الثلاثاء، 2 مارس 2010

عمو سيد الزبال






امبارح كنت فى مشوار الصبح و بعدين اخدت تاكسى

كنت خلاص قربت على البيت اما لقيت لمه فى الطريق و ناس كتير

طبعا الفضول المصرى نقح عليا قوى و مديت راسى عشان ابص على اللى حصل

لقيت اتنين من عمال النظافه و طبععا عرفتهم من اليونيفورم بتاعهم

اما ركزت فيهم لقيتهم عم سيد الزبال اللى بيعدى علينا كل يوم وواحد زميله تانى

عربيه خبطتهم و هما بيكنسوا الطريق

سيد مش متعور بس يظهر العربيه اللى خبطته حدفته على الرصيف

بس الولد التانى وشه كان كله دم و مش بيتحرك خالص للاسف

بصراحه المنظر كان صعب قوى و لغايه دلوقتى لسه فاكراه من امبارح

بعد ما رجعت فضلت افكر فى الناس الغلابه دى اللى هما عمال النظافه

اللى معظمهم بيستغلوا باليوميه يعنى لا تعيين و لا بدل عدوى

و لا تأمين على الحياه و لو لا قدر الله و حصلتلهم حاجه

مفيش حتى لاهلهم معاش يقدروا يواجهوا بيه الدنيا

انا عن نفسى بحس الناس دى غلابه قوى و باحاول اساعدهم دايما

بس للاسف فيه ناس بتبقى قلوبهم جامده و مش بيرقوا لظروف الناس

بس بالمنطق و العقل

ايه اللى يخلى ناس زى دى تشتغل وظيفه مقرفه كده غير الشديد القوى و الحوجه

المشكله انى عرفت ان معظم الزبالين دلوقتى دبلومات يعنى متعلمين

زمان كانت الفئه دى معظمهم من الجهله و الاميين

ده معناه ان الناس دى محتاجه بجد



ياريت بس نفكر و نحس بالناس اللى حوالينا و قلبنا يرق شويه

لان اللى يشوف ظروف الناس و ميحنش ميبقاش انسان

هناك 52 تعليقًا:

سمع هوص (Abo 3li) يقول...

والله ولعبت معاك ياواد يا ابوعلي... اول تعليق وحركات..

سمع هوص (Abo 3li) يقول...

صباح الفل يادكتورة علا

ناس كتير حوالينا مطحونين ومش حاسين بيهم... يمكن عم سيد .. واضح انه مطحون.. بس فيه غيره عايشين بالعافية.. ورغم كده مبيعملوش حاجة حرام.. علشان يوفرو احتياجتهم الاساسية...
ورغم كده فيه ناس بتعمل كل انواع الحرام علشان تشتري فيلا في مارينا...

تحياتي لعم سيد وكل المصريين ال عايشين ب الحلال و بال شرف...

تحياتي ايدكتورة

فتاه من الصعيد يقول...

المشكله في الاستاذ اللي خبطهم ... مفيش نظر ولا رحمه

فعلا الناس دي غلابه

تحياتي

7annen يقول...

الف سلامه عليهم
الحمد لله انها جت سليمه

Foxology يقول...

والله يا دكتور الناس دى بيبقى فيهم ناس متعلمة معاهم بكالريوسات زى اللى بييجى عندنا البيت ياخد الزبالة من الشقق ومحترمين جدا وولاد ناس بس كدة احسن من انه سيقى عاطل او فاشل وواحد زى ده بيكافح واجب علينا اننا نساعده على مواجهة ظروف الحياة الصعبة

بالنسبة لموضوع بدل العدوى هيئة النظافة والتجميل بالجيزة كانت بتصرف جنيه واحد ( أيوة جنيه واحد فى الشهر) بدل عدوى !!!! ولا تعليق طبعا

تحياتى والف سلامة عليهم وربنا يحفظهم لأهلهم

لـــولا وزهـــراء يقول...

دكتوره علا

-*-*-*-
اولا حلو عنوان البوست حسيت انه يصلح عنوان لفيلم ........
الصوره كمان معبره جدا جدا

انتى فتحتى موضوع الكلام فيه كثير اوى اوى مش بس الزبال او الناس اللى تشتغل باليوم لكن احنا للاسف عندنا طوائف اخرى مش لهم اى اهتمام
يعنى هاقولك على حاجه يمكن بعيد عن الموضوع شويه انتى عارفه اختك بقى رغاااااااااااايه
بصى يا دكتوره فى اول جمعه من شهر ابريل بيكون يوم اليتيم لكن حد فكر فى اليتيم المعاق ........
احنا نظرنا بيروح على حاجه ونتفكر ان كل اللى محتاجين هما كده وبس .....
انتى عارفه احنا فى عندنا شركه للنظافه اسمها اونيكس كل الولاد اللى بيتشغلوا فيها معاهم شهاادت والله العظيم اعرف واحد شغال متابعه لعمال النظافه معاه ليسانس حقوق انجليش يعنى الناس دى متعلمه ومثقفه لكن احنا للاسف المظهر بيخدعنا .......
هو انا كلامى ملخبط او حد فاهم حاجه سورى لو كان كلامى مش مضبوط لانى مرهقه شويه .......
يمكن ارجع بعد شويه ان شاء الله اكتب كومنت تانى
موضوع حلو ومتميز
شكرا على انك القتى الضوء على هذه الفئه من الناس الشرفاء فى مصر ...

زهراء

فاتيما يقول...

متفقةمعاكى قى كل حرف قولتيه
و كتبتيه يا علا

و متفقة كمان مع شعورك
من الألف للياء

الفئة دى من جملة المهن
نظرة المجتمع ليها متدينة جدا
مع انها عمل ضرورى و حيوى
و لا نستغن عنه ابدا
و فى نفس الوقت بنهمل اصحابه
ايما اهمال
ماديا و معنويا و صحياً


الحادثة ممكن تحصل لأى حد
دا قدر
بس المهم زى ما قولتى
ما بعد الحادث
الناس دى مصيرها
و مصير المتعلق فى رقابيهم
إيه؟؟

تحياتى على البوست الرائع
و قلبك فيه الخير دايما يا لولاّ

بوسيلى العيال

adel يقول...

معرفتيش قريتها ولا لا
كان كتبها بلال فضل
ان دوقتي المتعلمين بياجروا لبس الزبالين دول منهم بعشرين جنية في اليوم مثلا
وهما بيمرسوا المهنة دي عن طريق كل سنة و انت طيب ياباشا و الكلام ده
وبيكسبوا دهب

شفت يعني مش كفاية غلابة لا و بيتنصب عليهم من غلابة تانين

احنا وصلنا لابعد مدي من الفساد

sony2000 يقول...

طب سوأل بقي:هو ايه الطائفه اللي مهتمين بيعا عندنا
حلهم يعملوا اعتصام ذي مافئات عملت قبل كدا علشان صوتهم يتسمع
طب دول هيعملوها اذاي علي الاقل ليهم نقابات ويقدرو يعملوا حاجه
لكن دول ملهمش نقابه او ليهم صوت اصلا
ربنا معاهم ويعنهم يارب
اللهم امين
تقبلي مروري وتحياتي

star in the sky يقول...

الحمد لله لاقيين شغل فى ناس مش لاقية

وفى ناس بتبقى محتاجة اقل حاجة والله

لو كل الناس تساعد بعض يمكن الفقراء والمحتاجين مش هيخلصوا بس هيبقى فى مستوى احسن

سبايدرمان يقول...

لان اللى يشوف ظروف الناس و ميحنش ميبقاش انسان

تسلمي على الكلمتين دووول ^_^

....

و حمد الله على سلامتهم ^_^

GHARAM يقول...

رغم ان البوست مآساه وانا بصراحه موش ناقصه


إلا أني عايزه اعرفك أني لما سافرت بره لقيت شباب زي الورد وبنات تحل من على حبل المشنقه بيشتغلوا نفس الشغل

الشغل موش عيب العيب ان الناس دي ملهاش عقود زي ما بتقولي او ضمان صحي ،،هي دي المشكله

م/محمود فوزى يقول...

ازيك يادكتوره
جزاكم الله خيراعلى شعورك الطيب
فعلا الناس دي لو مش محتاجه جدا مكنوش اشتغلوا الشغلانه دي
طبعا انهم يشتغلوا كده احسن من انهم يشحتوا
واحسن مليون مره من انهم يسرقوا
وبعدين اسلامنا بيعلمنا اننا نعطف على المساكين والفقراء
ومانقص مال من صدقه

ده على الاقل الابتسامه فى الوجه

وبرضه فيه دور المجتمع من جمعيات خيريه
وبرضه الناس
يعنى مثلا كل شويه يديه اللى فيه النصيب
فى العيد مثلا كيس لحمه
حاجات كده يعنى
وكله بثوابه
هو فيه حد مننا مش محتاج الثواب

اشكرك مره تانيه للموضوع المهم جدا ده
ربنا يكرمك ويسعدك

Tamer Nabil يقول...

الانسان لازم يشتغل عشان يقدر يجيب لقمة عيشة بالحلال

وياريت كل واحد مقتدر يساعد على قد مايقدر هيعود الية اكيد

مع خالص تحياتى

د. شلافييط يقول...

ممكن يكون اهلك يا دكتورة هما اللي علموكي التعاطف مع الناس دي بس الأغلبية بتعلّم اطفالها احتقار الناس .
بس السؤال المهم هل اهلي واهلك والناس كلها علّمت اطفالها ان فيه احتمال يجوز بنته لواحد من دول؟
لييييييييه؟
الناس معذورة برضه
في بلدنا الطبقة دي مهمشة (زينا كلنا برضه) بس انتي بشوية فلوس معاكي بتعملي لنفسك منظر يحسسك شوية انك مش مهمشة لكن من جواكي حاسة انك مهمشة.
الناس دي لازم يبقالها حد ادنى للرواتب لا تقل عنهم ولا يقل ان اي موظف .
الناس دي مالهاش تأمين صحي.
اي دولة فالعالم مبيشغلوش حد مالوش تأمين صحي وتأمينه الصحي بيكون مغطى من مؤسسته.
نظرة الناس الدونية للناس دي جاءت من هذا المنطلق
مرتبات متدنية + عدم وجود تأمين صحي + عدم وجود احترام للمهنة المبني على العاملين الأولين.
علشان فعلا نحسس الناس دي اننا بنحترمها لازم الموضوع ده ينبع من تربيتنا لأطفالنا وتربية حكومتنا لينا !!!!!

الشعب لابد له من حكومه تشكمه يقول...

لاحول ولا قوة الا بالله..
عارفه فى ناس خريجين هندسه وبيدورا على شغل وتخيلى فى مصانع 6 اكتوبر عرضوا عليهم وظيفة عمال,,
انا مبقلش ان الشغل عيب ولا حرام طالما حلال لكن دا ظللللللللللم...

لا حول ولا قوة الا بالله,,

الاكل العيش دلوقتى صعب اوى بجد.

Ashraf يقول...

والله حرام ولا حول ولا قوة الا بالله العلى العظيم

ياجماعه فيه ايه هى الرحمه اتنزعت من قلوب البشر

ارحموا من فى الارض يرحمكم من فى السماء

richardCatheart يقول...

للاسف مافيش حد واخد حقه ولا هاناخد حققونا لا غلابه ولا طبقه متوسطه ولا الهوا

على راى صبحى ماراحت خلالالالالالالالالاص

دا الواحد بيشوف مأٍسى وناس تقطع القلب
والواحد من العجز ساعات بيكره عشته
المشكله مش الشغلانه صحيح الزباله فى مصر تقرف الكلب بس بردو شغلانه شريفه المشكله ان الدوله نفسها ماتديش حقوق
ولا تجاره ولا اداب للناس العاديه
مابلك دول مافيش احساس بجد
هههههه قال ايه ويطلعو يقولك نسبه تجار المخدرات عاليه اوى والحرميه كترو
وحرميه الغسيل رجعو مش عارفين ليه تصورى الظاهر فكرنهم بيسرقو وينهبو ويشتغلو شغلانات منيله هوايه
لينا وليهم ربنا اللى احسن من الكل

تسلمى على البوست اللى يقطع القلب دا وربنا يشفى عم سيد وزميله

تقبلى مرورى

كيكى عوووووو يقول...

مادام ان شاء الله كلنا هنهتم وكلنا ايد واحدة يامرسى
حبيت اقولك
كل سنة وانتى طيبة وربنا يخليلك شوشو
ها!!

ستيتة حسب الله الحمش يقول...

حمدي السيد ماشي بورقة في ايده وعمال يصرخ انه معاه فتوى شرعية بإن الأطباء يجوز لهم الزكاة وفتح باب التبرع فعلا بس من الأطباء للأطباء

الأطبااااااااااااااااااااء

انا مش بتريق على فكرة

ماشي
بس خلاص

emymony يقول...

لا حول ولا قوة الا بالله
والله الناس الغلابه كتير اوى
بس عايشين وراضيين وفى ناس بتدعى الغلب
ربنا معاه يارب ...قدر الله وماشاء فعل
لهم الله وحسبى الله ونعم الوكيل فى اللى كان السبب حقوق ضايعه وحاجه استهتار بارواح الناس اكيد مش اقصد اللى خبطه بس
تحياتى

ماما أمولة يقول...

والله يا بنتي قلبنا تعب من كتر اللي بنشوفه

ولا حول ولا قوة الا بالله

تقديري لك حبيبتي

شفـقــة و إحســــان يقول...

زى ما انتى قلتى يا دكتورة الناس دى محتاجة الشغل ده
وغلابة اوى ولو ما كانش الشديد القوى ماكانوش اشتغلوا شغلانة زى دى
وياريت لو كل واحد فينا يقدر يساعدهم
ربنا يرحمهم ويعينهم على مواجهة ظروف ومتطلبات الحياة

صيدلانيه طالعه نازله يقول...

سمع هوص (Abo 3li)
انا كمان باحترم الناس دى قوى لانهم بيتعبوا بجد و بيدوسوا على نفسهم عشان يكفوا ولادهم و اهلهم شر السؤال

تحياتى

صيدلانيه طالعه نازله يقول...

7annen

ربنا يكرمك
نورتينى

صيدلانيه طالعه نازله يقول...

فتاه من الصعيد

المكان اللى كانوا فيه و الله كل يوم بدل الحادثه اتنين
لربنا يستر على الجميع
منورانى

صيدلانيه طالعه نازله يقول...

Foxology

جنيه واحد
هم يضحك و هم يبكى

بس حنقول ايه بقى

منورنى

صيدلانيه طالعه نازله يقول...

لولا وزهراء

زهراء

مين قال ان كلامك ملخبط
بالعكس
انتى بتتكلمى عن كذا فئه مهمشه محتاجين الاهتمام

كلامك جميل و مفيهوش رغى خالص
منورانى دايما

صيدلانيه طالعه نازله يقول...

فاتيما

انتى عارفه يا تيما من بعد الحادثه تعالى شوفى الشارع شكله ايه
و كل اللى يعدى يشتكى من الزباله و يشتم الزبالين
طيب مش تفكر و تقول راحوا فين و لا جرالهم ايه
اللى يغيظ اننا منعرفش قيمتهم غير بعد ما يختفوا و طول ماهما موجودين قدامنا بننساهم و نحتقرهم

منورانى يا تيما

صيدلانيه طالعه نازله يقول...

sony2000

كلامك صح
لان مالهومش نقابه مش حيقدروا يوصلوا صوتهم

تحياتى

صيدلانيه طالعه نازله يقول...

adel

ههههههههههههه
حلوه حكايه النصب دى
انا فعلا اما باكون فى القاهره على الكبارى خصوصا تلاقى الكناسين سايبين شغلهم
وواقفين للرايح و الجاى
كل سنه و انت طيب يا بيه
و كنت باستغرب قوى
دلوقتى انت نورتنى و فهمتنى كمان

فين المثاثات موصلتش لييييه

صيدلانيه طالعه نازله يقول...

سبايدرمان spiderman

الحمد لله ان كلامى عجبك
و ربنا يسلمك يارب

منورنى

صيدلانيه طالعه نازله يقول...

star in the sky

فعلا الموضوع محتاج تكاتف بين الطبقات كلها عشان يبقى الكل مستورين على الاقل و ده اقل حاجه

صيدلانيه طالعه نازله يقول...

GHARAM

انا مكنش قصدى ان الشغل عيب
انا كنت باتكلم عن حال الناس دى و حال اهلهم لو حصل لهم حاجه تمنعهم من الشغل
و كمان عدم تامين حياتهم و ما بعدها عن طريق المعاش

منورانى دايما يا جميله

صيدلانيه طالعه نازله يقول...

Tamer Nabil

لازم كلنا نساعد بعض عشان الناس دى تقدر تعيش بالحلال
منورنى

صيدلانيه طالعه نازله يقول...

م/محمود فوزى

انا بالاحظ الناسالمحترمه اللى فى الشارع عندنا بتعمل زىما حضرتك قلت بالضبط
فى الاعياد و المناسبات اللى بتكون محتاجه مصاريف
ربنا يدى الجميع على قد عملهم و نيتهم

صيدلانيه طالعه نازله يقول...

Ashraf

لو كل واحد فى المجتمع رحم الاضعف منه او الاقل منه
حاجات كتير حتتصلح

صيدلانيه طالعه نازله يقول...

د. شلافييط

يامن باشا
كلامك صح
الاهتمام بالناس دى لازم يبدأ من الاسره الصغيره و اكيد بالطريقه دى حيمتد للاسره الكبيره اللى هيا المجتمع كله
ساعتها حنبدأ نهتم بالناس دى و نحترمها و نبدأ نطالب بتحسين اوضاعهم

منورنة

صيدلانيه طالعه نازله يقول...

الشعب لابد له من حكومه تشكمه

اكيد الشغل مش عيب و لا حرام
الحرام ان الشباب ده ضيع عمره كله عشان ياخد شهادته و اهله حلموا بيه فى احسن مكان
و اما يطلع للحياه العمليه يكتشف الحقيقه المؤلمه و ساعتها بيكفروا بكل المبادىء و القيم اللى اتعلموها

صيدلانيه طالعه نازله يقول...

كيكى عوووووو

و الله انتى عسل يا كيكى
و انتى طيبه يا جميله

صيدلانيه طالعه نازله يقول...

richardCatheart

و لسه
كل الصور الاجراميه حتكتر طول ما فيه بطاله
و طول ما هو مفيش عداله فى توزيع الثروه
ووجودها فى ايد من لا يخاف و لا يرحم

منورانى

صيدلانيه طالعه نازله يقول...

ستيته حسب الله الحمش

مفهمتش دى

يعنى الدكتور المليان يكب على الفاضى
طب حيكب ايه بقى فلوس و لا يديله عيانين من عنده عشان يملا العياده

ضحكتينى يا توته و انا ماليش نفس
منورانى

صيدلانيه طالعه نازله يقول...

emymony

اكيد مش قصدك اللى خبطه بس
و لا انا كمان

ربنا عليه خلاص الحقوق

صيدلانيه طالعه نازله يقول...

شفـقــة و إحســــان

ياريت فعلا الكل يساعدهم لان فعلا ظروفهم وحشه قوى

منورنى دايما

صيدلانيه طالعه نازله يقول...

أمل حمدي

كلنا بنوصل اخر اليوم لحاله من الخنقه و القرف من كتر اللى بنشوفه و بيعدى علينا

منورانى

نهر الحب يقول...

يا دكتورة
بصى والله الزبال بتاعنا السابق دا يعنى ايام ما كانت بورسعيد نظيفة وقبل ما يدوها لشركة مصر سرفيس اللى مش بتعمل حاجة 00 كان كلية تجارة وبصراحة انا احترمتة جدا لانه يعمل بشرف ولا عاطل ولا حرامى
اما عن الحادث بصى فى ناس كتيرة جدا بتستهين بحياة الفقراء
او بتخاف من تحمل مسئولية اخطائها
بس نحمد الله عزوجل انها جت سليمة وربنا يحفظهم ويحفظنا


سلامات

مصطفى أبوزيد يقول...


هما دول على رأي بلال فضل السكان الأصليين لمصر - الناس الغلابه اللي للأسف ناس عاديه زينا بـ يبصولهم من فوق و كأنه بيعمل حاجه حرام

لسه كتير قدام مجتمعنا علشان يحترم بتاع الزباله زي ما بيحترم المحافظ و الوزير

و حتى ذلك الحين هذه السخافات مستمره في الحدوث

تقبلي مروري

قيس بن الملووووح يقول...

نحن في حاجه الي رايك في مشاكل القراء علي مدونة "دقات قلب بعد الخمسين"

كيــــــــــــارا يقول...

ياريت ياعلا

للاسف الناس بتتكبر مش يعرفو ان اللي

اداهم النعمة سهل اوي ياخدها منهم


كلامك في البوست دا متنشن صح

Cute Kitty **sookra يقول...

لولا

مساكى شيكولاته
ماعنديش غير كلمتين
لاحول ولاقوه الا بالله
موش لاقيه حاجه اقولها

Wanda يقول...

الموضوع فعلا حلو
مع انى بحاول اقصر فى التعليقات
بس حعلق قبل ما تنزلى حاجة جديدة

بصى يا صيدلالولة :-)

موضوع القمامة و النظافة موضوع حيوى قوى
علشان ننظف بجد كبلد لازم نربى الاطفال من جديد على نظرة ان النظافة من الايمان فعلا مش مجرد شعار، انهم ميتكسفوش يشيلوا ورقة او كلينكس او كيس شيبسى وقع منهم او من غيرهم و يرموه فى اول صندوق

ان مش الى بينظفوا من احقر طبقات المجتمع لا دى مهنة زى كل المهن و مهنه مهمة قوى لينا
لما بتوع الزبالة قلبوا على المجتمع الى ذبح خنازيرهم (و جه مصدر دخل ليهم) القاهرة و الجيزة غرقوا زبالة و لسه مقبوش منها على ما اعتقد لحد دلوقتى

هما مش كلهم غلابة
الموظفين منهم زى عم سيد هما الى غلابه انما الشركات ديه بتكسب قوى

فى الهند الى بينظفوا بيعتبروا من طائفة المنبوذين يعنى عليه القوم مفروض ميلمسهوش ليتنجسوا :-(
فى اوروبا الى بينظفوا الجاليات المهاجرة زى الهنود فى انجلترا ، السنغالين فى فرنسا ، الاتراك و الالبان فى المانيا (كده يعنى بيستوردوا حد يشيل الزبالة لانهم مجتمع نظيف ) و الخليج العربى تقريبا كله كذلك

هنا مفيش اجارية للنظافة لا موظفين و بيقبضوا شكلهم كويس لانهمم بيشوفوا شغلهم بذمة:-) و عادة يا الصبح قبل الشغل يا اخر اليوم بعد انصراف الكل

اعتقد فى اليابان مبيستوردوش برضه لانهم بيتربوا فى المدارس على اسلوب خدمة المجتمع بالنظافة
عيال بيمسحوا ارضية فصلهم مرة كل اسبوع ، شوفتها فى برنامج

يعنى عم سيد نساعده ازى
مش بحسنة
لا باننا نخفف الحمل ، منرميش زبالة كفايه عليه كنش التراب و الغبار الى الجو بيردم بيهم المكان
اننا نطالب كمجتمع بان شركته تيسرله طريقة امنة يمارس بيها وظيفته و يقبض مرتب معقول مع دخل الشركة من الزبالة
و ان يتم تعويضه و تحقيق العدالة ليه و لاسرته
و اننا لما نشوفه نرمى عليه السلام مش نتلفت بنأفف منه

بيتهيلئ الطرق ديه اكرم لانسانيته

Sameh Ezzat - (خواطر خاطر) يقول...

شئ مؤسف ..