الخميس، 4 مارس 2010

مجرد سؤال




من كام يوم قريت مقال كان كاتبه احمد حلمى الفنان المشهور و عجبتنى فكرته قوى

احمد سأل سؤال مجرد سؤال

قال الشاعر ابو العتاهيه اما قال

الا ليت الشباب يعود يوما فأخبره بما فعل المشيب

ليه اهتم بفتره الشباب و ما قالش الا ليت الطفوله تعود يوما

اشمعنى كان اهتمامه بالشباب و تجاهل الطفوله خالص

طبعا انا بما انى لسه يعنى اعتبر فى مرحله الشباب

الا اذا كان حد عنده اعترااااااض يعنى

حاسه ان فيه ناس معترضه

ياريت المعترض يتفضل يسكت و الا حاجيله اوريه شغله

تقريبا فاكره طفولتى بكل ما فيها و لسه منسيتهاش قوى

متهييألى الراجل كان بيحن لشبابه عشان هو اقرب مرحله للمشيب

وحاسس بالفرق بين الاتنين

جايز اه و جايز لا

انا عن نفسى بافضل طفولتى كتير عن مرحله الشباب

اقولكم ليه

الطفوله سن اللعب و الانطلاق و الفرحه الكبيره اللى مالهاش سبب و لا مبرر غير انها فرحه بالدنيا

مفيش مسؤليات .......مفيش هموم ................مفيش اى حاجه غير التفاؤل و الامل اللى من غير مناسبه

انا عشت و الحمد لله طفوله سعيده فى اسره مترابطه

بنحن على بعض و نحب بعض

من الاخر معنديش سبب يخلينى اكره طفولتى


بالنسبه لأى بنت شرقيه مرحله الشباب بتبقى مرحله القيود

ووضع الاسس الصارمه اللى على اساسها البنت حتكمل بقيه حياتها

و طبعا الاسس دى بتختلف من حيث الصرامه و اللين من اسره لاسره و من مكان لمكان

طبعا بالنسبالى انا من الاخر شبابى ضاع منه خمس سنين

فى المذاكره و تصوير المذكرات و الشيتات و الامتحانات

فى الكليه الهم اللى انا دخلتها و اللى اكتشفت بعد ما خلصتها

انها كانت خدعه كبيره و نصبه آخر حاجه


اوعى تزعلى يا واندا

و طلعت منها خبط لذ على الجواز و مسؤلياته

يعنى من الاخر

ملحقتش اعيشه زى الكتاب ما بيقول

المصيبه بقى ان من يوم ما بدأت افهم و استوعب و انا نفسى ابقى كبيره

و البس جزمه بكعب تعمل صوت و انا ماشيه

و احط ميك اب زى البنات

و اما اشوف برنامج امانى و اغانى و الاقى بنات اعدادى ضاربين بقهم روج

و انا اللى فى ثانوى ابيض و اسود و اجز على سنانى عاااااااااااااااااادى

و اقول لماما شايفه البنات

و اخويا ابو لسان طويل يقوللى طب هما بنات مالك انتى بيهم

و اروح حدفاه بالمخده فى وشه

من الاخر مشوفتهااااااااااش قوى و مش اعرف عنها كتييييييييييييييير



انتوا بقى اللى معانا و حوالينا و وسطينا

لو حنيتوا فى يوم لمرحله من حياتكم حتحنوا لايه و ليه

عايزه اعرف اسبابكم بصراحه ووضوح

متتكسفوش انكم تقولوا بتحنوا لايه و تكرهوا ايه


مستنيه اشوف افكاركم معايا هنا


هناك 55 تعليقًا:

كيــــــــــــارا يقول...

مش قلتى هتنامى ايه الناس دي

اقولك حن ليه

حن لايام طفولتى لما كان جدى عايش

وهحن لايامى حاليا

والسبب ان الفترتين دول اسد ايام حياتى

ويارب يكملوا علي خير

صيدلانيه طالعه نازله يقول...

كيارا

انا مبسوطه انك اول تعليق عند لاول مره
انتى حد جميل قوى يا بت انتى
ربنا يهنيكى يارب و يسعد ايامك و يحققلك كل احلاااااااااااامك على خير

ياااااااااااااااااااااارب

Ashraf يقول...

مثل ما قال الفنان عادل امام
كل مرحله لها معطياتها ومسئوليتها

وليها كمان حلوها ومرها

فى الطفوله الصداقه البريئه والبراءه

وفى الشباب الحريه مع تحمل المسئوليه

وكل له جماله

د. شلافييط يقول...

انا بقى بحن للحظة اللي قلتلك فيها
طب دول بنات انتي مالك بيهم !!!!
انا فاكر اللقطة دي
دي بتاعة ال3 بنات اللي بقوا يجيبوهم فالمقدمة بتاعة البرنامج
على اغنية محمد فؤاد
عيونك حلوة
حلوة حلوة
خدودك غنوة
غنوة غنوة
واحمد مختار ايام مكان ضارب ورنيش اسود فالصلعة علشان ميبانش انه اصلع
يااااااااااه
ذكريات

صيدلانيه طالعه نازله يقول...

Ashraf

كلام جميل كلام معقول

مقدرش اقول حاجه عنه

صيدلانيه طالعه نازله يقول...

د. شلافييط

يا بااااااااااااااى ده انت قلبك اسود قوىىىى

وكمان فاكر انهم كانوا تلات بنات

ناقص تقوللى ان فيهم واحده كانت لابسه حلق كبير مدور و شعرها بنى فاتح و شبه شيرى عااااادل

هههههههههههههههههه

منورنى يا يامونه

P A S H A يقول...

الإجابة الحاليه اللي في ذهني .. يعني مش جواب نهائي هه ؟؟



نفسي أرجع جنين !!


مممممممممم .. مش لاقي سبب منطقي بصراحة !

بس ده اللي حسيته دلوقت .. ممكن كمان شويه أكون فكرت !

تحياتي

:))

سلام

adel يقول...

lمرحي انا اول وغد يختار الطفولة و من زمان :)

1-الطفولة كان فيها اجمل لحظات عمري

2-الطفولة كان فيها كل مسلسلات الكارتون اللي بحبها زي النمر المقنع

3-كنت طفل في اوائل التسعينات بس يظل اجمد مزيكا اتعملت في مصر و اغاني هي الفترة بتاعت طفولتي

لذلك بتمني من ربنا ساعة واحدة في الطفولة

أبو حميد يقول...

شوفى يا دكتورة:
أحلى مرحلة فى حياتى هى مرحلة هى مرحلة تالتة ثانوى والجامعة, ليييييه؟
تالتة ثانوى كانت من أسهل سنين حياتى الدراسية, كنت مركز وعارف أنا عايز إيه وكنت شايف إن تحقيقه سهل وحققته الحمد لله
مرحلة الجامعة عست فيها أحلى أيام وطلعت منها بأجمل أصحاب وخصوصا صاحبى الأنتيخ :) وماكانش فى أى مسؤليات غير إنى أنجح ودى كانت حاجة مش صعبة على الإطلاق

تحياتى يا دكتورة

ايوشة يقول...

هى مرحلة الشباب اهى المرحلة اللى المفروض بتحدد حياة الانسان فى المستقبل من خلالها بيحدد مصيره ويبنى مستقبله ده المفروض يعنى
بس الحمدلله مفيش شباب خالص دلوقتى بقيت مرحلة كلها كابة واكتئاب وخنقة وملل وقرف ونكد وكل شئ سئ فى الدنيا
وزى ما حضرتك قولتى البنات ف المرحلة دى كانت بتبقى قيود وخنقة ليهم
بس ده كان لغاية سنتين فاتوا كده دلوقتى ماشاء الله البنات مش عليها اى قيود خالص
غير بس احنا اللى حظنا كان وحش وطلعنا فى الجيل القديم
انا نفسى مش عايزة ارجع لاى مرحلة فى حياتى انا عايزة اخلصها بصراحة بسرعة اروح ارجع تانى

فتاه من الصعيد يقول...

اكيد نحن للطفوله ... ماهو مفيش غيرها :)

لسه فتره الشباب بتدينا على دماغنا :)

تحياتي

لـــولا وزهـــراء يقول...

دكتوره علا
-*-*-*-*-*

حلو اوى الموضوع وبيحمل جانب انسانى عالى كمان وفى وجهة نظر فلسفيه
شكلك كنتى ادبى يا دكتوره هههههههههه

المهم نبدا على بركة الله ...
الحمد لله عشت مرحلة طفوله جميله جدا جدا واقولك على سر كمان انى لسه جوايا طفله وفيها شقاوه ممكن تسالى الناس المقربه ليا يقول انى شقيه جدا جدا وطفله اوى مش عيله يعنى
اما بقى مرحلة الشباب هو مش سن احنا بنعيشه لكن احساس انتى عارفه انى اعرف ناس كبيره فى السن لكن لازال جواها شباب .......

اختك بقى عايشه حياة الشباب والطفوله مع بعض ويمكن ده له لاسباب كتير لا داعى لذكرها .....
انتى عارفه فى ناس بتحن للطفوله ليه لان كان اكبر همك فيها هو لعبتك مافيش مسئوليه ولا مشاكل ولا هموم بس بينى وبينك برضه دلوقتى الطفوله مش بقيت زى زمان خلاص ما بقاش في اطفال ولا طفوله........
برضه رغيت كالعاده ......

تقبلى اطيب امنياتى لكى بالسعاده والبوست تحفه تحفه تحفه ..........

زهراء

richardCatheart يقول...

صباح الفل هههههههههه انا مش من المعترضين اه اتجوزنا وخلفنا بس لسه انن هو حد ليه عندنا حاجه اه صحيح بنتى بقت اطول منى بس بردو احنا انن هههههههههههه

ما انت وانت بتتكلمى جوبتى على السؤال
الشاعر راجل قال الشباب لان الرجاله بيعرفو يستمتعو بقتره شبابهم وبيروحو ويجو وصحابهم وممكن طبعا صحباتهم وعنكره وهنكره
عيشه فاعشان كده بقول الشباب يشوف كتفه ازاى المشيب خوف من الاخره اللى المفروض قربت والتزام فى كل شىء غير الروماتيزم والسكر والضغط مشيب بقى هههههه اما احنا فانت قولتى اللى بحصل لينا فى فتره الشباب الحاجه الوحيده اللى بنطلع بيها شويه الحب بتوع الخطشوبه كل واحد بقى بيحن لاكتر فتره استمتع فيها

انا بقى بحن من من ابتدائى كده لغايه
ثانوى دى فتره الدلع واللعب كله اولغايه بعدها بسنه كده علشان اتخطبت كانت جمييييله و اتجوزت بعدهاومن يومها بقول ليت الابتدائى والثانوى يعود يوما حتى اخبرهم بما فعلا بى الحب والجواز ههههههههه

تسلمى على البوست الحلو دا
تقبلى مرورى

عاشقه الرومانسيه يقول...

الطفوله سن اللعب و الانطلاق و الفرحه الكبيره اللى مالهاش سبب و لا مبرر غير انها فرحه بالدنيا
مفيش مسؤليات مفيش هموم مفيش اى حاجه غير التفاؤل و الامل اللى من غير مناسبه
****************
انتى قلتى اللى نفسى اقوله
مالهاالطفوله؟؟؟!!!ما كانت حلوه والواحد كان عايشها طولها وعرضها
مصروف وفُسح وضحك ولعب ودلع ومش بيعمل اعتبار لاى حد
والله انا باحقد على اى طفل اشوفه واقوله اتدلع ياابنى براحتك بكره تشيل الهم وتضرب نفسك 60 جزمه

انا زيك عايزه طفولتى ترجع تانى لكن شبابى لأ
لانى لما كبرت عرفت يعنى ايه الم ومسئوليه وحرقة دم من الدنيا والعيشه واللى عيشينها

Foxology يقول...

الواحد بيحن دايما لأيام الطفولة حيث لامسؤلية لا التزامات مجرد فرحة بالدنيا زى ما حضرتك قولتى

تحياتى

7annen يقول...

اعتقد يعنى ان فتره الطفوله مش بنبقى متذكرنها اوى
زى فتره الشباب بيكون نضجنا اكتمل وواعين للى بيحصل

م/محمود فوزى يقول...

ازيك يادكتوره
انا برضه من المفترض اكون فى مرحله الشباب
ده على حسب مقياس ريختر
وفيه ان انا من الشباب

طبعا كل فتره لها اوقات حلوه واوقات مايعلم بيها الا ربنا

بس بصراحه الطفوله جميله طبعا
مفيهاش مسئوليه ولا اي حاجه
واى حاجه لو عملتها ممكن يتقال عليا عيل وغلط
وان كان طبعا الامر ميسلمش من عواقب

المرحله اللى بعدها بصراحه مرحله الكليه
ودى نقطه قليل جدا اللى بيتفق معايا فيها
انا برضه كنت فى كليه 5 سنين من بتوع العشر الاف امتحان فى الشهر وشيتات ومذاكره
لكن برضه بصراحه كانت ايام جميله
يمكن بعد كده باه بقت المسئوليه اكبر والشغل باه بعد كده
بس يمكن برضه عشان الكليه كان فيها ناس كويسه اعرفها ودفعتنا كانت جميله
ده برضه بالاضافه الى نشاطات مفيده كنا بنعملها بفضل الله

عارف ان فيه ناس كتيره هاتعترض على نقطه الكليه وهمومها
بس كل واحد ورايه باه
هو مفيش حريه ولا ايه
شكرا على الفرصه دي للكلام
ربنا يكرمك ويوفقك

sony2000 يقول...

انا بقي لو هحن هحن لايام اعدادي
كانت مقفوله اكتر منك كدا
بس وقتها كانت جدتي الله يرحمها موجوده
وكنت فرحانه بوجودها فحياتي
كانت فعلا محسساني اني عندها اكتر من امي
وكل ماتقولي حاجه او تذعقلي علي حاجه بعملها موش صح اقولها ليه ياجدتي مهو اللي حولينا بيعملوها عادي
تقولي لا انا خيفه عليكي واقعد اقولها ليه يعني
تقولي اعذ من الولد ولد الولد
الله يرحمها
تقبلي مروري وتحياتي

قبلاوى يقول...

السلام عليكم

هو فيه سؤال برضه ..

كاتبه بلون احمر على خلفيه لونها احمر ليه ؟

ثانيا ...

فعلا الكليات العملية مش بتخلى الشاب من دول يقدر يعيش شبابه زى الاولاد التانيين ..

انا شخصيا مش الواد اللى بيذاكر اوى يعنى .. بس مش عارف ابقى شاب ولا عارف اطلع الاول ع الكليه

همس الاحباب يقول...

اممممممممم سؤال ينطبق تحت السهل الممتنع
انا نفسى ارجع طفل لما تحمله الطفولة من براءة وتلقائية وبعد عن الذنوب
وفترة الشباب من تمرد وصداقات
والفترة الحالية ادينا عايشين فيها بحلوها ومرها
من الاخر كل مرحلة لها مميزاتها وعيوبها
يعنى نبدا من مرحلة الجنين فى بطن الام بياكل وبيشرب وعايش مانتخ على الاخر
تحياتى

د.آيه يقول...

أكيد في كل مرة الحلو و الوحش ..
و كتير بتعدي أوقات بيتمنى الانسان ان هي تبقي للأبد بس بتتغير و بيجي غيرها ..
يعنى ممكن تقولى أجمل يوم في حياتى يوم لسه ماعيشتهوش .. عشان تستنى الأفضل دايما ..
الطفولة و اللعب و جدو
و المراهقة و الحب و المشاعر اللي بلا حدود
السباب و الطموح و الأمل
و مرحلة الأمومة و تشوفي طفلك حتة منك بتضحك و بتتحرك أدامك
أكديد كل مرحلة فيها حاجات حلوة .. و طبعا فيها صعوبات و حاجات وحشة

شمس النهار يقول...

ازيك

انا بحن زيه للشباب طبعا ده سن التعرف والتفتح علي الدنيا
الوصلة الاساسيه بين الطفولة والكهولة
ولو عدت صح الباقي هيبقا صح
يعني لو صنا هذه المرحلة اللي جاي هيكون زي الفل

بس انتي منضمه لطاااااابور المخدوعين فيما درسوا
زي كده


سلامي

Pink Dreams يقول...

بصى هو كل سن فيه الحلو وفيه الوحش

بس متهيألى احن لفتره الطفوله

أيام ما كنت لسه صغيره واهم حاجه فى دماغى اللعب وبس

وكانت الدنيا لسه بخير

أما دلوقتى فمش عارفه بصراحه بقيت ساعات كتير اشوف الدنيا متقفله فى وشى

بوست جميل

البنفسج الحزين يقول...

بصي انا هجاوبك الاول علي سؤال
اشمعني الشاعر اتمني يرجع لمرحله الشباب مش الطفوله....
لأن الشباب هو فترة اكتمال استمتاع الانسان بكل امكانياته ...
بمعني الطفوله مرحله يستمتع فيها الانسان بالصحه ولكن لا يكون عقله وتفكيرة ناضجين (يعني صحه ولا عقل فلا يكون الاستمتاع كامل)
والكهوله يكون الانسان عندة العقل والحكمه والخبرة ولكن بتكون صحته قلت وضعفت (فلا يكون الاستمتاع بالحياة كامل)
أما مرحله الشباب بقا فهي الفترة التي يستمتع الانسان فيها بالصحه والقوة والعقل والفكر معا فيستطيع فيها تحقيق ما يريد ...وطبعا هي مرحله العمل وبناء الفرد لنفسه وعشان كده هي أصعب المراحل علي النفس ...وألذها وأسعدها علي الاطلاق(أو المفروض يعني تبقي كده)...
تحياتي

Wanda يقول...

اخذ مقلب فى نفسى
و اقول انى بتنكش اعفرت عليك :-)))
و اعلق :-))

يا صيدلالولة بلاش مش حتخلصى منى كده :-))

اقولك ليه اختار الشباب :-))) نفهمكم و ناكل فيتامين سى من البرتقال الى عندنا :-))))

لانه ايام الشباب ديه اختيارنا احنا (:-) مفروض يعنى اننا بنتخذ قرارتها بنفسينا و حلاوتها بتكون من ايدينا احنا مش بادين اهالينا:-))

و بعدين فين الشباب ده :-))
و انا بقى بعترض :-))
نشوف بقى حتعملى فيا ايه :-)) وش مطلع لسانه

انت شكلك لسه مخلصتيش الطفولة اشاشا
عليكى واجبات مراجيح (لسه متكومين عليكى ) و استنى كده اقراء اللسته
50 نط حبل و 90 لعبة الاولى
35 مرة لعبة المساكة و .. كثير ابعتهالك ايميل احسن
الحقى قبل ميبقاش فيكى نفس و تطلعى فوق محملة باعباء الطفولة :-)))

احسن مرحلة عندى :-)))) فاتت
اممممممممممم
كله من اوله لاخرة على قد ذاكيرتى ما تجيب (اصلى نسايه قوى فاعتقد اغلبهم حلوين :-))

صحيح ذاكرتى شايلة برضه ايام و مواقف و وحدة فى الطفولة :-( مش حلوة قوى بس بطنشها

المراهقة كانت اصعب مرحلة تقريبا نسيتها برمتها :-)))

الشباب اممم احلاها و انا بستعيل فيها او بعمل روحى كبيرة :-))
لحد دلوقتى معرفتش الشباب مفروض يتصرفوا ازى :-))
يفكروا ازى او يتكلموا ازى :-)))

المهم قراراتى بشيها انا على دماغى لوحدى من ساعة ما دخلتها

الشيخوخة :-))) امم زى الطفولة اكيد
بس بيزيد عليها الهم بس و ادوية الضغط و السكر و الظهر و .. ودعاء الصيدلة لينا على الايراد الشهرى الثابت :-)))

بصى جملة "ضاع من عمرى" يعنى لو رجعتهملك كنت حتعملى بيهم ايه :-)))؟
بجد عايزة اديكى 5 سنين من عندى ، حتختارى تتدرسى ساعتها ايه؟؟
قوليلى و ساعتها نتفاصل :-)) و نتفق:-))

احلى ذكريات الشباب ذكريات الكلية
شكاسن من4 -8 ساعات و نخرج مش شايفين قدمنا
الفايتو الى كنا بقعد نرغى فيه زى مانكون قاعدين فى مطبخ
الكوجنزى الى بنتخيل حاجات تحت الميكرسوب لانها كلها قديمة و عدساتها شيش بيش و نضحك على تخيلتنا
السيوتيكل و رد فعل الولاد لما شافوا كريم الحلاقة الى عملناه :-))
الميكرو و حرقنا لشعرنا و تعورنا بالانبولات الجامده :-))
الكمياء باشكلها و انواعها و انفجرتها:-))

بذمتك مضحكتيش
مخرجتيش بذكريات و صدقات
و معلومات تضحك

معرفتيش محيط اكبر لعالمك ساعتها ؟؟
ركزى كده معايا

بصى فى الساعة البندول و ركزى معاها و لما اعد ل3 حتكونى نمت و بتحلمى و ترجع عيلة فى ال20 و اقررك عن ايام الكليه :-)))) و امضيكى على شيكات على بياض بالمرة :-)))


اكيد مش كل الى فاكرة الامتحانات الى بتيجى زى الاعصار و بتروح زية :-)) و سبحان الله كنا بنعدى ازى ومفيش وقت نذاكر :-))اشاشا

المهم الكتاب الى متمسكه بيه ده كتاب ايه ؟؟ كيف تكونين صيدلانية :-))) معداش عليا :-)) اتارينى صيدلانية فاشلة :-))

اول مرة كعب عالى و مكياج متفكرنيش
انا برضه كان عندى اخ اكبر و اتهريت منه

دلوقتى مبحطش اغلب الوقت و بلبس كعب عادى فى العادى ياما حاسة انى مش محتاجة ياما مليش مزاج :-))
و الغريب بحس ان السكرتيرة مش طايقنى علشان الموضوع ده :-)) لانها مش قادرة تخرج من بيتها منغير الفول ميكاب و الكعب (و هى قمر 14 تخيلى :-)

اذا احلى مرحلة عندى
امممممممممممم
قبل ما اموت على طول :-))))

فين الكركادية
و ياريت الاورجانك بتاع ايزيس لو سمحتى

سمع هوص (Abo 3li) يقول...

بما اني لسه في مرحلة الشباب... فا مفيش غير مرحلة الطفولة كا خيار...
بس برضو مش هختاروو..
مش علشان طفولتي كانت وحشة بالعكس..
بس انا شايف ان مرحلة الثانوي والكلية .. من الطف المراحل..
لان الواحد كان حر طليق...

انا مؤمن بمقولة "فترة الجامعة هي فترة التحرر من تسلط الأم.. والحرية الاخيرة قبل تسلط الزوجة"

وبما اني لسه متأهلتش.. ومفيش زوجة ولا بتاع... بس فيه مسؤوليات تانية تاعبة الواحد,,,

تحياتي يادكتورة علا

نهر الحب يقول...

مرحلة الطفولة يا فندم
ههههههه
مفيش احلى منها مرحلة بلا عناء تفكير ولا شيل هم ولا حتى ادراك لمدى قرف الحياة
مرحلة كان فيها بابا الله يرحمه موجود
وكانت الحياة بمبى جداااااااا

الطفولة مرحلة البراءة الامنتهية

تحياتى وحبى لك وكل اهل اسيوط

ستيتة حسب الله الحمش يقول...

انتي في مرحلة الشباب؟
سوفاج
انا تفلة نونو اساشا
ها أروح فين تاني
انا حابة نفسي زي ما انا كده

هو انا مجنونة يا منتي
ارجع طفلة
يانهار اثود
واذاكر تااااااااااااااااااااااني
ده انا بحلم اني اخلص السنتين اللي باقين وعلي النعمة اللي يقول لي ذاكري او اقرأي او اتطوري او اتهببي تاني لأشرحنه

قال الطفولة قال

ياريت تحطوا شرط في استمارة الرجوع

اننا نكون أميين
من بيت ببا لبيت العدل بلا تعليم :)

وحشاني جدا
معلش كنت امر بحالة هه مهببة واطن انني مازالت فيها
ها اخلص ان شاء الله على رئيس القسم وافوق وارجع فلة وشمعة منورة :)

Tamer Nabil يقول...

عارفة من راى

ان لكل مرحلة طعم وشكل تانى ويختلف عن اى مرحلة اخرى

ولكل مرحلة مميزات وعيوب ومهما كانت لاتعود بعد ان تذهب

ولكن هذة هى الحياة مراحل يمشى فيها الواحد من مرحلة الى مرحلة

مع خالص تحياتى

emymony يقول...

انا انا تمام ياباشا معنديش ادنى اعتراض لانضرب ههههههههههه
احلى مرحله فى حياتى هى مش طفوله اوى
يعنى مرحله الثانوى استاتذه تحبيهم وتحترميهم
احمل صحاب
الحياة حلوة من غير هموم
وكنت فى حضن جدو الله يرحمه
مكنتش مديه فرصه لطعم الحزن انه يظهر فى حياتى
يعنى كنت بانسى بسرعه وبفرح نفسى
الحمد لله على كل شىء
والزمن مش بيقف عند حد
اكيد بس عيبا انك لما بتكبرى بتتحملى مسئوليه
بس المهم تستمعتى بكل لحظه تمر فى حياتك بجانب مسئوليتك
مع خالص حبى وحبى

صيدلانيه طالعه نازله يقول...

P A S H A

اكيد ليها سبب انك
يمكن احساس داخلى انك نفسك تبدأ من الاول
بنيه جديده

صيدلانيه طالعه نازله يقول...

adel

غالبا الطفوله هى اختيالرنا كلنا لانها الاحلى و الانقى و الاجمل

تصدق فعلا احلى فتره ظهرت فيها اغنيات هى التسعينات

كل سنه و انت طيب

منونى يا دوووووله

صيدلانيه طالعه نازله يقول...

أبو حميد

فعلا انا بالنسبالى برضه ثانويه عامه كانت اسهل سنه
و الله اكتر سنه لعبت فيها و تقريبا مذاكرتش غير اخر شهرين
و لو كنت ركزت كنت جبت مجموع دخلنى وكاله ناسا

منورنى

صيدلانيه طالعه نازله يقول...

ايوشة

انتى على طول زعلانه يا يويو
يعنى مفيش حاجه حلوه عدت عليكى خالص فى حياتك
دورى كده اكيد حتلاقى

صيدلانيه طالعه نازله يقول...

فتاه من الصعيد

تعيشى و تااخدى غيرها يا قمرايه

صيدلانيه طالعه نازله يقول...

لولا وزهراء

زهراء
انتى فعلا طفله كبيره
بس طفله عاقله و رزينه
باستفيد و انا باتكلم معاها
ربنا يديم عليكى نعمه

صيدلانيه طالعه نازله يقول...

richardCatheart

هههههههههههههههههه
يظهر يا ااختى كلنا اتضحك علينا و مشفناش دلع غير فتره الخطوبه و اول كام يوم جواز
انا حتى خطوبتى كانت سبع شهور بس
يعنى حتى الدلع اتضحك عليا فيه

صيدلانيه طالعه نازله يقول...

عاشقه الرومانسيه

انتى حتقوليلى على حرقه الدم و النكد اللى بيجى للواحد من حيث لا يدرى
و انتى طبعا عارفانى و عارفه حالى

ياريت الطفوله فعلا ترجع

صيدلانيه طالعه نازله يقول...

Foxology

و انت كمان فى فريق الطفوله
كده منتخب الطفوله قرب يكمل

منورنى

صيدلانيه طالعه نازله يقول...

7annen

فعلا الشباب الوعى فيه اكبر و الفهم و الادراك اعلى

منورانى

صيدلانيه طالعه نازله يقول...

م/محمود فوزى

اكيد الكليه كانت ايام حلوه و جميله
بس انا ليا فيها ذكريات مش حلوه قوى عشان كده مش بفتكرها بالخير قوى

منورنى

صيدلانيه طالعه نازله يقول...

sony2000

ربنا يرحم الغاليين كلهم
كانوا فعلا طاقات نور فى حياتنا

صيدلانيه طالعه نازله يقول...

قبلاوى

انا برضه مكنتش الاولى و برضه مكنتش مبسوطه قوى
هيا كليات خنقه من الاخر و الله

صيدلانيه طالعه نازله يقول...

همس الاحباب

ايوه بس الفتره الحاليه مرها اكتر من حلوها لما الواحد بقه وجعه

صيدلانيه طالعه نازله يقول...

د.آيه

حلوه فكره ان اقول انا احلى يوم لسه معشتهوش
حاجرب اعملها و اقولك النتايج
منورانى

صيدلانيه طالعه نازله يقول...

شمس النهار

ازيك واحشانى جدا و الله
انتى كمان متعقده من اللى درستيه و ضيع عمرك
برااااااااافو برااااااافو
و ادى واحده كمان معايا فى الفريق

منورانى

صيدلانيه طالعه نازله يقول...

Pink Dreams

تفاءلى خير و ان شاء الله ترجع تتفتح فى وشك تانى

منورانى

صيدلانيه طالعه نازله يقول...

البنفسج الحزين

هو فعلا الرأى ده برضه صح
بس يمكن عشان انا باحب طفولتى اكتر متحيزه ليها شويه

صيدلانيه طالعه نازله يقول...

Wanda

حتى لو رجعوا الخمس سنين كنت حابتكر عشان برضه اضيعهم

و ياريت افضل طفله و اقضيها نط حبل و لعب استغمايه مش احسن من الحقن والقطره يا اختى

انا عايزه ارجع عيله
انتى مااااااااااالك

صيدلانيه طالعه نازله يقول...

سمع هوص (Abo 3li)

حتى لو مش متجوز اكيد عندك التزامات تانيه
انا كمان باحب مرحله ثانولى قوى ايام الشعننه و اللعب برضه
و الناس تبقى فرحانه بالدنيا و فاتحه دراعاتها للحياه
ربنا يفرحك يارب

صيدلانيه طالعه نازله يقول...

نهر الحب

و اهل اسيوط بيدحرجوا التماسى على اهل بورسعيد
ههههههههههههههههه
ربنا يهنيكى فى ايامك الجايه يا انوس
و تقدرى تعملى اللى يخلى بابا فخور بيكى فى عالمه الاخر

صيدلانيه طالعه نازله يقول...

ستيته حسب الله الحمش

انا برضه اللى مخوفنى برضه من الرجوع موضوع التعليم و المذاكره ده
لكن لو اميييييين
يبقى بييييس يا ماااااااان

صيدلانيه طالعه نازله يقول...

Tamer Nabil

يا واد يا عاقل انت يا بتاع المراحل و متطلباتها
انا عايزه راى قاطع
يا طفوله يا شباب
بسرعه
ههههههههههههههه

صيدلانيه طالعه نازله يقول...

emymony

ساعات يا ايمى بتدورى على المتعه بنفسك و متلاقيهاش

ربنا يسعد ايامك يارب

Wanda يقول...

حبه بس اطمن
انت فين يا صيدلالولة
اوع تكون اتفسحت ؟؟
بس ايه ده مش شايفة حد اتفسح معاكى
يبقى لازم و لا بد نجيب الحلاوة الطحينية بالفزدق :-)))

يارب بس تكون سبب الغيبة
انك بتعيدى بعيد المرأة :-))))
و طبعا ساعتها متعرفناش :-))))

ممكن لو قرارت تسيبى المدونة للعيال و ابوهم
ندخل نلعب براحتنا و لا حيبعوها فى المزاد ؟؟؟

الصيدلة يوازورون بعضهم البعض
يا سعادة البية ديه
حقها مش تاخذوها تفسحوها لا
هاتوها العباسية معانا تتونس معانا
ده مدونة مننا و من العيلة ياسعادة البية
دى اختى الصغيرة يابيه
هاتها انا بس هناك عند فطوم و احنا الاثنين نملصلك ودنها :-)))

عودى يالولة :-))