الجمعة، 30 أبريل 2010

صحبه ورد



انا النهارده مبسوطه قوى  عارفين ليه؟؟؟

عشان كنت مع احلى صحبه ورد

مش حقول مع احلى ناس انتوا فعلا ورد 

وورد بلدى بريحه حلوه قوى

انا كنت معاكم يا احلى ناس عرفتهم فى حياتى

كنت مع الناس اللى دخلت  عالمهم من سنتين

و بحمد ربنا انى عرفتهم سواء فى البلوجات او فى الحقيقه

انا النهارده كنت فى لقاء الخير 

لقاء البؤجه اللى اول مره بحضره السنه دى

و بفتخر انى حضرته و شاركت فيه كمان

لو حتكلم عن الورد قصدى المدونين

لازم ابدأ الكلام بكبير القعده و اللى مقعدش لحظه واحده على حيله

خالد همس الاحباب

مش حتكلم عن ذوقه و ادبه و طيبته اللى مش محل نقاش هنا خالص

انا بس حتكلم عن تفانيه فى عمل الخير

و تعبه فى شيل البؤج الكتيره و الكبيره اللى الناس كانت بعتاها

و اهتمامه بينا و بمضايفتنا رغم كل االلى وراه

و الورده التانيه النهارده طبعا

فاتيما

اللى مبقتش بعرف اوصفها

مش محتاجه وصف مش كده 

هيا فوق الوصف و الله

عامله زى الام اللى ولادها بيجوا يزوروها و بوجودها البيت 

بيبقى مفتوح دايما

و مش حقول غير انها عندها قدره غريبه فى توزيع الاهتمام على 

كل البشر اللى بتبقى موجوده حواليها

من غير ما تهمل حد منهم

و عايزه اشكرها كمان على المعلومات الجميله

 اللى عرفتها عن القطط و  تربيتها النهارده

مشكرين يا حاجه و دايما كده مستفيدين منك

الورده التالته النهارده طبعا 

داليا قوس قزح

اللى على الرغم من انها مقعدتش غير دقايق

 بس كانوا ليهم طعم و لون مميزين بضحكتها الحلوه و حضنها الدافى

الورده الرابعه النهارده 

ام بتول

اللى ابسطت النهارده انى اتكلمت معاها 

و اعتقد اننا بقينا اصحاب لان ده شيىء يشرفنى جدا و الله

و اللى كان معاها بتول بنتها الرقيقه الهاديه قوى

ربنا يوفقك يا قمر فى امتحان السبت اللى بعد الجاى

الورده الخامسه

كيااااااااااااااااااااارا

بنوتى القموره اللى كل يوم بتزيد غلاوه عندى

انتى النهارده كنتى عامله طعم للقعده بضحكتك الحلوه

و خفه دمك الشقيه و المثاثات اللى هرتينا بيها

بحبك يا بنوووووووته

الورده السادسه

ميراااااااااااااااااااااا

الشعنونه اللى مبطلتش رغى من ساعه ما وصلت

و اللى ضحكت عليا و قالتلى مش جايه و هيا كانت فى المترو و جايه فى الطريق

و طبعا لازما و لابد اسيحلك و اقول انك كبيتى القهوه عليا

و كنتى ناويه تكملى و تحمينى بالكركديه

بس ربنا ستر

انتى سكره يا مرموره مهما حاولتى تعملى فيها حد جد

و انا كمان بحبك قوى

ربنا يجمعننا دايما على خير

الورده السابعه و التامنه

وليد كنج توت و مراته السكره بوبو

اللى طلعت بلدياتى و حبيبتى و كفاءه

هيا و ابنها الشقاوه عمر

مش حنسى ابدا تعبكم معانا النهارده و انكم وصلتونا معاكم للنادى

و مش حنسى رغيى مع بوبو السكر اللى مبسوطه قوى انى اتعرفت عليها النهارده

بس للاسف نسيت اخد تليفونها عشان نبقى ننقى رز فى اوقات الفراغ

الورده التاسعه

شريف باشا 

 متكلمناش كتير بس باين قوى انك حد راقى و ذوق

و ان كان ده برضه  باين من تعليقاتك و كتاباتك المميزه

ربنا يكرمك دايما

الورده العاشره

مصطفى ريان

شاب ثائر اللى مبطلش خناق مع ميرا من اول ما وصل

ههههههههههههههههههههههههه

انت طيب قوى يا مصطفى و ربنا دايما يفوقك لانك حد يستاهل النجاح

الورده الحداشر

ابوحميد 

مهما قلت مش هكفيك كلام

كفايه تعبك و اهتمامك و توصيلنا من النادى لغايه العربيه

من كلامنا النهارده بان ان حضرتك حد ذوق و مثقف

ربنا يوفقك دايما و يخليك لاسرتك وولادك

الورده الاتناشر

لريييييييييييييم 

اللى كانت اكتشافى النهارده

رغم اننا تقريبا بنتكلم كل يوم الا انى اما شوفتك

حسيت انك رقيقه قوى و ضحكتك حلووووووووووه قوى

كلك على بعضك بجد حلوه

انا مبسوطه قوى انى شوفتك النهارده

و ان شاء الله تتكرر كتير بعد كده

الورده الثالثه عشر

لمنووووووووووونه 

 حبيبتى

اللى كافحت النهارده عشان تشوفنى 

صحيح جت قبل ما امشى بربع ساعه

بس بجد كانوا احلى ربع ساعه

البنوته دى طيبه قوى يا جدعان

و حنينه و صوتها حلوووووووووو قوى و جميل كده

و شكلها فى الحقيقه احلى بكتيييييييييييييير من الصور

بحبك يا منووووووووووووووونه و ربنا يكرمك يا قمر

و اشوفك عروسه منوره بيتك قريب جدااااااااااا

مش حنسى طبعا 

وليد الدوغرى هيا و ظروفها

ملحقتش اتكلم معاه كتير بس برضه ليه ورده كبيره

عشان جه و كمان عشان عريس و لسه خاطب جديد

مبروك يا عم و ياريت تبقى تعزمنا على الفرح

شفتوا بقى الورد كان كتيييييييييير ازاى

انتوا احلى و الله كمان من الورد

ربنا يخليكم دايما سباقين فى الخير

و مبسوطين فى حياتكم لان اللى بيزرع خير اكيد حيلاقى خير


بحبكم يا احلى ناس






هناك 45 تعليقًا:

كيــــــــــــارا يقول...

والله وانا مبسوووووووووووطة اني شفتك ياحلي مامى في الدنيا

بحببببببببببببببببببببببببببك

وشادن صبحتى بجد ثكر خالث خالث

reem يقول...

يا حبيبة قلبي انا فعلا مبسوطة كتييييييييير انى شفتك انتى وشادن وسيف العسولين
ربنا يخليهم لك هما وزوجك يارب

وانتى زى ما تخليتك واحلى
عسوله ودمك زى العسل بجد

وميرسي يا قلبي انك جيتى ونورتى كايرو كلها ونوريتنى
بوسي لى شادن كتيييييير

أبو حميد يقول...

يافندم حضرتك والدكتور والولاد نورتم القاهرة وأنا سعيد جدا إنى إتعرفت على ناس محترمين زى حضراتكم ويارب نتجمع فى الخير دايما
سلميلى على الدكتور قوى وشكرا على الكلام الجميل ده مع إن فيه مبالغة كتير
تحياتى يا دكتورة

sony2000 يقول...

بجد كان نفسي اكون معاكو
لولا الظروف
بأذن الله المره اللي جايه وتيجي ممتي وقتها
اللهم امين:)

ahmed_k يقول...

ربنا يكرمكميا دكتوره
ودايما خطواتكم تكون لفعل الخيرات
سعدت جدا بحضورك البؤجه إنهارده
رغم اني مسعدتش بالتحدث معك
وذلك لسبب بسيط جدا
أني انا محضرتش ،
تتعوض في تجمعات رائعه كتلك في قادم الأيام بإذن الله

سمع هوص (Abo 3li) يقول...

ومفيش وردة ليا؟؟؟
:( :( :( :(
الحمدلله انه كان يوم حلو عليكم... كنت اتمني اكوون موجود... بس للأسف حظي وحش... تتعووض ان شاء الله..

Ramy يقول...

حمداللة على السلامة

يارتنى كنت معاهم يارتنى كنت معاهم

ههههههه

دة مش تقليل دة بجد اصلى انا بحب الجو دة جدا

اهم حاجة انة كان يوم مثمر



ربنا يوفقكم كلكم


شكرا جدا

mostafa rayan يقول...

د.علا انا والله فرحان قوي انى شوفت حضرتك ودكتور اشرق والقمرتين سيف وشادن ربنا يباركلك فيهم ويحفظهم من كل شر
بس انا هنا ابدي اعتراضي ميرا هي اللي كانت بتنرفزنيييييييي وبتجر شكليييييييي
هههههههه
والله اليوم كان جميل قوي وربنا دايما يجمعنا في الخير
لحضرتك ودكتور اشرف وسيف وشادن مني كل التحية والود

richardCatheart يقول...

يا صباح الورد والحب والجدعنه والجمال

يارب ديما متجمعين فى الخير يارب وعند النبى

ان شاء الله

بوستك فرحنى اوى والله ماشاء الله الانبساط باين فيه ويارب ديما

والله خالد دا من الناس النادره اللى عرفتها الله يباركله فى نفسه وبيته واهله والاده وزوجته يارب
انه سبب جمع الخير الجميل دا

والله ياخونا نفسى تشرفونا فى اسكندريه
نعملو الواجب ونتقابلو وتنورو الدنيا عندنا ويحصلنا الشرف
خالد قالى ان بأذن الله هايجو الشهر الجاى ربنا يحينا ان شاء الله

اتمنى والله تيجى يالالا وتيما وستيته ست الستات واتعرف على اكبر عدد من الناس الحلوة اللى ماعرفهاش
انتم ناس جميله وجدعه واصيله والله
ربنا يكرمكم كلكم
وبما ان تيما فادتك فى تربيه القطط
فانا هاستغلها اسؤ استغلال علشان محتاسه فى عيالى الجداد

تقبلى مرورى ويارب فى سعى الخير ديما يا لالا موجوده

لـــولا وزهـــراء يقول...

علااااااا

احلى عنوان قراته واحلى تشبيه
عارفه انتى قولتى على الناس الحلوه دى انهم ورد ليه ؟؟؟
لانك انتى فى حد ذاتك نوع من الورد وهو الفل انتى فله بيضاء اوى رقيقه جدا ريحتها رقيقه ورغم ان الفله بتكون صغيره لكن لما تقربى منه بتحسى باحساس غريب بالراحه والهدوء...
انتى كده فله شمعه منوره

طبعا كان معاكم كوكبه من اجمل الناس وكان نفسى اكون معاكم بس طبعا انتى عارفه الظروف وكنت فى قمة السعاده لما سمعت صوت فاتيما حد جميل اوى وكان نفسى اتقابل مع وليد الدوغرى صديقى واخويا الجدع وكنت اتشرف بمعرفة وليد كينج تووت وزوجته الرقيقه هبه
وكل الناس اللى اغلى من الماس اكن نفسى اشوفهم
فاتيما وعدتنى بزياره هنا فى اليكس تشرفوا وتنوروا طبعا والبحر كل يتفرش ورد لعيونكم

احلى ورد لاغلى واحلى ناس

زهراء

بوبو يقول...

انا مبسوطة اوي اني اتعرفت عليكي.. وبعدين انا اول ما قعدت جنبك عرفت فيكي جدعنة الصعايدة وروحهم الحلوة - تحيز للصعايدة طبعا- وفرحت اما عرفت انك صيدلانية طالعة نازلة اللي انا متابعاها من زمان.. انما مش عارفة ازاي تاه مني اخد رقم موبايلك.. هو الواد عمر اللي بيخلي دماغي مش فيا.. ملحوقة يا كوكو.. هبعتهولك على الايميل

صيدلانيه طالعه نازله يقول...

كيــــــــــــارا

مش اكتر من انبساطى انا انى شفتك
شادن كمان كانت مبسوطه بيكى قوى انتى و ميرا
عشان كنتوا بتشجعوها و هيا بترسم
ربنا يخليكى ليا يا قمر

صيدلانيه طالعه نازله يقول...

reem

انتى بقى كنتى احن و ارق بكتير مما تخيلتك
و خليتى للقعده طعم تانى من ساعه ما وصلتى
ربنا يجمعنا تانى ان شاء الله على خير

صيدلانيه طالعه نازله يقول...

أبو حميد

ربنا يخليك
انت انسان بجد كلك ذوق
و ده انطباع كل الناس عن حضرتك
يعنى مش مبالغه و لا حاجه

صيدلانيه طالعه نازله يقول...

sony2000

ان شاء الله تيجى و اكون موجوده و تنورينا و تشرفينا

ياااااااااااارب

صيدلانيه طالعه نازله يقول...

ahmed_k

ان شاء الله
تنور و تشرف فى المرات الجايه
و تكون مشاركتك ايجابيه باذن الله

صيدلانيه طالعه نازله يقول...

samy

ان شاء الله
ربنا يكرمك و تشارك فى المرات الجايه
منورنا

صيدلانيه طالعه نازله يقول...

سمع هوص (Abo 3li)

انا مش بوزع ورد
انا وصفت اللى جه انه ورده
المره الجايه تبقى من ضمن الصحبه
ان شاء الله

صيدلانيه طالعه نازله يقول...

mostafa rayan

ميرسى ليك يا مصطفى
و موضوع ميرا ده احسنلك تحله ودى
لانك مش حتخلص معاها
ميرا دى مشكله اصلا

منورنى

صيدلانيه طالعه نازله يقول...

richardCatheart

ميرسى لكلامك الرقيق يا قمر
نفسى و الله احضر لقاء فى اسكندريه
لان اصحابى كتروا قوى هناك
ان شاء الله يكون التجمع ده قريب

تحياتى ليكى

صيدلانيه طالعه نازله يقول...

لولا وزهراء

الناس اللى كانوا معانا هما اللى فل و ياسمين وورد كمان
انا مش اجى حاجه فى وسطهم

انتى بس اللى عنيكى حلوه و بتشوفى كل اللى حواليكى حلو

صيدلانيه طالعه نازله يقول...

بوبو

يا قهلا يا قهلا
رابطه ابناء اسيوط ترحب بكم
هههههههههههههههههه

انا انبسطت قوى انى اتعرفت عليكى و على وليد
فاتيما كانت دايما بتشكر فيكم قوى
و فرحتى زادت اما طلعنا بلديات


منورانى يا بوبو فى اول زياره
و خطوه عزيزه

فاتيما يقول...

عينى يا عينى

ع الناس اللى كلت الجو مننا

احنا نعتزل كتابة البوستات بقى
طالما الناس الحلوة اللى زيكم قايمين بالواجب و زياااااااادة و ميت فل و خمأشر أهو


الكلام الحلو اللى أنكتب عنى دا فوق انى اتحمله يا لولاّ

يا عيال مبقدرش استوعب الكلام الكبير دا و بحس كأنكم بتتكلموا على واحدة غيرى مش انا و الله ...
أصله على إيه و النبى ؟!!!

طب أسيح و اقول بقى انك سلختينى تريقة امبارح ؟؟؟

بس كان عندك حق
الندالة اصلها طبع مأصل فيا و محدش بيصدقنى ...

الواد سيف بيذاكر و لا مجننك ؟؟

و شوشو كانت زى القمر بعد قصة الشعر الحلوة دى ...يوسف هيبقى عينه ف وسط راسه و كدا مينفعشى ى ى ى ى

عقبال ما تكونى موجودة كل لقاء

اعملى حسابك النوبة الجاية
رايحين اسكنكرية عند الحبايب كلهم هناك

هيبقى على آخر الشهر دا تقريباً
خالد هيرتبها و يقولنا

تكونى خلصتى امتحانات سيف
و كلنا نصيف يوم ف اسكندرية الماريا

كان نفسى تقعدى أكتر
بس عارفة المواعيد و المحطات و الحركات

لما قعدتى جنبى ع الكنبة و ميلتى على كتفى... نعنوياتى ارتفعت و حسيت انك مش زعلانة منى ..


ربنا يديم المحبة يا رب
خلى بالك من نفسك و النبى ى ى

بوسات و حضونات
يا لولتىّ

صيدلانيه طالعه نازله يقول...

فاتيما

تيماااااااااااااا
اخيرا جيتى انا قلت خاصمتينى بعد اللى عملته فيكى امبارح بس مانتى مش بتخاصمنى و انا عارفه
و بعدين لازم التسييح و نمت على كتفك و كده يعنى
طب انا بقى نمت على كتفك و سرسرت معاكى كمان
هه ارتحتى يا هانم

امبارح و انا فى المحطه شوفت المكان بتاعى انا و انتى و كيارا
و قلت لاشرف كنا قاعدين هناك

و سرحت فى كلامنا و افتكرته و افتكرت قعداتنا كلها من اول ما عرفنا بعض
و لغايه دلوقت

ربنا ميحرمنيش منك ابدا

كيكى عوووووو يقول...

وردة!!!
انا مينفعش معايا الكلام دة
انا كنت عايزة اجئ عشان تعزمينى على حاجة
اه
داخلة على طمع ولا مؤاخذة
معلش اللقاء نصيب
اشوفك على خير ان شاااااااااء الله
ياعلا

فتاه من الصعيد يقول...

كل لقاء وانتي طيبه

جازاكي الله خيرا

تحياتي

مهموهـــــــة يقول...

دكتور علا يا حبيبتي الغالية

و الله سعيدة اوي اوي بالكلام معاكي النهاردة يا قلبي و الله
و بجد مدونتك غاية في الجمال
و بتدل على انسانة عسولة اوي و مليانة احساس و حب لكل الناس

سعيدة اوي انكم اتبسطوا في اللقاء و يا رب الناس تفضل تحب بعضها كده علطول يا رب

اكيد مدونتك هضيفها عندي لاني بجد حبيتها بس بعد ما حبيتك

تقبلي مروري الاول و ان شا ءالله مش الاخير

خالص حبي و تقديري

اموااااااااااه

همس الاحباب يقول...

نورتونا جدا جدا يا دكتورة
وربنا يجعل مشاركتكم فى ميزان حسناتكم
طبعا اليوم بيكم كان ليه طعم تانى
دكتور اشرف من الشخصيات المحترمة جدا ووجوده اسعدنا جدا
اما سيف وشادن فربنا يحفظهم ويبارك فيهم ونشوفهم فى اسعد حال
وشكرا على كلماتك الطيبة فى حق الجميع وده ان دل فيدل على نقاء السريرة وطيبة القلب من جانب حضرتك
تحياتى لجميع الاسرة اللى شرفونا ونورونا
تحياتى وتقديرى

صيدلانيه طالعه نازله يقول...

كيكى عوووووو

و انا و الله كان نفسى اشوفك قوى
من يوم ابو الريش اللى فى رمضان
شوفنا بعض بس متكلمناش
اللقا فعلا نصيب
و ربنا يجمعنا مع بعض قريب

منورانى يا عوعو

صيدلانيه طالعه نازله يقول...

فتاه من الصعيد

ربنا يخليكى و المره الجايه تكونى معانا ان شاء الله

صيدلانيه طالعه نازله يقول...

مهموهـــــــة

منورانى فى اول زياره
انتى كمان سكره قوى و طيوبه قوى
و انبسطت قوى بكلامك

ربنا يفرحك و يحققلك كل اللى تتمنيه

صيدلانيه طالعه نازله يقول...

همس الاحباب

ربنا يخليك يا ابو همس
انت انسان محترم بجد و كلك ذوق
و التجمعات دى انت الللى بتديها رونقها و نظامها
ربنا يبارك فيك و فى اسرتك و يجعلك دايما فى الخير سباق

خواطر شابة يقول...

ان شاء الله متجمعين في الخير دائما

momken يقول...

ربنا يقدركم دايماً على فعل الخي واتمنى اكون معاكى فى اسكندريه انشاء الله


كايرو كانت منوره

وكل الى قلتى ععليهم طبعا احسن ناس

ومحدش يختلف عليهم ربنا يزيد ويبارك

وتكون كل تجمعات المدونين بالجمال ده


تحياتى

мαησηα يقول...

انا جيييييييييييييت

يا حبيبة قلبى انتى بجد سكر يا لولى

حاسة كلامك من القلب اوى اوى بجد

ياحبيبتى والله انتى اللى جميلة وحنينة

وانا بموت فيكى بجد وشكل الخطة

هتنجح يا نصة هههههههههههه

انا مش عارفة اقولك ايه بجد انتى حد

جميل بشكل يفوق الوصف وعسولة

جدااااا بجد ربنا مايحرمنيش منك

ابداااااا قولى اميييييييييين

شفـقــة و إحســــان يقول...

ربنا يباركلك يا دكتورة يارب ويجعله فى ميزان حسناتك
تصدقى كان نفسى اشوفك جدا واتعرف عليكى
ربنا يكرمك يارب

had-befham يقول...

انتوا يعنى بتغيظونى؟
عااااااااااااااااااااااا

فتافيت يقول...

كده برضو حتى انت يا بروتس :((

طيب سيبي اوف لاين ع الماسنجر ان فيه لقاء وانك جاية يا لولو

يعني كده معرفش اشوفك ولا اعرف انك جاية اصلا :((

ماشي ماشي

وحشااااااااني قد الدنيا والله.. وانا غطسانة في مشكال عندي عشان كده مابدخلش كتير


وتعوض يا قلبي واشوفك ان شاء الله قريب على خير
موووووووووة

صيدلانيه طالعه نازله يقول...

خواطر شابة

عقبال ما نعمل لقاء عشان نقابلك
و انتى منوره مصر ان شاء الله

ربنا يخليكى ليا
منورانى

صيدلانيه طالعه نازله يقول...

momken

ربنا يخليك
الناس دى و حضرتك معاهم كل يوم بتعلم منهم حاجه جديده و بستفيد من خبراتهم

منورنى دايما

صيدلانيه طالعه نازله يقول...

мαησηα

آمين يارب العالمين
ربنا ميحرمنيش انا منك
انتى بجد سكره قوى
و طيبه قوى
ربنا يديكى اللى تتمنيه

صيدلانيه طالعه نازله يقول...

شفـقــة و إحســــان

و انا كمان يا شفشوفتى
ان شاء الله نتقابل قريب
كل حاجه باوان

صيدلانيه طالعه نازله يقول...

ad-befham

تقريبا و الله اعلم يعنى
اه بنغيظك

ههههههههههههههههه

صيدلانيه طالعه نازله يقول...

فتافيت

انتى يا بت انتى
انا كاتبه بوست يسد عين الشمس ان انا جايه
اشمعنى شوفتى ده و مشوفتيش التانى
اجى اعضك انا يعنى دلوقت

هههههههههههههههههه
ان شاء الله ربنا يجمعنا على خير

star in the sky يقول...

اييييييييييييه ده كله

اييييييييييييييييه ده كله

كل ده ورد دى جنينة بقى
هههههههههه


الحمدلله انه كان يوم وانك اتبسطتى