الخميس، 26 يونيو 2008

هذا ما جناه على ابى



ياترى ايه مواصفات الاب الكويس فى رأيكم ........هل هو الحنين قوى اللى يفضل
يبوس ولاده و يلاعبهم و ميقولش لحد فيهم

ده غلط و ده صح.

و لا هو الاب الجد اللى طول ماهو قاعد يدى تعليمات و اوامر لاولاده كانهم فىالجيش او
فى معتقل.

ياترى هوا الكريم بهبل مع ولاده يعنى يديهم فلوس من غير حساب من غير ما يسأل ليه
و ازاى

و لا لازم يزنقها عليهم لغايه ما يخنقهم.

امبارح كنت فى عزاء عند احد قريباتى ابنها اتوفى و عمره 28 سنه طبعا مش بعترض
لان ده امر الله

لكن الولد ده اكتشفت انه كان مدمن قبل مايتوفى وان سبب وفاته كانت نتيجه اصابته
بفيروس فى المخ

و ده اكيد له علاقه بالادمان لانه اكيد كان بيتواجد فى اماكن موبوءه اللى بيتوفر فيها
الزفت اللى بياخده

و انا فى البيت فضلت افتكر الولد ده كان عسول جدا و هو طفل كنا نحب نتفرج عليه و
هوه بيلعب و بيتكلم

لانه كان لمض و كلامانجى زى كل اللى فى سن 5 سنوات.

وبعد ما كبر شويه وبدأ يعى الحياه كان الام و الاب بيتفننوا ازاى يدلعوه هوا
و اخواته كلهم

الدلع ده بيتمثل فى الفلوس اللى من غير حساب و القعده فى النادى ليل نهار من غير
رقيب او حسيب

الدش و النت اللى فى كل اوضه فى البيت و كل واحد يجيب صحابه و يقفل عليهم الباب

من غير ما حد يسألهم انتوا بتعملوا ايه.

اللى زاد و غطى ان الاب اتجوز واحده تانيه على امهم الست اللى وقفت جنبه و نضفته و
عملته بنى ادم

و ده طبعا كان متوقع منه لانه كان عايز واحده صغيره يتعايق بيها فى سفرياته الكتيره
للخارج

بس اللى مش متوقع انه اهمل ولاده تماما لانه يا عينى كان مشغول لشوشته مع
السنيوره الجديده

و اللى جابتله طفل صغير خلاه يصدق انه لسه نغه و صغير و يجى منه و هو اللى تجاوز
الستين

طبعا السيناريو اللى انتوا عارفينه حصل الولاد قاطعوا ابوهم و التفوا حوالين امهم اللى
للاسف حاولت تكسبهم

اكتر عن طريق الفلوس الزياده و طريقه علشان تعرفوا مين بيحبكوا اكتر.

البنات اتجوزوا و كل واحده بقت فى بيتها اما الولاد كل واحد فيهم خد طريقه

الصغير اللى فيهم و اللى كان اكتر واحد متدلع و اكتر واحد محتاج توجيه الاب لم يجد
غير ام ضعيفه

مجروحه من الاب و عايزه اللى يطبطب عليها و مش مستعده تعمل اى حاجه غير
الولوله على حالها

طبعا ما خدتش بالها ان الولد فيه حاجه بتتغير و لم تأخذ بالها غير بعد ما اعراض
الادمان المشهوره ظهرت عليه

و طبعا الاب تخلى عنها و عنه و قالها ادى اخره التربيه الغلط و رفض انه يشارك فى
الصرف على ابنه

على الرغم من انه يشغل وظيفه مرموقه و مستريح ماديا.

مشيت الامور معرفش ازاى لغايه ما الولد تعب و دخل غيبوبه لغايه اما اتوفى.

و انا داخله الجنازه افتكرت آخر مره شوفته كانت فى فرحى و كان بيرقص مع اصحابه و
كله اشراق و حيويه و حب للحياه

و للاسف كل ده ضاع مع الوقت و خلال 10 سنين كان فى القبر

دخلت الجنازه اللى كنت انا داخلاها و عينيه مدمعه لقيت الناس عااااااااااادى امه عادى و
اخواته كذلك

و السيد الوالد الفاضل كان تحت فى الصوان قال ايه راااااااجل و بيتقبل العزا فى ابنه بعد
ايه؟!!!!!!!!!!!!!

و حسيت ان موت الولد فعلا كان راحه لهم هما قبل ما يكون راحه ليه بس ياترى حيكون
راحه لضميرهم

من العذاب و التأنيب على الامانه اللى فرطوا فيها

يا كل اب متسيبش ولادك جريا وراء نزوه هتكلفك كتيييييييير و اولهم ولادك لان دول اهم
مكسب فى حياتك

و يا كل ام الحب ميبقاش دلع زياده و فلوس و تسيب و ميبقاش انى اسيبهم كده فى الدنيا
من غير رقيب او حسيب


اعتقد ان الرساله وصلت


و انا لله وانا اليه راجعون

هناك 20 تعليقًا:

Appy يقول...

كذا مشكله يا حبيبتى تناولتيهم مع بعض بجد
التفكك الاسرى اللى بقى بيودى للادمان
للهطل اللى بيحصل للاباء لما يكبروا للانانيه الزايده او الجرح اللى بيودى للكرهه عند الام
كل ده اصله الاب والام
ربنا يرحمه يا رب ونخلى بالنا ويحمى شبابنا

سومه...مجنونه فى بلد عاقل يقول...

بصى فى البدايه الاب لازم يكون حازم ومتفاهم والام تكون حنينه وسر ولادها معاها
اى شىء لو زاد عن حده ينقلب لضده
ودا اللى حصل مع الولد دا يعنى لا دلع زياده ولا حزم زياده
تحياتى ليكى وربا يرحم لولد ويصبر اهله
سومه_87

شفـقــة و إحســــان يقول...

برافو عليكى موضوع هادف ومهم جدا ...تسلم ايدك عليه
ويارب تكون رسالتك وصلت

Anonymous يقول...

لا حول ولا قوة الا بالله العلى العظيم

بطوط حبوب يقول...

لا تعليق بجد
اصل الحكايه فكرتنى بحكايه مكنتش عايز افتركها

Anonymous يقول...

إنا لله وإنا إليه راجعون .لايمكن أن يقال في هذه المأساه الا أن ربنا أعطاهم نعمه يتمناها الكثير من الناس الا أنهم بدلا من صيانتها ورعايتها بددوها وسوف يحاسبوا عليها يوم القيامه وللأسف ليست حاله فرديه بل أصبحت ظاهره .ولاحول ولاقوة الابالله.

mayada يقول...

ربنا يرحمه يارب
ويغفر لاهله لانهم بجد دمروه مش دلعوه
المفروض الاباء يمسكوا العصايه من النص
الحنيه مش معناها التسيب ابدا

محاولة لكسر الصمت يقول...

فعلا ربنا يرحمه ويغفرله يا رب...موضوعك جميل جدا وزي ما آبي قالت بيتناول كذا قضية...بس المشكلة ان كل حاجة في الدنيا بقت ملخبطة واتغيرت.....صحيح في الاول سالتي ايه هي مواصفات الاب الكويس....اسمحيلي اجاوبك...انه يكون أب من غير كويس ومن غير أي صفة تانية...لان كلمة أب لوحها ليها معاني كتير أوي محتاجة كتير عشان توصفها...بس للأسف في زمانا ده كلمة أب بقت مجرد لقب.......

blue-wave يقول...

فعلا بقت حاجه تقرف محدش بقى فاضى لحد ولا حد بيعلم حد لكن متهيألى مش دى القاعدة
فيه ناس لسه واخدين بالهم من ولادهم وعايشين حياتهم ليهم
البوست بتاعك جميل بجد
تحياتى

جـيـداء Gaida يقول...

كل اب بيبقى فاكر نفسه مجرد ماكينة نقدية و خلاص
والام بتبقى معتبرة نفسها دادة بتأكل و تشرب و خلاص

لو كلمتيهم عن تربية نفسية اجتماعية اخلاقية ولا حتى دينية ..
انسى انهم يفهموا..

احنا عندنا اهو اكتر من جيل اباء عدى فى منتهى السوء و عمالين ينتجوا فى اجيال شباب فى منتهى السوء برضه

و الله انا مهم اتكلمت فى الموضوع ده مش هشفى غليلى ،ربنا يهدى بقى و يصبرنا..

Bongo يقول...

إنا لله و إنا إليه راجعون

مشكلة بنشوفها كتير للأسف
و ده اسبابه معروفة و نتايجه هي اللي شايفينها في البوست

رأيي ان الأب و الأم لازم يكونوا عارفين ولادهم فين و بيعملوا ايه و في نفس الوقت اسلوبهم يبقي مش متشدد

يعني وسط بين الشدة و الدلع
لأن خير الأمور الوسط

طبعا ربنا يرحمه

و يهدي شباب المسلمين يارب ..

دكتور بهــدوء يقول...

لا اله الا الله
لا اله الا الله
بجد فيه كده
متهيألي عقاب ربنا للاب والام واضح
وياريت يركزوا بأه ف ولادهم التانين

ذربونة هانم يقول...

ان لله و ان اليه راجعون

فعلا انا كلامك و حكايتك عنهم استفزتنى
الغريبة ان التلفزين مليان مسلسلات بتتكلم عن حاجات شبه كده
بس غالبا الناس كلها ماشيه بمبدأ"يحدث للاخرين فقط"
حسبى الله و نعم الوكيل

Foxology يقول...

فاقد الشئ لا يعطيه

الأب والأم معنهدهومش اساس التربية الصح يبقو هيربو صح ازاى ؟؟؟؟؟

الله يرحمه ويغفر له ويسامح ابوه وامه لأنهم سبب فى وفاته بالشكل ده

ربنا يرحمنا برحمته

ahmed_k يقول...

صيدلانيه --- في البدايه عاوز اعبرلك عن اعتذاري علي خطأ غير مقصود في اسم حضرتك في ردي علي تعليقك في مدونتي, وبخصوص بوست اليوم فهو موضوع قيم ويظهر اولي مراحل فساد اي مجتمع وهو الأسره فالأسره المترابطه والتي تقوم علي مبدأ الحنان والأهتمام بجوار الرقابه والحزم هي اساس تكوين مجتمع صالح ومنتج والأسره المفككه والتي مبدأها الدلع الزائد وترك الأبناء يتصرفون كما يحلوا لهم بدعوي انه يوجد ثقه فيهم هي اساس مجتمع فاسد متخلف , حمانا الله , وصدق الله حين قال ( واذا اردنا ان نهلك قرية امرنا مترفيها ففسقوا فيها فحق عليها القول فدمرناها تدميرا ), رحم الله مجتمعنا واسرنا من بلاء التفكك وتقبلي تحياتي والسلام ختام

صيدلانيه طالعه نازله يقول...

ابى:الهطل عند الرجاله بقى موضه اليومين دول كل واحدلبس كرافته لمونى يروح يصدق نفسه انه نغه و لسه صغير
و مش بيفكر انه بيجرح اقرب الناس له
===================================
سومه :اللى انتى قولتيه صح فعلا خير الامور الوسط
نورتينى يا قمر
===================================
شفقه هانم و الاستاذ احسان:ياريت فعلا تكون وصلت و اللى مفهمش يفهم
شرفتونى
===================================
غير معرف:شكرا على التعاطف
نورتنى
================================
بطوط حبوب:انا اسفه يبدو انى قلبت عليك المواجع
كلنا عندنا ذكريات مؤلمه
تحياتى
=============================
مياده:ربنا يرحمنا جميعا و يبعد عنا الحاجات الوحشه دى
نورتينى
================================
غير معرف:دول كانوا نعمه و امانه و فعلا لم يحافظوا عليهابس الواحد بيزعل على الشباب اللى بيضيع ده
تحياتى
=================================
دواير:فعلا الاباءدلوقتى بقوا القاب و بس و الامهات كمان و مبقاش عندهم وقت غير لجمع الفلوس و الخناق و بس و مفيش وقت لولادهم خالص
ربنا يهدى الجميع
=================================
blue-wave:فعلا الغالبيه لسه بتهتم بولادها و بسلوكياتهم من غير خنقه و لا مضايقه
تحياتى
==============================
جيداء:ليه بس الغل يا جميل
اللى انتى بتقوليه دى حقيقى و بحس ساعات ان انا منهم ساعات مش على طول
اما اكون متضايق او مشغوله بحاجه
بس برجع اظبط نفسى بسرعه
نورتينى
=================================
بونجو:حمد الله على السلامه وانا معاكى فى رايك و لازم نهتم بولادنا اكتر شويه
==================================
دكتور بهدوء:فعلا ده العقاب بس للى بيفهم و يقدر
تحياتى
================================
ذربونه هانم:ما عاش اللى يستفزك يا جمييييييييييل فعلا التلفزيون طول النهار بيجيب كوارث و يبدو ان الشباب بيتعلم منها مش بيتعظ
================================
فوكس:فعلا لو هما اتربوا صح كانوا عرفوا يربوه
انت عندك حق
نورتنى
==============================
احمد:ايوه مين اميمه دى؟
الاسره هى نواه المجتمع و اذافسد الاساس فسد الباقى كله و بالتالى المجتمع كله حيبقى حاله زفت و الحمد لله
ياريت الكبار يقروا كلامنا ده و يفهموه
تحياتى
==============================

tarek alghnam يقول...

اختى الرائعة
كلامك ممتاز وبوست رائع
انا ليه رائى وسمعته فى احد المسرحيات
وهى مسرحيه سك على بناتك فى نهايه المسرحيه يقول بطلها لازم نسك على بناتنا الباب بس نخلى المفتاح معاهم
تقبلى تحياتى
ومتعك الله بالحب
ودمتى بحفظ الله

semsem يقول...

اولا الرساله وصلت طبعا
بس حضرتك تلاحظى ان شباب كتير بيموتوا صغيرين
بجد لاحظتها اوى
الله يرحمه طبعا ..ويصبر امه..ويهدي كل شبابنا
بس احنا لازم نفوق
وحضرتك كنتى سألتى الاب المثالى فى نظرنا ايه؟؟
باختصار هو الاب المتفاهم اللى يعرف معنى الحب
معنى الحنيه ...وازاي يبقى والدي وصاحبى
انا لله وانا اليه راجعون
وجزاكى خيرا انك حكيتى لينا عشان ندعيله
وجزاكى خيرا على التذكرة

شهووووده يقول...

الله يرحمه ويرحمنا جميعا.. بس لا اعتقد انه وفاته كانت شيء عادي بالنسبة لوالدته على الأقل .. ساعات الصدمه بتخلي الواحد يتصرف تصرفات غريبة يعتقدها البعض لا مبالة...

موضوع قيم شكرا لك اختي الفاضلة

شهووووده يقول...

الله يرحمه ويرحمنا جميعا.. بس لا اعتقد انه وفاته كانت شيء عادي بالنسبة لوالدته على الأقل .. ساعات الصدمه بتخلي الواحد يتصرف تصرفات غريبة يعتقدها البعض لا مبالة...

موضوع قيم شكرا لك اختي الفاضلة