السبت، 14 يونيو 2008

الريس خالد حرب



خدنا الاجازه خلاص و بدأت السينما تنزل


افلام الصيف الجديده و صاحبتكم بقى مدمنه


سينما يعنى مفيش فيلم بينزل الا و بيمر عليا


بدا الموسم عندى السنه دى بفيلم


"الريس عمر حرب"


الفيلم ده جديد المخرج خالد يوسف او بمعنى


اصح تحفته الجديده بعد كل افلامه الرائعه


السابقه.


الفيلم بيدور فى عالم صالات القمار و ما يحدث فيها بالتفصيل الممل و ان كان ما يعيب الفيلم هو مشاهد الجنس الكثيره


و الصارخه و على الرغم ان الفيلم للكبار فقط لم اكن اتصور ان ارى كل هذه المشاهد الخارجه مقارنه بفيلم آخر


للكبار مثل "عماره يعقوبيان"او "سهر الليالى"و الاتنين كانوا للكبار فقط


الفيلم كان فيه سميه الخشاب و غاده عبد الرازق و هانى سلامه الذى لولا وجود خالد صالح فى الفيلم لكان هو البطل


المطلق له لان الفيلم كان على اسم شخصيه خالد صالح لكن مشاهد هانى سلامه اكتر و ان كان معظم مشاهده راحت فى


البحلقه بعينيه كعاده هانى سلامه دائما و ربنا ما يقطعله عاده ابداااااااااااااااا


اما بقى خالد صالح فكان تحفه الفيلم بجد ايه الراجل ده مش ممكن الموهبه دى كلها


الراجل ده عنده قدره انه فعلا ينسيك هو مين فى الاصل و لا تتذكر الا انه الريس عمر حرب


قوه فى الاداء و كمان بسهوله من غير تكلف او تشنج ,نظرات عينيه فى الفيلم كانت مرعبه و قويه و كلها ثقه


اضافه على ان قوه القصه و الدور جعلوا تمثيله اقوى حتى من دوره فى "هيه فوضى "


هوه كان دوره صاحب صاله القمار القوى الشخصيه الصارم الذى تثار حوله الاساطير و التى تذيد قوه شخصيته و


غموضها و مش حاحكى حاجه تانى عشان محرقش الفيلم للى عايز يشوفه.


بصراحه خالد صالح يستحق جائزه عن هذا الدور بجد و الايام حتثبت انى على حق


ياريت يا جماعه كل اللى راح الفيلم يجى يقوللى هو معايا و لا ضدى فى الرأى انا شخصيا ارفع لخالد صالح القبعه عن


هذا الفيلم.


و نتقابل انشاء الله مع الفيلم الجاى

هناك 27 تعليقًا:

mayada يقول...

انا الالفه هيه هيه
المفروض ادخل كليات القمه بقي
خالد صالح ده ملوش حل بجد
انا مشفتش الفيلم بس في مخطط اني اشوفه
وبما انك شوفتيه فالله يسهله ياعم
بس هو فعلا حد وهم
تحياتي ياجميل

Foxology يقول...

والله انا مش بحب خالد يوسف من الأساس لكن لو فكرت ادخل الفيلم هيبقى علشان خالد صالح النجم الكبير والفنان الحقيقى

المشكلة ان فعلا الواحد بيقرف من نوعية افلام خالد يوسف للمشاهد اللى فيها ولو اتكلمنا يقولك انا بعرض الواقع طب يا اخى محنا عارفين لازم تعرى الناس اكتر بالشكل ده ؟؟

تحياتى :)

Ashraf يقول...

والله احنا فى سنة 2008
والجرأه والواقعيه كويسه وانا مع خالد يوسف فى الوعى الجنسى فى حدود الدين والقيم والعادات(لا حياء فى الدين)
انا كان لى الشرف وشاهدت الفليم واعتقد انه سيحصد الجوائز

Appy يقول...

ايه يا دكتور انت طلعت دكتور تحاليل افلام ولا ايه ههههههههههه بجد نفسى اشوفه بس مفيش وقت ومفيش اسلام هههههههههه لانه مش فاضى
بس واضح انه جامد انا عاوزة اقولك ان خالد صالح اساسا ممثل قوى وانا بحبه جدا

كاتب مصري يقول...

يشرفني جدا أن أجدك زائرا على صفحة مدونتي وتترك تعليق أو حتى توقيع فأنا أود كسبك قارئا لمدونتي ..
تحيتي وأنتظر الزيارة واعتبر هذه دعوة
مدونتي هنا
http://kanyatklam.blogspot.com/

blue-wave يقول...

اول زيارة لمدونتك الجميله وانشاء الله مش هاتكون الأخيرة بس مش متفق معاكى ان الريس عمر حرب دا فيلم جامد انا شايفه كله قلة ادب انا دخلته ومقدرتش اكمله
لك

FaceMoon يقول...

خالد يوسف مخرج متميز مع انى بعيب علية فى دخول مشاهد قليلة الحياء كتير فى افلامة بس هو اخراجة جميل وقصص افلامة محدش بيعملها غيرة
اما بقى خالد صالح فدة عبقرية فذه ربنا يخلية للسينما بقى

بطوط حبوب يقول...

انا عملت التاج اخيراااا
الفيلم بيقولوا ان فى لقطات كتيره مش كويسه عشان كده مش هشوفه
كمان فكره الكلام عن الحياه فى صالات القمار ايه الى ممكن يشد فيها؟؟

try again

ahmed_k يقول...

فرصه لكي اعبر عن احترامي لفن خالد صالح والذي يعد من النجوم الذين يتركون بصمه في السينما المصريه بقوة وسلاسة ادائه فهو يؤدي بشكل يمكن نقول عنه السهل الممتنع ولا يقلد احد بل له حضور خاص به تحياتي لكي وتقبلي دعوتي بزيارة مدونتي المتواضعه

Geo Amr يقول...

بجد ومن غير زعل خسارة الوقت الى انتى ضيعتية علشان تكتبى بوست زى دى ياريت لو تكتبى عن شخصيات اسلامية او تكون عالمية ودة هيكون افضل وبجد خالد يوسف بيركز على الاشياء السلبية وبعدين واحنا مالنا بالاشياء التى تحدث داخل صالة قمار وبجد كل واحد قراء البوست وناوى يشوف الفيلم بسببك انتى هتشيلى ذنبه
سلام

غني يابهيه يقول...

شفت الفيلم وطبعا فيلم تحفه وكمان مسخره
بس فعلا اللي في الفيلم ده هو خالد صالح وبس

والراجل ده من يوم تيتو وهو عملاق وهايفضل عملاق

just me يقول...

انا طبعا ماشفتش الفيلم
وبجد هتكسف اشوفه بسبب المشاهد اللى انتى قلتى عليها
هى افلام خالد يوسف فعلا حلوه بجد وليها معنى
بس ليه المشاهد دى بجد؟؟
ممكن نعبر عنها بس مش بالصوره دى
فى حاجه اسمها الحياء
لكن دول بيقتلوه باسم الفن

صيدلانيه طالعه نازله يقول...

مياده:مبروك المركز الاول
ربنا يسهلك و تشوفيه بس اوعى تتخضى
من اللى فيه
و لا جدال على تفوق خالدصالح
نورتينى
=================================
Foxology:دى وجهه نظر برضه بس اما نعرى مشاكلنا ده بيسلط الضوء عليها علشان نلاقى لها حل
تحياتى
=================================
Ashraf:هوه اكيد حياخد جوايز و دى عاده خالد يوسف التفوق دائما
================================
Appy:ده شرف ليا يا افندم انك تعتبرينى محلله افلام و لو عايزه تروحيه قولى بس و احنا نعمل سرعه ضبط و احضار للمدعو اسلاااام طوالى ههههههه
================================
كاتب مصرى: شرفتنى بالزياره و انشاء الله دايما
================================
blue-wave:بالعكس الفيلم حلو و المشاهد دى علشانها كتبوا للكبار فقط
على الفيلم
نورتنى و اتمنى تكرار الزياره
==================================
face moon:بس هوه بيعرف يوظف المشاهد الجنسيه لصالح الفيلم مش ضده
بس للصراحه هيا كانت كتيره قوى فى الفيلم ده
عشان تبين التخبط اللى بيعانى منه هانى سلامه فى الفيلم
نورتينى يا قمر
===================================
بطوط حبوب :كفاره من الامتحانات و الفيلم و الله حلو جدا
و شكرا على ردك على التاج
و حاسمع نصيحتك و حاحاول تانى
=================================
Ahmed-k:فعلا خالد صالح ماشاء الله عليه
متفوق دائما و كل شويه بيتفوق على نفسه اكتر
و شكرا لمرورك الكريم
==================================
geo Amr:مين قال ان وقتى ضاع على الفاضى بالعكس كفايه ان حضرتك نورتنى بالزياره بسببه وده فى حد ذاته مكسب
و المدونه دى بعتبرها بيتى انا يعنى اعمل فيه اللى انا عايزاه
مش كده و لا ايه؟!
و على فكره قرأ بتتكتب كده مش زى ما حضرتك كتبتها و شكرا
نورتنى
=================================
غنى يا بهيه:و الله هوه حلو فى كل ادواره حتى فيلم احلى الاوقات كان جميييييل جداااااا
تحياتى لك
=================================
لست ادرى:بس روحى شوفيه و مش حتخسرى و الله و المشاهد مش كتيره قوى
نورتينى و ياريت تتكرر

سوسا ومودى يقول...

سؤال بقى الله يخليكى عشان أنا أصلا متغاظه من اللى أسمه خالد يوسف ده
أحنا أيه اللى حنستفاده من اللى بيدور فى صاللات القمار

مش فاهمه الصراحه
على العموم أنا مش من أنصاره خالص
وأصلا مش بدخل سينيما
لان الافلام فى السينيما بقت واخده سكه كده مش ولابد

محاولة لكسر الصمت يقول...

بصراحة..أنا ماشفتش الفيلم عشان كده مش هعرف احكم...بس عموما افلام خالد يوسف يبقى فيها فكرة مميزة..على سبيل المثال خيانة مشروعة وجواز بقرار جمهوري وانت عمري...بس ده طبعا ما ينفيش زي ما حضرتك قلتي انه بيزودها اوي في المشاهد الجنسية والالفاظ غير المقبولة...بس انا كنت حابة لو سمحتيلي ارد على سؤال بعض الناس عن ايه اللي هنستفيده من اننا نعرف اللي بيحصل في صالات القمار...بيتهيالي مش قضية هنستفيد ايه؟ خالد يوسف بيعكس واقع يمكن احنا مش متقبلينه لاننا بعيد عنه تماما...بس للأسف الواقع ده ابطاله هم اللي بنسميهم (علية القوم)...يعني صالات القمار الكبيرة دي مش بيبقى فيها ناس عادية...لا دول بيبقوا من اغنى اغنياء البلد...وبيتهيالي ده موضوع يستحق العرض بعيدا عن الاسلوب او الطريقة اللي استخدمها خالد يوسف لاني بصراحة ماشفتش الفيلم عشان كده ما اقدرش احكم عليه........

خاطبة المدونات يقول...

نريد متطوعون لإنجاح فكرة المدونة
ومن يجد في نفسه حب الخير فليتفضل
elkhatbah60@yahoo.com

Tamer Nabil يقول...

انا مش شوفت الفيلم عشان اقدر احكم علية

بس الغريبة فى افلام اليومبن دول كلة للكبار طيب الصغيرين مش بيدخول ولا حد بيسال على الباب انت صغير عيب ارجع مش اعتقد

تحياتى

المـــفـــــــقــــــــوعـــــة مــرارتـهــا يقول...

انا عاملة إضراب عن أفلام الصيف ده
بقي ده اسمه كلام برضه

يعني نودي الولاد فين

وبعدين انا لو دخلت فيلم للكبار فقط بابقي خارجة منه في نص هدومي
من الناس اللي معايا في السينما

صيدلانيه طالعه نازله يقول...

سوسا و مودى: ماله بس خالد يوسف مزعلك فى ايه و مالها السينما برضه
اهى الصناعه الوحيده اللى لو اهتمينا بيها ممكن تدخل للبلد دخل كبير و هيا محتاجه دعم كل المصريين
نورتينى
================================
دواير : انا معاكى جدا فى رأيك
مشكله صالات القمار انها مسموح بيها للاجانب بس و ممنوعه للمصريين و اللى يدخلها لازم يكون معاه جواز سفر اجنبى
و احنا من حقنا نعرف اللى بيحصل فى بلدنا حتى لو كان غلط
و ده هوا اللى عمله خالد يوسف بالضبط
وحشتنا ردودك الجميله يا جميل
===================================
خاطبه المدونات:
شرفتينى و لو انك مقرتيش حاجه و جايه فى رساله محدده
==================================
تامر نبيل:الصغيرين يدخلوا كباريه و كابتن هيما
حكايه للكبار فقط دى بقت موضه عشان الناس تجرى على الفيلم
نورتنى
================================
المفقوعه مرارتها:سيبى الولاد عند فيفى مش انتى سبتيلها المدونه بتاعتك و طفشتى
خلاص دبسيها فى الولاد يوم
بس الفيلم جميل و حكايه جديده مش مكرره
نورتينى يا قمر
==================================

Darsh يقول...

هو خالد صالح مفيش اتنين يختلفوا عليه على الإطلاق ... فعلا مبدع

و قدرات خالد يوسف كمخرج مفيش جدال عليها ... فعلا عبقري

بس إضافة المشاهد الخارجة لأفلامة بتضره مش بتنفه على الإطلاق

للأسف انا مش هدخل الفيلم ده رغم اقتناعي المسبق انه رائع علشان اللي فيه

رئـــــيسـة حزب الأحلام يقول...

انا مارحتش الفيلم دة لانى مش غاويه سينما
بس كترخيرك اعطيتينا فكرة
تحياتى

reem يقول...

اول مره في مدونتك الجميلة وان شاء الله استمر بقرأتها على طول ... وفعلا رأيك صح جدا في موهبة خالد صالح الكبيرة وبجد هو عنده قدرة على التنوع مش معقوله انا مش شفت الفيلم لكن دا رأيه فيه على طول .. اتمنى ان تزورينى في مدونتى المتواضعة وتدينى رأيك لانى لسا جديدة على التدوين انا صحيح لسا مش عارفه حتى اكتب ازاى البوستات صح وتايهة اوى بس يعنى اهى محاولات للفضفضة مش اكتر .. وتحياتى لك كتير

دكتور بهــدوء يقول...

أنا بصراحه لسه ماشفتوش
اصلي لسه مش خلصتتت امتحانات زيكوا
يابختكوا بالاجازه
هخلص واحد تمانيه ان شاء الرحمن
****************************
طبعا الفيلم فيه رمزيه كتير ع إن الصاله هيا الدنيا والبقاء للاقوي وكده
بس أنا بأه عشان دايما بحب أتأمل سبت الفيلم قعدت أتأمل ف الاسم
الريس عمر حرب
اقريها م الشمال كده
تبقي حرب عمر.........
مش عمر اسم لا عمر بضمر العين وسكون الميم
يعني حياة
وكفايه كده عليا هيجرالي حاجه م كتر التفكير

حلم الحرية يقول...

خالد صالح عبقرية تمثيل بحق وحقيق
وانت بتتفرج عليه قادر انه يخليك تغوص معاه في تفاصيل الشخصية اللي بيؤديها ايا كااانت

للاسف الفيلم رغم انه بيحمل فكرة وفيه اسقاطات علي المجتمع ...بس زي ما انتي قلتي انه فيه مشاهد مش حلوة خالص فمش ناوية اشوفه

تحليل متميز ليكي باحييكي عليه

دمتي بود

صيدلانيه طالعه نازله يقول...

darsh:اذن انت من المؤيدين لى و لحكومتى حول خالد صالح
اما موضوع تروح او متروحش ده حريه شخصيه انا مش باخد من اصحاب الفيلم فلوس
انا بوست كله كان على حلاوه تمثيل خالد
نورتنى
===================================
رئيسه حزب الاحلام:الناس المهمه اللى زى معاليكى مش فاضيين للحاجات الصغيره دى
كفايه الحزب و مشاغله
ههههههههههههههه
تقبلى تحياتى
===================================
reem:شكرا على التعليق الجميل و مدونتك انتى كمان حلوه و ربنا يوفقك
==================================
دكتور بهدوء:ياسلام على الناس اللى بتحقد على الاجازات بكره تخلص و تزهق منها
و كفايه فعلا تفكير فى اسم الفيلم لانك فاضل تغير ترتيب الحروف و تطلع منها كلمات جديده
ههههههههههههههههههههه
نورتنى
==================================
حلم الحريه:شكرا على اعجابك بالتعليق على الفيلم و ربنا يخلى لنا خلود باشا اللى كان السبب انى اتعرف على الناس الحلوه دى
نورتينى
===================================

ذربونة هانم يقول...

انا الصراحة بتكسف اخش ليه افلام لانى بتكسف جدا خصوصا وانا طالعه
بس شكل الفكرة بتاعه الفيلم تحفه ده غير انى بموت فى خالد صالح و بحترمه جدا
مش عارفه بأه اعمل ايه

صيدلانيه طالعه نازله يقول...

روحى الفيلم و ما تتكسفيش لان كل اللى طالع حيبقى مكسوف و محدش حيشوف حد
هههههههههههههههههههه