الجمعة، 2 يوليو 2010

فى الاخر الاتنين فراق برضه







من كام سنتين تلاته اتعرفت على شخصيتين اصبحوا مع الوقت من صديقاتى المقربين




و بما اننا اتعرفنا فى البيسين فى تدريب السباحه بتاع الولاد فطبعا اتكلمنا كتير و حكينا اكتر




الاتنين اتجوزوا عن قصه حب جامده جدا




واحده منهم اتجوزت اللى بتحبه و خلفت منه بنوته زى القمر




و فى الوقت اللى كانت بنوتتهم عمرها سنه




يشاء الله ان زوجها يغرق اثناء المصيف فى مارينا و تترمل صديقتى و هى عمرها 25 سنه




اما اتكلمت معاها كنت عارفه من ناس اصدقاءنا انها ارمله بس من كتر كلامها على زوجها




و الهيام و العشق اللى بتبقى فيه و هيا بتتكلم عنه شكيت فى الموضوع كله







التانيه بقى اتجوزت اللى بتحبه رغم معارضه اهلها و خلفت بنتين




بس طلع شخص قليل الاصل




كانت بتشوفه بعينها بيفتح شنطتها و ياخد فلوس من غير اذنها و تسكت




كانت بتسمعه بيكلم واحده عرفت انه متجوزها عليها و سكتت




كل ده عشان بتحبه بس هو مقدرش الحب ده




هو كان متجوزها عشان مركز والدها كأستاذ فى الجامعه




و هو كان معيد فى نفس الكليه




المهم حصل الصدام و سرق دهبها كله




و طلع عينها على الطلاق و نفقه البنات اللى بتاخدها تقسيط




و هيا مش محتاجاها بس لمجرد انها تقرفه و تغيظه





دار بيننا فى مره كلام




كانت صديقتى الارمله بتحكى ان جوزها واحشها و انها نفسها تأدى مهمتها مع بنتها




على خير عشان يبقى راضى عنها و تقابله و هيا رافعه راسها



راحت صديقتى التانيه المطلقه قالتلها احمدى ربنا انه حرج من حياتك



و انتوا كل الذكريات اللى بينكم جميله و حلوه دى فى حد ذاتها نعمه كبيره



و تستاهل انك تحمدى ربنا عليها ليل نهار



كان ممكن ربنا يمد فى عمره سنييييييين طويله و يحصل بينكم حاجات وحشه كتير



و برضه تكون النهايه بينكم فراق يبقى انهى فراق بقى الاحسن؟؟؟؟



اما قعدت مع نفسى كده و فكرت قلت :



هو لازم الانسان اللى بنحبه يختفى من حياتنا فجأه عشان نفضل نفتكره بالحلو



طب هل ده معناه انه لو كان فضل مووجود كان اكيد حيتكره و يبقى مرفوض



طب ليه بنوصل بعض للحاله دى اصلاااااااااااااااا



ليه مش بنحافظ على بعض و على مشاعر بعض و نحاول نقرب اكتر



ليه مش بنحاول نزرع الحب من اجل الحب نفسه



ماهى شجره الحب الصغيره مسيرها تكبر و تبقى واااااااااااااحه فواحه بالحب



حاجات كتير قوى فكرت فيها بس للاسف ملقيتش اجابه على اى سؤال



لان للاسف اللى بيحصل فى الواقع شيىء تااااااااااااانى خالص غير اللى باقوله

هناك 35 تعليقًا:

adel يقول...

مين قال لازم يخرج دي ؟
ومين قال اصلا لازم فراق
يعني اكبر اكتمال للحب انهم يتجوزوا
لو الاختيار مبني غلط
متقوليش ليه الحب ميكملش

ولو الاتنين بيحبوا بعض فعلا بس مش متقبلين بعض
يبقي مشكلتهم مش مشكلة الفراق و الحب و الكلام ده

طيب مافي الف مثال لذد اللي انتي قولتيه كان متجوزة عن حب و مستقرة تماما و لسه بيحبوا بعض

وصاحبتك التانية بجملتها دي سوري دي عقد يعني ؟؟
يعني ايه هيخرج هيخرج ؟
مين قال ان كلا الامثلةو وحشة قوي كده ؟
ومين قال حتي لو انسان وحش مبيتغيرش ؟

زهــــراء يقول...

علا
الفراق كلمه صعبه فى حد ذاتها يمكن اصعب حاجه فى الدنيا الفراق
اتكلم معاكى بصفه شخصيه انا والدى الله يرحمه توفى من اكتر من 20 سنه ولازلت امى ربنا يبارك فى عمرها تتذكره بكل خير رغم انه اتوفى بعد سنوات قليله من الزاوج لكنها تتذكره بكل ود وحب فى المقابل عندى صديقه مطلقه لو سيرة زوجها جت تفضل تلعن وتشتم فى اللى جابوا اهله ...
المشكله مش ان الاتنين فراق المشكله فى نوعية الشخص اللى بيفراقنا نقيس الكلام بطريقه تانيه فى جمله بتقولى هناك اموات تحيا القلوب بذكراهم وهناك احياء تموت القلوب برؤياهم
انتى ممكن يبعد عنك صديق لمدة ايام تحسى انه غايب من زمن وممكن صديق يغيب بالشهور وتحسى انك كانك كنتى معاه امبارح ....

بالنسبه لموضوع الزاوج بقى الموضوع طويل والرغى فيه كتير اوى اوى بس فى الاول وفى الاخر النصيب بيحكم وكمان اختيارتنا بتحكم يعنى اللى اختار صح مش زى اللى اختار غلط لما يحصل الفراق بين اللى اختاروا بعض غلط بتكون النتجيه لما سيرة حد فيهم تيجى امام التانى تلاقى كمية من الكلام الجارح اما بقى اللى اختاروا بعض عن تفاهم ورضا ومن الاسرتين وحب بيكون النتجيه غير كده حالهم بيكون مختلف ...
اقولك على حاجه واحده زميلة ماما فى شغلها كانت بتقولها يا بختك ان زوجك ميت ياريت زوجى انا اللى كان مات شوفتى ان فى نماذج سيئه وفى نماذج حلوه
باقولك هو انا ينفع ادخل اعلق تانى انتى عارفه عندى امتحان بعد بكره ان شاء الله وعارفه الفيلم التانى اللى انا فيه ....

دعوااااااااااااااااتك

غير معرف يقول...

لا ابدا هو بس حسن او سوء اختيار موش اكتر ..

الاحباء المخلصين حبهم بيزيد سواء عايشين او ميتين :)

ربنا يصبر الجميع

تحياتي

حاجات جوايا يقول...

الله
هو انتى علا
انا فكرت واحدة تانية كان عندها مدونة اسمها صيلانية
اصلك مقولتيش طالعةنازلة
مبروووك عالعتبة الجديدة يا قمر
وان شاء الله تبقى وش الخير

بالنسبة للبوست
فى رايى ان الموضوع بيخضع للانسان نفسه
ومش شرط انه يتحول لفراق مع الزمن
ممكن يتحول لفتور
لبرود
لروتينية


يمكن لو كل واحدة جوزها او حبيبها ماتوا فى عنفوان الحب وبداية العلاقة كانت عملت زى صديقتك الارملة دى

معتقدش لو كان عايش كانت هتبقى فى الحالة دى

من محاسن الموت انه بيفكرنا بمحاسن المتوفى وينسينا الاساءة لو وجدت
يمكن اشفاقا عليه عشان مات صغير
يمكن افتقادا لوجوده فى حياتنا
يمكن تعويض مننا لمشاعر كتير كان المفروض نديهاله والوقت مسعفناش فبنديهاله بعد ما مات

بس الملاحظ جدا
ان الانسان اللى بيموت بدرى بيبقى انسان كويس والكل بيمدح فى اخلاقه وتدينه سواء فى حياته او بعد وفاته

ربنا يجعلنا ذكرى حلوة
ويجعل عملنا طيب وصالح
سواء فى حياتنا ابعد وفاتنا
اللهم امين

دمتى بكل الخير والمحبة حبيبتى

غير معرف يقول...

الحكايتين اصعب من بعض
مش لازم الانسان يفضل معانا
عشان نفضل نفتكره حلو
كل واحد بيسيب بصمته فينا حسب اخلاقه
واسلوبه ومهما طالت سنين عشرتنا ليهم
تحياتى

richardCatheart يقول...

انا جيييييييييييييييت
الف مبروك ربنا يجعلها عتبت خير يارب

حلو البوست يا لالا

كلمها صح بالرغم من ان البعض هايقول ازاى بس هى دى الدنيا

ديما افتكر تيتانك وانها عاشت على ذكراى

واقول لو كانت اتجوزتو كانت هى اللى غرقته باديها ههههههههههههههههه

ليه دا بيحصل
علشان مش كل الناس دماغها واحساسها زى بعض زم الختلاف اللى بيخلق الخلاف
وساعه الخلاف اصل بيبان على حققته والحب بيتعرى مش اكتر
ومش كل الناس بتقدر تستوعب اختلاف ومنها بيجى الخلاف

ربنا يعنهم اهو دا بيرتاح و دا بيرتاح

سمع هوص (Abo 3li) يقول...

بصي عنوان البوست جاب من الاخر...
الاتنين فراق...
والفراق صعب بكل اشكاله...

Dr.Mohammed Gohary يقول...

زي مافي وحش في حلووو

هي الحياة كدا

عمنا جاهين قال
لو دنيا شر... الخير هيعيش منين؟؟

هو كدا
لازم خير وشر
لازم حب وكره
لازم ناس حلوة وناس وحشة

لازم ناس مرتاحة وناس تتعذب

ربنا يطلعنا منها على خير


دمتي بود

هي وظروفها يقول...

فيه فرق ف كلا الحالتين

صاحبتك اللي جوزها مات وكان كويس

ممتش جواها وحتي لو اتجزت غيره هتفضل فاكراه

مين اللي قال ان الحياه بتنتهي بموت صاحبها

عمنا احمد شوقي بيقول قالذكر لالانسان عمر ثان

احنا اللي ف ايدنا نحلي حياتنا واحنا اللي ف ايدنا نخايها جحيم وده كله بيخضع لحسن الاختيار

صحبتك اللي اتطلقت وجوزها كان بيستغلها ماديا ونفوذيا غلطانه انها تقول للتانيه كده ومنفسنه

يا ما ناس عايشه كويس
بس كل واحد بيبص للدنيا بعنيه هو

الللي معاه فلوس بيفتكر كل النس معاها

واللي حياته كرب بيشوف ويقنع نفسه ان كل الناس ف قهر وقرف
بس الحقيقي ان فيه ناس عايشه سعيده مع اجوازها ولو تقدر تديله عمر من عمرها والعكس صحيح
بس نرجع ونقول ان اجمل جواز هو الجواز اللي كان من غير علاقه سابقه لان ده الللي يرضي ربنا
وانا بصراحه رغم اني مبعملش كده ولكن الللي يرضي ربنا هو الصح والجواز اللي بيبتدي بعلاقه تستمر بالسنين لازم يحصل فيه قرف لانه من الاساس كان ضد الصح

بس بردو احنا رغم معرفتنا بالصح مبنعملوش ليه ربنا يهدينا

عاشقه الرومانسيه يقول...

علشان احنا فى الواقع كل اللى بنعمله اننا بنجرح فى بعض
مش بنحاول نسيب اى اثر طيب عند حد حبيناه فى يوم من الايام

سواحة يقول...

الاولى مجرد بعاد مش فراق
الثانية هى الفراق
بس للاسف الالم قلبها لانسانة بتكره الفرحة فى حياة الاخرين

لولة
اخبار البلبطة ايه ؟؟ :-)
انزلى خذيلك غطس فى بحر الامل و الفرحة
علشان يشيل عنك حالة الالم مش الملل
و نعرف نرجع ننكش فى بوستاتك ثانى :-(
ماهو كده مينفعش
اغلس فى بوست بالشكل ده ازى؟؟؟ قوليلى انت بقى ؟؟؟

Ramy يقول...

اولا سوررى على التأخير

دى مش عوايدى انتى عارفة

اصلى أنا نزلت اجازة اخيرا و كنت فى الموصلات بقى و لسة قاعد على النت اهو

شوفى بقى يا دكتورة

احنا اتكلمنا عن ان ازاى يفضل الحب موجود و يكون لمجرد الحب برغم الظروف اتكلمنا فى بوستات كتير

بس بأمانة انا يمكن وضحت كتير رايى فى الموضوع دة حتى فى امدونة عندى

اما القصتين فلكل قصة ظروفها و ممكن يحصل الأنفصال بدون كره بالرغم ان ده قليل و دة مرتبط بكلامى فى اول التعليق

انا مع المطلقة فى ان الأرملة تحمد ربنا للأسباب اللى ذكرتها

وفى الأول والأخر الحمد لله

بوست جميل و نفسى كعادتك (: تسلم ايدك

و خلتينى افتكر حاجات و ادمع معاها

عندما نحب يقول...

adel

صديقتى التانيه بتصبرها مش عقد و لا حاجه
هيا بتقولها احمدى ربنا انك فاكراله حاجه حلوه تصبرك على فراقه
انا اللى بقول فى الاخر الاتنين اسمهم فراق

و على فكره مش كل الوحشين بيتغيروا

منور ا عادل

عندما نحب يقول...

زهــــراء

زى ما قلت يا زهرا الحب زى النبته الصغيره كل ما نهتم بيها تكبر و تزرع و تبقى واحه
و انتى والدك الله يؤحمه زرع فى حياته و الحمد لله لقاه فى ولاده

اللى بيزرع حب بيلقى حب و اللى يزرع شوك بيجرح ايديه


منورانى

عندما نحب يقول...

فتاه من الصعيد

الاحباء المخلصين حبهم بيزيد سواء عايشين او ميتين :)


بالضبط يا حبيبتى انتى صح

عندما نحب يقول...

حاجات جوايا

ربنا يبارك فيكى يا قمر


انتى عارفه جوز صاحبتى دى
كان ماشاء الله ذوق و اخلاق و دين
ابن موت زى الناس ما بتقول دايما
عشان كده و على الرغم من ان 6 سنين عدوا على وفاته هيا لسه بتتكلم عليه كأنه لسه معاها و رافضه الجواز


ربنا يرحمه و يصبرها و يعينها على اداء رسالتها

عندما نحب يقول...

الشـــــوكه النــاعمه


فعلا يا قمر كل انسان بيسيب بصمته

حسب اخلاقه و سلوكه

منورانى يا قمر

عندما نحب يقول...

richardCatheart

ههههههههههههههههه
فعلا لو كان عاش كانت غرقته بايديها
و صح قوى جمله الخلاف بيخلق الاختلاف

منورانى يا مارو
و على فكره وحشتنى قوى كلمه لالا

عندما نحب يقول...

سمع هوص (Abo 3li)

ايوه فعلا
كل انواع الفراق صعبه

منورنى

عندما نحب يقول...

Dr.Mohammed Gohary

الدنيا فيها كل الاشكال و الاصناف و الوان

دى حقيقه واقعه لا مفر منها

منورنى يا دكتور

عندما نحب يقول...

هي وظروفها

كلامك صح يا وليد اكيد فى وسط الحياه فى ناس مبسوطه و عايشه سعيده
بس مش متفقه معاك فى موضوع الحب قبل الجواز
هو مش عيب و لا حرام طالما مفيش معصيه

منورنى يا وليد

عندما نحب يقول...

عاشقه الرومانسيه

فعلا احنا دايما اللى بنفسد اى علاقه حلوه بغباءنا و سوء تصرفنا


منورانى يا دودو

عندما نحب يقول...

Wanda

قربت يا ونون اخرج من المود الوحش
دعواتك انتى بس
شدى حيلك بقى عشان انا نفسى اشوفك
ياللا هانت
ربنا يرجعك بالسلامه

بحبك

عندما نحب يقول...

Ramy


انا كمان عجبنى راى الطلقه و ده كان رأيى انا كمان على فكره

بس انا قلقت و قولت فين سامى
راح منه اول تعليق
و ده شيىء يقلق جدا
هههههههههههههههههههه

منورنى

فكرة من الزمن ده يقول...

ياخبر!!!!
طيب الواحد يعني من الاخر زي ما الارض كروية
اكيد الواحد بيلف في حلقة مفرغة يعني في النهاية كله محصل بعض
فراق زي لا لقاء اصلا
جميلة المصادفة اللي جمعتكم
تحياتي

ذو الوجه المبتسم يقول...

الحكاية مؤثرة بجد

اما عن الصديقة الارملة دي بنت اصول واحساسها صادق وربنا يبارك لها فى نفسها وابنتها ويعوضها الله خير مما كان

اما عن زوج الصديقة الاخرى
بصراحة مش عارف اقول ايه الا انه سوء اختيار او خداع من البداية منه لها وان شخصيته تافهة
ربنا يعوضها افضل منه ويبارك لها فى بناتها

على فكرة الحالات دي بتحصل كتير فى الواقع وبيحصل اكتر من كده

علشان الحب يستمر فى قلوبنا لازم نحب بقلوبنا بجد ونكون لبعض كالكتاب المفتوح .. صدق - صراحة - احترام - احتواء - حاجات كتير مطلوبة


تقبلى تحياتى

Kiara يقول...

علي فكرة المشكله كانت سؤ اختيار بلاش يكون الحب شماعة نرمي عليها الاخطاء

مش في حد بيقدر يمثل طول عمره واللي جوزها اتوفا عاشو سوا علي االاقل سنتين لو ان وحش كان ظهر بس لانهم كانو بيحبو بعض بجد

اميرات الاسرار يقول...

السلام عليكم

اولا موضوع جميل جدا وليه احنا لما بنحب لازم نتجرح فى الاخر عمرى ماسمعت ان قصة حب كملت على خير احسنتى الاختيار للموضوع

ثانيا دى اول مرة ليا هنا فى مدونتك الجميله دى وان شاء الله يبقا بينا تواصل
وياريت تشرفينا فى مدونتنا مستنينك
اميرات الاسرار

Unknown يقول...

فيه مثل بلدى
دايماً انا فاكراه
بيقول:جنازته ولا جوازته
وفعلا فى بعض الأحيان اليـأس
راحة من المشاكل والاخد والرد

Unknown يقول...

فيه مثل بلدى
دايماً انا فاكراه
بيقول:جنازته ولا جوازته
وفعلا فى بعض الأحيان اليـأس
راحة من المشاكل والاخد والرد

لــــ زهــــــراء ــــولا يقول...

ربنا يصبر صديقتك الاولى الارملة ويعوضها خير ف بنتها وربنا يعوض على التانية باللي احسن منه ...انا بردد سؤالك ياقمراية تاني هو لازم نوصل في علاقتنا للدرجة اللي يتقال فيها لو ماتت م الاول يبقى احسن ع الاقل الذكريات تكون حلوة!!! ليه منخليش دايماَ بين كل الناس ذكرى جميلة نفتكر بعض بيها !!! البوست جميل ومعانيه كبيرة والقيمة اللي بيحملها عميقة ومهمة تسلم ايادي القمر يا احلى صيدلانية ف الدنياااااااااا
لولا

ahmedabediom يقول...


شركة تسويق الكتروني | شركة تصميم مواقع | تسويق الكتروني | شركة داما شركة تصميم مواقع | شركات تسويق الالكتروني | شركة داما شركة تسويق الكتروني

شركة داما السعودية

تقدم خدمات تصميم وتطوير المواقع لدي الشركات السعودية
باستخدام تكنولوجيا التسويق الالكتروني الحديث

دور شركة داما :

عمل بحث لمنافسيك لعمل موقع جيد
تنفيذ نموذج تجريبي لموقعك
حجز اسم الموقع الخاص بيك
تصميم موقع حسب اختيارك
التدريب علي لوحة التحكم لسهولة التعامل
التسويق الالكتروني للظهور في نتائج البحث
توافق المواقع مع محركات البحث SEO
صيانة الوقع بصفه دورية
دعم فني 24 ساعة في اليوم 7 ايام في الاسبوع


info@edaama.com

sales@edaama.com

00966566341760


Web Site http://www.e-daama.com
Blogger http://www.e-daama.blogspot.com
Page Facebook http://www.facebook.com/edaamaa
Linked IN http://www.linkedin.com/in/edaama
Twitter http://www.twitter.com/E_Daama
YouTube http://www.youtube.com/Edaama

Unknown يقول...

شركة تنظيف بالرياض

شركة تنظيف فلل بالرياض

شركة تنظيف شقق بالرياض

شركة تنظيف منازل بالرياض

شركة تنظيف خزانات بالرياض

شركة رش مبيدات بالرياض

شركة مكافحة حشرات بالرياض

شركة مكافحة النمل الابيض بالرياض

شركة كشف تسربات المياه بالرياض

شركة عزل خزانات بالرياض

شركة نقل اثاث بالرياض

شركة نقل اثاث

Unknown يقول...

شركة مكافحة حشرات بالرياض

شركة مكافحة النمل الابيض بالرياض

شركة كشف تسربات المياه بالرياض

شركة عزل خزانات بالرياض

شركة نقل اثاث بالرياض

شركة نقل اثاث

غير معرف يقول...

سهم لازوردي نقي هو سهم تابع لشركة لازوردي وهي شركة مساهمة سعودية تم تأسيسها عام 1980م