السبت، 12 سبتمبر 2009

مبسوطه انى منهم

اولا كل سنه و كلكم طيبين و بخير و صحه و سعاده و كل حاجه حلوه

انا النهارده مش عارفه اكتب ايه و ازاى نفسى اكتب مبسووووووووووووووووووووووووووطه من اول البوست لاخره

انا حاكتب عن افطار المدونين صحيح متاخر اسبوع بس عذرى انى كنت عيانه من يوم الافطار و كمان معنديش نت فى القاهره

اليوم ده اتحقق فيه حلمى و شفت اصحابى اللى ارتبطت بيهم سنه و اكتر

اول اما دخلت شفت فاتيما و ده طبعا حدث مهم لان الانسانه دى فعلا طلعت و الله زى ما تخيلتها و اكتر حتى فى الشكل

انسانه طيبه و لذيذه و محترمه و متتخيلوش كم الناس اللى كانت بتيجى تسلم عليها و لا اللى كانوا بيتصلوا على تليفونات

ناس تانيه عشان يكلموها و حظى الاحلى انها كانت جنبى فى الافطار و مبطلناش ضحك و هزار انا و جوزى و سيف و

شادن ولادى اللى حبوها قوى لانها حنينه قوى بجد يارب يرد غيبه يوسف ابنها و يكون معانا فى فطار السنه الجايه

انشاء الله و كلنا كنا حريصين اننا ندعى فى الافطار ان ربنا يرجعه ليها تانى

كان معانا على نفس الترابيزه وليد عارفه مش عارف ليه اللى كان شخصيه جميله برضه و هاديه فى نفس الوقت

حكينا معاه كتير و بان من كلامه انه شخصيه متميزه جدا و طيب و ذوق جدا جدا

اللى حكايه بقى و كانت اكتشاف ليا هيا سومه مجنونه فى بلد عاقل اللى اول ما عرفت انى صيدلانيه خدتنى بالحضن

و كاننا نعرف بعض من زماااااااااااااان و مبطلناش نتكلم انا و هيا و فاتيما معظم الوقت و كان نفسى اشوفها تانى

خصوصا انها جارتى فى اكتوبر بس انا خدت انفلونزا شديده بعد الافطار ضيعت معظم الاجازه

كمان اتعرفت على مصطفى ريان شاب ثائر و هو ولد طيب قوى و مثقف و على طبيعته قوى فى الكلام

و انبسطت قوى انى شوفته برضه

شوفت كمان دعاء مواجهات و بصراحه مكنتش متخيلاها كده خاااااااااااالص بس هيا طلعت لذيذه و حبوبه قوى

و مبطلتش كلام مع الكل

كمان ميرا اتعرفت عليها هناك و كيكى عوو بس متكلمناش مع بعض كتير بس باين عليهم انهم حبوبين و شخصيات جميله

كمان اتشرفت قوى انى شوفت ايناس نهر الحب اللى كانت جايه من بورسعيد عشان اليوم ده

طبعا شوفت آبى بتنجانى اللى طلعت اكتر بتنجانيه مما كنت اتخيل بعد شخصيه تسحرك من اول ما تشوفها

من شقاوتها و خفه دمها و شعننتها بس للاسف مشيت بدرى عشان كان وراها غسيل زى ما قالت

هههههههههههههههههههههه

كمان اتعرفت على خيخه الجدعه اللى مش خيخه خالص و لا تقرب للاسم بصله متكلمناش كتير بس الجدعنه

بتبان من اول نظره و بيتحس بيها و كان معاها شاهى

شفت ناس كتييييييييييييير و قوى و عشان اتعرف عليهم كلهم عايزالى كااااااام فطار تانى عشان اعرفهم

طبعا الاكلام المخصوص قوى يبقى من حق داليا قوس قزح و خالد همس الاحباب اللى مقعدتش معاهم خااااااااااالص

مش لانهم مجوش لا بس عشان هما كانوا شايلين الليله من اولها على كتافهم و لغايه ما مشيت الساعه تسعه

ما كانوش حطوا لقمه فى بقهم عشان ينظموا قعدتنا و يطمنوا على كل حاجه ماشيه تمام التمام

و كفايه ان خالد اما عرف انى ماشيه و مكلتش الحلو بتاعى فوجئت انه جايبلى انا و جوزى و الولاد

اطباقنا لغايه عندنا و بصراحه حركه بسيطه بس بينت مدى الذوق اللى بيتمتع بيه

ربنا يباركلهم بجد لان اللى قريته عن انجازهم فى اليوم ده يخلينى اتشرف انى انتمى للناس دووووووول بجد

صحيح انا مشاركتش معاهم سواء ماديا او معنويا بس بجد بانجازهم ده اتعلمت منهم كتير قوى

ناس كتير شوفتها و اللى اتعرفت عليهم اقل من اللى موجود بكتييييييييييييييير و اكتشفت انى معرفش ناس كتير من المدونين

بس اوعدكم انى حاتابع اكتر من الاول لان الناس دى فعلا تستحق

هناك 22 تعليقًا:

الجواز و سنينه يقول...

ايه ده انا اول تعليق
لوووووووووووووى

الجواز و سنينه يقول...

المهم مبسوطه جدا انك شووفتى الناس الحلوه دى
بس كان نفسى اكون معاكم بس فرقت يوم معاكم
يلا الايام جايه كتير
وصفك للناس حببنى فيهم من غير ما اشوفك
بس انا واثقه من حكمك على الناس
مسيرى اشوفهم ان شاء الله
و الف سلامه يا جميل

almasry يقول...

اكل



وحلووووووو



فطار



ناس



احمدك يارب




انا أكيد كنت فى الحمام الفتره دى


وممكن بردو أكون كنت نايم




عموما مطرح ما يسرى يمرى زى ما بيقولوا



ومش هقر ,,,, هنق بس





كل سنه وانتى طيبه



المصرى

Ashraf يقول...

بصراحه
ده من اللحظات الجميله
ناس محترمه و
عقليات عبقريه و
لا يجمعهم سوى الخير و
تعرفت على ناس رائعه الشخصيه
و لم اتوقع الجمال ده و
العطاء بدون غرض او مصلحه
شكر خاص لوليد و فاتيما و مصطفى وساجى
و الابطال داليا وخالد
ارجو ان يتكرر اللقاء

عاشقه وغلبانه يقول...

انا نفسي في تجمع زي ده
العيشه بره القاهره والشغل مكتفين الواحد

كل سنه وانتي طيبه ياجميل ولو انها في اخر رمضان

وعقبال السنه الجايه واكون مشاكره باذن الله

عاشقه الرومانسيه يقول...

فاتيما دى حدوووووووته
حكايه لوحدها
انا كمان اول مره شفتها لقيتها زى الصوره اللى فى خيالى بالضبببببببط
وخيخه نفسى اشوفها جداااااااا
ونفسى اشوفك انتى كمان جدا جدا جدا
وعندنا لقاء مدونين فى الاسكندريه
وهيكون فيه معظم الناس الحلوه دى
والتفاصيل على مدونتى
هتيجى وتنورى اسكندريه معاهم ولا لأ؟؟؟؟؟؟؟؟؟
اتمنى يكون الرد اه جايه

Appy يقول...

طيب ليه التسييح ده يا بنت الناس لازم تقولى غسيل وحركات وبعدين انا كنت هاديه جدا اليوم ده انتى مشوففتيش حاجه
بجد انا مبسوطه انى شوفتك يا قمر

فاتيما يقول...

آبى هانم ؟!!!
هوه فيه فى حلاوتها و شقاوتها
طب دى كانت جاية مقريفة و مش نايمة اومال لما تشوفيها و هى مصحصحة ؟!!!
هتقعديلها على كبوت سيمبا
عشان متخليهاش تروح أشاساً
المهم يا ستى
الف حمدلله على سلامتك يا حبيبتى
و سيف حبيبى كمااان ؟!!!
قطع تسيباس و سنينه ولاد لحلال دول بصينلنا ف الاكل ...
و يا فندم مشكرين على كل الكلام الحلو دا ف حق الغلبانة أم يوسف
اومال انا أقول إيه عليكى إنتى ما شاء الله
طب منا قولت خلاصة الست المصرية الصميمة يا بنتى و الله متتصوريش قعادى جنبك قربنى منك ازاى و خلانى احبك اكتر و اكتر
لأ و العياااااااااااال
مش عاوزة أتكلم على العياااااااااال
عشان الحسد و القر
و جوزك العزيز و الله نموذح مفرح ربنا يخليكم لبعض يا رب
إن شاء الله تنورونا كل مرة
و الله بفرح قوى لما أحس إن الناس عندها إنطباعات حلوة و كله حاسس ببعضه كدا من غير حاجة
بطمن على إن الصلة ما بيننا حقيقية جدا و مفيهاش نقطة زيف واحدة
الحمدلله
و ربنا يديم المحبة و الخير مجتعين عليه دايما
بوسة و حضونااااااااااااااااات
لسيف و الغزالون يهبلن و سعادتك قبلهم طبعااااااااااا

ابو على يقول...

احلى حاجه بصراحه كانت ف اليوم

بعيد عن لقاء الاصدقاء والمدونين

الاكل

كان تحفه
انا كنت عايز اخد الطبق بتاعى وابروزه ع الحيطه

mahasen saber يقول...

يا رب كل المدونيين متجمعيين كده على خير
كنت مخططه احضر بس الظروف بئا

كان نفسى اشوفك جدا واشوف كل حبايبنا بس الجايات اكتر ان شاء الله

صيدلانيه طالعه نازله يقول...

الجواز و سنينه :انا كمان كان نفسى اشوفك قوى
الناس دى فعلا مكسب ان الواحد يتعرف عليهم
الجايات اكتر انشاء الله
=====================================
Almasry:اكيد كنت نايم لان انا اللى فى اسيوط عرفت يبقى انت اكيد كنت فى الضياع
و حاعتبر كلامك نق مش قر
كل سنه و انت طيب
===================================
Ashraf:احلى حاجه بقى ان اللقاء ده غير نظرتك للمدونين للايجابى اكتر و بصوره فرحتنى انا شخصيا
تحيه فعلا لكل اللى نجح اللقاء ده
==================================
عاشقه و غلبانه :انشاء الله نتجمع قريب كلنا مع بعض
و كل رمضان و انتى طيبه
==================================
عاشقه الرومانسيه:كل سنه و انتى طيبه يا جميله و عقبال ما نيجى نحضر الفرح انشاء الله
للاسف انا خلاص رجعت اسيوط خلاص و صعب انى اجى
ياريت تبقى تاخدى الميل بتاعى من المدونه و تبعتيلى تليفونك عشان اسلم عليكوا يوم التجمع انشاء الله
===================================
Appy:انا كمان فرحانه قوى انى قابلتك و كان نفسى نحكى شويه اكتر و الكل فعلا قال انك مكنتيش فى الفورمه فى اليوم ده
انشاءالله ربنا يجمعنا فى يوم تانى قريب
==================================
فاتيما:ماذا اقول و ماذا يمكن ان يقال بعد كل ماقيل
ما اقدرش اقول حاجه غير ان ربنا مخيبش ظنى فيكى ابدا
انتى فعلا انسانه حلوه قلبا و قالب
ربنا يرجعلك فرحتك قريب و يبعد عنك الحزن و الدمع بحق كرامه النبى و اهل بيته و العشره الاخيره من رمضااااااان
و ربنا يجمعنا كلنا دايما على الحب
سلاااااااااااام بقى
===================================
ابو على:فعلا على الرغم من تأخير الاكل شوياااااااات كتيرااااااااااااات الا انه اما جه ماهانش عليا اسيب منه فتفوته لانه فعلا كان رائع
و كمان الانبساط كان زياده لانى شفت الناس الجميله دى كلها
نورتنى
==================================
فى دائره الضوء:انشاء الله الخير اللى يجمعنا دايما
شرفتنى بالزياره
==================================
Mahasen Saber:انا قالولى انك جايه و بعدين مش جيتى
لعل المانع خير
و كل سنه و انتى طيبه و سلامى لابنك القمر
=================================

The illusionist يقول...

مساااااااااااء الفل
رمضان كريم
والف مبروك انك اخيرا شوفتى حبيايبك
عقبالنا يا رب
يا رب نشوفهم بقى قبل ما اموت
اهئ اهئ
بس بجد الواحد فرحان ان الناس شافت بعضها
وربنا يكتبلنا نشوفهم احنا كمان

قوس قزح يقول...

ده انا بقى متغاظة بشكل
كنت هتجنن و اقعد معاكى
و اتغظت اكتر انك رجعتى قبل ما نتقابل تانى
بجد اللقاء التانى كان فوق الرائع
و ضحكنا ضحك
كان ناقصك بصراحة

لما تيجى تانى لازم نعمل لقاء تانى ان شاء الله

micheal يقول...

إفطارا شهيا
وبأنا قريت عن تفاصيل الإفطار ده في أكتر من مدونة واليوم الخيري
ربنا يباركلكلم
تحياتي

سومه...مجنونه فى بلد عاقل يقول...

ازيك يا ادع صيدليه الف سلامه وانا اسفه لانى انا اللى تقريبا عديتك :))
كل سنه وانتى طيبه وبالف صحه وسلامه والله انا اللى بجد فرحت بيكى قوى حسيتك واحده قريبتنا مع فرق الشبه يا عم وانك قمر ماشاء الله هههههه بس تحسى انك قريبتنا معرفشى ازاى
شكرا جدداااا على المكالمه اسعدتينى جدااا بيها والله

زى الهوا يقول...

Happy 3eed

د. ياسر عمر عبد الفتاح يقول...

كل عام وأنتم جميعا بخير

كل عام والأمة الإسلامية إن شاء الله منتصرة

كل عام ونحن جميعاً إلي الله أقرب وعلي طاعته أدوم

تقبل الله منا ومنكم صالح الأعمال

حنين القلب يقول...

كل سنه وحضرتك طيبه
واعاده الله عليكى بالخير واليمن والبركات

واتمنى تنورينا فى اللقاء السكندرى
هتلاقى التفاصيل عندى

اتمنى بجد اتعرف بحضرتك

تقبلى مرورى

micheal يقول...

كل سنة وأنتي طيبة

قوس قزح يقول...

كل سنة و انتى طيبة يا جميل
و عيد سعيد عليكى و على اسرتك يا رب

واحدة مفروسة يقول...

اولا كل سنة و انتى طيبة يا قمرة و بخير و سعادة انتى و اولادك و زوجك
انا للأسف مش رحت الفطار ده
بس لو كنت اعرف انك رايحة يمكن كنت راجعت نفسي و خصوصا انك معاكى الاطفال اللى نفسي اشوفهم
علا انتى انسانة جميلة و حبوبة و دمك خفيف و عشرية و كل الصفات الحلوة فيكي
علشان كده انتى كمان شايفة الناس من حواليكي حلوة
و على فكرة داليا قوس قزح قالتلى انها شافتك و قالت فيكي شعر
المهم فيه تجمع يوم السبت
لو حتحضريه قولى
تحياتي ليكي يا قمرة

Mr.Hazem يقول...

مرحبا يا دكتورة
كل عام وانتي بألف خير يارب
ينعاد عليكي بالخير والبركات
وسعيد جداً بزيارتي الاولى لمدونتك
وان شاءا لله تتكرر
ارق تحية