الجمعة، 5 يونيو 2009

حقنة البنج !!!!!!!!!


طول عمرها حنونه و طيبه و جامعه حبايبها حواليها لا عمرها اشتكت و لا كلت و لا ملت
مرت سنييييييييين و الست الطيبه قايمه بواجبها مع ولادها و قريبها و جيرانها كمان
و عمر ما حد قصدها و خذلته ابدا لكن العمر بيجرى و الصحه كلت و الجسم مسكته العله
راحت للدكاتره شخصوا حالتها انها مرض خطير منتشر فى معظم جسمها نتيجه اهمالها من زمان
فى العلاج لانها كانت بتستخسر فى نفسها عشان توفر لولادها حاجاتهم
كل ما الايام تعدى الحاله بتتأخر اكتر و كل شويه يجيبولها دكتور من المتلمعين بتوع اليومين دول
و عندك بقى تحاليل و اشاعات و ادويه تتحسن الحاله كام يوم و بعدين ترجع اوحش من الاول
كل مره يتكرر نفس السيناريو و المرض عمال ينتشر و يستشرى فى هدوء قاتل سارقا معه صحتها
و عافيتها و ذكرياتها الحلوه كلها
طبعا اهلها بدأوا يزهقوا و اللى كان بيزورها كل يوم بقى يوم و يوم بعد كده كل اسبوع كل شهر حسب التساهيل
هيا طبعا حزينه لان ولادها نسيوها و اهملوها و حزينه على صحتها و عمرها اللى ضاع هدر
فجأه ظهر فى البلاد البعيده طريقه جديده فى العلاج و قالولها على الدكتور بتاعه
جريوا اهلها على الدكتور بالتليفونات و الفاكسات يتحايلوا عليه عشان يعالجها
و بعد توسلات و محاولات تنازل الدكتور و تواضع ووافق يجى لغايه عندها يزورها
طبعا فرشوا ليه الارض رمل و ترحيب و استقبال و احسن الفنادق
طبعا الدكتور ده ميفرقش كتير عن اللى قبله بس كل ميزته ان لسانه حلو و بيعرف يلمع نفسه
راحلها الدكتور و كشف و قرر علاج قال عليه جديد و اول مره يستخدم و راح يتكلم معاها و ينفخ فيها
ويحسسها انها قويه و سليمه و المرض اللى عندها بسيط و علاجه سهل و انه مش محتاج غير عمليه بسيطه
وافقت و فى العمليه كل اللى عملهالدكتور انه اداها حقنه بنج وسابها نايمه شويه و لما صحيت طبعا
اشتغل معاها بالمسكنات و المخدرات القويه و هيا فاكره انها خلاص خفت و نسيت مرضها و عاشت الوهم
المرض بينتشر و لسه حينتشر اكتر و هيا للاسف مش حاسه بيييييييه خاااااااااااااالص
و كل مايقابلها حد تحكى و تتحاكى عن شطاره الدكتور اللى جاى من بلاد بعييييييييييييده
مش عارفه حتفضل نايمه و متخدره لغايه امتى؟؟؟؟؟؟؟؟؟
كل املنا ان حد يجى يفوقها و يعرفها ان مرضها مالوش علااج غير بعمليه كبيييييييييييره قوى
خطيره ايوه بس هياالوحيده اللى حتقدر تشيل كل العلل اللى مليتها
امتى حيجى الحد ده الله اعلم!!!!!!!

هناك 20 تعليقًا:

Ashraf يقول...

فى اوروبا والدول المتقدمه المسكنات من حقوق الانسان المهمه جدا.
و لكن على مدار التاريخ والامم العريقه وخصوصا مصر التحديات موجوده دائما والله ناصرها دائما.
مصر أحسن بلد ومهما طلعت دوله هنا او هناك ان شاء الله ربنا هيأخذ بيدها ويعليها وينصرها على من يعاديها

Anonymous يقول...

لو لم اكن مصرياً لوددت أن أكون مصرياً.ومهما كانت في عيوب في بلدي وجروح وامراض محتاجه استئصال فلن استطيع ان امنع نفسي من حبها.
اما المرض اللي انتشر فسوف تستطيع أن تعالج نفسها بقدراتها الذاتيه واهتمام اولادها بيها شويه اللي نسيوها ونسيوا ان امهم ليها فضل عليهم وواجبات لازم يؤدوها قبل مايفكروا في نفسهم مش كدا ولاايه؟؟؟
نوجه
أو
بنت النيل

نعكشة يقول...

لو كانت عجوزة قوي
أنا شايفة انها تكمل الباقي مسكنات مادام بتقدر تمشي

عشان حرام نتعب نفسيتها في ايامها الاخيرة

خليها كمان تستخدم العسل
و ترقي نفسها
و تدعي جامد
و تتصدقة

داووا مرضاكم بالصدقة

و ربنا يشفيها و يقويها و يعملها اللي فيه الخير ليها

سلام عليكِ

د/على خميس يقول...

السلام عليكم ورحمة الله و بركاته
الله عليكى يا دكتورة ...معنى فى منتهى العمق و فكرة فى منتهى الجمال
بس للأسف فعلا فيه ناس من أبناءها بتحب المسكنات و المخدرات ..مش عايزين يتحملوا مسئولية أم مريضة ...مش عايزين يتعبوا فى العلاج من أجل استئصال البؤر المرضية أو علاجها لو لسه فيها أمل..
جزاك الله خيرا

و كل شويه يجيبولها دكتور من المتلمعين بتوع اليومين دول
ايوة و الله فشى غلى من شوية منهم كل شوية على الفضائيات يهاجموا الصيادلة ...كأننا بنأكل من رزقهم ..مش عايزين يقدروا اننا كلنا مع بعض على ثغر مهم من ثغور الإسلام و ان كلنا لازم نتكاتف من أجل الأمة و الوطن..الله يهدينى و يهديهم للحق


بارك الله فيك
تقبلى تحياتى

همس الاحباب يقول...

رائع جدا جدا
تشخيص رائع لحالة مرضية منتشرة فعلا
وده احسن تحليل لحال يلدنا
فعلا محتاجين تدخل جراحى لازالة المرض لكى يرجع الجسد معافى من جديد
تحياتى

MǿиY El-Shreef يقول...

برافو عليكي يادكتوووووووور
بجد انتي فاهمه العبه دي اوووي

والله ماشاء الله عليكي عرفتي تلخصي كل حاجه

نفسي يجي اليوم ده نفسي بجد

لتل فاهمه انك بتتكلمي عن الامه العربيه وعن حامي الحما اوباما بس بجد جبتيها بشكل تستاهلي مليون سقفه عليه

د. ياسر عمر عبد الفتاح يقول...

الناس دي ضمايرها ماتت
طيب هيقابلوا ربنا ازاي؟؟
إن لم تستحي فافعل ما شئت

موناليزا يقول...

الغريق بيتعلق فى قشة زى مابيقولوا

ويكا يقول...

اااه صحيح يا سبهلله والله فكرتينى
انا نسيت اكتب فى البوست بتاعى ان الدكتور الباشا الفهيم الفتاي النصاب هو كمان عمى وعم اللى جبونى كمان وعم البلد كلها .
منهم لله والله.

ويكا يقول...

سورى يا دكتره
اصلى كنت هبعت ايميل لسه دلوقتى لسبهلله علشان موضوع السماح بالدخول عندها ده ، فضربت معايا لحمه ، (اصلى جعان بعيد عنك والبمج جرا ريقى)

ويكا يقول...

دكتور

ياريت تشيلى صورة البنت الميته دى ، حرام

MaNoOoSh يقول...

على فكرة الست دي لوحيد في ايد ولادها

هم بس اللي في ايدهم دواها وشفاها.

صيدلانيه طالعه نازله يقول...

Ashraf:املنا ان ولادها يبذلوا مجهود اكبر عشان ربنا ياخد بايديها بجد
=====================================
نوجا:ياريت كلنا يبقى احساسنا كده و نحس شويه بس بسرعه لاحسن مفيش وقت
===================================
نعكشه:مريضتنا هنا كبييييره اه بس مش عجوزه قوى الا باعمالنا احنا و بايدينا نرجعها شابه تانى الكبييييره هنا هى مصر يا نعكوشتى مش حد تانى
===================================
dr aly khamis:انشاء الله فيه امل بس محتاج تعب كتير اه بس مصر بلدنا و الله تستحق كتير
==================================
همس الاحباب:شكرا لردك الجميل و الحمد لله ان الفكره وصلتك زى ما انا عايزه اوصلها و ياريت منتخدعش بالوعود البراقه و الكلام الناعم لاننا فعلا كلنا انبهرنا بكلام اوباما بما فيهم انا
=================================
mony:كلنا مستنيين اليوم ده و ياريت ميتأخرش
=================================
د.ياسر:انا كلامى هنا عن مصر و الدكاتره المتلمعين دول هما الشويه المرتزقه الناهبين لخير بلدنا
و العايشين على خيرها
==================================
موناليزا:ياريت منغرقش قبل مانلاقى القشايه دى بسرعه
لان البلد خلاص مش مستحمله
==============================
ويكا:ماشى حاعدى موضوع سبهلله بس بعد كل الكومينتات دى انت ما علقتش على الموضوع الاصلى
===================================
Manoooosh:املها فينا كلنا فيا و فيكى و فيهم لانها امنا كلنا
وصلت الرساله و لا لسه
=============================

المعلم محمد صاحب المطعم - طعمية سخنة يقول...

اكبر اولادها يقولها

ويكا يقول...

لا ازاى علقت
اطلعى فوق كده شويه!
وروحى على بوست " مصر العزيزه" اللى انا كاتبه كده ، هتفهمى انا اقصد ايه

وعلى فكره فى بوست اخير هيعجبك وهيعجب كل الستات ياريت تبقى تقوليلى رأيك فيه.

Foxology يقول...

العملية خطيرة فعلا والله اعلم بنسبة نجاحها على فكرة يعنى ممكن ميبقاش فيها الحل السحرى

جميلة القصة والأجمل الأسقاطات اللى فيها

تحياتى :)

norahaty يقول...

جميلة القصةومعانيها
سواء المباشرة منها
او الغير مباشرة

لاسع افندى يقول...

الدكتور ده لازم يكون حد من ولادها اللى قلبهم عليها الغريب عمره ماحيداويها ويبقى قلبه عليها ويعالجها بمسكنات ويضحك عليها

تحياتى

ملحوظه ارجو حذف صورة الطفله ونكتفى بالصوره الجميله لانها بجد مؤلمه جدا

سبهللة يقول...

شفافها الله وعفاها

عطش الصبار يقول...

السلام عليكم
الحقيقه ان بعض ولادها بيتعمدوا يخدروها
ويدوها ادويه غلط كمان عشان يستوردوا العلاج والاكل ويخدروها عشان تفضل تايهه ماتعرفش ايه اللى بيجرلها يقوموا يبعوا ارضها ويهربوا فلوسها ويدمروا رزق ولادها الضعفاءاللى مالهمش ضهر
لكن اكيد هيجى يوم تفوق وتعرف مين باعها بالرخيص ومين حافظ عليها وحاول ينجدها
بوست رائع
تقبلى تحياتى وتمنياتى بالشفاء لامنا