الأربعاء، 11 مارس، 2009

ما كان من الاول


تخيلوا كده معايا الاهرام من غير سلامه احمد سلامه,طب تخيلوها كده من غير فهمى هويدى
اعتقد ان كلنا متفقين على رأى واحد انها خلاص مبقاش ليها لازمه بس علشان اكون مش باكدب
انا بقى لازمانى !!!! ليه بقى ؟؟؟؟؟عشان بالف بيها فى الصيدليه ,بحطحها ساعات على الترابيزه
ساعه الغدا غير كده و الله و لا تسوى
الاهرام بادارته الفذه المستفزه فضل يفكر ازاى ينكد على الصحفيين اللامعين اللى عنده
قال ايه ممنوع الصحفى يكتب او يشتغل غير فى الاهرام بس و ممنوع فضائيات او جرايد مستقله
يعنى الصحفى يكتب مقاله و بعدين يربع ايديه و ينام على الديسك و ميعملش دوشه
طبعا ده كان سببه ان معظم الجرايد المستقله بقت بتوزع بارقام قياسيه اذا ما قارناها بالاهرام
طب مش هما هما الصحفيين اللى بيكتبوا هنا و هناك يبقى المشكله فين؟؟؟؟؟؟؟؟؟؟؟فييييييين بقى؟؟؟؟
طبعا الصحفيين ثاروا و اعترضوا و على اثر هذه الاحداث تقدم الاستاذ سلامه احمد سلامه
باستقالته لا و ايه كمان رفضوا نشر مقال وداعه للقراء و كانه ضيف عابر و مشى
انا اعرف ناس كانت بتشترى الاهرام فى الايام اللى بيكتب فيها سلامه و هويدى بس
طبعا الاداره سخنت و قالت لاااااااااااااا احنا محدش يلوى دراعنا و اللى مش عاجبه يستقيل
او يخبط دماغه فى الحيط و توقعوا ان الموضوع يهدا و يتلم و الصحفيين يخافوا على الخييييييييييير
الكتييييييييييير اللى بيجيلهم من الاهرام لكن شيىء من ذلك لم يحدث
و يظهر حدثت مشاورات تانيه و جهات سياديه تدخلت زى كل اضراب حصل الفتره اللى فاتت
و رجعوا امبارح يقولوا يا جماعه انتوا فهمتونا غلط و دايما ظالميننا و طلع اسامه سرايا فى العاشره
مساءا يقول لمنى مهو الصحفيين اللى زيكوا اللى ملوا الفضائيات هما اللى بيسخنوا المواضيع
و كأن ما يظهر على الشاشات هو احتفال الصحفيين بعيد الرياضه و الخناقات دى تسخين عشان
المباريات مش اكتر و قالها احنا اخدنا قرار ان اللى عايز يشتغل بره يقدم اجازه بدون مرتب و خلاص
فيها حاجه دى؟؟؟؟؟؟؟؟؟؟؟؟؟؟؟؟؟؟؟؟؟؟؟؟!!!!!!!!!!!!!!!!
المصيبه ان منى الشاذلى استضافت واحد اسمه ابو الهول و بتقوله انتوا مش حاسيين
ان مبيعات الاهرام انخفضت انخفاض ملحوظ رد عليها لافض فوه ان كل الجرايد و المطبوعات
مبيعاتهم قلت عشان الازمه الماليه العالميه ضحكت و قالتله بس مفيش جريده منهم وراها 130 سنه
صحافه راح ساكت و غلوش على الكلام
طيب مادام هما قراراتهم غلط و مش صح ليه مش بيجتمعوا مع المعترضين من اول يوم ليه
سابوهم لغايه مفضحوهم و طلعولهم تجاوزاتهم و نشروا غسيلهم الوسخ كله
طب ما كااااااااان من الاول

هناك 12 تعليقًا:

well يقول...

السبب يا صيدلانية ..ان اللى زى اسامه سرايا ..وابو الهول..اتعينوا بالوسطة...مش بالتقدير ..وهو ده اللى مخلينا ورا ....

Anonymous يقول...

اؤاكد ان الامور هتكون فيها حل وتتظبط بس بعد خراب مالطه واوعد هتتكون لجان حل للمشاكل وازمات بعد خرابها
ان شاء الله
للاسف ياريتهم خصخصوها
وعجبى

الضاحكون يقول...

من الطبيعى ان يسكت ابو الهول بعد رد منى الشاذلى عليه
ياستى ده ساكت بقاله كذا الف سنه وخد حقن فى لسانه علشان ينطق الكلمتين دول ورجع تانى يحرس الاهرامات
تحياتنا لكى

عبده الرايق

mayada يقول...

ازيك ياقمر المسلماني لسه امبارح
كان بيتكلم عن الموضوع ده
وحق الصحفي انه يعد او يقدم برامج او يكتب مقالات هو حر
وقالك انهم بيطفشوا الصحافين عشان في تيار عاوز يخصخص
الاهرام واكد انه ده اكده مرسي عطا الله
لانهم لما قدموا شكوه في الرئاسه الرئاسه رجعت بعتتها لمرسي عطا الله يعني الحكومه بتقولهم اخبطوا دماغكم في الحيط
حاجه تقرف

أنا حر يقول...

المشكلة كلها تتلخص في كلمتين الخطوط الحمراء
الاهرام والجرايد الحكومية في الاساس هي جرايد شعبية بمعنى ان اللي بيتصرف عليهم بيتاخد من ضرايبنا ومن فلوسنا علشان كده المفروض يكونوا صوتنا احنا لكن العكس هو اللي حاصل وبقت جرايد الحكومة وزي ما الحكومة بتقوم بطرد اي حد معار ليها في الحزب الوطني كمان بتقوم بطرد اي حد في الجرايد الحكومية من اللي بيهاجموا الحكومة في الجرايد المستقلة الجرايد الحقيقية
اعتقد ان مشكلة الاهرام زيها زي مشكلة مصر كلها كثير من الفساد كثير من الغباء قليل من مصر ومن الاهرام ايضا
تحياتي

عاشقه وغلبانه يقول...

هو في ايه ...؟؟؟
موضوع الاهرام ظاهر اوي اليومين دول
في التليفزيون
في النت
في المدونات
الناس قايمه اوي علي الراجل ده
وانا بما اني عمري في حياتي ماشتريت جرنال غير مجله الاهلي والازياء والموضه فمش عارفه انتوا عايزين ايه ياصيدلانيه ياختي

بس اللي سمعته ان الوكاله سرحت عماله كتير اوي غير اللي استقالوا

واللي لمحته في برنامج الطبعه الاولي بيقول للراجل استقيل
هو في حد بيستقيل اليومين دول
ده حلم ياجدعان
ههههههههههههههههههه

Appy يقول...

بكره الاهرام والاخبار والجمهوريه والدستور وكل الجرايد كلهم مصالح شخصيه مفيش صحافه محترمه لسه

مواطن مصري يقول...

هوا لسة حد بيقراء الاهرام؟؟؟


انا مقاطعها من زمااااننن


و ابيدت ابطل اشتري جرايد عشان الضغط

بس الي بحصل في الاهرام مهزلة مهما كانت دي مؤسسة تاريخية ولابد ان يكون ادارة جيدة ل ادارتها

حاجات جوايا يقول...

الاهرام دى أنا كنت بتابعها زمااان كل يوم جمعة بس عشان الاستاذ الراحل عبد الوهاب مطاوع الله يرحمه وبريد الجمعه

من بعده خلاص
محاولتش حتى اشوف الجديد فيها

بس كتر خيرهم والله انهم لسه شغاليين عشان بس الورق بينفع فى حاجات كتير ههههههههه

سلام يا جميل
سالى

بسنت يقول...

احنا فى البيت لسه بردوا بنجيب الاهرام لانه بينفعنا فى لف الحاجات بردوا
هههههه
بس تعرفى يوم الاربعاء مقال جمال الشاعر
متبعاه وسعات شريف الشوباشى
ولكن فهمى هويدى بحبه اكتر فى الدستور بيتكلم احسن كتير
سلامه احمد سلامه دى من العملاقه وكلامه على مقداره فعلا
بس معروف ان الاهرام جريده حكوميه يعنى هتتوقعى منها ايه مثلا
لازم يكون للحكومه مناصرين زى الاهرام ولاخبار والجمهوريه
والكاتب الحر لا تسلط عليه فطبيعى مكانه الجريده المستقله
المصرى اليوم جريده فعلا تستحق المتابعه
خليكى معاها احسن
---------------------
انتى من اسيوط لو كان كدا
فى مؤتمر للصيادله عن الادويه المخدره فى كليه الصيدله يوم 18-3
يعنى الارعاء القادم لو هتحضريه ان شاء الله كدا ممكن نتقابل لانى هحضرته مع فوج محافظه المنيا
دمتى بخير

همس الاحباب يقول...

الاهرام بقت زى ابو الهول خرساء
بقت اعلانات ووفيات ودمتم
فاضل فاروق جويدة كماااااان
ويبقى الله يرحم الاهرام وكل الجرائد القومية
تحياتى

صيدلانيه طالعه نازله يقول...

well:اللى بيحصل ده بيفكرنى باللى حصل فى روز اليوسف بعد ما سابها عادل حموده استلمها شويه من الارزقيه اللى جابوها الارض و اتحولت من مجله معارضه الى مجله تحيا الحكومه
================================
غير معرف:و مين اللى حيشترى جرنان خربان مرتجعاته اكتر من مبيعاته
================================
الضاحكون:حلوه حكايه واخد حقن فى لسانه دى عشان يتكلم
متعرفش بتتجاب منين و اسمها ايه عشان اجيبها فى الصيدليه عندى
==============================
mayada:اعتقد ان الصحفيين اللى بيشتغلوا فى الفضائيات هما الناس الناجحه اللى اثبتت كفاءه عشان كده حبوا ينكدوا عليهم شويه و الناس دى لو تكاتفت و استقالت هما الكسبانين و الله لانهم حيتخطفوا خطف للمؤسسات الصحفيه الاخرى
================================
انا حر:انت كلامك صح و الدليل اللى حصل مع هويدى انهم فضلوا يمنعوا مقالاته
و بعدين بعتوا له رساله ان مده تعاقده خلصت و انهم مش حيجددوا و حيتعاملوا معاه بالقطعه
و طبعا الطريقه بوقاحتها خليته يقدم استقالته و الله هو الكسبان
===================================
عاشقه و غلبانه:طب و الله انتى عسل ياشيخه بلا اهرام بلا وجع دماغ
المهم انتى تبقى كويسه
و على فكره الاهلى برضه الجرنان بتاعه بقى اى كلام من بعد ما الاهلى بدأ مستواه يقل
=================================
Appy:للاسف معظم المعارضه فى مصر بتبقى نابعه من اختلافات شخصيه او تعارض مصالح اللهم الا قله قليله هما اللى بيهمهم مصلحه البلد
===================================
مواطن مصرى:و الله من غير جرايد اللى بيحصل فى البلد يجيب الف ضغط فوق الضغط بس لازم يبقى فيه تدخل سريع من ناس محبه و عايزه مصلحه الاهرام فعلا
===================================
حاجات جوايا:و مين قال ان الاهرام فيها جديد لاجديد يا حبيبتى و لا قديم هما بس بقوا بيقولوا بالروح بالدم نفديك يا زعيم بس بطريقه مفضوحه شويه
==============================
بسنتك انا بتابع الفجر و الدستور و صوت الامه و حاليا الشروق
و على فكره فهمى هويدى ساب الاهرام بقاله 44 شهور تقريبا و بقى فى الشروق و سلامه احمد سلامه برضه سابها مع القرارات الاخيره و استقر فى الشروق

بالنسبه للمؤتمر غالبا مش جايه بس لو جد جديد ابعتيلى النمره على الميل و ابقى ارن عليكى
olamohammedeg76@yahoo.com
=============================
همس الاحباب:اه و الله صح كل ما اقول لجوزى بلاش الاهرام يقوللى عشان اخبار الوفيات و الله و انا بقول عشان لف الالويز فى الصيدليه
هههههههههههههههههههههه
و انا برضه بشكر الاهرام اللى خلت ناس جديده كتير تيجى تنورنى لاول مره
================================