كده
مع العلم اني مؤمن جدا بمقولة
الانسان هو الذي يصنع الظروف
لكن احيانا الظروف هي التي تصنع الكثير
تحياتي عالبوست الجميل

عاشقه الرومانسيه يقول...

صح طبعا
اصل احنا كده شعب نكدى
يعشق النكد
فرحان يعيط
حزين يعيط

ستيتة حسب الله الحمش يقول...

ليه كده يا شعب
ده انا شغالة 12 ساعة
لحد ما كحيت جاااااااااااز

والله بقى كده
خلاص خلاص نغير المادة 76 ونجيب لكم البرادعي
وقد وافق سيادته على التنحي علشان الشعب قرفان في عيشته من السواد والحكد والإكتيييييئاب

كلام صح وملوش تفسير غير كلمة سمعتها مرة

احنا شعب عندنا زحام
بنخبط في بعض طول اليوم زي مادة كيميائية غير مستقرة الجزيئات
كل جزيء عاوز يفقع الجزيء اخوه بمبة ويخرجه علشان يستقر

أبو حميد يقول...

عندك حق يا دكتورة
ناس كتير بدل ماتحاول تشوف الناجح ده نجح إزاى بتحاول تسقطه علشان مايبقاش أحسن منهم لأن طريق النجاح صعب. وللأسف ناس كتير ماوراهمش غير تكسير مجاديف أي واحد بيحاول, مجرد بيحاول إنه يبقى ناجح
تحياتى لكى يادكتورة

الملاك الحزين يقول...

السلام عليكم
ازيك ياقمر
اخبارك ايه معلهش متأخره عليكى لظروف ولكن نحمد الله

كل سنه وانتى طيبه بمناسبة المولد النبوى

وتعرفى البوست دا جاى فى وقته
الناس كلها بتعيب فى الزمن والعيب فينا احنا هو ليه صحيح بنعلق اخطائنا على الزمن

يااااااااااااه بجد كلامك صح
ربنا يوفقك
يارب ويكرمك خير
دمتى بكل الخير
اختك
ايناس

Cute Kitty **sookra يقول...

دكتوره علا
ازيك يالولا شفتى من غير القاب اهو
عندك حق احيانا ابص للمرايه من غير قصد الاقينى مكشره كده وحزينه اوووووووم ايه اضحك
فهو لازم نضحك بدال مانطق ولاايه
اما عن الغيره والحقد والحسد فموش هيخلصوا غير لما كل واحد يهتم بحاله وبس ويبص لمستقبله موش مستقبل غيره
واحشانى يالولو
مساكى شيكولاته

فاتيما يقول...

صباااااح الخير

و النكد ع الصبح

و بعتييييين بقى


يا ست انتى ياللى بحبك و انتى معكننة كدا و معكننا معاكى


بصى بقى

كل اللى سيادتك كتبتيه دا
ملخصه كلمة و احدة مفيش غيرها



الدنيا


آه
هيا دى الدنيا
بكل ما فيها


بس زودى عليها شوية حاجات مفرحة تانية و انجازات و نجاحات و ناس تتمنالك الخير و تحبك و تسندك و تساعدك و تموت فيكى و .....ألخ

المراية مبتتغيرش

حالتنا النفسية بس
وقت البصصان فيها
هوه اللى بيفرق

انتى دلوقتى مزاجك
يوك
عشان كدا البصة حزينة



لكن لو مزاجك رايق و تمام
هتلاقى حاجات حلوة تشوفيها


عجبتنى قوى كلمة وندا
و بنفذها كتير قوى
عشان مستسلمش ليأسى
اللى لو بس حس انى نخيت شوية
هيهجم بكل شراسة
و يخلص عليا

و انا مش ناوية أسيبه بقى يعملها
على الأقل الا لما احارب
بآخر جهدى



انتى كمان يا لولاّ
اوعى تسيبى الياس يغلبك



يا بنتى احنا بنحبك قوى
و مبسوطين بيكى قوى
و انتى مهمة قوى
ف حياة ناس كتيييير


قوم تيجى تحزنى كدا
و أنقهر انا
و اقوم اكسرلك المراية دى
خمسميت الف حتة يعنى
عشان متبصيش فيها
و تزعلك كدا ؟؟


لااااا بقولك ايه
متكرفيش عليا
لحسن ازعل انا كمان
هه


بوسة و حضونااااااااات
يا لولتىّ

صيدلانيه طالعه نازله يقول...

7annen

كلامك صح فعلا

ربنا يراضينا و يهدينا كلنا

منورانى

صيدلانيه طالعه نازله يقول...

Tamer Nabil

اللى انت قلته ده داخل تحت قائمه الاحباطات و ذهاب الشيىء لمن لا يستحقه

لو كل ده اختفى
اكيد حنبقى مبسوطين

صيدلانيه طالعه نازله يقول...

Ashraf

حتقوللى على دول
اى شغل فى الدنيا بتبقى فيه الناس المقرفه دى
و بصراحه بيدوا طعم للمكان
هههههههههههههههههههه

سيبك انت و روق
و خليهم ياكلوا نفسهم

صيدلانيه طالعه نازله يقول...

الشاعر الفنان أحمد فتحى فؤاد

ببقى مبسوطه قوى اما حد يدخل عندى و يقول ان فيه امل

بس بصراحه مفيش
ده حتى كتب العربى شالوا منها امل و عمر

ربنا يقرب البعيد بقى

صيدلانيه طالعه نازله يقول...

Mano

هو المفروض ان الانسان يصنع الظروف
بس للاسف مش كل مفروض بيحصل

منورنى

صيدلانيه طالعه نازله يقول...

عاشقه الرومانسيه

و انا بقى من يومى و دونا عن كل اخواتى اللى هما واحد بس
اعز النكد زى عينيا
امينه رزق يا اختى

صيدلانيه طالعه نازله يقول...

ستيته حسب الله الحمش

مقولنا بلاش الكيميا يا حاجه
و قولنا اللى يسقط فى الكيميا يشتغل فى الاحيااااااااااااااء
هههههههههههههههههههه

بصى يا حاجه الشعب ده عشان وشه يتفرد لازمله 100 برادعى مش برادعى واحد

اصل الكراميش كترت و طلع فوق الكراميش كراميش تانيه
و الموضوع عايز مكوجى رجل بس يكون شاطر يا اختى

يعنى مش موضوع تنحى

لا دى عايزه تناااااحه

و انا قررت من دلوقتى اكون كده

صيدلانيه طالعه نازله يقول...

أبو حميد

للاسف الحكايه دى هنا بس لكن فى اى بلد تانى تلاقى الناس تفرح بالمتفوق و تشجعه و تزقه لقدام عشان يبقى احسن

لكن هنا نحط له قشره موز عشان يتزحلق و يقع و نلحق نسبقه و برضه مبنعرفش لان الفاشل عمره ما ينجح حتى لو قتل الناجح

منورنى

صيدلانيه طالعه نازله يقول...

إبتسامة ملاك

نوسه

ازيك يا قمر كنت قلقانه من اختفاءك بس لقيتك ظهرتى تانى قلت اكيد حتيجى

للاسف فعلا العيب فينا مش فى حد تانى
و للاسف ان كلامى معظمه صح

ربنا يحلى ايامك و ايامنا ان شاء الله

نورتينى بجد

صيدلانيه طالعه نازله يقول...

Cute Kitty **sookra
باستناكى انا يا سكره عشان الشيكولاته الجميله اللى بتجيبيهالى

للاسف الغيره و الحسد صفات انسانيه و عمرها ما حتختفى طول ما الانسان موجود على الارض

و انتى كلامك صح
اما الواحد بيشوف نفسه مكشر بيحاول يضحك حتى لو مش من قلبه

صباحك مارون جلاسيه

صيدلانيه طالعه نازله يقول...

فاتيما

و الله مفيش غيرك انتى اللى بيرفع معنوياتى

بقى انا حد مهم انا
زياده دى
انا ممكن اكون مهمه عشان باعمل الاكل و انشر الغسيل و اطلع و انزل
غير كده نوووووووووو و 100 نو وووو كمان

انتى بس اللى بتحبينى زياده

صباح الفل

لـــولا وزهـــراء يقول...

دكتوره علا
-****-*******
انا جيت تانى مش عارفه بقى من حسن حظى او من سوء حظك انك هتسمعى شوية كلام من دماغى الغريبه العجيبه
ههههههههههههههههههه
والله انا متفائله لان كل حاجه حواليا ممكن تجيب لى احباط وياس وياريت الناس تسبنا فى حالنا سواء كنا مبسوطين او زعلانين .......
فى مره قرات جمله بتقول اسهل طريقه لكى تسعد الناس هو ان تتركهم فى حالهم


اولا اغنية المرايا دى صعبه اوى اوى باحس كده انها بتدخلنى فى مود مش حلو خالص مالص


والله بقى انا مره سالت حد من اصدقائى المقربين اوى اوى انت مكشر ليييييه على طوووووووو قال هو فى اى حاجه تدعو للضحك او التفاؤل بصراحه قولت فى عقلى ان كلامه صح بس برضه بسم الله ما شاء الله عليا على طوووووووول مبتسمه وباخد كل عين والتانيه بس يلا خليها على الله ..........

اللى انتى قولتيه ده مش غلط بس برضه مش صح مش كل الناس كده لسه فيه ناس طيبه محبه للخير بتفرح لغيرها وبتساعد غيرها يمكن عددهم قليل بس لما ربنا يكرمنا بحد فيهم لازم نمسك فيه بايدينا
انا رغيت كتييييييييييير معلش بقى كان وحشانى الرغى من فتره
تقبلى اطيب الامنيات لكى بالسعاده والهنا والفرحه الدائمه

زهراء

فاتيما يقول...

نعممممممم!!!!


متخلينش اقف ازعق بقى
و الم عليا البلوجر ؟؟؟


منزنى هيبقى ويحششششش
و الناس واخدة فكرة انى كسوفة و ركيكة و كدا



مين دى سعادتك اللى بتتكلمى عليها بالإسوتخفاف دا ؟؟؟؟


هيا حكاية اكل و شرب و غسيل ؟؟


يا شيخة حرام عليكى


طب خدى بعضك كدا مع نفسك شوية
و افصلى فى خيالك
و طلعى روحك من الصورة

و بصى من بعيد
و قوليلى



لو أختفيتى (بعد الشر مؤقتا) من حياة دكتور اشرف
و العيال
و اهلك
و معارفك
و احنااااا
و التدوين


المنظر هيكون عامل ازاى ؟؟؟
عادى يعنى ؟؟؟
و جالك قلب تقوليها !!!


مش بقولك شكلك هتكرفى عليا
و انا مش طالبة معايا نكد الايام دى

يا لولاّ
اللى حواليكى بيحبوكى قوى
يا حبيبتى
مش عشان حاجة بيخدوها منك
او أى استفادة آنية



العالم دى بتحبك
عشان محتاجلك فى حياتها
احتياج متبادل مش انانى
محتاجين حسك معاهم عشان
تملي ايامهم أمان و فرحة
و حتى لو مفتحتيش بوقك بريع كلمة


اصل انا شوفت دا
بعنيا و قلبى

بطلى تقللى من قدرك
و قيمتك عندنا
لحسن و كتاب الله آجى أبطحك


و اهو القطن و الشاش و المطهر عندكو مش هنجيب من براااا

وش بيغمز
و بيقولك بالمرة
انه بيحبك يا نكدية



على فكرة
انا روخروا من محبى است امينة رزق
جدااااااا


بوسة و حضونات
و هاجى تانى اخد جرعة نكد جديدة
لما نشوف آخرتها معاااااكى

Wanda يقول...

احلى بوست قراته فى حياتى
خليتى فطوم تشرشح (لا مؤخذة يا فطوم :-))))))))))))))))))))))))))

كل ده يطلع منك
انا بقى احاسب بقى و انا بجى اعلق عندك :-))))

فمرة حتقفشينى تعبطينى :-)))

صيدلانية كلمى و النبى بوستات نكد (هاتى ودنك كده كده وكده طبعا :-))))
خلينا نشوف اللغة الفطومية الحديثة مش لازم تبقى فى نكد فعلا)

و بعدين امينة رزق ياصيدلانية
لا لا خليكى عبلة كامل
عليها احلى عياط :-))))
لما اسمعه افطس من الضحك
مرة شوفتلها مسرحية اسمها عفريت لكل مواطن
كانت طالعة خدامة بتعيط بشكل متواصل :-)))))) رهيبة

و بعدين
بلاها مرايات خالص
علشان متزعليش نفسك
اقولك اعملى زى
ازرعى البيبان :-)) صحى البيت كله و ماله :-))) لما يصحوا شوية :-))
يعرفوا قيمتك
و يحولوا يتفادوا زعلك :-)

فاتيما يقول...

بت يا ون ون

يخربيتك

انا بموت فى المسرحية دى
و بحب لينين الرملى و نبيل الحلفاوى و عبلة كامل فى النص دا خصوصا
و كنا مسجلين المسرحية دى فيديو و شفتها عشرتلاف مرة لحد الشريط ما باظ
و مش لاقيها ع النت خااااالص
مهما دورت

لااااااااااااا


انا اتلبشت منك كدا

و انا بشرشح ؟؟؟

طب دنا حسى عمره ما طلع
و دايما يقولوا عليا
بسكوتة ركيكة
طب دنا حتى عندى بنت
بسكوتاية
اسما و فعلاً


كدا تظلمينى ى ى ى
يا وحشة


وش باصص للأرض
فى كثوووف
و عامل غلبان

Wanda يقول...

بذمتك يا صيدلانية
(معلش عملناها قعدة عربى :-)) البوست ده :-)) استحملينا
احنا ضيوف خفاف جدا :-))

انا بتبلى على فطوم ؟؟؟
انا بظلم فطوم ؟؟:-))
وش بيغمز

و قال الدليل عندها بنت بسكوتة
ما انا عارفة اصلها تبقى عمتى :-)))
بس بسكوتة لا ينطبق عليها المثل القدرواى الفول :-))
اذا فهو دليل مرفوض

حته فطوم بسكوتة
لا اظن فطوم انت عسليياية
يعنى ممكن تخبطى الناس على دماغتهم لو عايزة و تدوبى فى بوهم بالراحة لو عايزة :-))
بس محدش يقدر يعض فيكى او يقرقشك و لا سنانه تتكسر

ياترى حد غيرنا فاكر الممسرحية ديه
:-)))))

متتلبشيش
انا بطلع بالنهار بس
فى اليل بطلع فى النت :-)) اه والله :-))
و مبعديش من الحيطان :-) من الشبابيك بس :-)))
و متبصيش وراكى :-)))

بسنت يقول...

السلام عليكم
اكيد اللى قلتيه كله صح
بس ليه فعلا لازم نفكر مش مجرد نسأل ولازم نجاوب
الايمان هو السبب بانه القدر وكل شئ نصيب وربنا مقسم رزقنا الى مش بايد اى حد تانى
تعرفى لسه النهارده جاللى كتاب صغير اسمه الدعوه الاسلاميه كتاب جميل بالرغم من انه مغالى فى بعض الاشياء - الخاصه بالادب والفلاسفه- بس فيه اجابات جميله عن اسئلتك دى
لو كتبت مقولاته فى مدونتى التانيه هرجع اكتبللك اللينك

سلمتى دايما

صيدلانيه طالعه نازله يقول...

لولا وزهراء

ده من حسن حظى انك جيتى تانى يا قمره
انتى من الناس اللى ينطبق عليهم كلامك
يعنى انتى من الناس اللى اتعرفت عليهم و مينفعش اسيبهم يخرجوا من حياتى
كمان البت اللى فوق دى و عماله تزعقلى اللى اسمها فاتيما
كمان البت واندا دى اللى شكلى حاروح اخطفها من مكان ماهيا موجوده

الابتسامه فعلا مهمه و انا كنت زيك بس يظهر اتنشيت عين برضه

ياللا ملحوقه

منورانى يا جميله

صيدلانيه طالعه نازله يقول...

فاتيما

هههههههههههههه
يااااااااادى النيله يعنى تبطحينى و كمان تعالجينى بفلوووووسى
ايه الافترا بتاع بنات وسط البلد ده و على الاتين من الخارج مراعاه فروق التوقيت


ده انتى طلعتى قويه و مفتريه
خلاص عرفت انى مهمه يا ستى فى حياه مصر كلها و حارشح نفسى نائب للبرادعى

و ربنا يستر بقى

هاااااااااااااااا
ارتحتى يا حاجه
ادينى رميت نفسى فى التهلكه

صيدلانيه طالعه نازله يقول...

Wanda

ايه رأيك بقى
اى خدعه
خليتهالك تشرشح بالعربى اهه

هههههههههههههههههه
انا كمان باموت فى المسرحيه دى و عبله كامل فيها مسخره فعلا

فكره برضه يا بت يا واندا موضوع رزع البيبان ده
حاجربه و لو اضربت حاجى اقطم رقبتك

صيدلانيه طالعه نازله يقول...

فاتيما

انتى تشرشحى؟
ميييييييييين اللى قال كده
لا انا و لا واندا نقصد كده خااااااااالص
انتى؟؟؟؟؟؟؟؟؟
ده انتى دونا عن اخواااااااتك كلهم
نسمه
هههههههههههههههههههه
وش بيتمصمص

صيدلانيه طالعه نازله يقول...

Wanda

لا يا واندا براحتك انا بعت اجيب شاى و عشا يا اختى

و بعدين ده الادب تيما و الاخلاق تيما

تيمااااااااااا
يخرب بيت اللى يزعلها يا شيخه

و بعدين ايه حكايات الاشباح و الشبابيك
دى انا كاتبه بوست نكد مش ارواح و اشباااااااااااااح

ياللايا بت من هنا
يجعل كلامنا خفيف عليكى
هههههههههههههههههههههههههه

صيدلانيه طالعه نازله يقول...

بسنت

ازيك يا ست الزميله المفتشه

الايمان هو طريقنا للرضا بالقدر اكيد
و اى خلل فى الناحيه دى معناها ان ايمانا مهزوز

مستنيه اللينك

منورانى

فاتيما يقول...

البرادعى ؟؟؟؟


و لا أعرفففففففففك يا امى


آل البرادعى آل

صيدلانيه طالعه نازله يقول...

فاتيما

صباح الندااااااااااله الاصلى

بكره تندم يا جمييييييييييل

Wanda يقول...

استنينى يا فطوم

بقى كده بتهشنى يا صيدلانية
يعنى ماحدش غيرك بيعرف يكتب نكد
لا طيب :-)))
حنزلك بوست نكد :-)))

اخلص غسيل المواعين الى عاليا
و افوق واكتبهولك

بعد ما بعتى على الشاى و العشاء تهشنا و منغير ما ندوق :-(
كده يافطوم
اديها كلمتين
متتهوشيش من برادعى ديه
الله و انا بقول المعلمة فطوم حتجبلنا حقنا :-((
توتوتو

كده برضه
هربت من حماة ابنك

بالمناسبة علشان اهدى النفوس بس :-)
بغلس على بابا عادل و اقوله حشتكيه لخطبتك:-)))
يقول خطيبة مين ؟ يرضيكى كده يا طنط (وش برئ مبربش :-))

بس
كفاية كده اخلص الغسيل و
اجى اشوف لو لقيت البوسك النكد لسه سارى المفعول
حنكد انا كمان اشمعنى يعنى
احنا وحشين و لا ايه:-))
لا بنعرف ننكد برضه :-))

(نصيحة علشان تصرفى الاشباح الوندالية يا تجبيلك مقرئ يا تكتب بوست جديد :-))))اختارى :-)) انت و جيبك :-)))

صيدلانيه طالعه نازله يقول...

Wanda

عادل بيقولك كده عشان بيخاف من العين و الحسد
و بعدين انتى شكلك مينفعش معاكى مقرىء واحد انتى عايزه الحضره عشان تصرفك
ههههههههههههههههه

emymony يقول...

جميل اوى البوست ودايما بيحصلى بجد
بس انا لما بابص فى المرايه بتحصل لى ازمه نفسيه بجد
وبفضل اعيط وباحاسب نفسى على كل اللى عملته ف يومى بس من غير المرايه المرايه بخليها للبكاء وانى افضل ابص لعينى
اوقات باحس انها بتكشفنى وبتقول كل اللى جوايا وبتعاتبنى وتحاسبنى من غير مااتكلم
بس القسوة الغدر ربنا يبعدهم عنا رحمه ربنا عليه انى دمعتى قريبه وبتفضحنى فى فرحى وزعلى وتكشف اى احساس جوايا
ومن غير زعل ولا خصام مده صغرة وكل شىء بيروح
تحياتى واسفه على التأخير ف الرد لان النت كان بايظ
مع خالص حبى وحبى يالولو

خواطر شابة يقول...

تعرفي وانا بأقرأ كانت الخلفية اللي في دماغي هي اغنية محمد منير وخالد عجاج ليه يادنيا هي ايضا كانت محورها هذا السؤال ليه بنعمل كده وهذا السؤال للاسف يبقى معلق بدون اجابة محددة لان الاسباب متعددة ومتشعبة

Abd-Alrahman يقول...

سالت نفسي السؤال دة كتييييييييير
وبرضة ملاقيتش اجابة
ازيك الاول
من زمان مجيتش عندك
بسبب الكلية
انتي اكيد عارفة الفارما والفيتو
والي فيهم
ادعيلي بقي اخلص عشان اتخنقت

وانا عارف السبب الي بيخليني مكشر
هوة ان ورايا امتحان سيوتكس
او فايتو
ههههههههههههههههههههههههه


تحياتي
مستني زيارتك

الصيدلي المطحون

العيسوى الصغير يقول...

انا شايف ان الانسان محب للنكد

مفيش حاجة تفرحنا اوكى

بس المفروض نفرح عشان مفيش حاجة تخلينا نزعل

جوناى يقول...

تستخدم رسائل المبيعات لإدخال منتجات جديدة للعملاء الجدد والزبائن الماضي. من المهم أن تحدد مشكلة مهمة تحتاج إلى حل وتوفر الحل في رسائل المبيعات. يوفر هذا المثال نموذج cover letter بالعربي
، وكذلك العبارات الهامة لاستخدامها عند إرسال مجموعة واسعة من رسائل المبيعات.