الأحد، 3 يناير 2010

رساله مهمه

بصراحه انا الفتره اللى فاتت لاحظت حاجه لفتت نظرى جدا و استغربتلها خالص


الابهات و الامهات بقوا هما اللى بيعملوا المصايب لعيالهم سواء بنات او اولاد مش العكس


ازاااااااااى بقى؟؟؟؟؟؟؟؟؟؟؟؟؟؟؟


من كلامى و مناقشاتى مع كذا واحده من صديقاتى سواء المدونات او غيرهم


الكلام جه ناحيه تأخر سن الجواز و سببه و ليه و ازاى و كلام من هذا القبيل


واحده حكتلى ان والدها و العريس اللى كانت مخطوبه ليه اتخانقوا قبل الفرح بكام يوم مش كام شهر


و الخناقه كانت طبعا على القايمه و المؤخر و المقدم و الكلام الفاضى ده و طبعا كانت النتيجه


ان الجوازه باظت على رأى عادل امام و البنت داخله على 28 سنه و العمر بيجرى و الاب و لا اتهزتله شعره


واحده تانيه جميله و حلوه و اهلها بقى كبروها على انها حلوه و جميله و ان سوق الحلاوه جبر و انتى اخر الحلوين


يعنى تقعدى تتشرطى و تطلبى و اللى يقدر على طلباتك يتفضل يكبش و يديكى


طبعا هيا صدقت كلامهم و عاشت الدووووووور قوى و كل ما يجى عريس لا ده قصير لا ده رفيع


لا ده بكرش و عريس و را عريس و سنه و را سنه و فجأه لقت نفسها عدت التلاتين و هيا مش واخده بالها


والولد اللى اهله قالوله سافر و لم فلوس و ارجع اشرط و اتشرط و البنات يا خويا على قفا من يشيل


سافر صاحبنا و رجع بقى بعد 10 سنين بقى و معاه شقه و عربيه و ارض فى البلد و اربعين سنه


شايلهم فوق كتافه و جاى يدور على عروسه 18 سنه اصله عايز واحده تدلعه و ترجعله شبابه


واحده ترفض لانها عاقله و عارفه ان فرق السن الكبير ده مشكله المشاكل وواحده توافق


و طبعا هيا برضه اهلها خلوها توافق عشان تشوف العز اللى عنده و برضه اهلها حينوبهم من الحب جانب


ادى مجتمعنا و اللى بيحصل فيه اليومين دول و ده تفكير الاهالى و اللى للاسف بيربوا ولادهم عليه


انا فعلا عايزه اقول للاب اللى عمال يتشرط على العرسان و يفاصل فى تمن بنته


يا ترى فى وسط اطماعك و خناقاتك دى فكرت فى بنتك نفسها و لا حاولت تسألها مره واحده


هيا عايزه ايه و لا نفسها تعمل ايه فى دنيتها


ما حسيتش ان عمرها بيضيع منها و احلى ايامها بتتسرق من بين ايديها و انت فى الطراااااااااوه خالص


و قال ايه خايف على مصلحتها!!!!!!!!!!!!!!


باقولهم برضه بلاش تنفخوا فى ولادكم و لا بناتكم قوى و تحسسوهم ان مفيش زيهم فى الدنيا


و انهم خساره فى اى حد ميقدرش على تمنهم لانهم للاسف بيصدقوكم و يعيشوا الوهم معاكم


لانكم ببساطه اهلهم و بيبقوا حاسن انهم حيخذلوكم لو اتخلوا عن اى شرط من شروط الجواز دى


حاولوا تعقلوهم و تفهموهم بدل ما تبقوا انتوا سبب مشاكلهم

هناك 34 تعليقًا:

Ashraf يقول...

والله المشاكل فى مجتمعنا والعقد والكلاكيع وكلها من غير اساس.

المفروض العالم كله فى ازمه ماليه طاحنه
طيب ليه مانيسرش -يسروا ولا تعسروا

ثانيا اين الدين -ذات الدين-

ثالثا: مايتبقى ليس المال ولا الجمال ولكن المتبقى هو الدين ثم شخصية الطرف الاخر


الواحد مش عاوز يعايب علشان مايقعدلوش فى اولاده بس العوانس مع الاسف من الجنسين لا يستطيع احد انكار زيادة عددهم بشكل ملحوظ
ده غير حالات الطلاق فى زياده
والارامل

والله الموفق والمستعان

(Joudy) يقول...

بجد عندك حق يادكتورة زمان كنا بنقول البنت هى اللى بتتشرط إن العريس يكون مريش ويقدر يجيب عربية وفيلا دلوقتى الأهل هما اللى بيحرضوا بناتهم انهم يفكروا فى كده مش فاهمين انهم لما يقدروا الانسان اللى بيتقدم بأخلاقه وشخصيته علشان يصون بنتهم مش بس يغرقها بالمال ويهنهاطبعا ده مش كويس نهائى

يارب كل الاباء يراعوا ولادهم بجد ويهدوهم للى يستحقهم ويصونهم

دمتى بكل الخير والسعادة

حلم بيعافر يقول...

الدنيا مصااااااااااالح

يوميات شاب منوفى يقول...

امال يادكتورة لو شوفتى الى بيحصل فى الارياف بلاوى كتير فى الجواز اقل شبكة بقت ب15 الف وعشرين الف وام البنت تقد تتشرط على الشبكة بالذات وتقول هى يعنى بنت اقل من البنات التانية .
حكاية حصلت عندنا فى البلد يوم كتب الكتاب وخلاص العريس والعروسة عملوا الكحك وعزموا الناس واتفقوا مع المازون ويطلع ابو العريس يضرب كرسى فى الكلوب ويحاول يلوع دراع ابو العروسة ويحطة امام الامر الواقع بس مشمتذكر السبب متهيئلى كان القايمة او المؤخر والجوازة كانت هتتفركش وكل حاجة اتاجلت لحد ما اهل الخير ادخلوا وحلو الموضوع وبقت فضيحة وعلى فكرة العريس والعروسة صيادلة

موناليزا يقول...

عندك حق فعلا
ورأيى تفصيليا ستجدينه هنا
http://monaliza110.blogspot.com/2008/11/blog-post.html
أدعوكِ لمشاهدته

Foxology يقول...

المغالاة فى طلبات الجواز هى السبب والنعرة الكدابة هى السبب والجاهلية القبلية هى السبب اللى هو نظام انتى مش اقل من بنت طنط باكينام ولا انت اقل من توتى ابن اونكل حازم والكلام الفاضى ده

ربنا يرحمنا برحمته

تحياتى على الموضوع الجميل

ستيتة حسب الله الحمش يقول...

ازيك يا علا
شوفي
كل اللي بتقوليه مش جديد
من زمان وقلة العقل بتخلي الناس تترس في حاجات تافهة وتسيب المهم

ومن زمان والتربية يا تعقد البنت خالص وتخلي معندهاش سنتي سيلف ستيم او تخليها طالعة فيها
والإتنين عقدة وغلط

ومن زماااااااااااااااااان واللي عنده ان شا الله سبعين عاوز بنت 18 عادي جدا
وراجل وميعيبوش شيء
وماما قالت له يا حلاوتك يا جمالك مفيش في "الجبلاية" مثالك

لما تحطي على كل ده ازدياد الفجعة المادية عند البشر
واندحار القيم الدينية والأخلاقية

تلاقي مجتمع الهنود الحمر وكسات لا تنتهي

ربنا يصلح الحال يارب

تحياتي على النصيحة الحلوة

قوس قزح يقول...

اولا كل سنة و انتى طيبة و سنة سعيدة عليكى يارب انتى و كل احبابك

ثانيا عندك حق فى كلامك جدا و اعتقادى العنوسة سببها البطر على العرسان و الاحلام اللى بتخلينا عايزين شريك للحياة سوبر ى كل حاجة و الاحلام دى عند الولاد و البنات و الاهل كمان

blue-wave يقول...

كلام صح مليون فى الميه يا بلدياتى
مع ان رسولنا بيقول اذا جاءكم من ترضون دينه وخلقه فزوجوة
لكن احنا خليناها اذا جاءكم من ترضون شقته وعربيته فزوجوة
ربنا يرحمنا

واحدة مفروسة يقول...

ياهلا يا هلا
ازيك يا علا
ايه الموضوع الجامد ده؟؟؟
لما نشوف يا حبيبتى حتعملى ايه مع بنوتك لما تكبر
ههههههه
بصي اولا لازم نقر و نعترف ان كل شي بيد الله و حده
و مكتوب البنت ديه حتتجوز مين و امتى و حتخلف ولا لأ
ثانيا خلينا بقا نتكلم على اللى انتى قلتيه
ده بيحصل بالظبط و المظبوط
بس اللى يفرس اليومين دول يا اختى
ان على رأى الحاجة ستيتة
ان اغلب البنات عندها فاجعة مادية
كل البنات و الامهات بتدور على المادة و العيشة السهلة لبناتها
و ده معاه مش بيفرق سن بقا
اللى تلاقيه ان شالله 70 سنة

و لما الاولاد الفللات شايفين البنات بتفكر فى ايه و ازاي
بيسافروا يكونوا نفسهم ولما يرجعوا زي ما انتى قلتى و العمر جري بيهم
بيبدأوا يدوروا على بنات وظاويظ صغنين
و لما يلاقوهم و يتجوزوهم
البنات الاكبر شوية يجيلهم اكتئاب
و يقعدوا يندبوا حظهم المنيل

بس تصدقى يا اختى احنا لازم نوعي البنات و الاولاد
برضه و نقولهم على اللى مستنيهم
ههههههههههههههههه
و لا نسيبهم يخلعوا؟؟؟؟

صيدلانيه طالعه نازله يقول...

Ashraf:للاسف معظم الاهالى بقوا كده
و للاسف الاولاد بعد ما بيتجوزوا مش بيقدروا يكملوا لانهم بعد ما بيطمنوا لموضوع الفلوس يبدأوا بقى يفكروا فى المشاعر و طبعا هيا مش موجوده من الاول

صيدلانيه طالعه نازله يقول...

(joudy):فعلا الشخصيه المحترمه والاخلاق الكويسه هيا اللى بتفضل حتى لو الفلوس ضاعت
ياريت فعلا الاهل يفهموا كده

صيدلانيه طالعه نازله يقول...

حلم بيعافر:بس مينفعش الدنيا تمشى كده خالص

صيدلانيه طالعه نازله يقول...

موناليزا :انا قريته يا مونى و بصراحه بوستك كان شامل جامع
نورتينى

صيدلانيه طالعه نازله يقول...

يوميات شاب منوفى:قصدك ايه بقى ان العرسان كانوا صيادله
هههههههههههههه
بس انت كلامك صح الاهالى بيعملوا حاجات غريبه و تفرس
انا كان ليا واحده صيدلانيه صاحبتى كان كل ما يتقدملها حد امها تقوله انت حتتجوز مشروع تجارى
شفتش خيبه اكتر من كده
نورتنى
كل سنه و انت طيب

صيدلانيه طالعه نازله يقول...

Foxology :الله يخرب بيت طنط و انكل دول اللى جايبنا ورا دايما بس دى حاجات بتحصل فعلا
كل سنه و انت بخير

صيدلانيه طالعه نازله يقول...

ستيته حسب الله الحمش:اكيد هو مش جديد بس اما الكلام بيتفتح مع حد و النقاش يدور الواحد بيبقى عايز يفكر بصوت عالى و يسمع اراء الاخرين
و بعدين ياريت نحصل الهنود الحمر يا اختى و لا حتى الجبلايه

صيدلانيه طالعه نازله يقول...

قوس قزح:دودو يا جميله فعلا هو بطر و الله
و مبقاش فيه بنت عايزه تكافح و لا تصبر
كله عايز كل حاجه من الاول
نورتينى يا جميله

صيدلانيه طالعه نازله يقول...

blue-wave:للاسف هو ده المنطق السائد دلوقتى و بصراحه منطق انتهازى خالص
و مينفعش فى الظروف اللى الكل بيعانى منها دلوقتى
مبروك الجواز و لو انها متاخره و عقبال ما نبارك على النونو

صيدلانيه طالعه نازله يقول...

واحدة مفروسة:روسه يا جميله
انا رأيى نسيبهم يخلعوا
هههههههههههههه
مفيش بنات عاقله بتخلع لانها كده بتخسر الجلد و السقط زى ما بيقولوا
البنت العاقله تصبر تصبر تصبر لغايه ما تطقق جوزها و تخليه يهرب بجلده و يسيب الجمل بما حمل
(وش شرير بيضحك)

Che يقول...

مش لاقى حاجه اقولها اكتر من الله على البوست .... مع انه فكرنى بتجربه شخصيه ليا .... بس عادى
و زى ما العمه ستيته قالت ... حالنا كده من زمان و فى الغالب هنفضل كده زمان تانى

صيدلانيه طالعه نازله يقول...

Che :لا يغير الله ما بقوم حتى يغيروا ما بأنفسهم
تفتكر ممكن نتغير؟
للاحسن طبعا!!!!!!!!!!
ياريييييييت

Tamer Nabil يقول...

بجد ياعلا

كلامك صح

فى حاجات الناس بتمسك فيها مسك الموت اللى مش عايز يموت رغم بعدها عن الموت

حاجات ممكن نعديها عشان الموضوع يمشى بس نقول اية فى ناس مخها قافل اللى تقول علية هو الصح وبس ولاتسمع لااى كلام اخر

ربنا يهدى الحال

مع خالص تحياتى

م/محمود فوزى يقول...

السلام عليكم
ازيك يادكتوره
جزاكم الله خيرا على الموضوع الهام
للاسف احيانا بيكون الاباء والامهات سبب لعدم الجواز من كتر حرصهم على اولادهم وبناتهم
يعنى مثلا موضوع العفش والقايمه والحاجات دي -باذن الله - بسيطه قدام سعاده بنتهم اذا كانوا شايفين العريس كويس اخلاقيا ودينيا
واذا كان مش قد كده فيبقى ليه الجواز من اصله سواء فيه عفش او لا

وهنا يبقى عوامل الاختيار والموافقه فى كذا عامل زى ما اسلامنا قال لنا
انه يكون متدين وصاحب اخلاق
وطبعا عامل التكافؤ موجود باذن الله
ربما الحاجات دي اهم العوامل فى الاختيار
وطبعا لازم موافقه البنت

انما باه جواز عشان فلوس فده مش الاساس
لان الجواز فى الاصل موده ورحمه
مش بيعه وشروه
زى ما فيه ناس فاهمه الجواز غلط

ربنا يهدى الجميع
ربنا يكرمك ويسعدك ويوفقك للخير

Mahmoud البطراوى يقول...

الكلام النظرى حلو .. وكلنا مقتنعين بيه واحنا هنا

بس صدقينى فى الواقع وعن تجربه .. مبتقدريش تعلمى كده

اذدواجيه انك (عاوزه تيسرى الموضوع والشباب رفان واحسن البنت تعنس).( هو دا كويس ولا نستنى شويه)
الاذدواجيه دى بتخلى الاباهات والامهات يعملوا كده
وملهاش حل
:D

ميمى واحمد يقول...

حفلة صغننة ل د / ستيتة ..

قولوا كل سنة وهيا طيبة في البوست ده

نهر الحب يقول...

التدوينة السوداء
ادعوا كل المدونين الشرفاء الى عمل تدوينة سوداء يوم 15/1 اعتراض على الجدار الفولاذى جدار العار والخزى

نهر الحب

نهر الحب يقول...

بصى انا رأى
ان البعد عن الدن والتقاليد الغلط سبب رئيسى فى كل دا

قلب ينبض بالحب يقول...

منقشتي معاكي للبوست ده هيبقى بيني وبينك دلوقتي انا جاية اشوزفك فين بقالك كام يوم يارب تكوني بخير ووحشاني يالولا

rovy يقول...

السلام عليكم ..
الحمد لله اولا انك طلعتى انتى بصراحة انا كنت قلقت و قررت ما اكلمكيش على الماسنجر الا لما اتأكد انك انتى ..:)
البوست جميل و عندك حق اكيد بس اللى عاوزه اقوله لكى ان اكثر شىء محزن ان البنت اللى بتعدى الثلاثتين بتعتقد انها انتهت مع انها ممكن يكون ربنا شايلها سعاده كبيره جداا .. المهم انها تفضل مهتمه بنفسها علشان نفسها مش علشان العريس و وقت ربنا ما يريد حيجى ان شاء الله و ربنا يارب يسعد كل البنات ..
تحياتى بكى اختى الغاليه و اتمنى نتكلم قريب ان شاء الله

الفراغ يقول...

انا عن نفسى بقعد افكر فى الناس التانيه
اللى فى امريكا واوربا
ليه معندهمش المشكله دى
ليه الكل بيتزوج ؟
وحتى كبار السن عندهم يعنى مافيش مشكله خالص
وانا هنا بتكلم عن الزواج والارتباط المبنى على اساس
وجدت انهم مابيبصوش لحاجه اسمها فارق مادى ولا تعليمى
المهم عندهم القدره على تحمل المسؤليه
ويمكن دا اللى بيخليهم (وانا طبعا مش موافقه على كدا )يدخلوا فى علاقات خارج اطار الزواج ..علشان يطمنوا ان هذا الشخصعلا هايقدر يعيش ويستمر
طيب ليه احنا مابنفكر زيهم
واحنا اصلا عندنا القدوه والمثل فى رسول الله صلى الله عليه وسلم
الذى قال:...
اذا جائكم من ترضونه دينا وخلقا فزوجوه...فان لم تفعلوا فانه فساد فى الارض
وكمان هو اول من زوج ابته لعلى رضى الله عنه...ولم يكن غنيا ولكنه اول المؤمنين

نعم القدوه ونعمه المثل
ونعم تقوى الله فى اولادنا

(حلـم)،، يقول...

امليح


كتير


صيدلانية في روعتك


وذكائك


فورا يجب ان تحذفي عبارة(طالعة نازلة)

لتصبح مدونتك باسم صيدلانية تمنحك الترياق او(صيدلة الترياق)

انا عارف حشرت نفسي في حاجة بتخصك جدا جدا

واكيد يا مصراوية اعتبرتيني غليس

مو غلط

الغلط ان نجد الفرصة لنبوح ونصمت

تمردي كما شئتي

واياكي ان تسقطي الريات


بعتذر ان تجاوزت

اقبلي اسفي

واهملي راي

واياكي ان تنزعجني مني

انااااااااااااااااااااااا

حلم

!!! عارفة ... مش عارف ليه يقول...

كلام جميل وكلام معقول

مقدرش أقول حاجة عنه

لكن خيال كل واحد فينا موديه في ستين داهية

المهم والأهم إن كل واحد قبل ما يدور على القايمة والقاعدة

يدور على راجل يصون بنته
مش يصون العفش

وربنا يلطف بنا جميعا

سمع هوص (Abo 3li) يقول...

شقة تلت اووض وصالة وتكون تمليك
شبكة بتلاتين الف جند
الفرح اوبن بوفيه في المريديان
والله حسباية بسيطة... يدوب الشاب المتوسط.. هيقدر يجيب كل ده.. وهوا عنده 92 سنة ... يدوب يلحق يدخل دنيا

يجماعة الجواز ابسط من كده... ومعقد اكتر من كده.. ابسط في لاوزمه.. ومعقد اكتر في اهميته. واهمية الاختيار الصح للشريك.. هه سامعين.. الشريك..
مدونتك جميلة يادكتورة .. ربنا يوفقك