الجمعة، 1 أغسطس 2008

اكتوبر اللى بعدتنى عنكم


اخيرا رجعت اكتب تانى و الله اللى كان باعدنى عنكم الشديد القوى و القوى جدا كمااااااااااان
الفتره اللى فاتت سافرت اكتوبر عشان اوضب شقتنا الجديده فى اكتوبر و كلى اشراق و تفاؤل
و اقبال على الحياه
من ساعه ما دخلت الشقه و انا اتقلبت سندريلا بكل ما تعنيه الكلمه من مسح و كنس و تنفيض
خدت يومين مع النجار اللى كنت جايباه معايا خوفا من افترا النجارين الاكتوبريين و طبعا
كنت واقفه معاه انا و جوزى لما اتطحنا و اتفرسنا من برود الاستاذ و هدوءه الزائد عن الحد
الحمد لله خلصت النجاره بكل مشتملاتها و قلت يا مسهل ادينا حنبدأ الاجازه لكن هيهاااااااااااااااات
هيهاااااااااااااااااااات
اثناء وجود النجار لاحظنا بعض التسريب من الحنفيات فاتصلنا بالباشا السباك
اللى اسمه مكتوب على العماره و جه صلح حاجات بسيطه اول يوم و لهف 50 جنيه و مشى
اتصلنا بيه بعد يومين عشان يركب السخان و يظبط التواليت اللى كان بيمشى هوا و الحوض لوحدهم
و فين و فين لما تم المراد من رب العباد و خلصنا السباكه ده بعد ما لهف 500 جنيه تانيه
طبعا كنا محتاجين تلاجه رحنا هايبر مش لقينا النوع اللى عايزينه و كسلنا نروح كارفور
واحد ابن حلال (ارشدنا) على محل كبير متخصص فى الاجهزه الكهربائيه
و اكيد كل الاكتوبريين عرفوووووه و فعلا لقيناها هناك و اشتريناها لنكتشف بعد كده انه اغلى من السوق
بحوالى 70 جنيه يالا حار و نار فى جتته طبعا كان نفسى مووووووووووووووووت اكتب لكم يومياتى
و مغامراتى اول بأول من هناك بس للاسف اكتشفت ان تليفونى الهوائى مينفعش يدخل على النت
و حاولنا نمد وصله من الراجل بتاع النت بس كان عايز يدفعنا 350 جنيه تمن البوستر عشان مش فيه
حد غيرنا فى العماره مشترك طبعا جوزى كبر لان احنا كنا خلاص مسافرين و مش مستاهله
فياريت اللى عنده واسطه فى سنترال الحى السادس يشوفلى حل فى موضوع النت ده و له الاجر و الثواب
فضل من الاجازه كام يوم كده سافرت اسكندريه يومين بس و بكده تكون خلصت الاجازه
كان نفسى اشوف ابى و مفروسه و المفقوعه و خيخه و باقى اعضاء نقابه المدونات الحريمى طبعا
بس للاسف مفيش نصيب بس اوعدكم انى اعزمكم على حفل قص شريط افتتاح الشقه
قرييييييييييييبا جدا جدا جدا و ياريت كل اللى يجى يجيب معاه حاجه نكمل بيها اللى ناقص فى الشقه
و اهو من قدم شيء بيداه التقاااااااااااااه و هنيااااااااااااااالك يا فاعل الخير و الثواااااااااااااااااااااب
قبل ما انسى احب اوجه الشكر لابى على اهتمامها و سؤالها عليا صحيح كنت خلاص رجعت بس
كفايه انها افتكرتنى و سألت عليا.

هناك 18 تعليقًا:

كاتب مصري يقول...

حمد لله ع السلامة ربنا ييسر لكم ف شقتكم الجديدة دي ويجعلها قدم السعد والخير عليكم
كل ودي
وعقبال ما تفتحي صيدلية بأه
كل ودي لكِ

Appy يقول...

يا حبيبتى اكيد هاجى واقص لكى الشريط طيب مش كنت تقولى كنت جيت ظبط لكى السباكه هههههههههههههههههههههه

بجد اسفه انى معرفتش اشوفك اختك فى غيبوبه شغل

ahmed_k يقول...

مبروك الشقه الجديده

وعقباااال الفيلا

semsem يقول...

حمدا لله ع السلامة ياقمر
وحشتييييييييييييييييييينا جداااااا

اولا الف مبروووك ع الشقه وربنا يجعلها عليكو دار سعاده ان شاء الله

ومتغبيش بقى
حاولى ييا عسل
ربنا يوفقك:)

سبهللة يقول...

الف مبروك على الشقة
وحمدلله على سلامتك
انتى جبتى الثلاجة من بهجت ستورز؟؟

Anonymous يقول...

مبروك وربنا يحقق لك كل احلامك وحتى وصول النت للشقه

Mahmoud البطراوى يقول...

مبرووووووووك على الشقه الجديده وعقبال الاجدد منها ههههههههههه
هو العب الى فى الاول ده عشان تحسوا بقيتمها محدش بيكالها بالساهل
وربنا يجعلها قدم سعد وتلاقى نت قريب

فاتيما يقول...

إيه دا بقى
اللى ييجى يجيب معاه حاجة للشقة إيه بقى إن شاء الله
مش جبتى التلاجة و صلحتى كل حاجة و لا بتخمينا ؟؟
ألف مبروك يا ستى و ربنا يجعلها عتبة السعد و الهنا عليكى
و خلاص إنضميتى لمحافظة اكتوبر اللعينة على رأى خيخة و بقيتوا زمل
الف مبروك يا ستى
و مستنيين قص الشريط
تحياتى ليكى يا عزيزتى

رئـــــيسـة حزب الأحلام يقول...

الف مبروك على الشقة الجديدة
ونيجى نقص الشريط ونشرب الحاجة الساقعة
والف تحية لكى
ياقمر وكان نفسنا نشوفك فى الحفلة

صيدلانيه طالعه نازله يقول...

كاتب مصرى
"""""""""
الصيدليه فاتحاها من زماااااااااان
و هى دى سبب تسميتى البلوج بالاسم المتعب ده لانها تعبانى معاها
تحياتى
Appy
""""
متخافيش احنا شايلينك للنقاشه انشاء الله
و انشاء الله نشوف بعض قريب و الجايات اكتر من الرايحات
Ahmed_k
"""""""
من بقك لباب السمااااا يااااارب
و ساعتها حأعزمك تفجر الشريط مش تقصه
هههههههههه
ٍSemsem
""""""
ما تشوفيش وحش يا قمرايه انتى و ربنا يبارك فيكى و عقبال ما تفرحى بشقتك يارب و انشاء الله ما اغيبش تانى ابدا
سبهلله
""""""
لا انا جبتها من المرشدى يا حبيبتى و اتقهرت بعدها لانى دفعت كمان 30 جنيه توصيل و عرفت ان كارفور بيوصل ببلاش عاااااااااا
غير معرف
"""""""
يارب فعلا النت نتوصل للشقه لانى وصلت التليفون مخصوص عشان كده
بطوط حبوب
""""""""""
فعلا الحاجه اللى بتيجى بعد تعب بيبقى ليها غلاوه و طعم تااااااااانى خااالص
يالا عقبال شقه العياده و نيجى نركب الطقم عندك يا دوك
فاتيما
"""""""
لا مش مصدقه فاتيما عندنا يعنى لازم اسكن عندكم عشان تيجى تزورينى فى البلوج اظاهر انك عنصريه و مش تحبى الصعايده
انشاء الله اشوفك قريب يا جميله و تشرفينى فى بيتى المتواضع و ياريت تجيبى معاكى شفاط او خلاط و كفايه كده مش عايزه اتقل عليكى
نورتينى
رئيسه حزب الاحلام
""""""""""""""""
تنورينى و ربنا يبارك فيكى و حاجتين ساقعين مش حاجه واحده بس انتى تعالى

دكتور بهــدوء يقول...

بارك الله لك ف الشقه
ويجعلها قدم الخير والسعد
ومش هوصيكي ياختي
العنبر والحنه والشبه عليكي بيهم ف ميه ساقعه
ويباتو طول الليل وترشي اعتاب الاود
اه ياختي العين فلقت الحجر
ودي شقه
ربنا يستر

د/اجدع بنوته يقول...

ربنا يجعلها فتحة خير عليكم يارب

ماشاء الله بقى ف كتير مدونين ف اكتوبر اهو

ربنا يباركلكم فيها يارب

mayada يقول...

نيهااااااااااااااااااا
انت كمان في اكتوبر اللعينه
قري واعترفي فين في اكتوبر
عشان احنا كمان اخدنا شقه في اكتوبر
اعترفي ياصيدلانيه حالا سلمي نفسك
الف مبروك الشقه ياقمر نورتي اكتوبر
ونوفمبر وديسمبر يلا بوسه وسلام ياقمر عشان انت وحشناني خالث

نهر الحب يقول...

اه مبروك عل الشقة الجديدة
ان شاء الله تكون ادم السعد

نهر الحب يقول...

مشكلة حكاية الناس الحرفيين اللى بيستغلوا دى
انا كمان عرضت لموقف مشابه وطلعت عينى مع النجار والحداد
واشتغلت انا سباكة عشان اخلص

همس يقول...

حمدلله على السلامة


والف الف مبروك على الشقه

وان شاء الله تعيشو فيها بخير وسعاده


تحياتى

شفـقــة و إحســــان يقول...

حمد الله على السلامة والف مبروك الشقة الجديدة

صيدلانيه طالعه نازله يقول...

دكتور بهدوء:
"""""""""""
و الله احنا بخرنا بعين العفريت و زر الورد و المستكه علشان العكوسات
خمسه و خميسه
ههههههههه
د/ اجدع بنوته
""""""""""""
و الله احنا نشكر الشقه اللى خلتك تيجى عندنا مش كنتى قلتى كنا فرشنا الارض رز بلبن
الله يبارك فيكى و نورتينى
مياده القمر
"""""""""""
يعنى بقينا جيران فى البلوج و السكن كمان دا انا حظى بمب جدا خالص
مبروك انتى كمان عليكم الشق و تبقى فاتحه خير عليكم
نهر الحب
""""""""
الله يبارك فيكى
و الله الواحد بعد ما شاف العذاب ده قال ياريتنى بقيت سباك و لا نجار يمكن كان بقى الحال احسن
نورتينى
همس
""""""
الهه يسلمك و شكرا على التهنئه
نورتينى
شفقه و احسان
"""""""""""
ربنا يباركلى فيكم و شكرا