الأربعاء، 24 فبراير 2010

نفسى ابقى يسرا !!!!!!!!!

نفسى ابقى يسرا

اوعوا مخكم يروح لبعيد و تفتكروا انى عايزه ابقى زيها شكلا

نووووووووووو طبعا

انا راضيه بنفسى كده و الحمد لله و اهو قضى اخف من قضى

انا اصلى دايما اشوف يسرا فى مسلسلاتها ست قويه جدعه يعتمد عليها

تقع فى كل مشكل و مشكل و بذكائها و شطارتها تقدر تخرج منهم باقل خساير ممكنه

انا مش باقول ان انا ضعيفه لا الحمد لله نوعا ما قويه

بس انا عايزه ابقى اقوى

بس انا نفسى ابقى زيها طاقه نور لكل اللى حواليا

اقدر اساعد اصحابى و انصحهم

عايزه اما حد يعتمد عليا فى حاجه اكون قد توقعاته فيا

نفسى اما اوعد حد بحاجه مهما حصل اقدر اوفى بوعدى

نفسى مهما قابلتنى صعوبات فى حياتى متكسرش

ممكن اقع بس اقدر اقف تانى و الملم نفسى جوه نفسى و ابدأ من جديد

نفسى ابقى قويه و انا باربى ولادى و اطلعهم هما كمان عندهم روح التحدى

نفسى اقدر ارضى كل اللى حواليا من غير ما اخسر رضايا عن نفسى

نفسى اما اوصل لنهايه حياتى اقدر اقف و انا واثقه من نفسى و اقول

انا كنت ناجحه


عرفتوا بقى ازاى نفسى ابقى يسرا






هناك 83 تعليقًا:

سمو الأميرة سارة يقول...

يااااااااااااريت كل الستات في مصر تبقى زي يسرا والله

بجد بزعل اوي لما اشوف واحدة ضعيفة ومتخيلة انها اتخلقت ضعيفة ومش ممكن تكون اقوى

بوست جميل اوي تسلم ايدك يا قمر

adel يقول...

حماتي تبقي يسرا ؟؟؟
وساعتها عروستي تبقي منة شلبي و تديني بمبة !!!!!
يالهوي
لا لو كده هافسخ الخطوبة و اتروح اشوف نفسي بقي ;)
:]:]

بس انا مبحبش يسرا ما تخليكي اي حد الا يسرا و الهام شاهين و نادية الجندي
بلاش دووووول

ويسرا بتمثل انها قوية بس في امثلة حقيقة لستات قوية و ساعات مفترية و بتكون طجاقات نور للحواليها و مين قال انك شخصيا مش كده !!!
تفكير حضرتك لوحده كفاية يوصلك للهدف ده

AHMED SAMIR يقول...

ساعات عبلة كامل برضة بتلعب نفس الدور
ممكن تكوني عبلة كامل

احاسيس آيوشه يقول...

ازيك ياادكتورة اخبارك ايه يارب تكونى بخير
بخصوص يسرا وادوراها مفيش انسان فى الدنيا يقدر يبقى كده دى تحس انها مثاليةزيادة عن اللزوم مفيش انسان كده يعنى ربنا خلق الانسان ساعات ضعيف ساعات قوى ساعات حزين ساعات فرحان مفيش حال ثابت

انا خلصت امتحانات خلاص وباذن الله هكلم حضرتك واتفق نتقابل امتى علشان اوفى وبعدى ومش هطلع ندلة المرة دى بجد هههههه وهبعت لحضرتك الايميل الجديد على الفيسبوك علشان القديم راح فى الوباء

فاتيما يقول...

يا سلام!!!

و هيا يسرا بس
اللى قوية؟؟


طب تعالى اوديكى لستيتة و ام بتول و صبرنى يا رب و شاهى و وندا و مليون حد تانى اجدع من ست يسرا دى

بلاااااش

تعالى يا امى
افرجك على الحاجة ام فاتيما

اهى دى بقى شافت اللى شفته يسرا
فى خمستلاف مسلسل و يزيد

و عادى يعنى


بصى بقى يا مجننانى


الاخت يسرا مش حلوة كدا علطول
و لا جدعة كدا علطول
و لا مثالية كدا علطول


ما هى اصلها بشر يعنى


لازم هتيجى فى وقت
و تنخ تحت وطأة الجبال
اللى شيلاها


بس الضرورة الدرامية تحتم
ان الاخ المؤلف يلملك كل الاحداث
فى نوبة واحدة عشان فى الآخر
تتعاطفى مع البطلة
و تحبيها
و تحترميها



الدنيا مش كدا للأسف


مش حلوة علطول
و وحشة علطول


و بالتالى احنا كمان اللى عايشنها
مش اقويا علطول
و لا ضعفا علطول


انا مالى الأيام دى
ماشية فى المدونات أفرق حكم
و مواعظ؟؟؟


اكونش لسعت خلاص
و ركبنى جنون العظمة
و فكرانى خلاص فهمت الدنيا ؟؟

باينى والنبى

طب مش تقولولى يا عيال


الملخص عشان يا حبيبتى
متقسيش على نفسك دا


انتى نقطة نور
لكل اللى حواليكى
بس اصل القمر كدا
لازم يشوف من حواليه كله عتمة


طب انزل معانا يا جميل للأرض
و بصى كدا

هتلاقيكى منورة
و متوهجة
و احنا بنحبك
و باصينلك


و انا عمالة اعاكس فيكى
كام بوست و انتى مبتصدقيش كلامى
و تقعدى تقولى ابقى قوية و يعتمد عليا و العيال و ابصر ايه
مينفعش كدا
انا قربت يجيلى اوكتئاب
و ذنبى فى رقبتك يا لولااااااااا

star in the sky يقول...

يسرى اه دماغ وجدعة

نفسى اكون زى احمد زويل فى العلم

ورجب طيب اردوغان فى الدماغ على حد علمى ان عم الحاج عامل حاجاات جامدة فى تركيا

وناس كتير فى كذا حاجة

عاوزة اعمل خلطة كده من شوية ناس اعرفها واطلع شخصية مش هتكرر تانى

فتاه من الصعيد يقول...

ومين قالك ان يسرا كده

لو قصدك شخصياتها في المسلسلات الهابطه اللي واجعه دماغنا بيها علشان تلملها قرشين بعد ما السينما رمتها بره تبقي غلطانه

هما بيخلوها هيرو لان المسلسلات عمرها ما بتحكي عن ابطال حقيقيه ... بتجبلنا ابطال خرافيين وتنسبلهم احلامهم الهبله وقيم محدش بيعرفها اصلا دلوقتي

معلش اصلي بكره يسرا :)

تحياتي

الجواز و سنينه يقول...

مين قالك ان يسرا علشان بتمثل انها قويه انها تكون كده فى حياتها
انتى احسن من يسرا بمراحل
ليه
لانها ممكن تكون مش كده فى حياتها
بس انتى على الاقل عايزه تكونى كده
ربنا يديكى كل اللى انتى عايزاه
و تكونى زى ما انتى عايزه

عاشقه الرومانسيه يقول...

اشمعنى يسرا يعنى؟؟؟؟؟؟؟
ماانتى ممكن تكونى قويه وانتى علا
ثم ان الضعف والقوه من صفات البشر
بمعنى
ان الانسان اللى بيكون قوى جدا قدام الناس بيجى عليه وقت وينكسر بينه وبين نفسه على الاقل
وبيكون نفسه يبكى بحرقه من همومه اللى شايلها باستمرار

قوتك فى ضعفك (كأنثى)
قوتك فى تكوين شخصيه اولادك (كأم)
قوتك فى الحفاظ على بيتك (كزوجه)
قوتك فى برك باهلك (كأبنه)
اقرى البوست تانى كده هتلاقى نفسك فعلا قويه
واحسن من خمستلاف يسرا

ثم انى بحبك وانتى علا
ضعيفه قويه مش هتفرق لانى بحبك زى ماانتى كده
ومفيش حد ضعيف بيقول على نفسه كده

يعنى كل الكلام ده نطلع منه بانك فعلا قويه يالولو

Mahmoud البطراوى يقول...

طب ما تبقى يسرا!!
والله مش بهرج
عاجبك صفه فى حد وعاوزه تخديها وتحوريها وتبقى صفه متأصله فيكى ما تعملى كده
الطبيعى ان الانسان كائن بيتطور

بس وانتى بتاخدى الحلو اللى انتى شايفاه فى يسرا حطيه فى قالب يمشى معاكى .
عارفه انتى كانوا زمان بيقولوا فى فرق بين تمصير الادب وبين تعريبه.

التمصير انى احور فى الادب العالمى دا عشان يناسب بيئه زى مصر
والابطال يبقى ست البيت , وحمدان

انما التعريب انى اترجم بكل حياديه ويفضل البطل اسمه جيمس والبطله كاترينا.

انتى بقى خدى يسرا بطريقه تنفع د علا.
التطور حلو

richardCatheart يقول...

وليه يسرا ماهو لوكده تبقى ناديه الجندى بضم الجيم ههههه صحيح هى هارتنا افلام مقاولات ونفختنا جامد عبر الازمنه المتعاقبه بس فايتر وجامده وجدعه ههههههههه والاهم من دا هى راحت تل ابيب كمان ههههههه
لالالا شويه جد بقى بصى يا علا اولا واضح من كلامك معنا كلنا سواء مقربين او لاء انك جدعه وست كويسه بتفهمى ومتعلمه والاهم عندك بصمتك وشخصيتك دا الاساس
وبادم موجود خلاص عمرك ماهتلاقى حد بتحبيه محتاجلك ومش هاتقفى جمبه مهما حصل وعمرك ماهتلاقى حد محتاج مساعده من اى نوع وانت تقدرى وهاتتاخرى عنه
اما الصلابه والتحدى دا مع صفات الشخصيه بيجى بالتدريج من مشاكل الحياه تربيه الولاد والخوف عليهم وعلى البيت وتعب العمر فى الشغل والكفاح
كل دا بيعمل اثقال للبنى ادم المهم ان
الاساس موجود وكفايه انك بتفكرى كده
ولعلمك انت اجدع كتيييييييييييير من مودام يسرا ومن الست ناديه الجوندى
ومن كل موزز السيما العربيه لان الاكيد انهم مش كده ومابشوفهمش جدعان ولا اقويه دا شغل سيما
انت ست مصريه صنع فى مصر عاديه يمكن من وجه نظرك بس شوفى نفسك فى عنين الناس اللى حوليكى ومن غير اى رفهيات زياده سوبر هيرو فى حيات كل اللى بيحبوكى جوزك وولادك واهلك واصحابك حتى احنا انا عن نفسى بشوف كتابتك ببقى سعيده بقدرتك على التعبير عن نفسك واى ست مدونه بتسعدنى بقوتها فى التعبير عن نفسها اوى ودا قوه وصلابه
انت اللى بتعمليه دا قوه مع الوقت هازيد وتبقى حديد بس مش عز ههههههه

تسلمى على البوست
ويارب تبقى احسن من يسرا مش زيها
تقبلى مرورى

Cute Kitty **sookra يقول...

يسرا مين دى يالولو
انتى اجدع من مليون يسرا
وبعدين عندك حق هى لها ادوار كتير بتبان فيها جدعه اوى وقويه اوى
بس ياترى يالولو لو بقينا اقويا هنقدر نقوى على روحنا
لان روحنا هى اللى بتضعفنا لانها حنينه ورقيقه زيك كدا ياام شادن
ياحبيبتى كل واحد مننا فيه القوه والضعف
ماينفعش تبقى ضعيفه على طول ولاقويه على طول
وخلاص ياستى خدى من يسرا قوتها

Pink Dreams يقول...

يا ستى ومن غير ما تبقى يسرا تقدرى تعملى دا كله

مفيش حد بيبقى قوى على طول ومفيش حد بردو بيبقى ضعيف على طول

ساعات بتجيلنا لحظات نضعف فيها وبنحتاج لحد يقف جنبنا

اما يسرا فى مسلسلاتها دايما تطلع قويه فى كل المواقف تقوليش سوبر وومان يا خواتى

بوست جميل يا قمر

واحدة مفروسة يقول...

يسرا ؟؟؟!!!!!

لأ
انا مش عاوزة أكون يسرا خاااااااالص
شايله هموم و مسؤليات
نو نو نو

مممممممممممممممممم
انا عاوزة اكون هيفاء وهبي
هههههههههههههه
اه من غير ما تتفرسي
و ممكن نانسي عجرم
اهو واحدة من الاتنين المدلعين الحلوين دول

لكن يسرا ب 100 راجل
و انا زهقت انى اكون ب 100 راجل
و اتحمل مسؤليات

و النبي يا علا يكرمك ربنا
لو بس عندك نمرة الاخت هيفا ولا نانسي
و صيهم عليا يدوني دروس فى الدلع و الروقان
ههههههههههههههههههه
سلام

قوس قزح يقول...

ممكن ابقى اليسا ؟؟
هو تقديم الطلبات فين ؟؟

لـــولا وزهـــراء يقول...

دكتوره علا
-****-****-***
قبل اى كلام شدنى العنوان ازاى تبقى زى يسرا يعنى استغربت بصراحه لكن لما قرات قبل ما اتمعن فى القراءه شدتنى الاغنيه طبعا لانى مش عشاقها وكمان لان فى جزء فى الاغنيه دى نصيحتى لاقرب صديقاتى الى قلبى " من الغباء انك تعيش زى الملاك بين البشر " تحفه الاغنيه وبعدين انتى بقى المفروض تقولى عاوزه ابقى زى شيرين لانك البوست اللى فات والبوست ده اغناى لشيرين
نبدا بقى فى التعليق على كلامك يا ست الكل فى ناس فى واقع الحياه اجدع من يسرا مليون مره ولو دورتى فى الناس اللى تعرفهيم هتلاقى فى امثله زى يسرا واكتر هتلاقى اللى شالت مسئولية نفسها ومسئولية الاخرين ايضا عارفه افتكرت دلوقتى اغنية فليم طير انت دور بنفسك جوه نفسك هتلاقى فيكى حاجات حامده اوى وجدعه جدا جدا كمان اكيد جواكى مزايا لو يسرا او غيرها شافوها هيقولوا نفسنا نبقى علا

عارفه اخر مسلسل ليسرا اللى كان اسمه خاص جدا ربنا سبحانه اكرمنى بحد قريب منى اوى هى نفس الشخصيه لكن مش دكتوره وشخصيه عاديه يعنى مش مشهوره او اى حاجه تانيه
كالعاده اكتشفت انى رغييييييييييت كتير اوى اوى بس اعمل ايه بقى طبع فيا ومش عارفه اغيره
اتمنى ان تكونى قويه مش من الخارج ولكن من الداخل ايضا ويتكونى اجدع من مليون يسرا

زهراء

موناليزا يقول...

واشمعنى يسرا يعنى!!
طب ما فيه امثال كتير من الصحابيات
وهنروح بعيد ليه واحنا قدوتنا خير البرية نبينا محمد صلى الله عليه وسلم

مع احترامى لرأيك أراكِ لم توفقى فى إختيارك

Single Mummy يقول...

نعم يا ست الداكتورة
وانتى تفرقى عن يسرا إية؟؟؟ أقدر أعرف؟ دا كفاية عليكى قطعت النفس طالعة نازلة..دا عير المدونة ..والتعليقات والزيارات الحلوة للاصحاب والمعارف اللى بتكتبيها من قلبك..دا كفاية العيال ومدارسهم وتدريباتهم وشيوخوهم وسلاطاتهم وبابا غنوجهم..وكلة كوم طبعاً وابو العيال كوم تانى..يا شيخة إن ماكانت يسرا بتقول دلوقتى لو عملت مسلسل عن حياتك ومثلتة أأكيييد هتاخد الاوسكار
قال يسرا قال
تحياتى وقبلاتى

mayada يقول...

عروستي

بحر الالوان يقول...

لو بمنطق القوة ...... يبقي نعيمه الصغير هي الحل المثالي .

تحياتي في مرور اول

الملاك الحزين يقول...

وحشتنى ياقمر اخباراتك ايه عارفه انى متأخره بس كنت فى حالة من الاحباط مسيطره عليا وبحاول ارجع اقوى من الاول عشانى واثقه فى نفسى ومش عاوزه اكون زى حد
ربنا يكرمك يارب ويصلح ليكى حالك وبجد وحشتينى مووووووووووووووووت

دعواتك ليا بجد من قلبك يا على
كل عام وانتى بخير بمناسبة المولد النبوى الشريف
تحياتى
ايناس

Ashraf يقول...

ياناس اشهدوا علينا

طيب انا اعمل ايه

لما هى تبقى الاستاذه يسرا (وانا بحبها وبموت فيها) -
انا بقى هاكون مين-والاولاد؟؟؟؟؟؟؟؟؟؟؟؟؟؟؟؟؟؟

طيب انا والاولاد هنتعامل معاها ازاى

ربنا يستر

انا باشكر فاتيما بالنيابه عن المدونه وتعليقاتك مهمه جدا
ده انت مثل البرادعى (الشخصيه الكبيره)

اما بالنسبه لغناء شيرين فهو صوت مصرى اصيل ومحترم ومحتشم

عموما انا راجل متواضع بس اهم حاجه اكون سى السيد فى البيت

باشكر تعليق عاشقه الرومانسيه الرائع

هي وظروفها يقول...

بصي يا علا

مش لازم نكون بنعرف نساعد كل الناس

او لازم يكون عندنا مصباح سحري

لحل مشاكل حبايبنا وصحابنا

لا يكلف الله نفسا الا وسعها

اتصرفي واقفي جمب حبايبك بقدر المستطاع

وساعتها اكيد هتكوني راضيه عن نفسك

لانك مبخلتيش بشيء

جميل قوي اننا نحلم اننا نقدري نساعد ونقف جمب كل الناس الغريب والقريب
والله ده حلم جميل بس لو مقدرناش هنعمل ايه ادي الله وادي حكمته
هو صحيح ايه موجه الكئابه اللي اغلبنا عايش فيها
لازم نشوف حل لحالت الزهق دي
والله يا علا كنت بضحك زمان ودمي خفيف بقيت رخم حتي بيني وبين نفسي

emymony يقول...

يا لولو ياعسل لو بصيتى للحقيقه هتلاقى نفسك تفوقيها بمراحل المراحل
سورى يعنى مين يسرا دى
دا كله تمثيل وضحك على الدقون زى مابيقولوا
بس طالما عندك الاحساس ده اكيد هتكونى احسن من تمثيلها اللى بتبين انها قويه ومن جدعنتك عمرك ماهتخذلى حد
مع خالص حبى وحبى

صيدلانيه طالعه نازله يقول...

Ashraf

معلش يا جماعه حنخلى اشرف اول واحد ارد عليه
معلش بقى الراجل قايل كلام زى الفل
مين بقى اللى بتحبها و بتموت فيها يسراااااااااو لا اناااااااااا
وضح عشان اللى انت قولته فيه قولان

ماشى يا عم سيد
يوووووووووه قصدى يا اشرف باشا

صيدلانيه طالعه نازله يقول...

سمو الأميرة سارة

انا فعلا قصدى على قوه يسرا فى الشخصيات اللى بتقدمها

و على فكره مفيش حد بيتولد ضعيف
احنا اللى بنضعف روحنا بايدينا

نورتينى يا ساره

صيدلانيه طالعه نازله يقول...

adel

متخفش يا عادل احنا ناس اصيله حتى لو ربنا كرمنى و بقيت يسرا عمر ما حاتكبر عليك يا ابنى
ههههههههههههههههههههه
ربنا يكرمك يا عادل يا جابر بخاطرى

منورنى

صيدلانيه طالعه نازله يقول...

AHMED SAMIR

عبله كامل مفتريه و فيها حنيه بس مش مقنعه انها قويه

بس ممكن افكر برضه

تحياتى

عاشقه الرومانسيه يقول...

Ashraf


لا شكر على واجب يادكتور
والرائع بجد انك فعلا انسان محظوظ بوجود الدكتوره علا فى حياتك
الله اكبر
اللهم لا حسد

هراء لا داعى له ..... يقول...

إحم ....

أنا لقيت المدونة كدا فى السيرش بس كان لازم أقحم أنفى و أرد على حاجة



بس ........

الرد إللى كنت عايز أقوله قالته موناليزا

يا جماعة يسرا إيه بس دى إللى عايزين تبقوا زيها !!

حتى لو على الصلابة و قوة الشخصية إللى بتمثلهم
أكيد يعنى مش واحدة مفسدة دى إللى هننقل الصفات الكويسة دى منها

ياريت نختار الأمثلة كويس


و إن كان الصراحة الكلام دا ميمنعش إن الواحد نفسه يبقى زى يسرا فى حاجات تانية و الصراحة بحسدها عليها رغم إنى ولد

و هى إنها رغم تعديها ال...مش عارف كام و الله بس هو بقى عندها كتير من العمر يعنى

و رغم ذلك لسا أمورة و أكثر جاذبية من ناس كتير ــ من الجنسين ــ فى سن الشباب

حاجة غريبة ......

تلاقى واحدة زى دى و زى مرفت أمين مثلا
مش بيبان عليهم السن و لا العجز
بينما الواحد يدوبك عدى 23 سنة و حاسس بتضخم تلك المشاعر عنده ....

صيدلانيه طالعه نازله يقول...

احاسيس آيوشه

انا مش باتكلم عن المثاليه
انا بتكلم عن قوتها و قدرتها علىالخروج من المشاكل

لكن مش قصدى هيا خالص

انتى بقى انا مستنياكى و نشوف حتجينى الصيدليه و لا ايه النظام

منورانى يا جميله و بالنجاح ان شاء الله

صيدلانيه طالعه نازله يقول...

فاتيما

ايوووووووووون انا عايزه اشوف ام فاتيما عشان احييها و ابوسها على الهديه اللى بعتتهالنا دى
انتى يا بنتى اللى شايفانى كده
عشان عنيكى حلوه و متفائله دايما

انتى طيبه قوى يا بت انتى و انا ادمنتك و مفيش حل

انا باتكلم عن ادوارها القويه و الله و عارفه ان ممكن تكون اضعف من الضعف فى حياتها

بحبك يا حاجه

صيدلانيه طالعه نازله يقول...

star in the sky

ايوه الخلطه السريه
ههههههههههههه
زى بتاعه كنتاكى

بس دى خلطه القوه

نورتينى

فاتيما يقول...

دكتور أشرف
-----------

حضرتك بتشكرنى على ايه بس؟؟

طب دا لولاّ اختى
و حضرتك جوز اختى
و العيال الشقاوات دول ولاد اختى
و الله حاسة بكدا



و لو هيا يسرا

تبقى لازم حضرتك تكون مثلا
محمود قابيل
او توفيق عبدالحميد
او حد من الناس اللى مش موجودة
فى الواقع دى
و ينصدف انها تظهر فى آخر الحلقات ....

بس الحكاية مش محتاجة
انت اجدع منهم الف مرة
لأنك حد حقيقى
و بيحب بطلة قصتنا بجد
دا رأيى الشخصى
من غير حتى ما أسأل حضرتك
و لا يبقى فيه موقف لذلك
انا بشوف دا بمجرد وجودكم سوا
و لو من غير كلام
ربنا يحرسكم من عيونى
و عيون كل حد



و علا غالية عندنا كلنا
ومش عندى انا لوحدى
لما بلاقيها كاتبة حاجات مشابهة
ببقى عاوزة اقول اى حاجة و كل حاجة
بس الواحد ساعات كتير مبيعرفش يعبر
الحب اصله صعب
يختصر فى جمل و كلمات


ربنا يخليكم لبعض و للعيال

و لينا احنا كمان

يا رب

صيدلانيه طالعه نازله يقول...

فتاه من الصعيد

انا بقى باحبها لانى باشوفها طيبه فى ادوارها
معرفش هيا ايه فى الحقيقه بس بحبها

منورانى يا بلدياتى

صيدلانيه طالعه نازله يقول...

الجواز و سنينه

ربنا يكرمك يا رافعه معنوياتى

بحبك و منورانى

صيدلانيه طالعه نازله يقول...

عاشقه الرومانسيه

ربنا يخليكى يا دودو
كلامك لمسنى بجد
يا ملكه الحب و الرومانسيه

بقى انا كل ده

انتى واخده مقلب جامد فيا
كلامك ده تاج على راسى و اكتر من حقى بكتير
وش مكسووووووووف قوىىىىىىى

صيدلانيه طالعه نازله يقول...

بطوط حبوب

انا فعلا عايزه ده انى اخد منها الصفات اللى بتعجبنى فيها و اللى تنفعنى و تناسبنى
تمصير تعريب
اى مسمى
المهم الاستفاده

اهلا بيك

صيدلانيه طالعه نازله يقول...

richardCatheart

لا انا باكره ناديه الجندى كره بمعنى الكلمه

كلامك عنى حلو قوى و حيخلينى اتغر جامد

و ياريت ابقى عند حسن ظنكم بيا دايما

تحياتى ليكى

صيدلانيه طالعه نازله يقول...

Cute Kitty **sookra

ايوه انا عايزه قوتها
ليها لازمه عندى
الضعف اصلا موجود و اللى عايز يجى ياخد

منورانى يا سكرتى

صيدلانيه طالعه نازله يقول...

Pink Dreams

انا باقول عليها بيونيك ووومن
هههههههههههههههههههه
ناقص تطير فى الهوا زى سبايدر مان
ههههههههههههههه
بس باموت فيها

و باحبها و هيا ناشفه و جامده كده و قادره على الدنيا
نفسى يا نااااااااس

منورانى يا قمره

صيدلانيه طالعه نازله يقول...

واحدة مفروسة

حاضر يا روسه هانم
حابقى اكلم مدير اعمالهم و اخدلك معاااااااد

ماشى يا روسه بس اما اشوفك
متخليكى راجل احسن
اريح و الله
هههههههههههههههههه

صيدلانيه طالعه نازله يقول...

قوس قزح

اليسا مش فاضيه اليومين دول
متخليكى مع روسا عند هيفا و اهو تونسوا بعض فى الرايحه و الجايه
هههههههههههههههههه
الطلبات بتتقدم عندى

صيدلانيه طالعه نازله يقول...

زهراء

ده انتى اللى اجدع من مليون يسرا فى خاص جدا
انتى محلله نفساويه من الاخر يا بنتى و مش عارفه قيمه نفسك
متيجى نشتغل مع بعض

بحبك يا زهرا

صيدلانيه طالعه نازله يقول...

موناليزا

احلى حاجه فيكى يا مونى صراحتك
و الله من ساعه ما كتبت البوست وانا مستنياكى
عشان اعرف رأيك
و معلش مره تصيب و مره تخيب

منورانى دايما

صيدلانيه طالعه نازله يقول...

Single Mummy

ربنا يعزك يا مدلعانى انتى
و الله كلنا حياتنا فيها من العبر و المفارقات ما يستحق الاوسكار بجد

بحبك يا بت انتى و منورانى

بسنت يقول...

هى فعلا- فى مسلسلاتها- فيها كل الصفات دى
بس ما ننساش ان الكمال لله وحده
والشخصيه القويه دى مهارات مكتسبه فعلا يعنى وجودك فى جماعه بتعملى معاها بينمى الموضوع دا وروح الجماعه مثلا
وكدا - لازم تجربى - بس انا شايفه ان اداره صيدليه هى شجاعه بردوا لان الشيكات ومسئوليه الاداره - تحتاج فعلا لشخصيه قويه تدير كل من حولها
اما مساعده الغير دى محتاجه بس تواجدك بين اصحابك ان شا الله تليفونات واقاربك هتلاقى نفسك فعلا فى وسط مشاكلهم
الغريب دا بقى من عند ربنا تلاقى حد محتاجلك وتقدرى تقفى معاه
كله متوفر يعنى المهم احنا نكون مستعدين

دمتى بكل الخير

صيدلانيه طالعه نازله يقول...

mayada

شعرها اصغر و عينيها حوله
هههههههههههههه

صيدلانيه طالعه نازله يقول...

بحر الالوان

و نعم الاقتراحات

هههههههههههههههههه

منورنى

صيدلانيه طالعه نازله يقول...

إبتسامة ملاك

مالك يا انوس
حاساكى حزينه و مش انتى خالص
فين ضحكتك اللى كانتى بتطلع من الكومنت اسمعها عندى
سيبيها على الله و هو يحلها
و كل سنه و انت طيبه

صيدلانيه طالعه نازله يقول...

هي وظروفها

انا يا وليد من فتره باقول الهوا اللى فى البلوجر كله مسموم
كلنا زعلانين و مكتئبين معرفش ليه
بس خير ان شاء الله
حاسمع نصيحتك و اجرب اعمل بيها

سلامى لساره
منورنى

صيدلانيه طالعه نازله يقول...

عاشقه الرومانسيه

ميرسى يا بت يا دودو
حابقى اشوفك بحته ملبن من بتاع المولد
هههههههههههههههههههه
اموووووووووووه

صيدلانيه طالعه نازله يقول...

emymony

ربنا يخليكى يا ايمى و الله الكلام ده اكبر منى و ما استحقوش
يارب ابقى زى تخيلكم ليا دايما

منورانى ومبروك النجاح

صيدلانيه طالعه نازله يقول...

هراء لا داعى له .....

يعنى انت رأيك زى موناليزا و مع ذلك داخل تعاكسها
طب ازاااااااااااااى
افهم بقى
انت معاهم و لا عليهم

صيدلانيه طالعه نازله يقول...

فاتيما

ايه يا بت ده كله
بقى بتحبينى و عامله تقيييييييله
ماشى يا تيما
و كاتمه كل ده فى قلبك و ساكته
ماااشى يا باتعه

انا بقى اللى باموت فيكى و كل اللى هنا بيموتوا فيكى و ممكن اعمل استفتاااااااااء دلوقتى عليكى يا مدام برادعى
ههههههههههههههههههههههه

صيدلانيه طالعه نازله يقول...

بسنت

دايما يا بوسى كلامك هادى و حكيم و بيدخل دماغى عدل
طبعا مش ست المفتشه
ربنا يجعل كلامنا خفيف عليكم
هههههههههههههههههههه

Baskouta يقول...

لولا وحشتيني
حلو انك تتمنى حاجات حلوة شايفاها في ناس
بس الاحلى انك تنمى الحاجات الحلوة اللى فيكي لحد ما توصلي للي يرضيكي

وحشتيني والولاد كمان
سلامي ليهم
تحياتي البسكوتية

صيدلانيه طالعه نازله يقول...

Baskouta

ياريت فعلا نقدر نكتشف الحلو اللى جوانا و ننميه

انت وحشتينى قوى و نفسى نتقابل تانى بقى

بحبك

هراء لا داعى له ..... يقول...

ما هو الحق يقال مهما كانت الموانع ...

هى الصراحة يسرا تستاهل تتعاكس

و إللى يشوف فيلم بوبوس يدرك إن دى حقيقة علمية


كون بقى إنها مفسدة و من أدوات التغييب و التعمية دا موضوع تانى خالص وليه أحكام تانية خالص


صحيح الكلام دا مزدوج المعايير لكن مين قال إن المعايير لازم توحد ..؟

Tamer Nabil يقول...

والله جميل ياعلاا

عايزة تبقى يسر طيب خليها تديكى دروس فى القوة خبرة بقى باالشخصيات اللى بتقوم بيها

ربنا يوفقك ويكرمك

مع خالص تحياتى

خواطر شابة يقول...

ربما يسرا نفسها ايضا تتمنى ان تكون مثل الشخصيات التي ثمثلها من يدري

Wanda يقول...

تلاقيكى بقى روحتى تنام ومبسوطة فاكرة نفسك صرفتى العفريت :-)))))
لا يا ماما
اا منصرفش ببوست زى ده :-)))))
الى فيه شبة نكد برضة

قال يسرا قال وبعدين ؟؟
ليه يعنى على ايه ؟؟

قولى نفسك الممثلين الشوباب يقعوا فى غرامك
اعترفى
اصل يسرا عندى بتطلع علشان الاصغر منها يحبوها :-)))

ملها الصيدلانية الطالع نازله
دا حتى الطلوع و النزول بيخسس :-))
يعنى بيحافظ على الوزن :-))) طبيعى
و الصيدلانيات احلى القمرات فى الكون :-)) ايوه ايوة انا ممكن اثبتهالك عمليا كمان :-))

و قال جامدة و تستحمل و تشيل
ليه عايزة تبقى نملة؟؟؟
اصل النملة هى الى بتشيل و قد وزنها 500 مرة تحبى اوريكى صورة
http://www.jor2day.com/vb/t25142.html

و الناس الى حواليكى ميشيلوا هما كمان ليه؟؟ عوديهم و علميهم :-)

مشعارفة نظام شيلنى و اشيلك :-)) و لا ايه ؟؟

بصى بقى انا انتى-فطوم
يعنى هى تدلع و تزعق
انا بقى اقلب و انعكش :-))

و لعلمك مش فطوم بتقولك من ضمن الامثال واندا (معلش اعذريها اصلها ملحقتش تقراء بوست النكد و لسه فاهمنى غلط :-)))
انا مش جامدة و بصراحة منفسيش ابقى جامدة :-))
لان الجامد يوم ما يتكسر بيتكسر قوى
خلينى شوية على جامد و شوية على ضعيف و شوية على مرن بين الاثنين

و بعدين عيب
انا حقولك :-) وش بيغمز
انت بشوية ضعف ( قصدى تمثيل ضعف :-)) تكسبى اكثر بكثير من الجمودية :-))
ولا ايه ؟؟

فين الشاى و العشاء ؟؟
المدونة ديه مش عارفين ناخذ منها لاحق و لا غذاء :-(((
اروح اكل عند صبرنى و ارجعلك بعدين
نشوف بقى حتعرفى تصرفينى :-)))))))) ازى :-))

اكثر تعليق عجبنى للزميل احمد سمير لما قلك عبلة كامل
مش بقولك عليها احلى عياط :-))) مالها بقى ؟؟؟

أبو حميد يقول...

يسرا؟!
يا دكتورة حرام عليكى
طيب شوفى حد عدل

وبعدين أنا من موقعى هذا أبعث تحية كبيييييرة للدكتور أشرف على موقفة الراسخ والشامخ وإصراره على أن يكون سى السيد فى البيت وتصبحوا على خير يابنى أدميين لحسن حيغمن عليا ونفسى أنااااااااااااام
يارب الشغل اللى معايا يخلص بقى

سلام يا دكتورة

Ms Venus يقول...

مين بيقدر على طول يبقى قوى ؟


ومحدش بردو طول الوقت ضعيف


لكن يسرا بقى اقدر اقول المخرج عاوز كده


تحياتى ليكى يا دكتورة

اول زيارة لمدونتك وعجبتنى جدا

ذوقها عالى

7annen يقول...

يارب ينولك كل اللى فى بالك يارب

ستيتة حسب الله الحمش يقول...

يسرا؟؟؟؟؟؟؟؟؟؟؟؟؟؟
دي حتى معرقبة على رأي مامتي :)
ناقص تقولي عاوزة ابقى ايناس الدغيدي

نو يا ماما نو

خليكي علا
دي حتى عسل وناجحة ما شاء الله وزوجة وأم وبترجو عفو الله

انا فاهمة انتي عاوزة تقولي ايه

بس طبعك في حد ذاته حتى لو تعبك مع بعض الناس حبب فيكي اغلى الناس
جوزك
وده كفاية

والا ايه
هه
قولي
ما تقولي
ما هو ها يقرأ
تقدري تقولي حاجة :)
شرانية انا ع الصبح :)

norahaty يقول...

اكيد فيكِ جزء منها
وأحسن منها كمان
لأنك بتقولى فى
مسلسلاتها
لكن انتِ كده
فى واقعنا وحياتنا

سمع هوص (Abo 3li) يقول...

لالالالالالا
دكتورة علا اجدع من مليون يسرا....

والست عمرها مكانت ضعيفة... دحنا ال غلابة جنبكم...

ثم ثقتك بنفسك وبال تقدري تحققيه (وال انتي فعلا عاوزة تحققيه) هما ال هيخلوكي الشخص ال انتي عاوزاه...

تحياتي.. وكل سنة وانتي طيبة

Foxology يقول...

ومين قال ان يسرا قوية ؟؟ يسرا قوتها من تأليف المؤلف لكن الشخصيات اللى فى الشارع اللى من تأليف الحياة اقوى بكتير

تحياتى

Anonymous يقول...

انا عن نفسي مكنتش بحبها بس حبيتها أوي أوي أوي في "خاص جداً" :)

و بتمنى أكون زي "شريفة" اسمها في المسلسل و الشخصية دي إنما يسرا و شخصيتها لأ مبحبش التمرد والصياعة اللي هي فيهم"أحياناً" !!!

أغنية شيرين اللي انتي حاطاها هنا تجنن :)

ميرسي عاللحظات الحلوة اللي الواحد بيشعر فيها في بيتك الجميل ده بجد :)


واحدة بتحبكم كلكم :))

Wanda يقول...

و بعدين
مش حنغير شرين بقى
عايز مقطع من مسرحية وجهة نظر
و قرصين نوفالجين ابلونج ايوه الممنوع دوليا
ماهو الصداع حيروح ازى و العفاريت تتصرف ازاى

متقوليليش الصيدلية قافله يوم الجمعة
مينفعش :-)

و ادى قعده
لحد ما تجبيلى الفطار العب فى الميكركروم شوية و صبغة اليود
اصل عندى لوحات فنية لازم تطلع على الحيطان :-))

richardCatheart يقول...

كل سنه وانت واسرتك بالف خير مولد نبوى شريف سعيد عليكم اعاده الله بالبركات على امه الاسلام والمصرين كلهم

حلم بيعافر يقول...

للنااااااااس فيما يعشقون مذاهب
اى يسرا انهاواحدة دمها تقيل وتافهة ونمطية جدا واساسا اساسا اخر مرة كان بيجيلى مرارة اكمل مسلسل عربى للاخر وانا فى الاعدادى ما عدا حاجات صبحى والفخرانى
المهم
انت كده احسن من يسرا بكتير والجمل انك بتدورى ع الفكرة مش على الشخص اللى بيجسدها

تحياتى وحقدى وغلى على الصيادلة والدكاترة
(مدرس غلبان)

حزينه يقول...

مش عارفه حسيت انك تعبانه اوى
بالذات لما قولتى نفسك تكونى زى يسرا
فى انها جدعه
سلامتك لو كنتى تعبانه
والله يقويكى

حزينه اوى

نهر الحب يقول...

ربنا يحقق لك كل ما تتمنى
لكن هناك فرق بين الواقع والخيال
انتى اكيد يسرا بس على صيدلانية
لانك ست مصرية مثقفة واكيد بيمر عليكى مشاكل وبتتخطيها ودا دليل على انك يسرا جداا وبالثلث


وفقك الله واسعدك

Sharm يقول...

كل سن له طاقته و قدرته ..
المرأة في سن الاربعين مش زي المرأة في سن العشرين و عموما الانسان كلما كبر كلما زادت خبراته و زادة دقة نصائحه

يسرا في الخمسين من عمرها و لهذا تستطيع ان تساعد الكل بخبراتها و لهذا اخيرت سفيرة للنوايا الحسنة من الامم المتحدة

لا اظن انك تريدين الوصول لهذا السن !

عايش... ولكن !!!! يقول...

طبعا متقصديش يسرا نفسها
تقصدى دورها يعنى السيناريو
فى الحاله دى اوافقك الرأى

قهوة بالفانيليا - شيماء علي يقول...

يا بنتي يسرا دي شخصية عادية ..
يعني هي يسرا في حياتها العادية بني آدمة زينا كدة :)
ليها نقط ضعف و ليها نقط قوة و بتزعل و بتفرح و بتتعب و بتتضايق و بتنبسط ..
الشخصيات اللي في المسلسل دي بتبىق شخصيات مرسومة ..
كاتبها حد زيي و زيك .. ناس زينا .. راسمين شخصية كاملة بس .. لكن دة مستحيل يكون حقيقي ..
:)
الكمال لله وحده :)

م/محمود فوزى يقول...

السلام عليكم
ازيك يادكتوره

كل سنه وانتى طيبه
على فكره يسرا اصلا محبش اتفرج لها على اى حاجه سواء مسلسل او فيلم

طبعا انتى باذن الله تقدري تعملى اللى بتقولى عليه
مادمتى عايزه كده وتصري عليه
وقبل ده كله تدعى ربنا يوفقك
باذن الله يتحقق اللى انتى عايزاه

ربنا يكرمك ويوفقك دايما

(حلـم)،، يقول...

اقسم بالله ثورة

دولة ثائرة


وفاء


ارادة


تحدي

قوة

شجرة وارفة مثمرة لاتنحني بل تثبت امام ريح العاصفة لو بعرف اجي اسيوط

لاصنعتلك تمثال(المراة المحاربة)(المبشرة بالانتصار)

دكتورة تلبس زى الملائكة الرحمة

ولكن بين اضلاعها قلب نبي ثائر


روحي وعين الله ترعاكي

روحي الله يحماكي

سمع هوص (Abo 3li) يقول...

السلام عليكم
يرب تكوني بخير يادكتورة علا
انا معايا رسالة ليكي من وصف الاحساس هحطهالك زي مهي
"احم ..احم ...احم
معلش يا ابو علي لو فيها غلاسة يعني
ممكن بس لو بتدخل عند صيدلانيه طالعة نازلة
تقولها ان من يوم ما غيرت اللوك بتاعها وانا الجهاز عندي بيهنج كل ما افتح عندها
اصل الحج عندي عندي عضمة كبيرة وما يستحملش الحاجات دي فاما بيرستر واما بيقف خالص
وبس
وشكرا"


الرسالة زي موصلتني

Anonymous يقول...

السلام عليكم
ازيك ياع..أقصد يسرا
واضح أن في ناس مش عاجبها موضوع بسرا
طيب ايه رايك تخليها سميره احمد؟؟
بنت النيل
او
نجلاء

Wanda يقول...

:-)))))))))))))
ماشى اغنية بصوت احمد حلمى مقبولة
هو دمه عسل صحيح بس صوتة يصرفنى فعلا :-))
اجازة منى اليومين دول :-)) حتى بوست نكدى اخر :-)))