الثلاثاء، 21 يوليو 2009

1000 مبروك من قلبى فعلا

" ان تكون الغائب الحاضر خير من ان تكون الحاضر الغائب"


بهذه الكلمات الجميله اختتم احمد حلمى فيلمه الجديد 1000 مبروك الذى يعتبر امتداد


لافلامه التى تمزج الكوميديا مع الدراما و التى تجعل المتفرج ليس مجرد متلقى


لشويه زغزغه تضحكه و يمشى و هو مش فاكر الفيلم كان فيه ايه


الفيلم مقتبس من الفيلم الجميل جداground hog day و جرى تمصير الفكره


باسلوب رائع و جميل فعلا


الفيلم بيدور حول احمد الذى يعمل فى البورصه و الذى يستعد لزفافه فى اليوم التالى


و يتعرض لحلم اثناء نومه ينتهى بموته فى حادث سياره و يصحى من نومه


ليجد الحلم يتحقق امامه و يحاول ان يغير من الاحداث حتى يتجنب النهايه المفزعه


و لكنه يفاجأ انه داخل حلم لا ينتهى و يتكرر يوميا


فيحاول ان يغير واقعه حتلى يتجنب الاشياء السلبيه ليكتشف اثناء حلمه


سلبياته التى لم يكن يراها من قبل من انانيه و حب للذات و سلبيه جعلت اهله


لا يشركونه معهم فى مشاكلهم و لا مشاعرهم و لا اسرارهم و جعلت اخته تخاف منه


و لا تحبه و تخفى عنه مجرد انها فتحت الكمبيوتر بتاعه و استخدمت النت


و انها تحب صديقه المقرب


يستيقظ احمد فى النهايه و يبدأ تغيير الواقع الحقيقى و الاقتراب من اهله


و لمس مشاعرهم و الاعتذار بشكل ايجابى عن اخطاء الماضى


ظهر ده بوضوح فى مشهده مع اخته اثاء مشاهدته لفستانها الجديد


كانت مشاعره جميله و رقيقه و حنونه مع اندهاش اخته الشديد منه و لكن


مع حنانه الواضح بدأت تتكلم معاه و تسأله ايه رأيك فى المكياج


بل تمادت و اعترفت له بحبها اللتى كانت تخفيه عنه


نهايه الفيلم كانت مأساويه صحيح و لكن كانت توضيحيه لمدى تغيير البطل و ان كان


مبالغ فيها


الفيلم فعلا جميل و احمد حلمى عمل شغل حلو فيه فعلا و يحسب له انه استعان بوجوه جديده


كثيره فى الفيلم ان لم يكن كلهم لانى فعلا معرفش اسم و لا حد منهم


جميل قوى ان الانسان تجيله فرصه انه يغير من نفسه للاحسن حتى لو فى اخر لحظه


بس الوحش انه ميمسكش الفرصه دى و يسيبها تهرب منه لان الحياه فعلا قصيره


و جميل قوى ان الانسان يسيب ذكرى حلوه ليه و هو غايب عن انه يكون موجود بس


مالوش اى اثر ايجابى


1000000 مبروك يا حلمى مش 1000 بس

هناك 26 تعليقًا:

norahaty يقول...

الحقيقة انا ما شفتش
لا الفيلم العربى ولا الاجنبى
لكن بسأل مش دى نفس فكرة المسلسل
(بردون برضه مش فاكرة اسمه)بطولة
نور الشريف(مختار العزيزى)ومرفت
امين لما بيفقد الذاكرة وبيرجع
يشوف اد ايه هو كان سىء
للغاية فى تصرفاته وبيحاول
يصلح من التصرفات دى؟

Ashraf يقول...

الحمد لله
اول تعليق
الفيلم رائع
حتى لو كانت الفكره مش جديده
وهذا ان دل فيدل على تفوق احمد حلمى
ادعو الى التقدم للامام بنفس الخطى والاسلوب المحترم

عاشقه الرومانسيه يقول...

شوقتينى اشوف الفيلم
خلاص
هاحطه فى الخطه الخمسيه الجايه
ههههههههههههههه

hasona يقول...

السلام عليكم


ألف مليون مبروك

والف واحد لحلمي

هو فعلا أصبح مختلف من فترة في اختيار أفلامه

وغير من فكر وطريقة أداؤه

وطبعا لأني لم اشاهد الفيلم فلن أتكلم عنه

نعكشة يقول...

مكملتش قراية عشان مش عايزة احرق الفيلم

بس انا مش هينفع اشوفه دلوقتي خالص
ععععععععع

عندي امتحانات خلاص قربت :(

هبقى اشوفه إن شاء الله لما اخلص
دة لو كان لسة في السنمات لإني تقريبا هخلص بعد قرن

مشوفتش لا العربي ولا الزنجليعي

بس انا عجبني اسف عالازعاج و كدة رضا

يلا خير


سلام عليكِ

موناليزا يقول...

من اعلاناته عرفت انه مقتبس
بس جميل مشاركتك لينا عن انطباعاتك

احاسيس آيوشه يقول...

من اول ما شفت الاعلان افتكرت الفيلم الاجنبى اغلب الافلام المصرية دلوقتى مقتبسة عن افلام اجنبيةواحمد حلمى دا مش اول فيلم مقتبس ليه حتى فيلم احمد مكى نفس قصة فيلم اجنبى
بس بصرف النظر عن موضوع الاقتباس انا بحب احمد حلمى وبيعجبنى اختيار قصص افلامه

ahmed_k يقول...

الحقيقه أفلام أحمد حلمي غالبا بتكون كوميديه وبها فكره لذيذه
وطريقته في الكوميديا جديده ولا تعتمد على الإسفاف او الكلمات الهابطه ونقدر نقول عليه نوع من مدرسة محمد صبحي في الكوميديا
أنا مشفتش الفيلم لكن متوقع أنه حيكون جميل وفكرته اللي شرحتيها فكره جميله وهادفه لكن ليه غالبا معظم أفلامنا تكون أجنبية الأصل وتم تمصيرها هل العقول والكتاب لدينا أفلسوا ولم يعد في جعبتهم الجديد سوى التوافه ليقدموه ؟؟

مع خالص تحياتي

MǿиY El-Shreef يقول...

الفيلم تحففففففففه اصلا من غير ما اشوفه

مستنيه انزل مصر وان شاء الله هبقى اتفرج عليه

بس احمد حلمي اساسا بجد اي فيلم بيعمله بيبقى مش مجرد فيلم كده والسلام

ياجامد انت ياذوووق ;)

شريكة في المطعم يقول...

السلام عليكم ورحمة الله وبركاته

افلام احمد حلمي حلوة اوي ودايما بتعجبني
والفيلم ده انا شفت الفيلم الأجنبي
بس مش بحب النهايات المأساوية دي
شجعتينا اننا نشوفه

promise is promise يقول...

هو الفيلم نزل اسيوط
ولا ايه

انا مش عديت من قدام السنيما

قوليلى علشان اعرف

ولا انتى خلاص يا دكتوره حرقتى الفيلم بس شجعتينى انى انزله من موقع ماى ايجى

تقبل تحياتى والسلام ختام

سبهللة يقول...

بعد اللى انتى كتبتيه دة
ممكن أفكر أروح الفيلم

momken يقول...

لسه ماشوفتوش بس انتى شوقتينى اشوفه جدا

نشوف ونرجع نحكم


بس طبعا اسف على الازعاج كان جامد جدا والف مبروك لو كان فى نفس لاطار يبقى احمد حلمى اكتشف نفسه

خصوصا انا مكنش بيعجبنى فى احمد حلمى الا مراته الحقيقه


تحياتى

بنوتة مصرية جداجدا يقول...

الله يكرمك
حرقتلنا الفيلم

نيوز فلسطين يقول...

اعـــلان هـــام >>>
للأصحاب المواقع والمنتديات والمدونات الالكترونية الراغبين بالمشاركة بدعم الاعلامى للحملة رمضان الخير
تعلن رابطة شباب فلسطين الخيرية للسادة أصحاب المواقع والمنتديات والمدونات الراغبين بالمشاركة
بالحملة الاعلامية الداعمة للحملة رمضان الخير.
اعلامنا بذلك كى يتم ارسال كود البانر الخاص بالحملة اليهم ووضعه فى مواقعهم اضافة الى وضع مواقعهم فى قائمة الشرف
للاعلامنا يرجى مراسلتنا من خلال البريد الالكتروني
pals-2007@hotmail.com
pale2070@yahoo.com
http://www.rpales.com/play-188.html
معاوسوياً من أجل رسم الابتسامة على شفاه المحاصرين
رابطة شباب فلسطين الخيرية
غزة المحاصرة

mahasen saber يقول...

فعلا احمد حلمى كل مدى بيثبت مدى رقى فنه واليى بيقدمه

وفعلا مبوينسش الانسان فى قبره الا ذكرى حلوه وبصمه ايجابيه يسيبها فى حياته

بحييكى على عرضك الجميل لفكرة الفيلم

dr.lecter يقول...

احلي حاجه ان الفيلم ده ختم الموسم بجد وختامها مسك

عمل لي حاله جميله رغم كم اتلتحفظات اللي قلتها عنه والاخطاء بس في الاخر كيفني

UPENDI يقول...

أول مرة اجى هنا
بس لما بلاقى بلوج صيدلانيه ببرشط علطول D:
لسه برضه ما شفتش الفيلم
بس احمد حلمى جامد فعلا وانا بعز افلامه كلها
ان شاء الله ابقى ازوك يا دكتورة

ABO JOSEF يقول...

صباح الخير أو مساء الخير أختي الدكتورة

أولا أحيي حضرتك علي المدونة الرائعة

ومواضيعك وتعليقاتك الهادفة
.....
هذا الفيلم شاهدت النسختين الإنجليزية والألمانية
ثانيا عندي سؤال بسيط أو ملحوظة...مش لحضرتك ولكنه عمومي
ليه السينما المصرية دائما تعتمد علي إقتباس وتعريب القصص والأفلام الأجنبية علما إنها لا تمثل الواقع العربي والصري خصوصاً

لعلم حضرتك إني لم أشاهد فيلم عربي منذ 20 سنة أو يزيد لأنها تصيبني بالنوم

عفواً لإطالتي ....
وتحياتي لزوجك وعائلتك الكريمة

تقديري وإحترامي

اقصوصه يقول...

انا شفت الفلم الاجبني

المقتبس منه الفلم

فعلا حلو

دايما اخيتار احمد حلمي مميز وجميل

تحياتي

د.أحمد عثمان يقول...

دكتورة
بصراحة انا كنت داخل من عنوان المدونة
بحكم المهنة يعني

لكن فوجئت بالبوست احمد حلمي
عموما انا فعلا بأتابع افلامه
لأنه اتجه اتجاه صح
وافلامه هي ما تبقى من الافلام
الصالحة لمشاهدة الأسرة

تحياتي
الى بوست آخر
و ربنا يعينك على اللي فوق
و اللي تحت

Anonymous يقول...

أنا أول مره أدخل المدونه
أمل

الجواز و سنينه يقول...

الف مبروك على انك شوفتى الف
عقبالى عن قريب ان شاء الله
ليه كتير مش دخلت سينما
و بحس ان كل الافلام اتحرقت مش عارفه ليه
يمكن ادخل فيلم احمد مكى
يا مسهل مين عارف يمكن نروحوا مع بعض

قيس بن الملووووح يقول...

هذه اول زياره لمدونتكم الواعدة وكنت اتمني ان اكون من هواة السينما حتي اعلق
خالص تحياتي

micheal يقول...

عاوزين بوست جديد

د.سيد يقول...

فيه تيمات في الإبداع, ممكن تتكرر, لكن يتم تحميلها بمحتويات جديدة وأفكار مختلفة, وإلا يبقى تقليد, الفيلم الأجنبي جميل لكنه ليس من العلامات أو الروائع, هو تعبير عن الحياة الآلية التي يمارسها الإنسان العصري, حياة بلا روح, بلا تواصل, أخطاء تتكرر, فقدان للرؤية, الفكرة جميلة وفي وقتها, دعوة لإعادة صياغة علاقة الإنسان بنفسه والعالم.
فيلم ألف مبروك فيه حاجة يمكن مختلفة, فيه فكرة الوجود الفارغ أو المفرغ, وجود بلا إرادة, بلا قرار, بلا مشاركة, بلا فاعلية, حياة ماسخة لأنها لا تصنع شيئا لأحد.
فيه جملة عالية أظن لتولستوي يقول فيها: كل الناس عايزة تغير العالم, لكن ما حدش فكر يغير نفسه.