الأحد، 3 مايو، 2009

حد فاهم حاجه


يا جماعه لو سمحتوا انا عايزه استفسر عن حاجه عاملالى قلق جامد اليومين دول
طبعا كلنا متابعين موضوع انفلونزا الخنازير و تداعياته السريعه المتواليه بس انا اللى قلقنى
هو الاستنفار الشديد و القاسى اللى موجود عندنا فى مصر اليومين دول يعنى قرار سريع بذبح كل الخنازير
و توفير جرعات زياده من دوا تاميفلو و زياده انتاج الماسكات و مصنع القوات المسلحه اللى جاهز
لانتاج ملايين الجرعات من الدوا و حرق الزباله اللى شغال فى كل الجمهوريه اللى خلتنا نتحرم من
ريحه الزباله اللى اتعودنا عليها و بقت صاحبتنا كل ده بيحصل مع ان لغايه دلوقتى مفيش حالات فى مصر
بالمنظر ده انا بدأت اشك ان فيه حالات عندنا و مخبيين علينا عشان منقلقش و اللى زود قلقى
امبارح كان فيه اعلان عن الوقايه من الانفلونزا بكل انواعها فى التلفزيون
يا جماعه احنا مش متعودين على كده و الاهتمام الزياده ده بيأثر فينا بالسلب مش بالايجاب
تانى حاجه ضايقتنى ان موضوع الخنازير بقى مسبب حاله كده شبب التهمه و الفتنه الطائفيه
و تلاقى المسيحيين عمالين يحلفوا انهم مش معترضين على ذبحها و انهم مش بياكلوها و انها مش مقدسه و لا حاجه
و المسلمين محسسينهم انهم السبب فى الكارثه فى العالم كله
الموضوع اكبر من كده بكتير يا جماعه لانها كارثه لو وصلت لنا ده اذا ما كانتش وصلت فعلا
مش حتفرق بين مسلم و مسيحى و الكل امام المرض سواء و معرض للخطر
ياريت فعلا الموضوع ده ميبقاش مقدمه لفتنه احنا حاليا فى غنى خااااااااالص عنها
و فتكم بعافيه بقى

هناك 22 تعليقًا:

يوميات شاب منوفى يقول...

ياستى سيبى الحكومة تعمب حاجة واحدة صح فى حيايتها ربنا يستر الموضوع بجد خطير مصر مش ناقصة وخصوصا ان اى مرض بيحب مصر وبيستوطن فيها زى انفلونزا الطيور ياريت تقبلى مرورى ونتبادل الزيارات

ويكا يقول...

بصى يا دكتره
ما اظنش ان فى حالات حصلت عندنا لغاية دلوقتى ان شاء الله ، وأسأل الله انه يعافينا ، وده لان مش من مصلحة اى بلد انها تخبى ابداً فى الوقت الحالى حاجه زى دى.
لكن اظن ، والله اعلم ان الجراءات المبالغ فيها دى تنم عن احساس او يمكن قناعه داخليه لدى الحكومه المبجله بضعف امكانياتها وقدراتها على ادارة الازمات. فبالتالى مشوا على مبدأ الوقايه خير من العلاج وحتى لو كانت الوقاية دى عشوائيه او مبالغ فيها.
عارفه زى ما يكون مثلاً عندك كتيبه من العساكر المهره جداً بس للاسف فيهم واحد خاين بينقل الاخبار للعدو . فتقومى تقررى باعدامهم جميعاً لانه اكيد هيبقى مات معاهم لانه منهم . (ترييح دماغ يعنى) بدل ما لسه نقعد نفكر ونحقق ونوجع دماغنا ويمكن يضحك علينا وما نعرفوش.
كده يعنى
خيبييييييييييييييييييبه.

واقعدى بالعافيه
صديق جديد اتمنى ان تتقبليه

ويكا

MaNoOoSh يقول...

اممممممممممممممممم
انا كمان بدات اشك ان فى حاجة مدكنين عليها ومبيقولوش
ربنا يستر علينا بقى فى البلد دى
تحياتى يا قمر

blue-wave يقول...

دى مجرد اجراءات وقائيه بتتعمل فى العالم كله بأمر من منظمة الصحه العالميه

koketa يقول...

على فكرة يا ابلة علا هى مجرد قرارت من الحكومة لاسكات الشعب بس وفترة بسيطة وهتعدى دا مش اهتمام ولا حاجة دا مجرد غطاء ساتر على نفسك علشان يحموا نفسهم من ثورة الشعب لانهم مش قدها فاطمنى كل شئ هيرجع لمجاريه وهنرجع للزبالة تانى عن قريب هى هوووجة زى ايام انفلونزا الطيور وهتهدا بعد كدا

MǿиY El-Shreef يقول...

يابنتي خليهم يهتموا شويه هي مش طالبه اكتر من شويه اهتمام

مش احسن مايطنشوا

وبعدين المخلوقات دي لازم تتعدم بجد دي حجات مقرفه مش فاهمه ليه الخناق ده كله والازمه ليه

ربنا يستر وباذن الله مايكونش في حالات ف مصر

عبد من عباد الله يقول...

ههههههههههههه يسلام على جمال الشعب المصري !!!
يعني يهتموا بجد و يشتغلوا صح نقول لأ احنا مش متعودين على كده دي حاجه تقلق ( زي الست اللي اول ما تشوف جوزها بقى كويس تشك فيه هههههه)

و بعدين انا معاكي في موضوع الفتنه ده و المشكله اساساً في تسميه بالمرض بأنفلونزا الخنازير لكن هى في الحقيقه ارطبتها بالخنازير مش كبير ولا حاجه ده فيروس جديد مكون من انفلونزا الخنازير و الطيور و البشري و ظهر في البشر و المشكله دلوقتي انه بينتقل من بشر لأخر لكن علاقه بالخنزير مش كبيره ولا حاجه ده هو بيصيب الانسان علطول حتى لو بعيد عن الخنزير اساساً ... و الله علم

ادينا بنحاول نعمل اللي علينا و نقول يا رب ... و الله المستعان

المعلم محمد صاحب المطعم - طعمية سخنة يقول...

سلامو عليكم
بصي بسرعة كده شوفي القاهرة اليوم
هتلاقيه جايب منظر الخنازير و منظر اللي بيتعاملوا معاها

و الاخوة المسيحين بعضهم مصر علي اساس انها صنعته و بيقولك ييجي يكشفوا لما يلاقوا حاجة يدبحوا !!!!!!!!

طيب مهو لو لاقوا حاجة هتبقي كارثة ده وباء و بينتشر بالناموووووووووووووس

يعني ناموسة تيجي مع الخنزير تنقله لأي بني ادم

كمان الكشف علي الخنزير الواحد 200 جنيه يوميا و علي راي عمرو لما نلاحق البني ادمين الاول !

و بعدين سيبي الحكومة تحرق اهي تشتغل شوية بقالها ربع قرن مريحة !

عاشقه وغلبانه يقول...

سيبيهم يتحركوا

الموضوع بجد كبيييييييييير ولو وصل مصر هاياخد في وشه كتير ولا الكوليرا

مسيحي ايه ومسلم دلوقتي المرض مابيفرقش

اعتقد مافيش حالات اصابه بس لو المرض وصل مصر مش هانعرف نواجه خاااااااااااااااااااااالص

نعكشة يقول...

بما اني دايماً مفيدة
فانا معنديش معلومات صراحة عن الموضوع

غير إن انهاردة و لأول مرة في حياتي تحصل
إن الممرضة تقف على باب مدرج الاطفال اللي بناخد فيه المحاضرات
و تحطيلنا على ايدنا انتي سيبتك

سألتها دة ليه يعني
قالتلي عشان انفلونزا الخنازير
بصيتلها كدة و البلاهة في عيني ( المفروض إني طالبة في كلية طب يعني)
هوه إيه علاقة الايدين بالمرض لو سمحتي
قالتلي : ماهو اللي بيعطس بيغطي فمه بإيده و بالتالي الايد مصدر العدوى

منكم نستفيد برضو و حطيتلي المطهر و مشيت

أول مرة حد يحطلي مطهر و امشي

كان ريحته حلوة :D

سلام عليكِ

د. ياسر عمر عبد الفتاح يقول...

إن شاء الله مش هيبقي فيه حالات
دي من المرات القليلة جداً إللي الحكومة بتاعتنا بتعمل الصح .. وبسرعة
يمكن نكون أخدنا علي السلبية
فالقرارت الإيجابية بتعملنا حساسية

وبعدين هوه التاميفلو هيعنل إيه يعني
ولا أي حاجة

لو أنفلونزا الخنازير دخلت مصر
هتجيب ضلفها

شاب كــ طخين ـــــا يقول...

السلام عليكم
الحكومه قايمه بحمله انا شايفها جامده اوى ومناسبه مش مبالغ فيها خالص
وربنا يبعد عنناالكابوس ده

عاشقه الرومانسيه يقول...

بصى بقى ياستى
لو على قولك ان فيه حالات ومخبيين علينا فاحب ابشرك بحاجه كل المصريين عارفينها
ان مفيش شئ بيتدارى فى البلد دى
اما بالنسبه للاهتمام فدى خطوه اجابيه كويسه لصالحنا
يعنى نستنى لما الكارثه تحصل وبعدين نتحرك؟
اه انا معاكى اننا مش واخدين على كده
بس فيها ايه لما ناخد ونتعود
ونتعامل كبنى ادمين

اما عن الفتنه فهى موجوده ومستنيه بس اللى يشعللها ياحبيبتى
احنا مش هنكدب على روحنا
ولا ايه رأيك؟

ahmed_k يقول...

نسأل الله العفو والعافيه
وأن يحفظ مصرنا وشعبها من الوباء والأمراض
وفعلا إستنفار الحكومه أمر طيب ومحمود ولأول مره يتم التحرك قبل وقوع البلاء
فلعله خير بإذن الله
والأمر مفيهوش فتنه ولا شيئ هو مجرد معارضه من أصحاب مزارع تربية الخنازير لأن قتلها سيؤدي بهم لخساره ماديه ليس أكثر من ذلك وفيهم مسلمين للأسف الشديد فهم غرضهم مصلحتهم فقط

والحمد لله فعلا لسه موصلناش المرض اللعين ده وأرجو من الله أن لا يصل لنا

وتقبلي خالص تحياتي

انحلت سيور العربه وسقط المهر من الاعياء يقول...

عندك حق يا دكتوره احنا احسن شعب يدخل الطائفيه فى اى حوار حتى البقال المسيحى مبيشتريش منه الا المسيحى ربنا يخلى الوهابيون خلوا الكلب انضف من المسيحى او على اقل تقدير الاتنين نجسه ومفيش اعتراف بقيمة الانسان وبيشوى ف الفيوم بيقول المسيحى ميتبرعش بالدم للمسلم لان المسيحى دمه مقدس والمسلم هينشوى ف النار فمينفعش الدم المسيحى المقدس يمشى جواه

الله عليك يا مصر

بس بجد موضوع شغال انفلونز الخنازير هتطحن الكل واحنا فاضين لا عطاء الموضوع بعد اخر

Appy يقول...

الحكومه متنفعش تخبى يا حبيبتى ومتنفعش تسكت
الجبلى حتى قايل مش عاوز تواجد الناس فى الاماكن الزحمه ويصلوا الجمعه فى الخلاء يعنى اماكن مفتوحه دى مصيبه مينفعش حد يسكت عليها

صيدلانيه طالعه نازله يقول...

يوميات شاب منوفى:ماشى يا عم انا اللى ظالماهم بس لا قدر الله لو الفيروس وصل ياريت نتقابل هنا و نناقش الوضع بقى ازاى و ايه اللى حصل
نورتنى يا منوفى
================================
ويكا:انا اتفق معاك ان الحكومه بتعلن عن الاجراءات عشان تورى الناس شافين احنا بنعمل عشانكم ايه و انتم متستاهلوش
==================================
Manoosh:اخيرا لقيت حد معايا و مؤيدنى
و ياريت تبقى شكوكنا فى محلها محدش يكره
==================================
blue-wave:ياريت يطلع كده فعلا بس الموضوع عندنا واخد شكل استعراضى قوى
==================================
koketa:فعلا زى ما بيقولواالغربال الجديد له شده و زى ايام انفلونزا الطيور الدبح و التنظيف اتمنعوا و دلوقتى كل حاجه رجعت عاااااااااادى خالص
=================================
mony el shreef:ربنا يستر و يكون الكلام مجرد اهتمام و بس و كويس ان الموضوع ده جه عشان نخلص من الزباله و الخنازير فى شوطه واحده
===================================

hamada يقول...

جروب جريدة الصباح العربي بيت المدونين العرب
http://www.facebook.com/group.php?gid=78080770039

صيدلانيه طالعه نازله يقول...

عبد من عباد الله:اما يبقى الشعب متعود على الاهمال و يصحى من النوم يلاقى اهتمام و بالزياده كمان يبقى من حقه يتخض طبعا و لا انت رأيك ايه؟؟؟
===================================
المعلم محمد صاحب المطعم :الموضوع مش تبع المسيحين بس فى موضوع اتنشر فى الفجر ان من اكبر مربى الخنازير فى مصر مسلمين و مزارعهم من اكبر المزارع و طبعا هما خايفيين على تجارتهم زيهم زى اى تاجر لحاجه تانيه و من حقهم انهم يتعوضوا عن خسائرهم و الا حينضموا لقائمه البطاله الطويله فى مصر
===================================
عاشقه و غلبانه:فعلا المرض و الموت ساعه ما حايجى مش حيفرق و ياريت الحكومه تتحرك فى الاتجاه الصحيح و تهتم اكتر بالوافدين من خارج مصر لانهم الخطر الحقيقى
=================================
نعكشه:طب و الله انتى عسل يا نعكوشتى و جالك عين و قلب تسألى الممرضه ايه فايده الانتىسيبتك حرام عليكى يا دكتوره المستقبل
ههههههههههههههههههههه
بس اهم حاجه ان ريحته حلوه و عجبتك
هههههههههههههه
===================================
د.ياسر عمر عبد الفتاح:ربنا يسمع منك يا دوك و يبعد عنا الزفت ده لاننا اصلا عاداتنا الصحيه سيئه و لو المرض وصلنا مش حيرحمنا
===================================
امبارح كان عمرى عشرين:على العموم ربنا معاهم و يسترها معاهم و معانا
================================
عاشقه الرومانسيه:للاسف احنا فى بلد الناس فيها هيا اللى بتدور على الفتنه عشان تزيدها يعنى فى مجلس الشعب اما نائبه مسيحيه تقول 10000 زبال فى مصر حيتحولوا لقنبله موقوته بسبب زبح الخنازير يقوم يرد نائب مسلم يقولها لو بعتوا 10000 احنا حنرد بمليون بقينا احنا و انتوا و للاسف المفروض ان ده تفكير عليه القوم و ماسكى زمام الامور فى بلدنا
================================
Ahmed-k:للاسف كله بيدور على مصلحته و ناسى خطوره المرض و انه لو وصل لينا مش حيسبنا الا و احنا مدمرين
===================================
انحلت سيور العربه:ربنا يبعد عنا شر الفتن ما ظهر منها و ما بطن
امين يارب العالمين
================================
Appy:تخيلى ان كل اللى فات كوم و موضوع الصلاه فى الخلاء حاساه انه بدايه الحلول الواقعيه فعلا و ربنا يوفقهم انشاء الله
==================================

الجواز و سنينه يقول...

اهه ده شغل الدكتره فعلا
فيه كلام سمعته ان الشركه اللى بتنتج تاميفلو هى السبب فى انتشار المرض لانها كانت اوشكت على الافلاس بس الوضوع ده نجدها من الافلاس
الناس ى ممكن تعمل اى حاجه علشان الفلوس
ربنا يسترها علينا يارب لحسن الدنيا مش ناقصه وجع قلب اكتر من كده

فاتيما يقول...

والله يا صوصو مخاوفك دى ف محله
خصوصا إننا معندناش أى شفافية خاااااالص فى المواقف اللى زى دى
و ربنا يستر بجد
كل الحب ليكى

همس الاحباب يقول...

عندك حق
كل شىء جايز
واحنا اتعودنا من حكوماتنا الهمامة التحرك بعد خراب مالطة
ربنا يستر
والموضوع ما يبقاش زى انفلونزا الطيور واللاميالاة اللى اتعملت لحد الموضوع ما اصبح كارثة
تحياتى وتقديرى