السبت، 18 أكتوبر 2008

معاهم و لا عليهم


وحشتووووووووووووووووونى جدا و مش لاقيه حجه ابرر بيها غيابى المره دى
غير المدارس و المذاكره و الحاجات الغلسه دى بس اوعدكم الغياب ده مش حيتكرر
تااااااااااااااااااااااااانى
كل سنه و احنا كلنا طيبين على كل المناسبات اللى فاتتنىو اللى جايه كمان
احتياطى لاحسن اكون مش موجوده ساعتها
اللى استفزنى النهارده و خلانى اجى اكتب بسرعه حكايه غاظتنى جدا من يومين
كنت فى الصيدليه و دخلت ام و معاها بنتين صغيرين و طلبت ببرونه صغيره
علشان البنت اللى فى الحضانه معرفش ليه مع ان عندها سنه و نص
المهم انا جبت واحده حمرا و واحده صفرا راحت هيا سألت البنت تحبى اى واحده
البنت اختارت الحمرا و كانت فعلا حلوه المهم اخدتهاو سكتت و مفيش دقيقه
و لقيتها بتقوللى لا خلاص هاتى الصفرا
ليه يا ستى ؟هيا الحمرا فيها مشكله و لا حاجه ؟ قالتلى لا بس انا مبحبش العيال تمشى
كلامها عليا!!!!!!!!!!!!!!!!!!!!!!!!!!!
مش عارفه اقولكم انا بصيت لها ازاى ساعتها و قلبت وشى و قلت لها و ايه مشكلتك
لو سيبتيها تختار يعنى ده حينقصك ايه ردت و قالت عادى عشان يعرفوا ان مش كل اللى
يطلبوه ياخدوه ده يبقى دلع
رحت انا رديت و اما تبقى طالبه رأيها فى حاجه و بعدين اما تختار تقولى لا ده يبقى
اسمه جنان مش حتخسرى حاجه لو سمعتى رأيها لان ده بيساعد على تكوين شخصيتها
راحت اخدتها و هى متضرره و قالتلى عشان خاطرك انتى بس
و حكتلى انها كانت بتشترى شنطه لبنتها اللى فى الحضانه و البنت اختارت تويتى
و بعد ما اشترتها و روحت نزلت تانى و رجعتها و اشترت واحده وش اسد عارفين
شبه الاسد بتاع شاهد ما شافش حاجه مفيهوش اى رقه و لا طفوله لا ده مرعب
و ده كله بس علشان رأى البنت ميمشيش و بس
دى كانت الحكايه و من ساعتها و انا مستغربه و متضايقه ان الناس دى ربنا سلمها
امانه ناس كتيييييييييييييييييير غيرها مش لاقيييين ضفرها و مع ذلك كل همهم انهم يعقدوا
ولادهم و يحطموا نفسيتهم مع ان حاجه بسيطه زى دى ممكن تفرحهم و تبنى شخصيتهم
صح و تخليهم يقدروا ياخدوا قرارات صح مستقبلا فى حياتهم
امهاااااااااااااات كتير زى الست دى و بجد نفسى يبقى فيه تقييم نفسى للشباب
قبل و بعد الزواج علشان يعرفوا مدى اهليتهم لتربيه الاولاد مستقبلا علشان
متجيش ام تعمل فى ولادها اللى انا حكيته من شويه
و الله بعد ما مشيت فضلت اقول ربنا يشفى و يرحم من كتر غيظى و فرستى
ياريت تريحونى و تقولوا لى انا غلطانه و لا ايه؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!!!

هناك 8 تعليقات:

Appy يقول...

والله والله
دى ست هايله يا شيخه بجد استغفر الله العظيم هى بتعند مع نفسها
هى لما تكون شخصيه البنت وتخليها تحب اللى عاوزاه يبقى بتمشى كلامها عليها
غير كده هى خيرة البنت بين اتين مش سابتها لوحدها يعنى ده كويس
ربنا يشفى بجد
وحشتينى خالص

صيدلانيه طالعه نازله يقول...

ازيك يا ابى نورتينى
امال انا اللى حصل الموقف قدامى كنت حتشل من الغيظ و مسكت نفسى و بقى نازل عليا بالضحك احسن ما اطق
فعلا الدنيا مليانه بلاوى

mayada يقول...

اهلا يادكتوره حمداللهعلي السلامه
الناس دي دماغها تحت ورجليها فوق
والله انا اعرف ناس تتمني ضوفر عيل
حتي لويطلع عينهم
يدي الحلق صحيح

blue-wave يقول...

اولا حمدالله على السلامه
وحشتينا ماتغيبيش تانى كدا
ثانيا دا عادى جدا
مفيش بنت تمشى كلامها على امها
صعايدة بقى:))
اة بجد انتى منين فى اسيوط؟؟؟

البحث عن أنا شىء جنونى يقول...

اولا جميل اوى الموضوع وبشكرك عليه بشدة

للاسف فى مجتمعنا الشرقى معتقدات غريبة وافكار اغرب عن التربية اللى للاسف بتتناقض حتى مع المفاهيم الادمية

للاسف المفاهيم دى بتربى شخصيات معقدة للغايه وغير مكتملة الشخصية

مع انها حاجات صغيرة جدا فى زى حرية الاختيار
احنا ممكن نوضح للاطفال الاختيارات وليه دى وليه بلاش دى

حاجات تافهه بس مهمه اوى :)

السنين الاولى من حياة الطفل هى المكون الاساسى لشخصيته اما يكون او لا يكون

ربنا يوفقك .. موضوعك جميل اوى

لك منى كامل احترامى

من بعيد .. بكتبلك

ahmed_k يقول...

أولا حمدالله علي السلامه
وايه أخبار الصيدليه الجديده
في أكتوبر تمام بس مبقيتيش طالعه نازله

وبالنسبه للست ربنا يهديها على بناتها
اللي هما نعمه من ربها ليها
ولو كانت مخلفتش كانت حتشرب المر علشان ربنا يكرمها بيهم
وبالتاكيد كانت هي في طفولتها بتعامل
بهذا الشكل من ابويها
فإستقر داخلها أن هذا هو الإسلوب الأمثل في التربيه

ومتغبيش عننا تاني
سلاااااااااااااااااااااام

صيدلانيه طالعه نازله يقول...

مياده:موضوع دماغها تحت ده معتمد على ان يكون فيه دماغ اصلا مش فرده جزمه
و للاسف بيربوا ولادهم على القهر و الانكسار
نورتينى يا قمر
=================================
blue wave:و الله تقريبا الصعايده دلوقتى بقوا متفتحين و مثقفين الست دى من القله القليله المندسه وسط الجماهير
انا من الاسيوط المحطه مش البلد
هههههههههههههههه
شرفتنى
==================================
البحث عن انا شيىء جنونى:انا حسيت انها سابتها تختار بس عشان تجبلها عكس اختيارها مش اكتر
و ده خلانى اصريت ان البنت تاخد الحاجه اللى اختارتها
فعلا عقليات مريضه و للاسف بتهدم مش بتبنى
اول مره عندى و ياريت تتكرر
و المره الجايه تكتبى من قريب
===================================
Ahmad-k:اولا شكرا على الاهتمام
ثانيا انا مازلت فى اسيوط زى ما انا بس بروح اكتوبر فسحه فى الاجازات
اما بالنسبه لموضوعنا انا متفقه معاك انهم ناس مش مقدره النهعمه اللى معاها
و فعلا اكيد دى ترسبات الطفوله
و انا لسه طالعه نازله على فكره
هههههههههههههههه
نورتنى

Foxology يقول...

اولا حمد الله ع السلامة يا دكتور

ثانيا المشكلة فعلا ف ان الأب او الأم كل اللى يهمهم ان كلامه يمشى حتى لو كان غلط !

مفيش حاجة اسمها بناء الشخصية ولو قلتى كدة يترد >> دول عيال يفهمو ايه ؟

المشكلة كبيرة وهى انعدام ثقافة التربية .. التربية مفهومها عند الناس هى ان كلام الكبار يمشى لأنهم ادرى بالمصلحة ! بدون اى اعتبارات تانية

يلا ربنا يرحمنا من الغباء والأغبياء

تحياتى :)