الخميس، 21 فبراير، 2008

و ضاع العمر يا ولدى

الواحد بعد ماعينيه عميت من المذاكره 5 سنين وبقاله 10 سنين متخرج اكتشف انه

معملش حاجه فى دنيته خالص و بقيت بقول فى سرى يا ريتنى فشلت

فى دراستى و بقيت لاعب كوره اهم الناس كلها نسيت مشاكلها و قرفها و فضلت فرحانه

معاهم وليهم و شالتهم فوق دماغها و ادوهم ملايين داخليا و خارجيا و مع ذلك عند اول

محطه بداوا ينطوا من القطر و اولهم حامى العرين الحضرى

بعد ماتش الكاميرون التانى الحضرى كان بيرقص و بيطلع لسانه ومعرفتش ساعتها

\لمين اتاريه بيطلعه لينا احنا و احنا بهبلنا مصدقين حكايه اسم مصر و الانتماء و ا

لحاجات الكبيره دى

من هذا المنطلق انا بفكر اطلع ابنى لعيب كوره و طول ما انا قاعده حا اقول له يابنى

امسكلك كوره وذاكر بدل ماتفشل و تطلع دكتور زى امك و ابوك و تقعد زيى فى صيدليه

للى يجى يقولك عايزه بربع ريفو ولا اللى يجى يفاصل ويقولك بكل سماجه ورزاله مفيش

خصم عشان خاطرنا

هناك 3 تعليقات:

الجواز و سنينه يقول...

انا اخويا فى منتخب كوره اليد
قعدت اقوله يابنى سيبك من اليد يا حبيبى
مالها كوره القدم
بس تقولى ايه عيال مش فاهمه مصلحتها
فجأه كده ال tv
مش وراهم غير عصام قعدت اقول كام عالم زهق و طق و ساب البلد
و محدش عبره
اظاهر ان فعلا المستقبل فى الكوره

NOur يقول...

فعلا .. انا كنت لسة قاعدة بدرب أخويا و ألعب معاه كورة دلوقتى استعدادا للملاييييييين : ))
صحيح هى القعدة ف الصيدلية مملة أوى ؟؟؟

mostafa rayan يقول...

ايام ماكنت في ابتدائي كان في واحد زميلنارافض التعليم لا كان بيروح المدرسة ولابيذاكر مرة اخوه الكبير جابه المدرسة وزعقله قدامنا قاله اتعلم لحد 3 اعدادي وتعال معانا الشغل - هما كانوا صنيعاية - لكن الواد رفض واصر علي عدم اكمال تعليمه وانه ينزل معاهم الشغل دلوقتي بعد مرور مايقرب من 16سنة اتأمل حالي وحاله هو بقي صنايعي وكسيب وعنده خبرة كبيرة جدا وانا مجرد خريج جامعي معايا ورقة هابلة اسمها cvبروح ارميها في كل مكان ولا حد بيتصل ولا حاجة لاء واللي يغيظ الحكومة دلوقتي من خلال اعلان غبي متخلف عقليا بيذاع دائما بتطالبني اعمل زي صاحبي دة اتعلم صانعة ووزير التعليم العالي بيأيد موقفه بيقولك مش مهم كل حد يكون معاه شهادة عالية المهم يكون معاك صانعة تعرف تسترزق بيها بعد مافضلو سنين يوهمونا بحوار الشهادة الكبيرة والعلم كالماء والهواء طيب ليه ماقولتوش كدة من زمان كنا اختصرنا السكة دلوقتي بقي هو الصح وانا الغلط يظهر انه كان مكشوف عنه الحجاب منذ ان كان طفل صغير ولو كان سمع كلام اخوه وقتها كان خسر كتير
آه لنا الله في هذه البلد
مش عارف اقولك ايه بس تدونتك دي حركت جوايا شجوني