السبت، 5 أبريل، 2008

يوم العطاء



ياترى و انتم صغيرين لما كنتم بتبقوا مع ماما و بابا فى المحلات و لا فى المصيف


و فجأهتبصوا حواليكم متلاقوهمش ياترى ايه كان احساسكم ساعتها؟


احساس بالضياع و التوهان و الخوف حتى لو كان لمده ثوانى


انا عارفه الاحساس ده لانى جربته زمان لمده 30 ثانيه


ياترى احساس الطفل اللى فقد ابوه و امه على طول و عارف انهم مش حيرجعوا تانى


يبقى ازاى؟


احساس اليتم ده احساس قاسى جدا و ساعات يبقى جارح خصوصا عند الاطفال


الصغيرين اللى مش فاهمين هما ليه كده و اشمعنى همه من دون كل الناس


اللى معندهمش بابا و ماما و الاحساس ده لازم يستوعب من الكبارعلشان يقدروا


يعرفوا كل طفل من دول احاسيسه ايه و بالتالى احتياجاته


الاحتفال باليتيم مش اننا نخلى له يوم واحد فى السنه فجأه يلاقى كل الناس


فوق دماغه و عماله تبوس فيه و ياروحى ياحبيبىو تديله هدايا و تتصور معاه


علشان تحلف انها شاركت فى يوم اليتيم من باب المنظره ليس الا و طبعا شفنا ده


امبارح فى كل قنوات التليفزيون كل نجوم المجتمع كانوا فى الملاجىء و هاتك يادموع


و تأثر و بمجرد التصوير كله بيروح لحاله



المذيعه تكلم الطفل من دول وتقوله ايه احساسك فى يوم اليتيم؟؟؟؟؟؟؟؟؟؟ياخبر اسود


بقى احنا عايزيين ننسيه تقومى تقوليله كده؟؟!!!!!!!!!!


انا اعتقد ان يوم اليتيم اتعمل علشان رجال الاعمال و الفنانين يلمعوا فيه نفسهم


و يوزعوا تبرعات و هدايا تتخصم من الضرايب اخذا بالشعار المعروف


مصلحتك اولا


الطفل اليتيم محتاج حب و حنان لاحتواء الغضب اللى مالى نفسه تجاه مجتمع رافضه


و رافض يعترف باحقيته فى الحياه الا فى يوم التلميع العالمى


ليه منخليش ولادنا يزوروا الايتام فى الملاجىء حتى لو يوم فى الاسبوع و ليكن الجمعه


مثلا و يصاحبوهم و يجيبوا لهم هدايا و يذاكروا معاهم ان امكن


حاجه زى دى حتخليهم يحسوا انهم جوه المجتمع و جزء مقبول مش منبوذ و مرفوض


و تخليهم يطلعوا من غير عقد و كلاكيع و يحبوا الناس و يندمجوا معهم


ياجماعه فكروا كده فى الكلام ده هتلاقوه منطقى جدا


ماهو مش معقوله نرميهم طول السنه و ننط عليهم كلنا فجأه كده دول حتى يتخضوا


و يكرهوا يوم اليتيم ده من اساسه


ايه رايكم نخلى اسمه يوم العطاء مش احلى برضه؟


قال رسول الله صلى الله عليه و سلم:انا و كافل اليتيم كهاتين فى الجنه,و اشار باصبعيه


السبابه و الوسطى.


صدق رسول الله صلى الله عليه و سلم


شفتوا دخول الجنه سهل ازاى بس شويه تفكير و تدبير

هناك 27 تعليقًا:

فرنسا هانم يقول...

كل سنه وكل طفل يتيم بخير
بس انا من رايى ان اللى بيفتكر اليتيم وبيروح له
من باب العطف
او الشهره
او التلميع زى عبد السميع اللميع
احسن من اللى مبيروحشى خالص ولا بيفتكرهم باى شىء
اما المذيعه اللى بتسأل الطفل دى
اكيد خريجد اعلام قسم هبل

امواج يقول...

صيدلانيه

حسه فعلا بكلامك لان الحرمان من الاب بس شئ صعب قوى ما بالك احساس الحرمان من الاب والام
معاكى فى كلامك انا سعات بحس ان يوم اليتيم ده معمول يزلو بيه الايتام والله


شكرا ع البوست الجميل

Anonymous يقول...

strong blog
you touch the misssing ling
Ashraf

محاولة لكسر الصمت يقول...

فعلا أنا كمان بستغرب أوي من التسمية...يوم اليتيم..مش فاهمة طيب امال هما بيعملوه ليه...اما حكاية يوم في السنة دي ..فمتهيالي دي بقت طبيعة فينا في حجات كتير اوي..عيد الأم ..عيد الحب..ويوم اليتيم..وما الى ذلك..وباقي السنة لا حب ولا صلة رحم ولا رحمة باليتيم...

FaceMoon يقول...

فعلا عندك حق فى كل كلمة انا بروح كتير ومش بلاقى حد فعلا بيهتم بالحاجات دى طول السنة ومش باليتيم بس بأولاد الشوارع والمسنين وكل انسان محتاج بيهتموا بيهم فى رمضان مثلا وفى يوم اليتيم وخلاص على كدة
بوست جميل تحياتى

Appy يقول...

بصى بجد بيصعبوا عليا بس بحس انهم بيتبسطوا قوى فى اليوم ده وكمان الاطفال بيكون نفسها يتكرر
يا ريت نقدر نخليه طول السنه مش بنفس الشكل انما بالود والسؤال عليهم

عمو احمد يقول...

انا اتاثرت فعلا بكلامك
معاكى كل الحق والله

أم أحمد يقول...

انا نفسي اكفل طفلة يتيمة بس مش عارفة يتوافق اني اخدها تزورني في بيتي ولا لا بما اني عندي ولدين

Ashraf يقول...

كلام صحيح 100% بدليل الصحف بتاريخ 5-4-2008 قالت ان 2 فرد فقط (أثنين) من كانوا فى ذكرى الفنان احمد زكى

walaa يقول...

عندك حق الطفل اليتيم محتاج مننا حب وعطف بجد ويقول المصطفى انا وكافل اليتيم كهاتين فى الجنه واشار على اصبعيه السبابه والوسطى
اما بقه اللى عملانها منظره فى كل واحد هحيحاسب على حسب نيته انا الاعمال بالنيات
تحياتى ولاء

mayada يقول...

صح كلامك
هو فعلا بقي اسمه السنه دي
يوم الاحبا
لان اليتيم ملهوش يوم
وكمان حصل حاجه حلوه قوي
ان التبرعات بتتجمع سواء حفلات او هيئات
وتتوزع علي الاطفال بقسيمه شرائيه
عشان يشتري هو اللي عاوزه
ويعرف انه جديد مش بياخد
فتات حد
ودي خطوه كويسه
تحياتي

فراشة يقول...

السلام عليكم
انا رائي ان اليوم ده لازم يكون فعلا زى ما بتقولي يوم في الاسبوع وليكن يوم الجمعه مثلا الاسرة تشترك في جمعيه من الجمعيات وليكن جمعيه رسالة واهي ليها فروع كتير جدا ومش بس بتهتم بالايتام لا ده كمان في ناس بتبقي اولي بالرعاية زى الصم والبكم انتى عارفه ان الفئة دى مظلومة اكبر ظلم في المجتمع ومحدش حاسس
عارفه انهم ملهومش انهم يكملوا بعد الثانوية وحتى مفيش معهد واحد يوحد ربنا على مستوى الوطن العربي كله تصورى ان فيه بره جامعه ليهم مخصوص وعارفه انهم بيدرسوا هناك ماجستير ودكتوراه مش بس الايتام اللي المجتمع بيروح لهم عشان يلمعوا لا ده في ناس دايسين عليهم وهاضمين اقل حقوقهم

معلش طولت عليكى في اول تعليق

صاحبة مدونة يوميات موظفة استقبال

صحفية روشة يقول...

انا بحب الاحتفال بيوم اليتيم كل سنة

وبشوف فيهم ينات زى القمر
بقول بينى وبين نفسى
خسارة فى اللى هما فيه
بس يلا قدر الله وما شاء فعل

Hossam Nasr يقول...

السيدة صيدلانية طالعة نازلة

كم أحب أن أزور مدونة لأول مرة وترسم مقالاتها بسمة رضا على قلبي. خاصة لما ألمس كم هو إنسان كاتب مقالاتها.

بالفعل ياسيدتي فاليتيم لا يشعر بتلك المرارة إلا عندما يختلط بغيره من أبناء المجتمع. وإن لم يكن بينهم اختلاط فسيعاملونه بشكل مختف. قال تعالى وَيَسْأَلُونَكَ عَنِ الْيَتَامَى قُلْ إِصْلاَحٌ لَّهُمْ خَيْرٌ وَإِنْ تُخَالِطُوهُمْ فَإِخْوَانُكُمْ وَاللّهُ يَعْلَمُ الْمُفْسِدَ مِنَ الْمُصْلِحِ وَلَوْ شَاء اللّهُ لأعْنَتَكُمْ إِنَّ اللّهَ عَزِيزٌ حَكِيمٌ [البقرة : 220]

فالإختلاط بين اليتيم الذي من الله عليه بفقد أبويه والآخر الذي من الله عليه بأبويه يلغي تلك الفروق ويبقيها كلمة واحدة...
عبد الله...الإنسان

إحترامي وتقديري

DayDreaming يقول...

البوست اكتر من رائع ويلمس القلب بجد
معاكي حق طبعا انه مش يوم في السنه والباقي صحرا كده انا شوفت الاطفال الايتام في اليوم ده فعلا في اكتر من حفله واكتر من مكان اه فرحانين بالهدايا وباللعب وبالناس لكن والله والله والله ما قد الفرحه اللي بتكون في عنيهم في اي يوم عادي حتى لو كان الزائر جايب حاجه بسيطه اوتى مش جايب حاجه

بالنسبة لكفالة اليتيم في امنية حياتي بس المجتمع العقيم اللي احنا فيه بيعقد اللي يفكر بس يعمل كده
اعرف واحده ووجوزها راحوا يتبنوا طفله الدار رفضت لأنهم معندهمش عقار بأسمهم بالرغم من انهم قادرين

معلش طولت عليكي
مدونتك جميله بجد وشكرا لزيارتك

فراشة يقول...

السلام عليكم
لا على فكرة مفيش ليهم جامعات خالص انا مشتركة في جمعية رسالة وعارفه الكلام ده وبرضه مفيش معهد حتى ليهم
ادخلي الموقع ده وشوفي الجامعه اللي مخصصه بره ليهم شكلها ايه وايه الخدمات اللي بتقدمها

WWW.gallaudet.edu

Tamer Nabil يقول...

كلامك سليم واتفق معاكى

الاطفال دى محتاجة الى الحب والحنان والاهتمام الدائم بهم مش لحظة فى يوم عيد والسلام عليكم

تحياتى

Bongo يقول...

كلامك جميل جداا

و عندك حق

المفروض منحددش يوم واحد نهتم بيه بالأيتام , المفروض اهتمامنا بيهم يبقي طول السنه

ميرسي علي البوست الجميل ده :)

ba7re يقول...

يا دكتورة
اولا شكل المدونة حسسيتنى انى داخل مدونة فنانة تشكيلية مش صيدلانية

نيجى لموضوع اليتيم ده
انا ناشط اجتماعى فى بورسعيد
و دايما بشارك فى الاحتفالات و المشاريع الخاصة برعاية الايتام و غيرهم

افتكر مرة كنا منظمين يوم يتيم
و كنا جايبين دى جى
البيه المفروض شغلته يظبط اغانى
يشغل اغنية ايه يا دوك
البيه بيشغل اغنية بابا فين ؟
طيب ده اعمله ايه ؟ :)
رحتله قولتله بلاش الاغنية دى غيرها
شغل ايه بقى ؟
بابا اوبح و اى اغنية فيها بابا شغلها
بس لانى دايما شغال طول السنة فى النشاط ده
بنعانى ان محدش بيساهم فى حاجة الا فى موسمها
يعنى محدش بيهتم باليتيم الا يوم اليتيم
و محدش بيشارك و يتصدق بشكل كويس الا فى رمضان
فده بيخل بعدالة توزيع الخير
و بالنسبة للايتام بيخل بعدالة توزيع الحنان
تحياتى
و سلام :)

Yuki يقول...

you've been tagged

:)

http://2twinz.blogspot.com/2008/04/new-tag.html

بنت مصريه يقول...

انا مره كنت ف ملجأاطفال ف حضانه كنت جايبه للعيال حاجات حلوه تخيلى اديت لواحد كيس الشيبسى رجعلى تانى عشان ياخد لصاحبه كيس ساعتها حسيت انى عايزه ابكى قوى للدرجه دى قلبهم على بعض دول مسلمين من غير ما يعرفوا يعنى ايه اسلام

بنت مصريه يقول...

انا مره كنت ف ملجأاطفال ف حضانه كنت جايبه للعيال حاجات حلوه تخيلى اديت لواحد كيس الشيبسى رجعلى تانى عشان ياخد لصاحبه كيس ساعتها حسيت انى عايزه ابكى قوى للدرجه دى قلبهم على بعض دول مسلمين من غير ما يعرفوا يعنى ايه اسلام

Esraa Hamed يقول...

و انا كمان علي فكرة بتضايقني يوم اليتيم دي و متفقة معاكي جداااا في اننا نسمية يوم العطاء مثلا


جميلة اوييييييييي مدونتك بجد

تحياتي ليكي

المـــفـــــــقــــــــوعـــــة مــرارتـهــا يقول...

يارب تكوني بخير أنا كدة قلقت عليكي
بقالك مدة مش بتكتبي ولا بتردي علي التعليقات ولا بتزوريني
مفتقداكي ياغالية
علي المانع يكون خير

mostafa rayan يقول...

عندك حق بجد في كل كلامك دة

lonely يقول...

السلام عليكم
ازيك يا جميل يارب تكونى بخيــــر

جميل يوم اليتيم وجميل انهم يلاقوا ناس جايه تشوفهم
بس مفيش عدل ليه فى اليوم ده
هو لازم اليتيم اللى هو فى الملجأ بس ؟
طيب واليتيم اللى ملقاش حد يأمن له مكان نضيف وكويس ويرعاه وانا اقصد اطفال الشوارع الايتام اللى الدنيا حكمت عليهم يبقوا فى الشارع

عندنا أيتام كمان كل يوم فى فلسطين .. منهم اللى طلع ملقاش معاه حد ومنهم اللى شاف امه وابوه تحت انقاض الحجارة أو ميت مابين احضانه
تفتكرى شعورهم ايه ؟ اكيد مش زى الاطفال اللى فى الملاجئ
ليه الأطفال اللى فى الملاجئ يتعمل لهم يوم مع انهم لاقيين حد يرعاهم ويكفلهم فى مكان كويس
واطفال الشوارع الايتام بردو فى اليوم ده محدش بيرحمهم وكل يوم يموتوا فى الشارع
ليه دول ملهمش يوم كمان نرحمهم فيه ؟
ليه فى يوم اليتيم ما بنفتكرش أيتام فلسطين ولا بنبعت لهم تبرعات نخفف عنهم العذاب ده
مش انتى معايا ان فى تفرقه عنصرية مابين الايتام ؟

غير ان اطفال الملاجئ مستقبلهم غالبا بيضيع اول ما يخرجوا للحياة
لو اتقدموا لحد بيتقال عليهم جايين من ملجأ ويترفض فى الشغل والجواز وملهمش حق فى الاستقرار
مش بس احساسهم بنقص بابا وماما هو اللى هيتعبهم
احساسهم بالرفض بعد ما يكبروا من المجتمع
معلش طولت عليكى فى أول مرة ليا عندك

سلام يا جميل

صيدلانيه طالعه نازله يقول...

الى كل من زارنى و حشتونى جدا و اسفه للغياب
الى صحفيه روشه:خساره ليه بقى الانسان هو اللى بيصنع نفسه بغض النظر عن ظروفه و البنات دول ان شاء الله ربنا حيكرمهم بحق تحملهم لظروفهم و رضاهم بها
===================================
whispers:فعلا لابد من الاختلاط بين الايتام و الاطفال الاخرين حتى تشيع روح المحبه بينهم و تصبح نفسياتهم خاليه من العقد و الاحقاد تجاه الاخرين
تحياتى
==================================
day dreaming:نفسى اعرف ايه علاقه العقارات بكفاله اليتيم مهو ممكن يكون غنى و عنده عقد و يعذب الطفل معاه و بدل ما يفرحه يكرهه فى الدنيا كلها
شكرا لتعليقك
===================================
تامر نبيل: فعلا همه مش محتاجين غير الحب و الحنان مش الشفقه
شرفتنى و ياريت متكونش اخر مره
================================
bongo:فعلا اتفق معاكى و ده بيعتمد على الناس و احساسها بالايتام
شرفتينى يا قمر
=================================
ba7re:للاسف فيه ناس مش بتحس بغيرها مهما حاولت تفهم ومنهم بتاع الدى جى ده
اما الاهتمام بالايتام فى يوم اليتيم و رمضان بس ده لان الاعلام بيركزليهم بس فى هذه المناسبات و بعد كده انسى يا عمرو
اهلا بيك و نورتنى
و شكرا على تعليقك على المدونه
=================================
الى yuki:شكرا على اختيارك مدونتى
================================
بنت مصريه:وجود الايتام مع بعض بيخليهم يبقوا مترابطين اكتر بحكم تشابه الظروفو يزود مشاعر الحب و الود بينهم و كتير منهم بيتجوزوا بعض
ربنا معاهم
================================
الى اسراء: كويس ان الناس كلها متفقه على هذا الاقتراح و شكرا لتعليقك
==============================
الى المفقوعه:انا رجعت اهو و حزهقك تعليقات تانى
شكرا يا جميييييييييل
=================================
الى مصطفى: شكرا على تعليقك و على اتفاقك معى فى الراى
===============================
الى فاطمه:اتفق معاكى فى الراى ان اطفال الشوارع دول ايتام و لابد ان نهتم بهم
هما ظهروا ايام قضيه التوربينى و فضلوا يكلموا عنهم و عن دورنا ناحيتهم و بعد كده كله اتنسى كعادتنا دائما
اما اطفال فلسطين فدول قصه تانيه لاختلاف الظروف و الاسباب
===================================