الاثنين، 26 أبريل، 2010

امووووووووووووت و اعرف








يوم الخميس اللى فات كان من الايام القليله

اللى جوزى قعد فيها فى الصيدليه معايا

دخلت واحده ست عايزه كريم فرد شعر
 اشترته و مشيت

ساعه كده و جت بتورينى الكريم نتيجته ايه فى شعرها

المهم جوزى قاعد و هيا المفروض محجبه و هيا مصره تفك الايشارب

و تورينى نتيجه الكريم

و انه نشف شعرها شويه و حاسه بملمس غريب فى الشعر

المهم انا لميت الدور معاها و قلتلها الكريم فى الاول بيعمل كده

و بعد كده عادى بيبقى كويس




راحت قالتلى انا عايزه حمام كريم للشعر و كريم تستعمله لشعرها

برضه اشترت و مشيت

شويه جت هيا و اختها و بتقولى الكريم بتاع الفرد بايظ و بوظلى شعرى

اكيد ده منتهى الصلاحيه

و حمام الكريم ملمسه غريب و عايزه  ارجعه

طبعا انا العرق الصعيدى اللى فى دماغى ضرب

و اتعصبت عليها لان تواريخ الصلاحيه للعلب كويسه جدا

لا و الهانم تقولى هاتى العلب الفاضيه عشاناعرف اشتكيكم بيها

قلتلها بينى و بينك تواريخ الصلاحيه بس لا اكثر و لا اقل

المهم هيا اتعصبت و انا اتعصبت

لقيت جوزى قام و دخل فى النص

و اهدى يا دكتوره مش كده و انا مصره ازعق

راح مزعق فيا و قاللى كفايه بقى

طبعا انا كرامتى وجعتنى قوى و رحت سايباهم و طلعت فوق



طبعا انا سيبتهم يتكلموا و يكملوا خناق

و بعد شويه لقيتهم بيرنوا عليا و لقيت

الست بتعتذرلى فى التليفون و هيا فى غايه الاحراج

طبعا انا انبسطت انها عرفت غلطها و اتأسفت



بس بصراحه بينى و بينكم حاموت و اعرف

هما اتكلموا فى ايه و انا مش موجوده

مش غيره و الله هو بس فضووووووول

و حتى لو كانت غيره حقى و لا مش حقى؟؟؟


هناك 65 تعليقًا:

صيدلانيه طالعه نازله يقول...

الناس اللى كتبوا تعليقات
انا بتأسفلهم
التعليقات ضاعت فى الوبا
قصدى فى الاشراف

انا اسف جدا و ياريت تكتبوها تانى

وش مكسوووووووووووف

لـــولا وزهـــراء يقول...

ههههههههههههههه

بعد الشر عليكى

انتى عاوزه تعرفى اللى حصل
ممكن اكتب لكى سيناريو اقول فيه اللى حصل كله ايه رايك ;)

تعليق ع السريع


زهراء

هوبتي يقول...

ههههههههههههههههههههههههههههههه
بصراحه ليكي حق ونص وتلات اربع كمان
ولو مش غرتي عليه هاتغيري علي مين
وبعدين انتي ليه مش سألتيه هو قال ليها ايه؟
انا لو مكانك كنت فتحت له تحقيق بصراحه انا جايه اهدي هههههههههههههه


لالالا بجد بامانه انتي من حقك تغيري عليه بس ما تنسيش انه جابلك حقك واكيد هو اتكلم معاها وفهمها انها غلطانه افترضي حسن النيه وعادي لجوزك الهفوات دي لانها مش تسحق ان دماغ تروح وتجيب فيها

أبو حميد يقول...

جوزك ده راجل جامد ربنا يخليهولك
مش كفاية إنه بيحللك مشاكل الشغل كمان
ونصيحة ماتزنيش علشان تعرفى قالوا إيه وإنت مش موجودة... لأنه مش حيقول يعنى مش حيقول

sony2000 يقول...

بجد من رأيي
هو قالهم كلمتين يهديهم موش اكتر
علشان يعرف يمشي الموضوع..لان كتير اوي من الستات صراحه بيذعلو من اقل حاجه وعوذين اللي يمشيها ويطيب خاطرهم بكلمتين وبس
تحياتي:)

من كل بستان زهرة يقول...

هههههههههه
حقك طبعا تعرفي
انا لو منك مكنتش نيمتوا اليوم ده من غير ما أعرف الي حصل

أوعي تكون قلعت الإيشارب وورته الكريم عمل في شعرها ايه

خلي بالك يا دكتوره
يعني مكنش لازم تتعصبي أوي كده وتسيبيهم
ما انتي عارفه حركات الستات
تحياتي

♥♥ شذا ♥ الروح ♥♥ يقول...

هههههههههههه

حقك ونص

الموضوع ده فى أن مممممممممممممممم


انى احتج
رجاله اخر زمن

اياكى تستكى لاذم تعرفى
شوفتى ازاى انا بهدى النفوس ياقمر

ربنا يسعدك يارب ويريح بالك
احبك فى الله
انا شذا واحده بتحبك وبتموت فيك

هاااااااا؟

عروستى

MR.PRESIDENT يقول...

مليش دعوة انا كتيت التعليق بعد دقيقتين :(:::
بهزر طبعاً في الحزن لكن فعلا انا كتبت التعليق بعد 2 دقيقة
بصي يا ستي انا كنت بقول الموضوع سهل ممكن تسألي جوزك هوا قلها ايه ...
ولو عايز تكسبي نقطة عنده ممكن تحاول تتصلي بالسيدة اللي اعتذرت ليكي واعتذري ليها صديقيني ممكن تصبح صديقتك وحتي معزتك هتزيد عن جوزك ..

اتمني اكون فيدتيك علي قدي

قلم رصاص يقول...

ههههههههههههههههه

ليكي حق طبعا يادكتوره

اكيد رجع لها فلوس حق الكريمات

اه ماهي الفلوس تهدي النفوس ^_^

masry يقول...

علي فكرة يا دكتورة في نصابين دلوقتي بيفضو الشامبو ويملوا العبوة ب اي حاجه وبيعملو الفلم ده خلي بالك

فتاه من الصعيد يقول...

هههههههههه

ولا يهمك المهم الموضوع اتحل ... انت جوزك انت هديتهم ازاي يا حبيبي علشان اتعلم منك ... ايون ارفعي معنوياته الذكوريه وهو هيقر بكل حاجه :D

تحياتي

ويكا يقول...

مفيش فايده

هما الستات هيفضلوا ستات.

علشان كده ، انا عمرى ما هستنى من اى ست غير كده


وده سر نجاح اى راجل بجد

ستيتة حسب الله الحمش يقول...

لا اله الا الله
ها يكون قال لها ايه يعني بذمتك
راجل
بيعرف يلم المسائل ويتكلم بهدوء
راجل يعني قطب مختلف وغير متنافر
والسوتات قطيعة تقطعهم يموتوا في الحونية
لا تعرفي ولا تسألي
سيرة وخلصت
ويطول عمرك يااختي تموتي ليه بس بعد الشر
ولو بيشتغل في مكان تاني ها تشتغلي حارس يعني؟
المهم بيحبك وابو العيال الدايخ ولازمن كله يدلع نفسه بالعقل وبالأصول :)

سبايدرمان يقول...

طب ما انا عايز اعرف ايه الى حصل طيب
اسالي و ااعرفي
اسأليها هيا بذات نفسها
او اسألي جوزك اضمن يعني
^_^

Ramy يقول...

ههههههههههه

حقك
بس مش معقول ان انت متعرفيش اسلوب جوزك

بس ممكن يكون زى ما قالت ستيتة هو طرف بعيد عن المشكلة

وممكن تكون اعتذرت لانها محترمة

برىء حتى تثبت ادنتة هههههه بضحك اسف


شكرا

Ashraf يقول...

ان بعض الظن اثم

واعوذ بالله من شياطين الانس والجن

طيب بالذمه حطى نفسك مكانها او مكانه هيكون يعنى ايه اللى حصل

طيب لو جاملها بكلمه رقيقه ولا حتى حنينه او بلمسه برئيه على شعرها
او حتى وراها فى يدها ان قوام الكريم سليم

هتخرب الدنيا

طيب مانتى عارفه انها ممرضه(غالبانه) واختها كوافيره -يعنى ناس رقيقة الحال والبعد فى التفكير-

طبعا غيرك انت مثقفه ودكتوره وتتمتعى بكياسه وفطنه وعلم

ولكن الشيطان -اعوذ بالله-يجرى من الانسان مجرى الدم

وطبعا طبيعة الانثى وغريزتها الاصيله

صيدلانيه طالعه نازله يقول...

لولا وزهراء

اه و الله يا زهرا مزنوقين احنا فى موضوع السيناريو ده
بس بسرعه و حياتك
عشان دى حياه اسره و استقرارها
ههههههههههههههههههههه

منورانى

صيدلانيه طالعه نازله يقول...

هبة الحياة

ماشى يا عاقله انتى يا راسيه

حاعتبر انه خد حقى و حاسكت خاااااااالص

اما نشوف اخرتها ايه؟


منورانى

صيدلانيه طالعه نازله يقول...

أبو حميد

و ايه اللى خلاك متأكد انه مش حيقول

صح نسيت انك من المتعصبين للرجاله

ماشى ماشى

حبقى اشكره انه بيحللى مشاكل الشغل

منورنى

صيدلانيه طالعه نازله يقول...

sony2000

ايوه اييييه هما الكلمتييييين؟؟

ده اللى عاوزه اعرفه

تحياتى يا قمر

صيدلانيه طالعه نازله يقول...

من كل بستان زهرة

و الله انتى اللى فاهمانى
و فاهمه اللى دماغى راحتله

بس ياللا بقى العايط على الفايت نقصان عقل

منورانى

صيدلانيه طالعه نازله يقول...

شذا الروح

سخنينى يا سوسه سخنينى
اروح اجيب الساطور و الاكياس دلوقتى

بس انتى شكلك عارفانى و بتمتحنينى حاعرفك و لا لا
انا صح و لا غلط

صيدلانيه طالعه نازله يقول...

MR.PRESIDENT

و الله انت طيب و على نياتك
اتصل بيها اقولها و النبى يا اختى قولتوا ايه
ده منظرى يبقى مش لطيف خالص و لا ايه

منورنى

صيدلانيه طالعه نازله يقول...

masry

لا هيا كانت جايباهم هما هما

حرام نظلم برضه

صيدلانيه طالعه نازله يقول...

قلم رصاص

يا سوسه

تخيل الفكره دى غابت عن دماغى خالص

ممكن و الله يكون ده اللى حصل

شكرا و نورت المحكمه

صيدلانيه طالعه نازله يقول...

فتاه من الصعيد

تفتكرى حيجيب معاه الكلام ده

نجرب

صيدلانيه طالعه نازله يقول...

ويكا

ماشى يا عم الناجح

منورنا

صيدلانيه طالعه نازله يقول...

ستيتة حسب الله الحمش

و الله انتى يا سوتيته دايما صوت العقل الناطق
و قلب العروبه النابض

دايما مهديانى و مفرحاه فيا
ما علينا
حتنزل المره دى

منورانى يا سكره

صيدلانيه طالعه نازله يقول...

سبايدرمان

يا عم انا لا حاسأل و لا اعرف
كل حاجه بتلف و تجيلى وحدها
و انا مستنيه

منورنى

صيدلانيه طالعه نازله يقول...

samy

لا اضحك براحتك يا عم

احنا بلد ديمقراطى

صيدلانيه طالعه نازله يقول...

Ashraf

اهو اعترف اهه
سجلوا اعترافه و اكتبوه

يعنى ربنا سترنا نفضح احنا روحنا
هههههههههههههههههههه

حاعمل نفسى مخدتش بالى

Anonymous يقول...

لا بصراحة حقك وحقك ونص وتلت تربع كمان

أشمعني يعني الخناقة مهديتش غير لما مشيتي انتي ؟؟؟!!!

بليز يا علا متفهمنيش صح ;)

وانا مع دكتورة ستيتة في كلامها جوزك قطب متنافر

وواضح ان أ.أشرف كان مطلع علي الموقف وعلي معرفة وثيقة بكل اطرافة

فصحيح يعني فيها ايه لما جوزك قال للبونية كلمتين حونينين ولا اقنعها بطريقتة

أومال فايدة الرجالة ايه غير انهم يذودوا عننا في المواقف اللي زي دي

وانتي ترفعي عن مثل هذه الصغائر يا مثقفة يا دكتورة

لآن الست المثقفة والدكتورة غير الهمجين والغوغائين دول مينفعش نتعامل معاها بحونية

برضة اوعي تفهميني صح

Anonymous يقول...

لا بصراحة حقك وحقك ونص وتلت تربع كمان

أشمعني يعني الخناقة مهديتش غير لما مشيتي انتي ؟؟؟!!!

بليز يا علا متفهمنيش صح

وانا مع دكتورة ستيتة في كلامها جوزك قطب متنافر

وواضح ان أ.أشرف كان مطلع علي الموقف وعلي معرفة وثيقة بكل اطرافة

فصحيح يعني فيها ايه لما جوزك قال للبونية كلمتين حونينين ولا اقنعها بطريقتة

أومال فايدة الرجالة ايه غير انهم يذودوا عننا في المواقف اللي زي دي

وانتي ترفعي عن مثل هذه الصغائر يا مثقفة يا دكتورة

لآن الست المثقفة والدكتورة غير الهمجين والغوغائين دول مينفعش نتعامل معاها بحونية

برضة اوعي تفهميني صح

Ramy يقول...

معلش انا اسف يكون اول تعليق كدة بس الموضوع بقى....

المدونة جميلة دى مش مجاملة

وربنا يوفقك

شكرا

صيدلانيه طالعه نازله يقول...

غير معرفه هانم

انا من هذوها المكان بابعت تعليقك ده للدكتور اشرف عشان يقراه و يتمعن فيه كويس

العيسوى الصغير يقول...

اه لا دا انت لازم تسالى جوزك على اساس يعنى مثلا انك عاوزة تتعلمى تعملى ايه بعد كده

مجرد بنت يقول...

ههههههههههههههههههههههههههه
هههههههههههههههههههههههههههه

بصراحة ليكى حق
بس ممكن تساليه عاااااااااادى جدا هيكون رده كالاتى مقولناش حاجة
احسن حل
كبر الجمجمة

reem يقول...

ياعلا الف بعد الشر عليكى

ولا تسألي ولا اى حاجة

المهم انه خلاهم يعتذروا

وبعدين اصلا اصلا انتى ليه تطلعى وتسيبيهم

وبعدين هو اعترف وانت سجلتى اعترافاته واحنا شاهدييييين

MR.PRESIDENT يقول...

انا قصدي تسأل جوزك يا صيدلانية اسأليه شوفي ايه اللي حصل ...

اما بمناسبة الإتصال بقولك ممكن تتصلي بيها لأنك اتعصبتي عليها .. ومعلش برضه شعر أي ست غالي عندها ولو حست ان حد بصله والشعر بقا مش زي ما كان هتلابسها للي بص وتقول حسد وكلنا عرفين ليه طبعا .. انا بقولك هيا تنازلت واعتذرت انتي ممكن تعملي زيها وبالعكس هتكوني أحسن ,, ودي مش طيبة والله دي جنتله وبراحتك في النهاية انا مجرد رأي

كيــــــــــــارا يقول...

هههههههههههههههههه


أ.اشرف اعترررررررررررررررف ياجدعان ال لمسة ال هههههههههههه

بصي يامامى

اعملي نفسك مش واخده بالك اكيد يعني عملها فيلم ان الكريم كويس ومش عارف ماله حتي بصي مكتوب عليه ايه ان مفعوله مش بيظهر من اول مرة وبيظهر مفعوله بعد مده

او ان ممكن شعرك مش مناسب مع الكريم

ماانتي عارفه الرجاله بيعرفو يبلفو بالكلام :)

عديها يامامى عديها بلاش فضايح ههههههههههههههههه

star in the sky يقول...

امال اانا ليه مش عاوزة انزل الصيدلية عشان كده

كويس انها اعتذرت يعنى قدرتك واحترمتك

اهم حاجة الناس تبقى طيبة هههههههههههههههههههه


بس عاااوزة اعرف حاجة بقى فى الموضوع ده كله الست شعرها بقى ايه دلوقتى

هع هع هع هع هع هع

عاشقه الرومانسيه يقول...

ياااااستى كبرى
هيلف يلف ويرجع لك
هيروح فيييين؟؟؟؟؟

سمع هوص (Abo 3li) يقول...

خلاص مفيش ضمير... بتبيعي ادوية مغشوشة ومستحضرات تجميل منتهية الصلاحية؟؟؟ وش بيطلع لسانه..

صوت من مصر يقول...

اظن يا دكتورة الرجالة بترف تحل فى المواقف دى بالهدوء

صيدلانيه طالعه نازله يقول...

العيسوى الصغير

و ليه اتعلم
نجيبه كل مره يحل المشكل بنفسه
اريح يا راجل
بلاش صداع

صيدلانيه طالعه نازله يقول...

مجرد بنت

ايوه هو تكبير الجمجمه ده
مش عارفه حتفضل تكبر و توصل فين

منورانى

صيدلانيه طالعه نازله يقول...

reem

اهم حاجه يا ريم انك شاهده معايا
تعالى بقى نسجل شهادتك دى فى القسم
هههههههههههههههه

صيدلانيه طالعه نازله يقول...

MR.PRESIDENT

حاضر يا فندم
حنفكر فى الموضوع

منورانى

صيدلانيه طالعه نازله يقول...

كيــــــــــــارا

يا رايح كتر من الفضايح
يا كركر انا ساكته اهه و لا حتعصب و لا حتنرفز و لا هرقع بالصووووووت

صيدلانيه طالعه نازله يقول...

عاشقه الرومانسيه

على رأيك يا دودو
تعالى اقعدى جنبى على الكنبه

هههههههههههههه

صيدلانيه طالعه نازله يقول...

star in the sky

و لا كان فيه حاجه شعرها
دى بتستعبط

بس ما علينا ماعلينا

بس يا بت انتى بلاش شقاوه

صيدلانيه طالعه نازله يقول...

صوت من مصر

ماشى يا سيدى

منورنى

د.أحمد عثمان يقول...

ربنا يعينك يا دكتورة على غلبة الزباين

انا كده عرفت سر انك طالعة نازلة

بقالي فترة بعيد عن متابعة المدونات
و قولت اتطلع و اشوف اخبار الدنيا ايه



بيني و بينك
اللي حكيتيه ده
احد اهم الاسباب اللي بتخليني مؤجل فكرة فتح صيدلية لحد دلوقتي
عموما المفروض انك تسبقي باعلام مستخدمي كريمات الفرد بالاثر الجانبي
حتى لا يفاجأ بها
خصوصا ان معظم المستخدمين يسيئوا الاستخدام إما بعدم التوزيع أو بطول مدة التعرض


فكرتيني والله بمواويل الصيدليات

صيدلانيه طالعه نازله يقول...

سمع هوص (Abo 3li)

ماشى ماشى
اتريق براحتك

richardCatheart يقول...

صباح الفل
الكل اقر وقال انه حقك ياختشى مافيش كلام

بصى يالالا فكك ولو مزنوقه اوى
نكدى عليه شويتين وهو يقر على طول هههههه

لاء بهزر ياشيخه كبرى دماغك ههههههه
مايستهلش الموضوع والله
بس هاتعرفى هاتستفيدى ايه اى كان اللى قاله هو ثبتها وخلاص وانت اللى استفدتى
واخدتى الاعتذار من ننيى عنيها ههههههه

طيب جيتى سالتيه وانت غيرانه وشاكه شكشوكه انن وقال الحق هاتصدقيه ولا هاتفضلى تخدى وتدى مع نفسك ياترى قال الحق ولا لاء؟

ماتخليش الحاجات دى تدخل بينكم على مافيش لانها باب مابتقفلش

بس حقك تغيرى طبعا خليها للحاجات المهمه والموزز وكده دى جايه تاخد كريم فرد يا لالا كبرى دماغك اومال لو شعرها ناعم ياستى هههه

صباحك ورد تقبلى مرورى

صيدلانيه طالعه نازله يقول...

د.أحمد عثمان

منورنا يا دكتور

احنا نشكر البوست اللى خلاك تتعرف على المدونه

فعلا معظم الناس بتسىء استعمال المستحضر و يرجعوا يتخانقوا بعد كده

منورنى

د.أحمد عثمان يقول...

نسيت اقولك
ان سبب هذا البوست
لا علاقة له بالغيرة على الاطلاق

و لكنه فضول المرأة
نفس الفضول الذي تسلل الى معظم كتاب ردودك من الجنس اللطيف
فهن يحثنك على فتح التحقيق
ليس لكونه حقك
و انما لشغفهن بالحلقة المفقودة في القصة

فضول أثاره طريقة عرضك الشيقة

صيدلانيه طالعه نازله يقول...

richardCatheart

صباح الفل يا قمر
انتى عندك حق و الله
بس انا بحب اهزر و انكشه

ان شاء الله ربنا مش يجيب حاجه وحشه

منورانى يا قمرو دايما مبسوطه بتعليقاتك الذيذه

صيدلانيه طالعه نازله يقول...

د.أحمد عثمان

هههههههههههههههه
ايوه فعلا هو فضول اكتر منه غيره
الجزء اللى النور قطع فيه عندى
اللى محضرتوش من الفيلم
بس مسيرى اعرف
و اعمل بوست جديد
لنشر الحقائق كلهااااااااااااا

richardCatheart يقول...

للللللللللللللللللللولى انت شيلتى العسكرى بتاع الرقابه على المصنفات
احمدك يارب والنبى اوعى تحطيه تانى


كتر خيرك على ذوقك بوستاتك هى اللى لذيذه وتستاهل الاكل هههههه

ربنا يهدى سركم ويهديكم لعض وتعيشى وتنكوشيه يارب ياختشى امال احنا لازمتنا ايه طبعا انكشى انكشى ولا يهمك

تقبلى مرورى

محمد فؤاد (صاحب عمود النور) يقول...

ههههههه
طبعا حقك تعرفى والفضول قتل القط
انا لو مكانك ماسبهوش الا لما يقولى على اللى حصل كله
هههههههه
بس موقف بجد جامد

Ramy يقول...

يا جماعة البوست دة عمل ضجة فى مصر كلها

دة الناس مصدقت ورغت

بس اهم حاجة منجبش كرومبو يكشف
غموض الموقف هههههه

Wanda يقول...

بناء على طلب الصيادلة
انى معلقش :-)
و لانى بنتقم فحعلق غلاسة

يعنى بجد عايزة تعرفى

طيب يا دكتور حضر الكفن و الصوان
و انت يا دكتورة اتشهدى الاول
وبعدين اقرئ التعليق :-))

بسم الله الرحمن الرحيم
ايه القوم

بماأن المتهمة المذكورة امامكم
كانت عايزة تفرد شعرها و تنعمه
و تعمدت تيجى الصيدلية ثلاث مرات
فى وجود البرئ الزائر :-))
فى حين ان الاخت اصلا كوافيرة من كلامه هو
و كانت مصممة فى ثانى مرة تثبت خامة شعرها الناعم
و لما لم تفلح المحاولة استعانت بقوات اخوية للهجوم
و للاسف عرفت ازى تشعلل اعصاب الجوزائية النارية الصيدلانية
و عليه اضطر قسم المطافئ البريئة للتدخل لاطفاء النيران المعادية و الصديقة قبل اشتعال الموقف النيابى

و على اثر انسحاب حضرة القاضية لفوق
قام البرئ بتوضيح ان المدام عندها
شعرة :-))))
ساعة تروح و ساعة تيجى
ساعة تروح و ساعة تيجى

و رافة بحاله توسل للمتهمة بانها تطفئ النيران الصديقة بالاتصال تلفونيا و الاعتذار حتى يتمتع بعشائه فى هذه الليلة

و حيث ان البرئ عزيز الروح على رأئ سيد درويش على اهل المنطقة فامت المتهمة على الفور بالاتصال و الاعتذار

اذا نستنتج من هذا ياه حضرات المستشارين
ان البرئ قام بالاتفاق مع المتهمة بهذة التمثلية حتى يتعرف على مدى غيرة المدام عليه :-))))

و الثمن بروكة بدل عن شعر المتهمة الذى تم حرقه :-)) ياعينى يا متهمة
و الله صعبة عليا

دفعت و اتحرقت و اتخنقت و اعتذرت :-((((((((

الا العشاء كان ايه بقى ؟؟؟:-))))

م/محمود فوزى يقول...

السلام عليكم
ازيك يادكتوره
انا اسف جدا للتاخير فى الزياره للمدونه
معلش

انا رايي انك لو انتى عايزه تعرفى اسالى جوزك
طبعا بهدوء يعنى مش يحس انه فى قسم

فى كل الاحوال صدقيه لانه معندوش حاجه يخبيها لان الموضوع مش خطيير بالنسبه له
ولو اصر انه مش يقولك

برضه مش قضيه
تلاقيه اتكلموا في ايه يعنى
كلام عن الكريم والدوا
لحد ما اقنعها وبس

ربنا يسعدك دايما

ELMOSTAFZ يقول...

أهو انا موتي و سمي الناس اللزجة اللي زي الأخت اللي واخدة بالها من شعرها دي...
ربنا يكفينا شرهم...