الاثنين، 17 أغسطس 2009

ياااااااااااااااااااادى المصيبه

مش عارفه اقول ايه و لا اكتب على ايه بس الخبرين اتحف من بعض و نوعا ما شبه بعض

شاب و امه و ابوه اتهجموا على بنت كانت ماشيه فى الشارع مع والدتها و جردوها من هدومها و اغتصبوها امام الناس

و خلاااااااااااااااااااااااااص

واحده فى الكويت جوزها طلقها و قرر يتجوز تانى راحت مولعه فى خيمه الفرح و مشيت

صحيح 43 واحده ماتوا بس الحمد لله العروسه نجيت

بس مفيييييييييييش مشكله

فى الخبر الاول حسيت ان الخبر بيتكلم عن حادثه حصلت فى الصحرا مش فى وسط شارع

بس عينى اتخبطت فى كلمه وسط الناس و امام الماره

طيب الاخوه الماره دول محدش منهم السائل اللى بيجرى فى عروقه خلاه يتنحرن شويه و يحاول

انا باقول يحاول مش مهم ينجح انه ينقذها و يخلصها من السفله دول

المصيبه انهم عملوا فيها كده عشان رفضت الجواز من ابنهم اللى ارتكب معاهم الجريمه

و طبعا عشان ينقذ نفسه بعد كده حيقول انه مستعد يتجوزها و ده كل مناه و مبتغاه من الاول

و طبعا البنت حتكون مضطره انها تقبل بعدالفضيحه اللى حصلت دى

طب الموضوع التانى...........يعنى ايه واحده اتطلقت تروح تحرق فرح طليقها؟؟؟؟؟؟

طب الناس المعزومه ذنبها ايه انها بدل ما تفرح تموت محروقه او تقضى باقى عمرها مشوهه

ذنبهم انهم راحوا الفرح طبعاااااااااااااااااااااااااا

و فى التحقيق تقول مكنتش متخيله ان ده كله حيحصل !!!!!!!

طب كانت متخيله ايه بقىىىىىىىىىىىىىىى

مش عارفه فعلا ؟؟؟؟؟؟؟؟؟؟؟؟؟؟؟؟؟؟؟؟

المثل زمان كان بيقول كل شيىء بالخناق الا الجواز بالاتفاق

بس دلوقتى ما بقاش كده ده بقى بالخناق و نظام غصب عن عين اهلك حتتجوزينى و الااااااااااااااا

بذمتكم مش مصيبه فعلا الزمن اللى بقينا فيه ده

ياللا ما علينا ..........................

قبل ما امشى اقولكم كل سنه و انتوا طيبين و رمضان كريم و سعيد و مليىء بالحسنات و المغفره انشاء الله

هناك 41 تعليقًا:

Bondoka يقول...

ولسه ياما هنشوف فى الزمن اللى احنا فيه ده
ربنا يرحمنا

رئيس جمهوريه نفسى يقول...

ابتسم انت في الوطن العربي

صيدلانيه طالعه نازله يقول...

اتذكر الان كلمات الممثله
لااجد ما أقوله والكلمات لا تستطيع ان تخرج-
ام هو اخر الزمان
ام قلة دين
ام لايوجد ضمير ولا نخوه
ام ماذا
نعما ايه؟؟؟؟؟؟؟؟؟؟
الطف بينا يارب
يارب اصلح الحال
-ان الله لا يغير نا بقوم حتى يغيرزا ما بانفسهم-
اشرف

فاتيما يقول...

بصى بقى يا علا
أنا بصراحة زهقت و قرفتلك سلف من بدرى لأن دا الواقع الفعلى
و مش مستغرباه
عارفة اللى مستغرباله إيه؟
إن إنتى اللى مستغربة؟!!!!!
عارفة ليه مش مستغربة الحادثتين
لأن فعلا محدش بيساعد حد خصوصا لما المشكلة تكون كبيرة
بيتراجعوا و يخافوا من الأذى على نفسهم و طبعا عندهم حق فى خوفهم
أنا حصلى موقف مشابه لدا لما تهجم عليا احد الناس اللى انتى عارفهم
هو و كام بلطجى من حتته
و للأسف بعد البهدلة قصاد الدنيا
و اللى يسوى و اللى ميسواش تدخل مديرى ف الشغل و دخلنى جوا المدرسة
لحد ما اهلى جم ياخدونى ...
زمايلى خافوا على نفسهم من التهور اللى كان شايفينه و كل واحد جرى استخبى و اللى خداها من قصيره وروح ..
و محدش بيبقى عاوز يتصدر لأن احيانا الطرف التانى وقت الجرايم دى بيبقى شيطان حقيقى و أذاه مرعب ...
بالنسبة للمطلقة و جوزها السابق اللى ولع فيها و فى الناس ...
معنديش أى تعليق للأسف
ربنا يتغمدهم برحمته
و كل الود ليكى و رمضان كريم عليكى إن شاء الله يا حبيبتى

يوميات شاب منوفى يقول...

انا مش مصدق الخبر الاول باى حال من الاحول لانه لو صح يبقى علية العوض ومنه العوض وقول سلامو كليكوا يامصر انا همشى بقى صحيح انا بموت فيكى بس كدة كتيرررر اوىىىىىىىىىىى ومعدش ينفع يعنى مامنش على اختى او بنتى وهى ماشية فى الشارع مش تحرش حتى دة اغتصاب عينى عينك
انى راحل يامصر

مسدس صغير يقول...

كل سنة وانتى طيبة يا دكتورة اولا
ثانيا
فعلا حاجة مؤسفة خاصة موضوع البنت اللى تم اغتصابها دى
والله الواحد متخيل اننا فى غابة دا حتى الغابة يمكن فيها مبادئ عن كده شوية
اما بالنوسبة للحاجة اللى ولعت فى الفرح فدى ابسط ما يقال عنها انها متخلفة عقليا
حاجات لا تتصور
ربنا يستر
كل سنة وانتى طيبة
رمضان كريم

على خطى الحبيب يقول...

السلام عليكم ورحمة الله,

أول زيارة لـي فى مدونتكم الكريمة,
وعندى تعليق على الحكاية الاولى اللى قلتيها, يا ترى الموضوع ده بجد فعلاً؟
انا شخصياً مسمعتوش
ياريت لو عندك الصفحة بتاع الخبر تقدرى تمدينى بيها.

ويارب مكونش ضيف تقيل

تقبلى مرورى,
خالـــص تحيـــاتى,,

على خطى الحبيب يقول...

السلام عليكم مجدداً,

على فكرة انا اتحققت من الخبر الأول بنفسى دلوقت, هو موجود على مصراوى فعلا من امبارح بس انا اللى مكنتش دخلت عليه,

بس يمكن اللى خلانى استغرب شوية اللى حكيتية وانه كان ولد وأبوة وأمة, واللى خلانى استغرب اكتر كون أمها معاها ((متهيالى مفيش ام تقدر تشوف بنتها كدة وتسكت)), دى كانت تاكلهم بسنانها حتى لو تحت تهديد مئات الاسلحة مش سلاح واحد,
لكن الحكاية انها عمات البنت واجوازهم الاتنين, والبنت كانت معاها اختها.

أخيراً وليس أخراً..لنا الله

وحسبى الله ونعم الوكيل

دمتى بكل الود والخيـــر,,

ahmed_k يقول...

أولا كل سنه وأنتي طيبه يا دكتوره وبعوده عليكي رمضان بخير وصحه وسعاده

أما بخصوص الجرائم التي ذكرتيها فالأمر الذي يجعلنا نقف فاغرين الأفواه أمامه أن الضحيه بنت أخت أم الولد الجاني والمشاركه في الجريمه يعني بنت خالة عريس الغفله اللي المفروض يكون حائط دفاع عنها بحكم الدم قبل أن يكون راغب في الزواج منها
وثبت أن البنت معها حق في رفضها الزواج منه لأنه من الواضح إن أسرته منحله خلقيا ودينيا
أما الماره والناس فلا حول ولا قوة إلا بالله مصيبه ما حدث وأين الأمن ؟؟ اللي قارفنا بنصب الأكمنه في كل مكان وفالحين في نصب الفخاخ لإيقاع الناس في المخالفات المروريه وتغريمهم ولا إنقاذ الفتاه لن يعود على الخزانه بمنفعه .

وموضوع الحريقه اللي حدث في الكويت
فلا أملك له ردا لأ التفاصيل لم أتطلع عليها ولكنه مهما كات الأسباب والدوافع لا يبرر فعلتها الإجراميه التي راح ضحيتها أبرياء لا ذنب لهم

micheal يقول...

قريت الخبر علي مصراوي وكنت حتقيأ..للدرجة دي..هي الناس مستنية ايه تاني يحصل قدامها عشان تتحرك
حاجة تقرف
كل سنة وانتي طيبة
تحياتي

احاسيس آيوشه يقول...

لا يادكتورة دلوقتى بقى الجواز بالاغتصاب دى حاجة تقرف حسبنا الله ونعمة الوكيل بجد الشعب المصرى انعدم فيه الاخلاق بالشكل ده وكمان مفيش واحد فى الشارع يدافع عنها

الشعب لابد له من حكومه تشكمه يقول...

سيبك من المطلقه خلينا فى اللى حصل فى شواااااارى القاهره,,فيييييييييييييين الناااااااااااااس فييييييييييييين البشر سابو دا كله يحصل ومفيش حد اتدخل لييييه؟ مفيش رجاله فى البلد؟ دا حاجه تقرف وتحبط والله:(

حاجات جوايا يقول...

احنا مش بقينا فى زمن صعب
لالالالالالا
احنا بقينا فى زمن مرعب

تقريبا الدين بدأ ينحسر من قلوب الناس
و ده سبب كل اللى بيحصل ده

ربنا يحفظنا ويحفظ اولادنا وكل المسلمين يارب

كل سنة وانتى طيبة حبيبتى

متنسيش تاج رمضان

دمتى بخير

Appy يقول...

انتى عارفه ان الخبر الاولانى انها بنت عمهم علشان رفضت ابن عمها ده تقريبا
انا فعلا مش عارفه بس دول ناس من الويلى يعنى تقريبا الحياه مزفته بزفت معاهم م شعارفه اوصف لكى الشكل الاجتماعى هناك عامل ازاى بس دول ولا يعرفوا دين ولا غيره الناس هتقول خناقه فى الشارع وبس محدش هياخد باله او فيه حلقه مفقوده فى الموضوع

قلم رصاص يقول...

لاحول ولاقوة الا بالله

الهذا الحد وصلت القيم والتصرفات
العالم أصبح يشبه الغابة

ولكن رغم ذلك .. نقول وبملء الفم : هيهات هيهات .. فالخير مازال موجودا وبكثرة .. وسوف ننتصر للخير على الشر طالما تجري في عروقنا دماء البشر

اما هؤلاء الاستثناء في حياة البشر فهم احط من الحيوانات التي تأبى أن ننعتم باسمها .. !

رمضان كريم وكل سنة وحضرتط طيبة

في حفظ الله

Foxology يقول...

بالنسبة للخبر الأول :

اخر الأخبار ان المتهمين اتحبسوا والبنت اتنازلت عن البلاغ !!!!!

بالنسبة للخبر التانى :

الغيرة بتعمى :) ومفيش فايدة

تحياتى وكل سنة وانتى طيبة :)

Ashraf يقول...

الله اكبر
ايه ده طيب ده الغرب بقى ارحم
ام هذه هى الحياه الماديه او الراسماليه
هل ورائها ورثه -ام جميله فاتنه الى هذا الحد ام انها مسالة كرامه بس

صيدلانيه طالعه نازله يقول...

Bondoka:بقينا فى زمان كل شيىء فيه بقى متوقع
نورتينى
=================================
رئيس جمهوريه نفسى:ابتسم و اضحك كركر و اوعى تكشر كمان
رمضان كريم
=====================================
اشرف اللى استغل اسمى و مستغلنى دايما:اللى حصل هو كل اللى انت قلته و ياريت فعلا نغير مابنفوسنا من مرض
=================================
فاتيما:فعلا حاجه غريبه قوى انعدام النخوه و الشهامه اللى كانت بتميز الشرقيين زمان دلوقتى خناقات بتحصل و ناس تموت و الشارع ماشى عاااااااااااادى ولا كأن
ما علينا
كل سنه و انتى طيبه يا طماطم و محققه امنيتك الغاليه انشاء الله
=================================
يوميات شاب منوفى:طيب لو رحلت لمكان كويس قوللى عليه عشان اخد جوزى و العيال و نروحاحنا كمان
كل سنه و حضرتك طيب
=================================
مسدس صغير:الحدثين فعلا مؤسفين و ان كان الاول بشع و مقزز فالتانى غبى و متخلف
كل رمضان و انت بخير
===================================
على خطى الحبيب:فعلا حسبى الله و نعم الوكيل
المصيبه انهم قرايب و كمان من الدرجه الاولى
كل عام و انتم بخير
=================================
Ahmed-k:فعلا المصيبه و الكارثه القرابه القريبه بين الجانى و المجنى عليه بس الموضوع فيه حاجه ضايعه مش مفهومه
بدليل ان البنت اتنازلت
رمضان كريم انشاء الله
=================================
Micheal:مستنيين الفوضى الخلاقه
كلنا حسينا نفس الاحساس المقزز ده لان الموضوع بشع فعلا
شكرا لمعايدتك و سنه حلوه علينا جميعا
===================================
ايوشه:غالبا الشعب كان واخد اجازه بمناسبه عيد الفلاح
كل سنه و انتى طيبه يا قمره
==============================
الشعب لابد له من حكومه تشكمه:لا ما انتى مش واخده بالك اصل المجرم و المجنى عليه كانوا لابسين طاقيه الاخفاء
بجد و الله حاجه تقرف
رمضان كريم
===================================
حاجات جوايا:ربنا يحفظنا و يبعد عننا كل شر انشاء الله
كل سنه و انتى طيبه
==================================
Appy:طيب حتى لو مفيش دين طيب كمان مفيش ادب مفيش تربيه مفيش راااااااااااااجل ماشى فى الشارع يحاول يحميها
يا بنتى المنحنى كل شويه بيتجه اكتر الى قاع الحضيض
ربنا يرحمنا برحمته
كل سنه و انتى طيبه و بلاش بتنجان فى رمضان عشان بيحمى على القلب
ههههههههههههههههههه
===================================
قلم رصاص:تفتكر فعلا ان الخير موجود؟
طيب كان فين ساعتها؟
بافرح قوى اما الاقى حد لسه عنده امل اما انا فلااااااااااااااااا
كل عام و انتم بخير
=================================
Foxology;ايوااااااااا اموت و اعرف ازاى اتنازلت بس هماكانوا كاتبين ان النيابه رفضت التنازل
الموضوع التانى هو فعلا قمه الغبااااااااء
كل سنه و حضرتك بخير
===============================
اشرف:الله اعلم
===============================

موناليزا يقول...

بغض النظر عن الموضوع اللى يحرق الدم ويوجع الاعصاب

====
كل سنة وانتى طيبة بمناسبة قدوم شهر رمضان واعاده الله علينا بالخير واليمن والبركات
ملحوظة: فيه غلطة مطبعية ارجو تصحيحها
فى اخر سطر فى التوبيك
"ان شاء الله"
تكتب هكذا
ارجو تقبل ملحوظتى بصدر رحب:)

احاسيس آيوشه يقول...

انا جاية اقولك كل سنة وانتى طيبة يادكتورة وكل سنة وانتى اللى الله اقرب يارب

ستيتة حسب الله الحمش يقول...

كل سنة وانت طيبة ورمضان كريم

معنديش تعليق للاسف
فاكرة حادثة البنت بتاعة العتبة
والا بتاعة المعادي
والا التحرش الجماعي
يبقى ده التطور الطبيعي للحاجة الساقعة


اما عن الست بتاعة الكويت فهي غبية
لا يوجد رجل او انسان يستحق ان اخسر لأجله الدنيا والآخرة
اما عن زوجها اللي طلق وراح يتجوز فخد بالك فقد اصبحت عبرة لمن يعتبر وكل راجل يخلي باله من لغاليغوه
هههههههههههههههههههههههه

تحياتي

Tarkieb يقول...

على فكرة خبر الحريق في الكويت طلع في كل الجرايد الالمانية .....وتاني يوم كان التعليق ع الخبر اكبر من الخبر نفسه عشان ان العروسة الاولى عملت كدة.....في نفس اليوم في نفس الصفحة القبض على زوجة في المانيا قتلت جوزها من ٢٦ سنة....الطب الشرعي كان اكتشف ان سبب الوفاه زمان تسمم محاري وسي فود.....الان اكتشفو ان زوجه القتيل صنعت السم بتاع السي فود بنفسها في المعمل لانها بروفسير للكيمياء....سيبك انت برضة العلم نووووووور

صيدلانيه طالعه نازله يقول...

موناليزا:كل سنه و انتى طيبه يا قمر
تم الاعتراف بالخطا المطبعى و جارى تصحيحه ......حول
=====================================
ايوشه:و انتى بالصحه و السلامه ياجميله
====================================
ستيته:نورتينى اول مره و كل سنه و انتى طيبه
و انشاء الله ننشر اعلان احترس للاغاليغك و الا انت الخسرااااان
ههههههههههههههههه
===================================
Tarkieb:طبعا العلم نوووووووووووورن امال ايه
و يا خوفى من الابتكارات الجايه
كل سنه و انت بخير
==================================

Migo Mishmish يقول...

احنا جايين نعدى عالحلوين ونقولهم كل سنه وانتو طيبيبن رمضان كرييييييييييييم
ميجو وزوجته مشمش من البلكونه

Tamer Nabil يقول...

السلام عليكم

ازيك اخبارك اية

كل سنة وانتى طيبة وبخير

رمضان كريم

تحياتى

سومه...مجنونه فى بلد عاقل يقول...

زمان كانت البنت تصوت كله يضرب
ربنا يسترها
كل سنه وانى طيبه

hasona يقول...

السلام عليكم
و هنشوف اكتر من كده كمان
وهتكون مواقف ألعن من ذلك

لأن في الحقبة الزمنية الاخيرة تم اعادة تربية وبلورة المجتمع وعاداته وضياع الكثير من تقاليده الجميلة
وأصبح القضايا التافهة والمهمشة علي السطح تعلوا وتشغل الناس
الناس بتتغير من سوء الي أسوء - وطبعا فيه قلة من الناس التغير ده من مصلحتهم ويصب في جيوبهم

،،،،
*//-/*//-/
،،،،،،،،،،،،،،،
كل سنة وانت بخير
وكل سنة وجميع أحبابك بخير وصحة وسعادة
وكل سنة وكل المسلمين علي شريعة الله وسنة الحبيب المصطفي رضي الله عنه وأرضاه

وان شاء الله نستفيد من رمضان بكل السبل
ونخرج منه أفضل مما ولجنا به
يا رب أعنا علي القيام والصيام والصلاة
ووفقنا لما فيه الخير للجميع يا رحيم يا كريم

وارزقنا العفاف والرضا - والمحبة واهدينا يا عظيم

وأعنا علي القيام والصيام والصلاة والارتقاءالي جنة الفردوس

واجعلها لنا ميراث خير وسعادة

واجعلنا من عتقاءك في هذا الشهر يا معطي يا وهاب

وارزقنا حلاوة القرآن و حسن تلاوته
وتدبر معانيه وفهم علي النحو الصحيح
ورطب ألسنتنا بذكرك يا الله

kochia يقول...

كل سنة وانتي طيبة وبكل خير ان شاء الله

ومش هعلق علي الموضوع الغريب جدا ده بمناسبة الشهر الكريم

سلام

ســـــــمــــكة يقول...

المشكلة ان في حادثة الفرح كل الي ماتو هما من خيمة النساء واغلبيتهم بنات صغيرين في جامعات ومدارس... ارجع واقول اللوم على البيئة البدوية والتربية الي اتربو عليها... طيب الحادثة الاولى نلقي باللوم على مين ؟؟ الشارع الي شاف وسكت ولا الناس الي عملو كدة ولا ايه بالزبط....

مدونة جميلة
كل سنة وانت طيبة :)

ضكـــــتور جدا يقول...

رمضان كريم

أبو كريم يقول...

الخبر الأول أنا قريته على مصراوى ولو حقيقى ( لان مصراوى بيضخموا) تبقى كارثه

والكارثه الأكبر أنها خالته وجوز خاتها وابنهم


والخبر التانى ده صحيح ميم بالميه
( أن كيدهن عظيم)


اللهم ألطف بنا

ويكا يقول...

والله ما انا عارف الواحد يعلق على ايه ولا ايه
ربنا يرزقنا العفو والعافيه

بيطرية ومش بايدى يقول...

كنت عايزة اقولك كل سنة وانتى طيبة بس نسيت معلش اعذرنى وللحديث بقية
دمتى ف صحة وسعادة

بيطرية ومش بايدى يقول...

على فكرة دى بقت مصيبة عادية جدا عايزة ايه طيب ؟؟عايزة ايه من شباب ماعدش فيهم لانخوة ولا مروءةولا رجولة هه
عايزة ايه من شباب فاضى مش وراه حاجة غير معاكسة البنات ويتفرج على الكليبات الخ ....الخ....
عايزة ايه اساسا من بلد اتخلت عن دينها وبقى كل عقيدتها تامر ودياب وعجرس عايزة ايه من رجالة بقى كل اللى على لسانهم ياعم وانا مالى كل واحد يخليه ف نفسه انا عندى عيال
يا شيخة دى بقت حاجة تقرف والله الواحد مبقاش عارف يعمل ايه عارفه حال اللى زينا عاملين زى ايه؟
عاملين زى ولاد ونيس ف مسلسله من ساعة ما طلع على وش الدنيا وهو بيربى ف اولاده ابنائى اعزائى وهكذا ف دنيا مبقتش دنيا بقت افظع من غابة ربنا يستر على ولاياه ويسترها علينا وعلى ولادنا ف المستقبل واحفادنا كمان ويساعدنا ويقوينا على تغير الحال اللى احنا فيه

بيطرية ومش بايدى يقول...

اه على فكرة انتى عارفة ان انا كان نفسى ادخل صيدلة وكنت كاتبة اسم المدونة صيدلانية وافتخر بس نصيبى جه كده بس برده جالى بيطرى فى اسيوط برده شوفتى سبحان الله وانا محتارة دلوقتى احول ولا لأ ابقى ردى عليا عندى ماشى عشان تنورينى
معلش تقلت عليك ف اول زيارة اصل انا رغاية

خواطر شابة يقول...

وقانا الله واياكم من شرار خلقه

micheal يقول...

في إنتظار جديدك

المسلم الصغير يقول...

السلام عليكم.. كل عام وأنت بخير.. أنا مسلم.. نعم اسمي مسلم.. أنا سعيد والحمد لله بميلادي مع شهر رمضان المبارك وسأكون سعيدا أكثر بزيارتك..
وجزاكي الله كل خير فيما قولتي وياما لسة في الدنيا هنشوف وربنا يستر علينا من هذا الزمن

blue-wave يقول...

يا ساتر.

!!! عارفة ... مش عارف ليه يقول...

كل سنة وحضرتك طيبة

وحقيقي كان يوم لطيف أووي

وسعدت بالتعرف على أسرة حضرتك

وحواري مع زوج حضرتك كان شيق وممتع

وشكراً جزيلاً على اليوم اللطيف ده


وليد

Sameh Ezzat - (خواطر خاطر) يقول...

ولسه يا ما نشوف

------