الأحد، 25 مايو 2008

استرها معانا يارب



من كام يوم كده و انا فى المطبخ زى كل يوم و مشغله الراديو سمعت تقرير منظمه الاغذيه العالميه


و البنك الدولى عن ازمه الغذاء و اللى للاسف مش عندنا بس لا دى فى العالم كله


المنظمه حذرت ان مخزون الغذاء العالمى اصبح يادوب يكفى العالم كله خمسين يوم بس اذا تمت عداله التوزيع


يعنى اذا كل واحد فى العالم خد نصيبه زى التانى و ده طبعا مش بيحصل


كمان قالوا ان 37 دوله معرضه خلال الفتره القادمه لمجاعات شديده و ده فى اغلب الاحيان بيؤدى الى حروب طاحنه


من اجل الغذاء و الماء


التقرير ذكر ان الارتفاع العالمى الشديد فى اسعار الاغذيه هو احد الاسباب الرئيسيه لهذه الازمه الطاحنه


حذر التقرير ايضا من المضاربه فى اسعار الاغذيه و التى تؤدى حتما الى ارتفاع الاسعار اكتر و اكتر و تؤدى الى


التلاعب بمقدرات الشعوب اللى هيه مش ناقصه اصلا


حذروا كمان الدول الصناعيه الكبرى اللى بدأت التغلب على مشكله ارتفاع اسعار البترول بأنها تنتج وقود حيوى


و ده بيكون عن طريق المحاصيل الزراعيه زى القمح و الذره و ده طبعا ادى الى نقص هذه المحاصيل و ارتفاع


الاسعار و خلى معظم الدول الفقيره مش قادره تشتريها


ايه رأيكم بقى بعد كل ده مش حاسيين ان بطنكم كركبت و لا حاجه انا شخصيا سمعت الكلام ده من 4 ايام


و من ساعتها و انا مصره اكتبه فى بوست


يا جماعه احنا لازم فعلا نرشد استهلاكنا جامد جدا يعنى نقلل استهلاكنا من العيش و الرز و المكرونه


و الحاجات اللى مش مهمه قوى بلاش منها و نحاول نستغنى عنها


انا شخصيا كنت ساعات اسيب عيش كتير بره التلاجه لغايه ما يبوظ بس من ساعه ازمه العيش الواحد بقى يطلع رغيف


اتنين بالكتير و اما يخلصوا نطلع غيرهم و هكذا فى الارز برضه بحاول اعمل شويه على القد بالضبط و يوم بيوم


و حسب الحاجه


و الله اسعار اللحمه اللى ضربت فوق دى احنا السبب فيها مين قال ان الناس مش لاقيه تاكل شوفوا اللحمه بقت


بكام؟ و مع ذلك تلاقى الناس قدام الجزارين طوابير طوابير و لا يوم الحشر و ده اللى يغيظ فعلا


يعنى لو طنشنا الجزارين قد اسبوع كده و اللحمه باظت عندهم حيرخصوا اللحمه زى الجزم و الامور ساعتها حتتظبط


مش حنموت من غير لحمه اسبوع يعنى فيه ناس عايشه من غيرها العمر كله و محصلش لهم حاجه


لازم كمان الحكومه تشجع الفلاحيين على زراعه القمح بمكافآت مجزيه جدا علشان نقدر نوفر شويه بس من دولارات


شرا القمح الهندى و الامريكى و الصينى


تخيلوا الامارات اللى كلها صحرا باعتالنا منحه مش عارفه قد ايه قمح شوفتوا الخيبه اللى بالويبه


يا جماعه الخطر قادم و حقيقى و لازم نحس بيه و نستعد له و نربط الحزام اكتر واكتر


و نتعود على الحرمان بمزاجنا بدل ما يجى الوقت اللى نبقى مجبورين عليه


لازم نحس بغيرنا و نساعدهم و بدل ما تاكل و حدك يا سيدى انت وولادك حط شويه اكل صغيريين فى كيس


و حطهم فى التلاجه و كل اكله اعمل كده و بعد كده اى جيران غلابه ليك و جنبك تقدر تديهم الاكل ده


و الله حتبسطهم قوى و حتحس انك مبسوط اكتر لانك عملت حاجه كويسه و شاركت غيرك فى اكلك


لو كل بيت عمل كده و الله مفيش حد حيبات جعان بعد كده و البركه حتحل علينا


و ساعتها ربنا حيستجيب لدعانا اما نقول


استرها معانا ياااااارب

هناك 15 تعليقًا:

Appy يقول...

عندك حق احنا ساعات بنعمل زياده عن احتياجتنا
كتير فى الاكل والمصاريف حتى فى استخدام الموبيل فى كل حاجه بتبذير

محمد فوزي يقول...

الجميل في البوست ده إنه بيطرح حلول وبيوعي الناس , وده شيء جميل
بدل ما نصدر الفزع نصدر الأمل
بدل ما نخلق مشاكل , نصمم حلول
ويا ريت فعلا نحس ببعض لأننا في مرحله حرجه جدا من حياتنا ومش هنعدي منها إلا لما نتوحد كلنا ورا هدف
وفي ايه هدف أكبر من الإحساس بالأمان

أحييكي يا صيدلانيه طالعه ونازله تاني بسرعه

Foxology يقول...

نفسى نشغل دماغنا بأااااة

بفكر انضم لحركة مواطنون ضد الغباء انا عن نفسى بيتنا بقيت بشيل من تصرفاته كل حاجة غلط كانت بتحصل زمان مبقاش ينفع دلوقتى تصرفات زمان

تحياتى وربنا يسترها علينا :)

وجهة نظري يقول...

بصي، الدنيا مش مضروبه أوي كده، وإسأليني أنا دا تخصصي. بس الموضوع شوية صراعات إقتصاديه دوليه، ونص الموضوع هو تخويف للدول من إنها تنتج وقود حيوي. وماهو طبعا لو وزعتي مخزون الغذاء العالمي بالعدل علي فرد فرد مش حيكفي أكتر من 50 يوم!! 50 يوم كتير كمان.... بس في 50يوم في إنتاج جديد وفي طاقه متجدده. التقارير دي بتطلع مدعومه من التكتلات الدوليه كمبرر لزيادة الأسعار.... بالنسبه لمصر كبعا مدعومه من الحكومه ومن الزغلول الكبير شخصيا كمبرر لطحننا أكتر.

في مصر لو زرعنا وأنتجنا بذمه مش حنضطر نستورد حاجه أبدا وحنكفي نفسنا 50 سنه مش 50 يوم.... بس إحنا مش عايزين.

برضه دا ما يمنعش إننا نوفر زي ما إنتي شرحتي بالظبط علشان الإسراف وحش وأخرته سيئه للإقتصاد بتاعنا... زياده علي الخيبه إلي إحنا عايشين فيها. كل الدنيا حتي الدول الغنيه جدا معندهمش التبذير إلي عندنا... فلو زالت النعمه يبقي عرفنا ليه.

تحياتي

mayada يقول...

بجد عندك حق ياصيدلانيه في اسراف جامد
في حاجات كتير وملهاش لازمه كمان يعني زي كميات الدقيق
اللي بتروح علي الجاتوهات والتوتات والحلويات اللي بتتقلب مرض علي الناس
كمان الاكل والله ماما مبقتش عاوزه تطبخ عشان بتحس بالذنب من الاكل اللي بيترمي
بقت بتعمل لكل واحد معلقتين رز باين ههه
اما بالنسبه للحكومه دي بتفش الفلاحين
انا كنت عامله موضوع اسمه فلاحين مصر قالوا كلمتهم الحكومه خربت بيتهم عن
الموضوع ده

Anonymous يقول...

انا بشتغل مندوب فى قبلى وبشوف قمح كثير فى المحافظتين اللى بشتغل وبلف فيهم
(اعتقد يكفيهم السنه كلها)
ولكن مايضايقنى اننى باسمع ان كثيرا منه يباع اخضر (فريك) اغلى بكتير من القمح
والله أعلم

BASEEM_18 يقول...

الو احد فعلا صار يخاف ويخاف على اولادة الأطفال من بكره يعني لو او لو ..

كما تفضلتي اختي ...

الله يسترها يــارب ..

أشكرك ..

المـــفـــــــقــــــــوعـــــة مــرارتـهــا يقول...

انا بقي كل مااحاول اقلل في الاكل ييجي جوزي ويقوللي كتري ولما اكتر الاكل يترمي
مش عارفة اعمل ايه في الحوسة دي
صحيح ابنك عمل ايه في بكالوريوس اولي ابتدائي ولا لسة ماخلصش

tarek alghnam يقول...

اختى الكريمة
عندك حق فديننا نهانا عن التبذير وامرنا بالاقتصاد فى المأكل والمشرب
ونعلم ان المبذرين اخوان الشياطين
لكن حتقولى اية احنا اخدنا على العيشة بالبركة
بوست رائع
ويارب يسترها معانا جميعا
تحياتى لكى وشكرى

Abo 7anf يقول...

السلام عليكم
اه احنا بنستهلك
واه احنا ساعات بنبذر
وممكن نوفر
بس ازاى ميكنش فى اتجاهات من الدوله لكدا
خطط تنميه
اى مشروع بيبص لقدام
يكون فى فائض انتاج يتعان
مخزون استراتيجى
مهو مش كل حاجه الشعب
ولا كل حاجه الحكومه

Tamer Nabil يقول...

ربنا يسترها

وياريت الناس نفكر وتكرر تخد قرار صح قى موضوع حيوى ومتعلق بحياتهم


---

خلينا نشوفك

تحياتى

الجواز و سنينه يقول...

و الله يا بنتى انا خايفه عليكى لا الناس تمشى وراكى و فى الاخر تتسمى حركه و تطلعى انتى من نظم لهذه الحركه و انتى عارفه الباقى
ربنا يستر عليكى و علينا و يجعل كلامنا خفيف عليهم
بس عجبتنى اوى فكره ان الواحد يشيل الاكل و يديه لحد تانى

اعترافات مش ليليه يقول...

يارب استرها
و فعلا خليلهم اللحمه ياكلوها لوحدهم يمكن تكفى جشعهم

خواطر رئيس شاب يقول...

انا اؤيدك فى كل اللى انتى قولتيه

التبذير عند المصريين فوق الوصف

والمنظرة فى كل حاجة حتى الاكل فى العزومات وخلافه

تحياتى

صيدلانيه طالعه نازله يقول...

آبى:فعلا انا موافقاكى فى حكايه الموبايل دى لانى انا منهم و حكايه المصاريف دى عايزه اراده هيا و الاكل
لانك لو قدرتى تتحكمى فى الاكل يبقى نجحنا فى عمل الريجيم اللى دايما بيفشل
================================
محمد فوزى:المفروض الواحد بدل ما يندب حظه على مشكلته يحاول يحلها احسن و ده اللى بحاول اعمله
نورتنى
===============================
وجهه نظرى:حتى لو كانت التقارير مضروبه احنا برضه لازم نرشد استهلاكنا
و اعتقد انه اترشد غصب عننا نظرا للغلاء الشديد اللى حاصل اليومين دول
تحياتى
==============================
فوكسولوجى:و النبى ابقى اكتب اسمى معاك فى الحركه دى و بلاش حركات النداله
يعنى اكتب اسمى الاول
=================================
مياده:بس احنا نلاقى الجاتوه يا ست مياده و متقلقيش احنا اللى حنجبله المرض باذن الله
ههههههههههههههههه
================================
غير معرف:انا مفهمتش حكايه القمح اللى بيتباع اخضر غير لما سمعت عن الوقود الحيوى اللى بيحتاج المحاصيل و هيا خضرا
================================
ربنا يسترها علينا جميعا يا باسم
قوووووول اميييييييين
=============================
المفقوعه مرارتها:الحمد لله اخدنا البكالريوسو رايحيين تانيه
انا بقى اعمل رز قليل يقولولى مفيييييش تااااااااااااانى و لو عملت كتير شويه يقعد و محدش ياكله
كلنا عندنا نفس المشكل
سلامى لفيفى و نورتى المكاااااااااان
================================
الاستاذ طارق الغنام:مش بس الاكل اللى عندنا بالبركه احنا كل حاجه فى حياتنا بالبركه و اهمها صحتنا انا اما بقعد فى الصيدليه بتأكد من النقطه دى من تعامل الناس مع الدوا و مع امراضها
يعنى الدوا اللى نفع مع واحد تلاقيه بقى من المعتقدات فى الاسره اى حد يجيله حاجه شبهه ياخد نفس الوا و من كده امثله كتيره و ربنا ساترها معاهم
===========================
ابو حنف:فى عاده عند الشعب المصرى انه اى حاجه فى ايده لازم تخلص يعنى لو معايا فلوس اتفنن ازاى اضيعها لو عندى اكل كتير مشيلهوش لا اغرف فى الاطباق كتير و ارمى الفايض فى الاخر
و بما ان الحكومه مصريه يبقى عندها نفس الطبع
مش كده و لا ايه
نورتنى
================================
تامر:لازم نفكر و بسرعه لانه خلاص مفيش وقت للهزار لان الجد بدأ
و ادينى حاركب تاكسى و اجى ازورك
==============================
الجواز و سنينه: على فكره اول ما حيسألونى مين معاكى فى الحركه مش حلاقى اعز منك عشان اخليه ينام جنبى على البرش
اما حكايه الاكل دى انا مجرباها و بتريحنى انى مرميش الاكل و فى نفس الوقت افرح ناس مش لاقيه
==============================
اعترافات مش ليليه:و الله انا كل ما اروح اشترى لحمه و الاقى الزحمه دى الفكره تلمع فى دماغى بس عايزه تكاتف
نورتنى
==================================
خواطر رئيس شاب:و الله يا سياده الريس احنا من ينطبق عليهم المثل "اقرع و نزهى"
تحياتى