ياااااااااااااااااااادى المصيبه

مش عارفه اقول ايه و لا اكتب على ايه بس الخبرين اتحف من بعض و نوعا ما شبه بعض

شاب و امه و ابوه اتهجموا على بنت كانت ماشيه فى الشارع مع والدتها و جردوها من هدومها و اغتصبوها امام الناس

و خلاااااااااااااااااااااااااص

واحده فى الكويت جوزها طلقها و قرر يتجوز تانى راحت مولعه فى خيمه الفرح و مشيت

صحيح 43 واحده ماتوا بس الحمد لله العروسه نجيت

بس مفيييييييييييش مشكله

فى الخبر الاول حسيت ان الخبر بيتكلم عن حادثه حصلت فى الصحرا مش فى وسط شارع

بس عينى اتخبطت فى كلمه وسط الناس و امام الماره

طيب الاخوه الماره دول محدش منهم السائل اللى بيجرى فى عروقه خلاه يتنحرن شويه و يحاول

انا باقول يحاول مش مهم ينجح انه ينقذها و يخلصها من السفله دول

المصيبه انهم عملوا فيها كده عشان رفضت الجواز من ابنهم اللى ارتكب معاهم الجريمه

و طبعا عشان ينقذ نفسه بعد كده حيقول انه مستعد يتجوزها و ده كل مناه و مبتغاه من الاول

و طبعا البنت حتكون مضطره انها تقبل بعدالفضيحه اللى حصلت دى

طب الموضوع التانى...........يعنى ايه واحده اتطلقت تروح تحرق فرح طليقها؟؟؟؟؟؟

طب الناس المعزومه ذنبها ايه انها بدل ما تفرح تموت محروقه او تقضى باقى عمرها مشوهه

ذنبهم انهم راحوا الفرح طبعاااااااااااااااااااااااااا

و فى التحقيق تقول مكنتش متخيله ان ده كله حيحصل !!!!!!!

طب كانت متخيله ايه بقىىىىىىىىىىىىىىى

مش عارفه فعلا ؟؟؟؟؟؟؟؟؟؟؟؟؟؟؟؟؟؟؟؟

المثل زمان كان بيقول كل شيىء بالخناق الا الجواز بالاتفاق

بس دلوقتى ما بقاش كده ده بقى بالخناق و نظام غصب عن عين اهلك حتتجوزينى و الااااااااااااااا

بذمتكم مش مصيبه فعلا الزمن اللى بقينا فيه ده

ياللا ما علينا ..........................

قبل ما امشى اقولكم كل سنه و انتوا طيبين و رمضان كريم و سعيد و مليىء بالحسنات و المغفره انشاء الله

عيشوا شويه مع انغام

بصراحه زى ما كان 1000 مبروك مسك الختام للموسم الصيفى

ياريت كلنا نغسل وداننا بصوت انغام الرائع اللى بصراحه مسمعتش زيه لغايه دلوقتى

و تليها بالنسبه ليا شيرين عبد الوهاب

بس احقاقا للحق حرام نظلم انغام و شريطها الرائع و نحطه فى مقارنه مع اى حد الصيف ده حتى لو كان الهضبه شخصيا

1000 مبروك من قلبى فعلا

" ان تكون الغائب الحاضر خير من ان تكون الحاضر الغائب"

بهذه الكلمات الجميله اختتم احمد حلمى فيلمه الجديد 1000 مبروك الذى يعتبر امتداد

لافلامه التى تمزج الكوميديا مع الدراما و التى تجعل المتفرج ليس مجرد متلقى

لشويه زغزغه تضحكه و يمشى و هو مش فاكر الفيلم كان فيه ايه

الفيلم مقتبس من الفيلم الجميل جداground hog day و جرى تمصير الفكره

باسلوب رائع و جميل فعلا

الفيلم بيدور حول احمد الذى يعمل فى البورصه و الذى يستعد لزفافه فى اليوم التالى

و يتعرض لحلم اثناء نومه ينتهى بموته فى حادث سياره و يصحى من نومه

ليجد الحلم يتحقق امامه و يحاول ان يغير من الاحداث حتى يتجنب النهايه المفزعه

و لكنه يفاجأ انه داخل حلم لا ينتهى و يتكرر يوميا

فيحاول ان يغير واقعه حتلى يتجنب الاشياء السلبيه ليكتشف اثناء حلمه

سلبياته التى لم يكن يراها من قبل من انانيه و حب للذات و سلبيه جعلت اهله

لا يشركونه معهم فى مشاكلهم و لا مشاعرهم و لا اسرارهم و جعلت اخته تخاف منه

و لا تحبه و تخفى عنه مجرد انها فتحت الكمبيوتر بتاعه و استخدمت النت

و انها تحب صديقه المقرب

يستيقظ احمد فى النهايه و يبدأ تغيير الواقع الحقيقى و الاقتراب من اهله

و لمس مشاعرهم و الاعتذار بشكل ايجابى عن اخطاء الماضى

ظهر ده بوضوح فى مشهده مع اخته اثاء مشاهدته لفستانها الجديد

كانت مشاعره جميله و رقيقه و حنونه مع اندهاش اخته الشديد منه و لكن

مع حنانه الواضح بدأت تتكلم معاه و تسأله ايه رأيك فى المكياج

بل تمادت و اعترفت له بحبها اللتى كانت تخفيه عنه

نهايه الفيلم كانت مأساويه صحيح و لكن كانت توضيحيه لمدى تغيير البطل و ان كان

مبالغ فيها

الفيلم فعلا جميل و احمد حلمى عمل شغل حلو فيه فعلا و يحسب له انه استعان بوجوه جديده

كثيره فى الفيلم ان لم يكن كلهم لانى فعلا معرفش اسم و لا حد منهم

جميل قوى ان الانسان تجيله فرصه انه يغير من نفسه للاحسن حتى لو فى اخر لحظه

بس الوحش انه ميمسكش الفرصه دى و يسيبها تهرب منه لان الحياه فعلا قصيره

و جميل قوى ان الانسان يسيب ذكرى حلوه ليه و هو غايب عن انه يكون موجود بس

مالوش اى اثر ايجابى

1000000 مبروك يا حلمى مش 1000 بس

اللهم اغفر لها و ارحمها

ربما اكون لا اعرفها معرفه شخصيه و لكن تربطنى بها علاقه انسانيه

فهى مصريه و صيدلانيه يعنى كمان زميله

كلنا عرفنا مروه الشربينى بعد وفاتها نتيجه الحادث العنصرى الهمجى البشع

اللى اتعرضت له فى المانيا على يد متخلف ارهابى المانى مش عربى

زى ما دايما بيقولوا علينا

اللى يزعل ان البنت بعد ما اتقتلت محدش هان عليه من السفاره انه يكلم اهلها

و يديهم خبر باللى حصل لها خصوصا ان جوزها كمان اتصاب باصابه خطيره

لما حاول يدافع عنها و ينقذها و اصابته كانت على يد البوليس الالمانى

اللى ساب المجرم يدخل قاعه المحكمه بسكينه و يطعن البنت 18 طعنه

من غير ان يحرك ساكنا و اتفالح على جوزها اما حاول ينقذها

الموضوع كله مأساوى خصوصا انها سابت طفل عمره 3 سنين

كانت حامل فى 3 شهور يعنى المجرم قتل روحين بدم بارد

اللى حصل ده لازم يكون للحكومه المصريه وقفه حازمه حاسمه معاه

لانها مؤشر خطير لمدى تردى العلاقه بين العرب فى المهجر و بين اهل البلد الاصليين

لازم حد ياخد حق الشهيده دى و لاازم الخارجيه المصريه تتصرف

لان المصريين مش رخاص و دمهم المفروض يكون غالى عند اهل بلدهم

مش نحس ان الموضوع عادى و كأنه لم يكن و انها كلبه و راحت

بجد ده الاحساس اللى بنحسه كلنا كمصريين اما حد بيحصله حاجه فى الغربه

كل بلاد الدنيا بتقوم الدنيا و تقعدها اما حد من عندها يحصله حاجه فى بلد تانى

الا المصريين مش عارفه ليه

و ياريت ميبقاش الاهتمام بالحادث ده نتيجه اهتمام وسائل الاعلام بيه

يعنى يبقى من باب حفظ ماء الوجه

مش عارفه اقول ايه تانى غير ربنا يرحمها و يسكنها روضه من رياض الجنه

و يجعل محشرها مع الشهداء و الصديقين

و ارجو من كل من يقرأ البوست على اختلاف ديانته ان يدعو لها بالمغفره و الرحمه

و ان يلهم اهلها الاصبر و السلوان

احنا بقى ...باقى مننا ايه؟؟؟

بصراحه النهارده انا مش عارفه اكتب حاجه لانى مش لاقيه حاجه تتكتب فعلا

انا بس حأقولكم الخبر اللى خانقنى بقالى كام يوم و اشوف رأيكم فيه

"تم حجب جائزه الدوله التقديريه فى العلوم و التى كان المرشح الاول لها الاستاذ الدكتور

هانى الناظر رئيس المركز القومى للبحوث و ذلك لاعتراض وزير التعليم العالى

و البحث العلمى على ترشيحه و يأتى هذا الاعتراض تصعيدا للخلاف القائم

بينهما منذ فتره"

اظن انتوا طبعا طايرين زيى من الفرحه بعد ما قريتوا الخبر

و قال ايه عايزيين البلد تتقدم تطبيقا لشعارنا الوطنى"بلدنا بتتنيل بينا"

و ادى دقنى لو عرفنا حتى نتنيل

و بالمناسبه الجميله دى اهديكم الاغنيه اللى ملقيتش غيرها يعبر عن حالتى

فى الظروف الحلوه دى

اللرجوع للحق فضيله

ما كانش ينفع غير انه يعتذر و يقر بغلطه اللى قلب مصر كلها عليه

تلات تيجان و البقيه تأتى

اولا ازيكم جميعا انشاء الله و بحمد الله و اخيرا حاجاوب على التاج اللى هو 3 فى 1

و كانوا اتبعتولى من كوكيتا و يوميات شاب منوفى و طعميه سخنه

من انت و ما الذى تفعله هنا؟

انا واحده عاديه جدا و مش محتاجه اعرفكم اسمى لان معظمكم عارفه و اللى مش

يعرفه يستعين بصديق و موجوده هنا عشان ايه؟؟؟؟؟ده بيتى و اعمل فيه اللى يعجبنى

اكتب ,اشخبط ,ازعق براااااااااحتى مش بيتى و انا حره فيه

بس انا هنا باجى عشان افش غلى من حاجات كتير مضايقانى او اسجل اعجابى بحاجه

كويسه شوفتها و ببقى مبسوطه قوى اما اشوف رأيكم فى افكارى

اسرائيل تقصف كل جنوب ممكن بحثا عنك اى شمال ستقصد؟

طبعا اسكندريه اولا لان ماما و بابا هناك و فرصه اقعد معاهم

ثانيا لانى باعشق اسكندريه و هواها و بحرها و ناسها وكل حاجه فيها لانها رائعه بكل ما

فيها خصوصا السمك و الارز باللبن بالايس كريم و الفطير

طبعا حسيتوا من كلامى انى باحب الاكل ايوه باحبه بس يكون فى اسكندريه

اى مكان تانى مالوش طعم فعلا

انت مكلف بحذف حرف من حروف اللغه العربيه اى حرف ستختاره و لماذا؟

اولا لغتنا حلوه و جميله و نبقى بنظلمها لو حذفنا منها اى حرف و ياريت نتمسك

بيها لانها هويتنا و تاريخنا و بلاش نبقى زى القرع و نتمنظر بكام كلمه انجليزى

و لا فرنساوى عارفينهم

لو قدر لك ان تدخل السجن فما هى القضيه التى تتمنى ان تدخل بها اليه؟

قضيه فك شفرات القنوات المشفره و خصوصا الرياضيه عشان الذل اللى الناس بتتذله

مع كل بطوله دوليه سواء للقدم او التنس او اى بلا ازرق

او قضيه طبع الكتب الغاليه و بيعها باسعار زهيده عشان الناس تقرا و تستفيد

مع الاعتذار لحقوق الملكيه الفكريه

بالمناسبه مت اكتشفت نفسك؟

اكتشفت نفسى و انا بجهز الصيدليه لان جوزى دايما مشغول فانا اللى عملت الورق و

و الضرايب و السجل و التصريحات و كل المشاوير الكتيره اللى كانت محتاجاها

و بعد كده تعبت قوى لغايه ما بقى فى ناس بتيجى مخصوص لينا مع العلم ان حواليا

صيدليات كتير ساعتها حسيت انى قويه و اقدر اسد فى المواقف الصعبه

عشان كده انا باعتبر الصيدليه دى بنتى لانى تعبت قوى فيها و هيا اللى عرفتنى

الطاقه الكامنه اللى جوايا

على مفترق الطريق لافتتان واحده تقول(الى حلمك) و الثانيه تقول(الى ما لم يحلم بيه بشر)

طبعا حاختار حلمى لانى من غيره تبقى عيشتى و حياتى بلا معنى او هدف

بجمله واحده فقط اكتب تعريف لكل كلمه من الكلمات الاتيه

الوطن:اى مكان بالاقى راحتى فيه حتى لو كان اوضه صغيره اكيد هو ده وطنى

الام:انكار الذات و التفانى فى خدمه الغير و التضحيه دى صفات الام اللى انا اعرفها

الليل:الهدوووووووووووء و السكينه و السهر مع الصحبه الحلوه وده طبعا مش دايما

و مش على طول

الحب:عمله نادره اللى يلاقيها يبقى لقى خاتم سليمان اللى هوا اصلا خيال بس

مش علمى

امريكا:الساحره الشريره و العجوز الشمطاء و اللى بتتزوق دلوقتى عشان تحاول تقنعنا

انها بقت الساحره الطيبه و على العموم افلح ان صدق

المرأه:نص الدنيا و سر الحياه و من غيرها الرجاله ميسووش بصله( تعصب بقى)

الصمت :زمان قالوا الكلام من فضه و السكوت من ذهب بس يبقى سكوت للتفكير

و التركيز مش سلبيه و خوف و جبن

الانترنت:هو كلمه السر زى افتح يا سمسم كده اللى خلتنا نعرف كل غريب و عجيب و

جديد اثناء حدوثه و محدش اتعود عليه يقدر يستغنى عنه

من الاخر ادمان العصر الحديث

اختر منصب و اتخذ قرار

نفسى ابقى رئيس جمهوريه نفسى ليوم واحد بس و القرار اللى حاخده

انى اخد اجازه من اللى حواليا لمده يوم واحد برضه و لو انهم حيوحشونى

و حارجع قبل اليوم ما يخلص

قيس ،عنتره،جميل هم الذين يقولون شعرا و ليلى و عبله و عزه (صموت)

لماذا هذا التغييب للمرأه؟؟؟؟

لان قيس باشا و عنتره بيه و جميل افندى عشان يقولوا شعر عايزين ياكلوا

ملوخيه و فراخ و يحلو بكريم كراميل و يحبسوا بشاى و ليلى و عبله و عزه

يا عينى فى المطبخ معكوكين بيعملوا الاكل يبقى حيفضوا امتى يكتبوا شعر

ان تكون مطلوبا لارتكابك جريمه خير من الا تكون مطلوبا على الاطلاق

هل تتفق مع هذه العباره ؟؟علل؟؟

اتفق ماتفقش ليه الصيت و لا الغنى بس متبقاش القضيه مبيدات مسرطنه و لا عباره

و لا قتل زوزان تميم يعنى من الاخر الاعدام مش تخصصى بعد كده كله عادى

الى اين تمضى كلمات الحب بعد ان نقولها؟

الى ودن واحد من اتنين اما واحد يسمعها و تأثر فيه و يعملها فيديو كليب

او واحد بياكل و مش فاضى و بالتالى تدخل من هنا و تطلع من هناااااااااك

و ياريت دايما نلاقى اللى يقدر كلامنا

هل تجد علاقه بين المرأه و قطاع الطريق؟؟؟

وراء كل حرامى قاطع طريق امرأه طمااااااااااااااعه

هذا فراق بينى و بينك متى و لمن تقولها؟

اقولها لكل اللى ميقدرش تعبى و مجهودى عشانه و يستخف بمشاعرى ساعتها اقوله

بالسلااااااااااااااااامه

كيف هو الغد؟

على حسب يعنى لو تعبنا علشانه اكيد حيبقى احلى بكتيييير من امبارح و النهارده

لكن لو نمنا و كسلنا حيبقى منيل بستين نيله

انا اتأخرت قوى فى حل التاج ده عشان كده اعتقد انه مر على ناس كتير بل مر على كل

الناس و اللى معداش عليه يتفضل يجى ياخده و بالهنا و الشفا