السبت، 9 أغسطس 2008

تجيبها كده تجيلها كده مفيش فايده.....بااااااااااااااااظت خلاص



النهارده بجد مش عارفه موضوع محدد اكتب فيه لان اللى شايلاه فى قلبى كتيييييييييير و معبى

مش عارفه اتكلم عن رمضان اللى خلاص بدأت تباشيره تظهر من ساعه ما كنت فى القاهره

و لا عن المدارس اللى لمست على نفس السلك بتاع المصاريف زى رمضان لا اكتب ايييييييه بالضبط

بدأت بقالى يومين اشترى حاجه المدارس للولاد و اهو بند نخلص منه هوه و مصاريف المدرسه

قبل ما ندخل على رمضان و طلباته الكتيره نوعا ما

بصراحه ذهلت من اسعار اللبس بتاع المدارس السنه دى يعنى انا قلت اوفر و جبت للولد

بنطلونين و قميصين بس و اهو عنده قمصان من السنه اللى فاتت كويسه و الجاكت زى الفل

و مع ذلك دفعت 170 جنيه امال لو كنت بعزقت كنت دفعت كام؟؟؟؟؟!!!!!!!مش عارفه و الله

اما الشنط و الشرابات و الشوزات فده يعتبر نثريات و ان كانت غليت كتييييييييييير هيه كمان

ده غير مصاريف المدرسه السنه دى انا عندى اتنين و ما حبكش الضرايب تتفرض على المدارس الخاصه

الا السنه دى ياربى ادينى حدفع 3000 و شويه و ياريت فى الاخر بيلاقوا شغل بس اهو برضه عشان اما

يفكروا يهربوا على ايطاليا فى فلوكه مخرومه يعرفوا يقولواHELP اماااااااااال احنا بنعمل لبكره برضه

مش عارفه و الله الناس اللى بتجيب عيال كتيره دى بتعمل ايه فى الايام دى وقال حماتى و قرايبى يقولوا لى

كل شويه هاتى عيل تانى و كفايه طب دول مش حاسين بالدنيا اللى ولعت ولا ايه مش عارفه بجد

انا ساعات بحس ان الواحد كان جاب واحد بس و كفايه بس ارجع و اقول الحمد لله دول برضه نعمه من عند ربنا

اا رمضان و مصاريفه انا عامه رمضان مش بيختلف قوى فى نوعيه الاكل عندى الا لو كانت عندى عزومه مثلا

اما ايامى العاديه بيزيد طبق شوربه و العصير اللى اساسى عندنا قمر الدين مشروبنا المفضل

و شويه حاجات قليله قوى زياده جنبه و الباقى زى اى يوم

المشكله ان الحاجات ضربت قوى لفوق فى السعر يعنى الحاجات اللى كنا بنجبها ب100 جنيه بقت 300

يعنى اقل حاجه حجيبها حاحس انى مبذره و مسرفه

حاسه انى اتخنقت و انا باحكى و مش عارفه اقول ايه تانى

نطلع بقى من نص رمضان بقى على لبس العيد اللى بقترح انه يتلغى السنه دى خاااااااااااااااالص

لانه بدعه و كل بدعه ضلاله و كل ضلاله فى النااااااااااااااار

من كل اللى انا قلته نطلع بأيه ؟؟؟!! ان المدارس لازم تتأجل لغايه بعد العيد عشان الناس

تاخد كل خبطه فى دماغها بتركيز و تدوخ شويه و تقوم تتخبط باللى بعدها

لكن كل الخبطات مع بعض لا الناس ساعتها حتموت من اول مره و مش حتلاقوا حد تخبطوا فيه بعد

كدهليه بقى؟؟؟؟؟

لان الخبط فى الميت حراااااااااااااااام

وكل سنه و انتم مخبوطين

يووووووووووه

قصدى بخيييييييييييييير

هناك 31 تعليقًا:

Anonymous يقول...

لاحول ولاقوة الا بالله العلى العظيم
لايوجد شئ بالمجان الان -
لان هذا يؤدى الى رقى الامم وسموها
ويجعل الروؤس تتساوى بين المتعلمين واصحاب الثروات والاثرياء
وبم اننا فى زمن الخصخصه فلن يكون التعليم مجانى ولا اى شئ اخر وليذهب الغير قادرون والطبقه المتوسطه الى الحضيض
والله المستعان على سواء السبيل

Appy يقول...

اجيب منديل والله واقعد اعيط جنبكم انا اللى مليش كل ده مضايقه علشان الناس معلش يا بنتى والله منهم لله هتعملى ايه مما الناس طالبت بالتأجيل وهما ولا فى دماغهم

Mahmoud البطراوى يقول...

عادى بقى المفروض تبدأى تتكيفى مع الوضع الجديد الى هو نفسه مش عارف يتكيف
بس الشعب المصرى شعب طيب وصبوووؤ خليكى صبوره زيه وطيبه زيه


اصل لو فضلتى تقولى العيشه والى عايشنها مش هتخلصى

كل خبطه وانتى بالصحه والسلامه
:)

دكتور بهــدوء يقول...

السنادي فعلا كله جاي ف وقت واحد
الواحد مش عارف اهله بيعملو ايه عشان خاطره
هوه فعلا الدراسه مش هتتأجل؟؟؟
وبالنسبه لرمضان
الناس دايما بتزيد م الاكل فرمضان
خلينا نخس شويه
مافيش كنافه ولا قطايف ولا مشمش ولاتين ولا قراصيا
ملها الليموناده كفرت؟؟؟
لا داعي للسمبوسك والجمبري والقشريات ولا قشريات
ماله الفول بالزيت الحار
سحور و
الفطار فرخه
مش لازم ام علي
مالها البليله
مش لازم اي حاجه
مالها ولا حاجه
ربنا يعدلها م عنده يارب

afreet يقول...

مش عارف ايه البطر ده على الدنيا الحلوة اللي انتم عايشين فيها مش تشوفوا ايه اللي بيحصل في الصومال احمدوا ربنا كمان مش لسه الريس مديكم 30% انتم مابيعجبكمش العجب عالم طماعه صحيح

AHMED SAMIR يقول...

من صيدلي زميل لصيدلانية طالعة نازلة
مش هلاقي احسن ولا افضل من الهتاف الشهير لجماهير كرة القدم
ولســـــــــــــــــــــــــــــة
ولســــــــــــــــــــــــــــــة
و لســــــــــــــــــــــة
تحياتي

سمر الشافعى يقول...

كل سنه وانتى وولادك وكل حبايبك بخير وتعيشى وتتخبطى

semsem يقول...

يا حبيبتى
كل ده فى قلبك
ربنا يعينك
بس وحشتينى اوى

ahmed_k يقول...

هو إحنا لسه شوفنا حاجه
طلبات المدارس
تتبعها طلبات رمضان
ثم العيد
وهكذا
تتم ترابط غريب في المناسبات بحيث الأنسان ميلحقش يشم نفسه
أنا الحمد لله مرحوم من الحاجات دي ههههه
بس شايف اللي بيحصل
وطبعا اللي أيده في الميه مش زي اللي أيده في النار

صيدلانيه طالعه نازله يقول...

غير معرف
""""""""
يا خوفى بعد كده ان الاكسجين اللى بنتنفسه يبقى بنظام كروت الشحن المدفوعه مقدما
ربنا يستر
Appy
"""""
متجبيش منديل و تكلفى نفسك انا معايا كتير قوى تخيلى حتى لو اتاجلت الموضوع كله دخل فى بعضه
انا مش عارفه الحكومه دى بتفهم ازاى و منييييين
بطوط حبوب
""""""""""
و الله انا الصبر اللى عندى يكفى الدنيا و يفيض بس كل شويه الخنقه فعلا بتزيد و الامور بتسوء مش بتتحسن
كلها كام سنه و تتجوز و تحس باللى بقوله و الله حقيقه مش حب للبكاء و الولوله
نورتنى
دكتور بهدوء
"""""""""""
انا فعلا ماليش فى البهرجه و لا الاسراف
رمضان بالنسبه لى عادى بالنسبه للاكل
هوا المشكله فى التزامن بين المدارس و رمضان و العيد
و اللى عنده اطفال بيبقى عاوزهم مبسوطين بكل ما اوتى من امكانيات
و على رأيك مالها الولا حاجه
جميييييييييييييله
afreet
"""""""
احنا فعلا صنف ما يملاش عينه غير التراب
بس البحر بيحب الزياده و احنا الحمد لله على طول ناقصين و مفلسين
على الاقل الصومال بيجلها معونات من الامم المنتحده لكن احنا لنا الله
a.samir
"""""""""
و انا حرد عليك من نفس المنطلق و نفس المدرجات
حراااااااااام

كفاااااااااااااااايه
سمر الشافعى
""""""""""""
و انتى بالف صحه و خير و خبطااااااااات
ههههههههههههه
Semsem
"""""""
و الله اللى فى قلبى كتيييير المهم انه ميطقش و ربنا مع الكل
معلش مش باجى عندك كتييير اديكى قاريه و عارفه
نورتينى
Ahmed_k
""""""""
مسيرك تقع فى الخيه يا كابتشن و نشوف حتقول اييييييييه و لا حتعيط ساعتها
الله اعلم
كل سنه و انت طيب و بخير

mayada يقول...

والله ياحبيبتي حاسه بيكي موت
موووووووووووووووووووووت
هعيط والله اصل الحكايه معايا جيم خالص
كل حاجه تمنها بقي مضروب في اربعه
مش عارف الحكايه دي تعدل ازاي
ملحوسه انا بعت العنوان علي الميل
يادكتوره ان شاالله يكون وصلك

Foxology يقول...

البلد دى خلاص مفيهاش حاجة رخيصة غير البنى آدم :)

رمضان كريم ومبروك الشقة :)

تحياتى :)

سبهللة يقول...

عارفة جوزى جالى من يومين وقالى لبس المدرسة بتاع اياد نزل فى المحلات هانشتريه امتى؟
قلته الواد مش بيكال وجسمه زى ماهو خليه يقضيها بلبس السنة اللى فاتت على ما رمضان يعدى وبعدين اشوف اذا كنت ممكن اشترى له ولا اطنش السنة خاصة وانه لسه هايدخل اولى ابتدائى ومش فاهم يعنى ايه لبس جديد ولا قديم
وفضلت احلم انى هاوفر فى البند دة
قوووم ايه
المدرسة غيرت الزى الخاص بالمرحلة الابتدائية واختلف كليه عن مرحلة الحضانة
شوفتى
يا فرحة ما تمت

Anonymous يقول...

الواحد مش لاقي شيئ يقوله غير أن ربنا يكرمنا ويرحمنا
إما بالفرج
أو
بالراحه الأبديه

شيتوس الاهلاويه اووووي يقول...

ازيك؟
دي اول زيارة ليا لمدونتك وبجد دمها خفيف ولذيذه وبجد انتي جواكي كتييييييير اوووووووي
ربنا يعينك والله ويكرمك
تقبلي مروري وتحياتي ليكي
دمتي سااااااالمه
اختك شيتوس

Anonymous يقول...

انت تقراى كثير ومتأثره بيوسف معاطى وكان الله فى عون اولياء الامور
د.عادل حسن

blue-wave يقول...

هههههههههههههه
وانتى مخبوطه
قصدى بخير:))
وربنا يعينك

mohamed ghalia يقول...

احنا خللاص خدنا على الخبطات دى
وكل سنة واحنا مخبوطين
تحياتى

ahmed_k يقول...

فينك يا دكتوره طولتي الغيبه
وطبعا من ساعة ما رحتي أكتوبر
مابقيتيش طالعه نازله
أصل مش معقوله فتحتي صيدليه
في نفس البيت
من دلوقتي إنتي
صيدلانيه مش طالعه نازله

متغيبيش عننا أكتر من كده

تحياتي

هانى زينهم يقول...

رمضان كريم ربنا يعيده عليكي وعلي كل المسلمين بالخير
المشكلة مش في مصاريفه لأنه ممكن الواحد يعيش علي قده ...المشكلة في الفرحة اللي غادرت قلوب الناس
تحياتي علي البوست اللي دمه خفيف ....ورمضان كريم

(احمد سكر ) يقول...

السلام عليكم

يعنى قدرى ااقرا البوست وانا لسا جاى من مدرسة محمد ومحمود

وانهارده المدام بتقولى ننزل نشترى حاجة رمضان

ااقوم اقرا البوست بتاعك

وانا لسا محرروووق فى 5000 جنيه قسط اول للبهوات

ولسا مش فيه لبس

ولا مصاريف كتب لانها لسا منزلتش

انا هعيط

لاء

انا هلطم

ربنا يعينا

وكل سنه وحضرتك طيبه

احمد سكر

mayada يقول...

يادكتوره انت فين
كل سنه وانت طيبه ابقي طمنينا عليكي
رمضان كررررررررررريم

ahmed_k يقول...

يا دكتوره فينك ؟؟؟

عسى ما يمنعك عن قرائك
يكون خيرا

كل عام وأنتم بخير

الجواز و سنينه يقول...

طلع كل اللى هايتعلموه هو
help
كويس اهه برضوا طلعوا بحاجه
طمنينى عليكى انتى فين؟

انت تسال والكمبيوتر يجيب يقول...

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

تحيه طيبه وكل عام وانت بخير
فكرة المدونه جيده ونحن سعداء بها وبك وسيكون لنا لقاءات ان شاء الله مع افكارك فى برنامجنا الأذاعى وهو اول برنامج اذاعى عن النت والمدونات فى الشرق الأوسط ويذاع يوميا عدا الجمعه صباحا من الأذاعه الرئيسيه لمصر
وكافة التفاصيل فى مدونتنا وموقعنا
والبرنامج متوقف طوال شهر رمضان
المدونه
http://netonradio.blogspot.com
الموقع
http://dear.to/cairo
والدعوه موجهه ايضا لزوار مدونتك

September 14, 2008 8:55 AM

Anonymous يقول...

فى خلال الثلاثين عاما الماضية تعرضت مصر الى حملة منظمة لنشر ثقافة الهزيمة - The Culture of Defeat - بين المصريين, فظهرت أمراض اجتماعية خطيرة عانى ومازال يعانى منها خمسة وتسعون بالمئة من هذا الشعب الكادح . فلقد تحولت مصر تدريجيا الى مجتمع الخمسة بالمئه وعدنا بخطى ثابته الى عصر ماقبل الثورة .. بل أسوء بكثير من مرحلة الاقطاع.
هذه دراسة لمشاكل مصرالرئيسية قد أعددتها وتتناول كل مشاكلنا العامة والمستقاة من الواقع وطبقا للمعلومات المتاحة فى الداخل والخارج وسأنشرها تباعا وهى كالتالى:

1- الانفجار السكانى .. وكيف أنها خدعة فيقولون أننا نتكاثر ولايوجد حل وأنها مشكلة مستعصية عن الحل.
2- مشكلة الدخل القومى .. وكيف يسرقونه ويدعون أن هناك عجزا ولاأمل من خروجنا من مشكلة الديون .
3- مشكلة تعمير مصر والتى يعيش سكانها على 4% من مساحتها.
4 - العدالة الاجتماعية .. وأطفال الشوارع والذين يملكون كل شىء .
5 - ضرورة الاتحاد مع السودان لتوفير الغذاء وحماية الأمن القومى المصرى.
6 - رئيس مصر القادم .. شروطه ومواصفاته حتى ترجع مصر الى عهدها السابق كدولة لها وزن اقليمى عربيا وافريقيا.
ارجو من كل من يقراء هذا ان يزور ( مقالات ثقافة الهزيمة) فى هذا الرابط:

http://www.ouregypt.us/culture/main.html

ahmed_k يقول...

أسأل الله
أن يعطيك أطيب ما في الدنيا محبة الله
وأن يريك أفضل ما في الجنه رؤية الله
وأن يجمعك بأفضل خلقه رسول الله
وأن ينفعك بأنفع الكتب كتاب الله
وكل عام وأنتم بخير
عيد سعيد

بنوتة مصرية جداجدا يقول...

تعيشي وتتخبطى
ربنا يسعدك ويخليهملك ويكرمك فيهم
عيد سعيد

حياتنا الزوجية...(عضو رابطة هويتي إسلامية) يقول...

ربنا يسعدك ويبارك ليكي فيمن تحبين
بالتوفيق و الي الامام بكرة احسن من النهاردة



حياتنا

أبو فاطمة / هويتي إسلامية - مدونون من أجل فلسطين يقول...

هذا هو عصر حزين عمدة بلدنا عندك اعتراض بأه يعيش العمدة حزين ربنا يهديه ويشفيه من اللي هو فيه

عاوزه ايه هه هه ردي
اوعي تنسي ان سجن ابو حزين واولادة مستني المشاغبين اللي زيكم هه ردي لو تعرفي تردي هه

بالتوفيق الي الامام دائما بارك الله فيك ربنا معاكي


ابو فاطمة من امام سجن ابو حزين
يا سلام عليك يا عمدة

Foxology يقول...

خير يا دكتور مفيش بوست من شهرين وزيادة

لعل المانع خير :)