الأحد، 29 مارس 2009

يرضى مين بس


الخبر اللى حكتبه ده قريته يوم الخميس فى الاهرام و مفهمتوش او فهمته و اتقهرت جايز
و قلت اغيظكم معايا اشمعنى انا يعنى و ده طبعا من مبدأ التكافل و اننا نشيل بعضنا فى الكوارث
قالك ايه فى محافظه سوهاج اتخذ المسؤلين قراربازاله زراعات قمح من ارض صحراويه
تزيد مساحتها على 500 فدان انفق على استصلاحها ما يزيد على 15 مليون جنيه
و طبعا تنفيذا و احتراما لسياده القانون اللى كلنا بنحترمه الجرافات راحت جرى عشان
تنفذ القرار و اللى كان قبل شهرين بس من اكتمال نضجها و حصادها كما يقول اصحابها
و القرار ده كان بسبب ان الارض مطلوب تسليمها لمشروع ابنى بيتك اللى نجاحه مكسر الدنيا
يعنى كانت حتفرق قوى معاهم الشهرين دول لو استنوهم يعنى و لا يعنى ابنى بيتك مش حينفع
الا بالارض دى و فى الوقت ده و الله مش عارفه خالص
كل اللى اعرفه اننا بلد مستورد بشراهه للقمح و ان انتاجنا ضعيف جدا و ان معظم الفلاحين
زهقوا منه و بدأوا يزرعوا طماطم و كنتالوب من الاخر الحاجات المريحه اللى بتجيب فلوس
كتير و بسرعه يبقى اما نلاقى حد زارع قمح و فى ارض صحراويه يعنى طلع عين اهله
على بال ما خلاها كده نقوم نعمل فيه كده مهما كان السبب الموضوع ده فعلا محتاج وقفه
جامده و شديده لان اللى حصل ده حرام فعلا و اهدار للمال و لتعب السنين اللى الناس دول تعبوا فيه
و اللى يقهر اكتر انهم شالوه قبل معاده بشهرين بس افترا و الله العظيم
كل اللى عايزه اعرفه اللى حصل ده يرضى حد؟؟؟؟؟؟؟؟؟؟؟؟؟؟؟؟

هناك 23 تعليقًا:

واحدة مفروسة يقول...

ياخبر اسود و منيل بستين نيلة
انا اتفرست مش اتغظت
و نرجع نقول استوردوا نيلة قمح و يبقى مرشوش ولا مضروب
يارب انت القوي
فرستيني جدااااااااااااااااااااا

blue-wave يقول...

بجد؟؟؟
ايه الخبر المنيل دا؟؟؟
حسبى الله ونعم الوكيل بجد

د. ياسر عمر عبد الفتاح يقول...

مش حضرتك كنتى عاوزة تحرقى دمنا زيك

تم بحد الله
البلد دى مش عاوزة تبقى كويسة

موناليزا يقول...

حسبى الله ونعم الوكيل

صيدلانيه طالعه نازله يقول...

مفروستى:اخص عليا يعنى انا كدا فرستك اكتر ما انتى امال انا اعمل ايه انا اول ما قريته كنت حرقع بالصوت و قصيته عشان اهديه ليكم و تتفرسوا زيى
================================blue-wave:اه و الله بجد و حصل المصيبه فى التوقيت يعنى حبكت خلاص طب ما يصبروا شويه
===================================
د/ ياسر:الف سلامه على حرق دمك يا دكتور حبعت لك شريط ثيراجران
بس مش الخبر يستاهل فعلا انه ينتشر و نفضح غباء و استهتار القيادات الفاشله دى اللى طول ما هيا موجوده عمر البلد فعلا ما هتبقى كويسه
نورتنى
=================================
موناليزا:و لو فيه دعاء اكتر من ده برضه مش خساره فيهم
منورانى دايما

Esraa Hamed يقول...

حسبي الله
الناس دي بجد عمرها ما هتتقدم خطوة واحده
نقول ايه بس !!!!

ماااااا علينا

مسدس صغير يقول...

انا مش عارف انتى زعلانه ليه؟؟
ايه اللى يزعل فى كده؟؟
هيه دى اول كارثة يعملوها.
والله الواحد مبقا عارف الناس دى بيحاربو مين؟؟
وع العموم عندنا القمح كتير جدا فى رومانيا والكونغو وفى السودان.
اة مهو مصر رايحة تزرع قمح فى رومانيا والكونغو والسودان اصل الارض فى مصر قليلة..
هههههههههه
ربنا يهدينا ويهديهم..
احييكى على مبدأ التكافل الجميل ده..

Appy يقول...

احسن تستاهلى علشان تبطلوا تقروا الاهرام
يا رب يجلهم استبحس
معتقدش الفلاحين هتوافق يبقى كده الحكومة بتلعب فى بق الاسد

kochia يقول...

القمح من الزراعات اللي لازم بتكون بكمية محدودة لينا بتتحدد من البنك الدولي
زي القصب والرز
مهو احنا ممكن نزرع قمح ونعمل اكتفاء بدل الاستيراد .. مش بنزرع ليه ؟؟؟

كمان فيه ناس عاملة انها بتاعة القانون وهي اول ناس بيخالفوه بس بيتصرفوا تصرفات تقربهم من الحكومة ومن اولياء الامر

بس بجد حاجة تحرق الدم

عاشقه وغلبانه يقول...

يرضي الناس اللي عملت كده

ماتتكلميش في السياسه
كلي كنتالوب وانتي ساكته

mUsLiM يقول...

حسبنا الله ونعم الوكيل

يا أختى دى مخططات جاهزة بتتنفذ من حكامنا اننا لازم نستورد أكلنا من بره

لازم نبقى جعانين

بس انا شم فاهم ليه الرضوخ ده

أمريكا والغرب اصلا مش فايق من الأزمة المالية

ليه كده بس

وليه الفساد اللى فى الإدارة ده

حسبنا الله ونعم الوكيل

صيدلانيه طالعه نازله يقول...

Esraa Hamed:مفيش حاجه تتقال غير حسبنا الله و نعم الوكيل
هيييييييييييييه ما علينااااااا
=================================
مسدس صغير:فعلا لو احنا زرعنا القمح البلاد التانيه حيتقطع عيشها و ده فعلا حرام فى حد ذاته و ميرضيش ربنا
================================
Appy:الفلاحين مش فى ايدهم حاجه دى سياده القانووووووووووون سيادتك و لازم تحترم زى العباره كده
اللى حكيته حصل فعلا و من اخر يناير و لغايه دلوقتى و لا حاجه حصلت فى مشروع البيت بيتك خااااالص بس اتخرب بيت الفلاحين و خلاص
=================================
Kochia:فعلا هما بينفذوا القانون على حساب الغلابه عشان يلمعوا نفسهم امام الكبار و يتحرق التانيين بجاز
و فعلا مينفعش نكتفى ذاتيا من القمح لان استيراده فيه سبوبه لناس كتير بيستفيدوا من وراه
نورتينى و اشوفك دايما هنا
=================================
عاشقه و غلبانه:مبحبش الكنتالوب فيه مانجه لو سمحتى؟؟؟؟؟
هههههههههههههههههه

=============================
Muslim:المشكله مش فى امريكا و الغرب فعلا المشكله فى الفساد و البيروقراطيه اللى بتخلينا ننفذ القانون على حساب مصلحتنا و على فكره الناس دى كان من حقها تتملك الارض لان عدى على وضع يدها على الارض 10 سنين بس نقول ايه بقى؟؟؟؟؟
=================================

Foxology يقول...

عااااااااادى جدااااااااااااااا

من كام يوم برضه قالو انهم هيهدمو مدينة سنبل للفنون اللى بيملكها الفنان محمد صبحى لحجة عبيطة برضه

قمة الأستهبال والسفالة اسف فى اللفظ

احنا ركبنا الزحليقة يا دوك خلاص :)

تحياتى :)

المعلم محمد صاحب المطعم - طعمية سخنة يقول...

طبعا الفلاحين غلطانين ! انهم زرعوا من الاساس و يصدقوا كلام الحكومة عن الاستصلاح و الكلام ده !!

ادي اخرة اللي يسمع كلام الحكومة !

Tamer Nabil يقول...

تعرفى السبب فى شيل وتدمير القمح

ربنا ينتقم منة ومايعيش سعيد ابدا

وحسبى الله ونعم الوكيل فية

تحياتى

المـــفـــــــقــــــــوعـــــة مــرارتـهــا يقول...

ربنا يخليكي عشان تشلينا وتحرقي دمنا

القمر الساهر يقول...

يعني ينفع كدا اول دخول ليا فى مدونتك تستقبليني بخبر يرفع وينزل في نفس الوقت الضغط..هئ هئ

بس هي دي البلد .. ما فيش نظااام ما فيش ضمير مافيش من الاخر دم

والله حسبي الله ونعم الوكيل فى كل مسئول ضيع الامانه

تصدقي انا بشفق عليهم دول مش عارفة هايقفوا قدام ربنا ازاي

بس هانعمل ايه والله لو في حاجة تنفع ونقف اول واحدة هاقف

حاجة تقرف

,,,,,,,,
يااارب

قلب ينبض بالحب يقول...

عادي يادكتور الي يعيش يااما يشوف والي يقرا يتقهر اكتر

rtrcbh يقول...

السلام عليكم ورحمه الله وبركاته

السادة الأفاضل زوار مدونتي الأعزاء ، أساتذتي الفضلاء ، إخوتي من المدونين والمدونات ،أصدقائي الأعزاء
تحية طيبة وبعد
أتشرف بدعوتكم اليوم إلى زيارة مدونتي ( مدونة ادم ويحيى ) وذلك بصفتكم أحد الشركاء الأساسين فيها بآرائكم وتعليقاتكم على موضوعاتها وزيارتكم لها
لحضور ندوة بعنوان

( ادم ويحيى ، تجربة تدوين )

اليوم هو استفتاء على تجربة تدوين

اليوم نعرف من هو أبو يحيى وادم وكذلك ادم ويحيى من هم ومن والدتهم

اليوم نعرف حقيقة هذه المدونة وما هي رسالتها الحقيقة وهدفها

اليوم رسالة اعتذار لكم عن بعض الأمور

اليوم رسالة شكر من كل قلبي على أمور أخرى

اليوم استفتاء حول منهج مدونة ادم ويحيى

اليوم هو رسالة منكم لي حول ما طالعتموه بيوم من الأيام بهذه المدونة
فأرجوا أن لا تبخلوا على بتعليقكم على هذه ألتدوينه
في انتظار زيارتكم
والسلام عليكم ورحمة الله وبركاته
د/أبو يحيى وادم

معتز شاهين - باحث تربوي يقول...

عادي
يبقى أنت أكيد أكيد أكيد في مصر
متقولش أيه أدتنا مصر

ويسعدني زيارتكم لمدونتي

ويبقى التواصل

Anonymous يقول...

طيب ازاى سابوا الاهرام تنشره (ده حريه مابعدها حرية رأى),
هل هناك اخرى لم تنشر ولم نسمع او نعرف عنها شى
اشرف

Tamer Nabil يقول...

السلام عليكم

ازيك اخبارك اية

فى انتظار الجديد

تحياتى

Anonymous يقول...

السلام عليكم .
مع احترامي لكل اللي اتقال من تعليقات الاخوه والاخوات من قراء الموضوع ده
الا ان
اللي حصل لكم من فرسه وغيظ وحرق وضغط دم ده في حد ذاته يسعد اللي فكر في هذه الخطوه العبقريه ونفذها وكدا بقوا 3 عصافير بحجر واحد بدل2
ارجوا اننا مانيأسش ونحاول تاني وعاشر نزرع القمح علشان هم اللي يياسوا من بيروقراطيتهم مش احنا.
بنت النيل
او
نوجه