الأربعاء، 17 فبراير 2010

صيدلانيه......و حاطق


بصراحه انا النهارده بعد ما احتفلت اليومين اللى فاتوا و فرقعت البالونات

قلت اتكلم جد شويه

طبعا كلكم عارفين انى صيدلانيه و من الشرفااااااااااااااء كمان

الشرفاء دول اللى هما مبيبعوش اخضر و لا احمر و لا حتى موووووووووووف

اللى هما بيشيلوا هم آخر الشهر من اول ما يجى اوله

اللى هما اقصى طموحهم فى الحياه انهم يدفعوا حساب طلبياتهم كله كاش عشان ياخدوا الخصم الاضافى

اللى بيقلقوا اما يشوفوا محصل الكهربا معدى قدامهم عشان الفاتوره حتبقى غاليه



الكلام ده بقوله للصيادله الجداد و اللى زعلانين قوى ان القانون الجديد زود مساحه الصيدليه

و اشترط اجراءات صحيه زياده

انا عايزه افهمهم ان الصيدليه الصغيره اللى مساحتها محدوده مش جايبه همها

ده للناس اللى ماشيه صح فما بالكم بقى اما المساحه تتضاعف

ده حيترتب عليه كهربا زياده

خشب زياده فى تنفيذ الصيدليه

ضرايب زياده لان المساحه الاكبر فيها بضاعه اكتر اكييييييييييد

انا رايى ان الصيدلى اللى يتخرج يفكر فى مجالات جديده

يعنى الدعايه و التسويق

يشارك فى مركز طبى مع حد من زمايله

يشتغل مدير فى الصيدليات التانيه و يروح يشتغل مش ياخد الفلوس و يقعد فى البيت

و ميبقاش عارف الناس اللى واخده اسمه دول بيعملوا ايه و المسؤليه فى الاخر على المدير مش الصاحب

ليه تعكوا نفسكم فى مشروع و الله و الله لو حسبتوه حتلاقوه خسرااااااااااااااااان


انا شخصيا لولا ان الصيدليه فى بيت حمايا كان زمانى قفلت من زمان

او مفتحتش اصلا من الاول


انا عارفه ان امل كل صيدلى جديد اما يتخرج انه يفتح مشروعه الخاص بس عن تجربه منصحكمش


الموضوع مش محتاج اعتصام او مظاهره

الموضوع محتاج اننا نفكر صح و نلغى الفكره الاصليه

ساعتها هما اللى حيرجعوا فى كلامهم


يا جماعه ده بين كل صيدليه و صيدليه بقى فيه خمس صيدليات

و كله بقى شغال بنظام سرقه العيانين من العيادات و توظيف اطفال ياخدوهم لغايه الصيدليه

و طبعا ده متوقع فى ظل الكثره العدديه الكبيره فى الصيدليات


ياريت تفكروا و تحسبوها صح عشان ترتاحوا بجد



هناك 45 تعليقًا:

richardCatheart يقول...

صباح الفل حلو...... الكلام طبعا انا مش صيدلانيه مواطن مجرد عيان بحتاج الدوا
كلامك واقعى اوى وانا بحب دا
بادمت الفكره الاصليه اللى من 50 سنه مابقتش جايبه همها الاصح تتغير بحاجه اوقع تناسب الوقت والظروف والضغوط ونلغى فكره ابنى صيدلى يبقى يخلص وافتحله صيدليه وبعدين كله يتعك والواد يبقى هو الفاشل وننسا ان الظروف المناخيه حوليه بقت زفت غير مناسبه للنجاح ههههههههههههه والله لما بشوف كده بسال نفسى هو احنا بنعلم عيالنا ليه مش لاقين اى عقبات يرصوها يافتعلمهم يا فى شغلهم
ياريت الشباب الانن الصيديلى يسمع نصحتك بعد مدت تجربتك ياعنى بتديهم الخلاصه لاصه لاصه
ربنا يوفقهم

تسلمى يا جميل وبعد الشر عليكى من الطققان
تقبلى مرورى

AHMED SAMIR يقول...

اولا: السلام عليكم
ثانيا: انا كمان صيدلي و دفعة 2001 و عندي صيدلية و باشتغل في الدعاية الطبية
يعني لامم القضية من جميع اطرافها
عارفة المأساة في ايه:
لا في ال 40 متر مربع او ال 25 متر القضية في الفساد اللي في النقابة اللي احنا مااخترناش افرادها اللي كل واحد فيهم يمتلك سلسلة صيدليات و اخر ما يشغل بالهم هم الصعاليك صغار الصيادلة
و مش كدة و بس لا دول كمان فاتحين الصيدلة الخاصة ع البحري لدرجة ان الصيادلة اصبحوا اكتر من الهم هلى القلب و اصبح اي عيل فاشل و اهله معاهم شوية فلوس بقى صيدلي زميل
حاجة بجد تقرف

لـــولا وزهـــراء يقول...

دكتوره علا
-*-*-*-
ليه بس العنوان اسمه صيدلانيه وحاطق
وليه تطقى خليكى كووووووول
بصى بقى انتى بتتكملى من وجهة نظر عملك وشغلك صح الصح
بس للاسف مش كل الناس ممكن تقتنع بكلامك
يعنى ممكن اى صديلى لسه متخرج يوافق عليه ويقتنع به بكن ممكن حد تانى يرفضه
انتى بقى امشى بمبدا اللهم بلغت اللهم فاشهد
وعلى فكره شكل المدونه بقى تحفه بجد

انتى عارفه ان فى الشارع عندى تقريبا 6 صيدلاليات يعنى فعلا بقوا كتير جدا جدا جدا
فى انتظار بوست كله فرفشه

زهراء

فاتيما يقول...

لولاّ

ازييييييك

حطتيتى الغنوة اهو و انا كنت لسه رايحة اجيب الكود يا ست ....

براوة عليكى ى ى


ايه نوظام الاخضر و الأحمر دا
عشان انا مش فاهمة ...
بس شكلها حاجات ضد الكانون
صح؟


انتى فى عرضك للمشكلة
وصلتنى فى الآخر ان ملهاش حل خالص؟؟؟
و ان المهنة عاوزة تتفك و تتركب من اول جديد ...انا فهمت صح؟

اصل لو كدا يا لولتىّ
يبقى مش انتوا بس يا حبيبتى
دا اغلب المهن المحترمة فى مصر كدا
عاوزة اعادة ترتيب
عشان أصحابها مش قادرين
يقفوا اكتر من كدا
وا قصاد الفساد اللى حاصل

بس لأ
الشرفاء دول يا بنتى
هما اللى مخلينها صامدة لحد دلوقتى

و ربنا يبارك فيكو


و كل الجروح ليها دوا
يا طير يا حايم ف الهوا

ومسيرك ترسى على بر الأمان
و الرضا و الهنا
يا قلبى

بحبك قوى

star in the sky يقول...

الصيدليات بقت كتيييييييير اووووى فعلا

والصيدلية مش دايما بتكون خسرانه ده بيتوقف على المكان اللى فيه الصيدلية بمعنى فى كام صيدلية حواليه وفى كام دكتور وبرده على امكانيات الصيدلية انها تقدر توفر ادوية على الاقل للعيادات اللى تبقى حواليها

والدتى صيدلانيه يعنى مش افهم اوى فى الموضوع ده بس بعك شوية فى الكلام :D

العيسوى الصغير يقول...

مركز طبى!!!

بجد مشروع حلو بش عاوز منفذ ذكى

يا خسارة انا تجارة مش طب

هههه

شفـقــة و إحســــان يقول...

مش الصيدليات بس اللى بقت كده وحياتك كل الى بيعمل مشروع دلوقتى بيلاقيه اتهد
الواحد مش عارف ايه اللى بيحصل فى الدنيا يعنى لا مشروع خاص نافع ولا شغل بره نافع
الواحد يتخرج ويقعد فى البيت اكرمله

رحله البحث يقول...

مساء الخير يا دكتور
فعلا عندك حق رغم انى مش صيدلى لكن معظم اصدقائى صيادله ودا مخلينى عندى خلفيه عن صعوبات المهنه
وكلامك كله صحيح بس مش هيحسه الا اللى عنده صيدليه ويكون شاب كده ولسه بادىء
دا انا واحد صاحبى اكتشف ان الصيدليه اللى جنبه اللى اساسا اللى مأجرها مش صيدلى بيبعت ناضورجيه عند دكتور بينهم يشدوا العيانيين وهما نازليين من عنده
ههههههههه
ربنا معاكم لكن فعلا مستقبل الصديدلى بقى صعب جدا
تحياتى يا فندم

mayada يقول...

طيب هاتي صيدليتك وتعالي جنبنا نحط صيدليتنا جنب بعض (:

بصي يادكتور الحكايه مش حكايه معترضين كلام طق حنك دول عندهم حق
هقولك طبعا حضرتك عارفه ان الشركات مبتقبلش غير الخرجين الجدد قشطه والشركات برضه في نفس ذات اللحظه مبتستوعبش كل الخرجين قشطه كده طيب هيتبقي حبه دكاتره كده حلوين عاوزين يشتغلوا يعمل واااااا ايه اممممممم يهجوا علي بره قولتش انا حاجه غريبه قشطه جداا طبعا الدكتور الصيدلي مقولكيش بره بتفرم ويطلع عين اهله تلاقيه راجع بعد كام سنه بغدروف دوالي مش عارف انميه حاده اي هبل وخلاص لانهم بجد اكتر مهنه طالع تربنتين ابوها بره وخاصه خاصه في 8 سنين الاخيره لان احنا لما كنا في السعوديه الصيادله كان ليهم شنه ورنه المهم يجي ياست الكل جايب القرشين مش لاقي شركه تشغله كبر خلاص وقام خابط في نافوره الغلي بحيث التحويشه متكفلوش مشروع اضخم من الصيدليه الي كان ا ن الصيادله بيجوا من بره معملهم فورمات من اللي شفوه مش عاوز يفكر اصلا ضيفي لده ان لغي التكليف قشطه جدا حتي مش هينفع يتمسح في تراب الميري طيب يادكتوره يقولك تعمل ايه ياواد ياصيدلي تعمل ايه ياواد ياصيدلي يرميهم في صيدليه تعيشه وخلاص حفظا لماء الوجه
لما بقي ياجميل الصيدليه تبقي اربعين متر شوفي تتفرش دوا بكام وكمان خشب بكام ده اذا فرضنا اصلا اننا لقينا الاربعين متر من الاساس غير بقي الشروط بنت التيت التانيه ممممممم الجدران والهباب ده يبقي اسمه خراب بيوت ولا ايه يادوك
طبعا لااخفيكي سرا ان حكومتنا الرشيد سابه الحمار ومسكه في البردعه خلاص قنن الاعداد اللي داخله صيدله بدل انت شايف ان سوق العمل سبعه صيادله مش ادي اديله عمال تخرج ناس وخلاص (لااخفيكي سرا برضه ان حال صيدله هيبقي زي المؤسف علي شبابها كليتي تربيه في التلت سنين الجايه يلغي تكليف ويخرج عواطليه ) مش يجي يحط شروط مخبطه ده ياشيخه علي قديمه انا كنت عا مله لاخويا خشب حشو اي كلام يعني محاوله مني تقليل النفقات ودخل في 10 الاف جنيه مقولكيش يادكتوره علا الحكومه دي بنت تيت والرجاله دي مش لازم تسكت لازم يقفوا وقفه رجاله ده الصيادله اللي بره بيشدوا في شعرهم اصحاب اخويا كلهم والله بيعيطوا من القرار لانهم بره زي المساجين اللي مستنين السنه الجايه واللي بعدها يعملوا قرشين وياخدوا براه من البلاد بنت التيت اللي بيشتغلوا فيها
وكمان عاوزه اقولك مش كل الصيدليات بتاعه صيادله (مشروع استثماري ) ويسجل باسم صيدلي ده اللي خلي المهنه تلم طيب ماانت قدامك ترصد المخالفات دي وتقفل صيدليات وكمان ترصد الصيدليات اللي ماشيه غلط وتقفلها كده علي فكره نص الصدليات هتقفل وتتحل المشكل لكن زي ماحكومتنا عودتنا ليه نحل لما ممكن نعقد تاااااا اننن تشششششش
عواف عليكي يادكتوره
وكل سنه ومدونتك بخير ياجمر

ستيتة حسب الله الحمش يقول...

كنت ها اكتب امبارح عن نادي اعضاء هيئة التدريس
شالوا الهيئة المنتخبة
وحطوا لنا شوية مزورين
اللي حطوهم مش بس مش ها يعادوا حد ولا يطالبوا بحقوقنا
لأ دول اعلنوها بكل بجاحة
يا جماعة احنا نادي اجتماعي
يعني رحلة ندوة ثقافية
احنا لا لينا علاقة بزيادة مرتبات ولا فلوس جودة ولا اي كلام من ده
صريحة كده
بكل بجاحة

خلاااااااااااااااص انا ها أطق
هم فاكرين بيحكموا قبضتهم على كل البلد
ابدا والله الحلة البرستو قربت تزمر
تووووووووووووووووووووووووووووووت

متاخديش في بالك ده الأبلاتين .. معندكيش حاجة خضرا بقى؟ :)

ويكا يقول...

الله
طيب انتى لييه اساسا ما تنصحيش ان ما حدش يدخل صيدله من الاساس .
هههههههههه

مالها الهندسه ، فن ومدرسه .
هههههه

بس والله العظيم انتى عندك حق .بس اللى انتى مش واخده بالك منه
ان الموضوع مش الصيدلانيين ولا الصيدليه ، الموضوع الشعب بحاله.

يا بنتى الحكومه عندها خطه لولبيه مهلبيه خطيره حريره ، ان الشعب لازم يتخنق ويتخنق ، وينتشر ويتوغل ويتوغل ويخترق ويحترق لحد ما يموت كبدا وكمدا وغيظاً.

عنوان الخطه :
" مش هنسيب حد فى حاااااااااله ، ريحوا دماغكم "

ده العنوان ، فما بالك بالتفاصيل.

الله المستعان

سقراط مصر يقول...

حقيقة مش عارف اقولك ايه

المحبطين بيشجعوا مصر واحنا معاهم ..

احاسيس آيوشه يقول...

السلام عليكم ازيك يادكتورة علا يارب تكونى بخير دايما يارب
انا جيت اسلم على حضرتك وقريت البوست وبصراحة عندك حق فى كل كلمة
ربنا يصلح الاحوال البلد هى بقت الازمات فى كل الوظائف والمهن

سمع هوص (Abo 3li) يقول...

يادي النيلة حتي الصيدليات اتضربت.... هههههههه
الجد بقي ... ان الصيدلية زيها زي اي مشرووع... يحتمل المكسب والخسارة.. والمكسب الكبير والخساردة الفادحة برضوو...
يعني لو اتعملها دراسة كويس... واتعملت علي اصولها... هتنجح لو ربنا ارادلها النجاح.... غير كده... مش الصيدلي من دول يختار شارع فيه عشرين صيدلية.. ومفهوش غير دكتور واحد.. ومفيش مستشفيات فيه... ويتخيل انه هينجح...

وانا بضم صوتي للناس البيطلبوكي بحاجة خضرا ولا حمرا...
انا محتاج فعلا حاجة خضرا علشان... اعرف اكمل الاسبوع... لحد الاجازة

متألقة كالعادة في كل بوستاتك يا دكتورة علا

تحياتي

سبايدرمان يقول...

اه و الله فعلا بقي بين كل صيدليه و صيدليه خمس صيدليات :(

هو زي ما انتي قلتي احلي شغل للصيدلي انه يفتح مركز هو و مجموعه من الاطباء

يشتغل صح و ده من رايي الشخصي او الدعايا و مكاسبها حلوه قوي قوي قوي ^_^

بس متنكريش برضه يعني ان الصيدليات بتكسب قوي قوي يعني ^_^ مش بقر و الله ^_^ بس مكاسبها حلوه ^_^ و ده عن خبره برضه ^_^

sony2000 يقول...

انا بجد موش عرفه اقول ايه
مبين الغلاء والاسعار والاحتياجات اللي الشباب موش عرفين يجبوها لنفسهم او يحققوا طموحاتهم واحلامهم
بس بجد موش حقول غير حسبي الله ونعم الوكيل فاللي السبب اللي بيخلي الشباب يهاجرو وممكن يموتو من الغرق
ربنا يحميكي يارب
اعملي حسابك اما هحتاج حاجه هجيلك ماشي
تقبلي مروري وتحياتي

Ashraf يقول...

والله انا باشكر خالتى

لما تخرجت جديد والدى وزوج اختى الكبيره الصيدلى -ربنا يكرمهم - اصروا و رخصوا لى المكان -اللى بتتكلم عليه الدكتوره
ثم اشتغلت فى الدعايه فى شركة دواء
وكان ليا نفس النظره
-ده فى اول التسعينات-
كنت عاوز اسافر الخليج او اهاجر

فقالت لى خالتى - ما عندهاش صيادله- غلط بعد ماترجع هتلاقى الترخيص سقط ولامكان جديد يعنى الصيدليات ستكون مثل السوبر ماركت وحتى البقالين

باشكرها بعد تخرجى ب 20 سنه

وعلى فكره اخى ومراته ومراتى واخوها ومراته وطبعا زوج اختى الكبيره واخوه الاصغر وبنته واولاد المرحوم عمى الاثنين -مع الاسف- صيادله
.

والله المستعان

صيدلانيه طالعه نازله يقول...

richardCatheart
----------------

انتى عارفه انا ليا واحده دفعتى و سافرت مع جوزها دبى و بتشتغل مديره علاقات عامه فى السفاره اليابانيه هناك
و ناجحه و مبسوطه و عايشه حياتها
و هيا اصلا صيدلانيه
بس بصراحه حسبتها صح

انا نفسى الكل يفكر و يشوف ايه اللى يناسبه و يعمله

نورتينى يا جميله

صيدلانيه طالعه نازله يقول...

AHMED SAMIR
---------------
تصدق انت كلامك صح موضوع مساحه الصيدليه دى اخر حاجه تشغل التايكونات الكبار لان اقل صيدليه ليهم 70 متر من 40 و ساعه ما يحسوا ان مصلحتهم تتعارض مع مصلحه الصغار طبعا حنروح احنا فى البيبسى اصل الكازوزه دى قديمه قوىىىى

بالنسبه للكليات الخاصه فحدث و لا حرج

و فعلا حاجه تقرف جدا

صيدلانيه طالعه نازله يقول...

لولا وزهراء
-----------
من جهه حاطق فانا طقيت فعلا و من زمان
انا مش باطلب من حد انه يسمع كلامى لان انا برضه مسمعتش كلام اللى نصحنى زمان
و افتكرته مش بيحب لى الخير
هههههههههههههههه
و ادينى صدقت و اقتنعت
و خلال خمس سنين بجد زهقت لان محدش بيحس بحد لا اعضاء نقابه و لا نيله

نورتينى

صيدلانيه طالعه نازله يقول...

star in the sky
------------------
لا ده انتى فاهمه كويس مش خفيف
على الاقل حاسه بالوضع و متفهماه
و كلامك صح اكيد
نورتينى

صيدلانيه طالعه نازله يقول...

العيسوى الصغير
-----------------
مفيش مشكله ادخل برأس المال و سيب الخبره لاهل الخبره

نورتنى

صيدلانيه طالعه نازله يقول...

فاتيما
----------
و مين قاللك انى عملتها داليا قوس قزح هيا اللى ظبطتت المواضيع
انتى كنتى فى الغيبوبه

هههههههههههههه
الاخضر و الاحمر دى حاجات عيييب تعرفيها
خليكى نايمه و اسكتى احسن بدل ما تلمى علينا الناس

و كل الجروح ليها دوا
يا طير يا حايم فى الهوا

معندكيش الاغنيه نفسها يا اختى

صيدلانيه طالعه نازله يقول...

شفـقــة و إحســــان
-----------------------
لاننا بلد بيكره النجاح و المسؤلين فيه بيحسوا بمتعه اما يذلوا اللى قدامهم و لانهم بيغيروا من اى حد ناجح

ده بقى حالنا

نورتونى

صيدلانيه طالعه نازله يقول...

رحله البحث
----------------
اللى بيشدوا العيانين و اللى بيعملوا خصومات خرافيه لانهم بيتعاملوا مع مخازن المحروق
و اللى بيبيعوا المخدرات الشريط بعشر اضعافه
كل دى حاجات بتحصل و للاسف مفيش موقف رادع
تصريحات و بس

للاسف

صيدلانيه طالعه نازله يقول...

mayada
-----------
الموضوع كله و الله حسبه خسرانه من اولها لاخرها
و للاسف حتى شركات الدوا بتفضل البيطريين لان ملهمش طموحات تانيه لكن الصيدلى ممكن يسافر يفتح صيدليه و بالتالى وجوده مش مستحب عندهم
انا اخويا صيدلى فى الدعايه فى السعوديه و بيقوللى لو فكرت ارجع حاعمل محطه بنزين او اخد توكيل مطعم امريكى و اكبر دماغى

و بصراحه كلامه صح

صيدلانيه طالعه نازله يقول...

ستيته حسب الله الحمش
----------------------
للاسف كل مهنه بقى فيها قرفها و نكدها
و ربنا مولى امورنا لناس لابتحس و لا ترحم و المفروض يكونوا هما اداه توصيل همومنا للناس الاكبر
لكن للاسف بيبقوا هما سبب المشاكل

الاخضر حيوصلك يا قمر فى الاوفلاين
مساااااااااااااء الجمااااااال

صيدلانيه طالعه نازله يقول...

سقراط مصر
-------------
و المفروسين و المخنوقين بيشجعوا مصر و انا برضه معاهم
عاااااااااااااااا

صيدلانيه طالعه نازله يقول...

ويكا
----------
تفاصيل الخطه واضحه جدا و اعراضها بدأت فى الظهور
لان كل الناس بكافه فئاتهم بداوا يطقوا زيى بالضبط
يعنى الحاله بقت عامه و معنى كده ان خطتهم نجحت

صيدلانيه طالعه نازله يقول...

احاسيس آيوشه
--------------
ازيك يا يويو و ايه اخبار الدراسات العلياااااااااا
مستنياكى اهه شهر فبراير قرب يخلص و تفضى بقى
ربنا يريح بال الناس كلها لان الكل جاب اخره بصراحه

صيدلانيه طالعه نازله يقول...

سمع هوص (Abo 3li)
----------------
و لا متألقه و لا نيله
هو الواحد اما بيبقى مخنوق من حاجه بيتكلم بصدق اكتر و عشان كده الناس بتصدقه

و موضوع ان الانسان يدرس المشروع اكيد بيحصل بس للاسف البعض بيلجأ للاساليب الملتويه عشان يكسب اكتر و للاسف لا ده اسلوبى و لا دى طريقتى

صيدلانيه طالعه نازله يقول...

سبايدرمان spiderman
---------------------
و انا من هذوها المكان بادعوك انك تشاركنى باللى انت تقدر عليه و تلم المكااااااسب المهوووووووله اللى حاتيجى
اتفقنا

صيدلانيه طالعه نازله يقول...

sony2000
--------------
و انا حادعى معاكى عليهم و اتفضلى فأى وقت
اهلا و سهلا بيكى

صيدلانيه طالعه نازله يقول...

Ashraf
-----------
و الله انا لو من دكتور محمد توفيق نقيب اسيوط يسيبنا نستقل بنقابه عوائليه لوحدنا
و ياريت اى حد يعرفنا و يعرفه يقنعه بالاقتراااااااح ده

نورتنى يا بابا

سبايدرمان يقول...

احنا عندنا في بيتنا صيدليه
و الشغل فيها بسم الله ما شاء الله تومااام جدا


اممممممممم

خلاص نشوف حكايه المشاركه دي !! ^_^

طالبة مقهورة ..درجة أولى يقول...

ياااااااه بجد مكنتش اعرف ده كله الصيدلة بعيدة تماما عن تخصصي

بس اللي ملاحظاه فعلا ان الصيدليات كترت اوي اوي بقت اكتر من العيانين

وعشان كده طبيعي ان اللي عاوز يعمل مشروع عقلاني يفتح مثلا معمل..او حاجة تخصصها تابع لصيدلة بس بلاش صيدليات كفايا كده ^_^

مش اول زيارة هنا بس اول رد :)

تحيااااااتي يا دكتورة

قيس بن الملووووح يقول...

نحن في حاجه الي رايكم في مشاكل القراء
علي مدونة"دقات قلب فوق الخمسين

Timo.. يقول...

ياااااه..
للدرجة دي الرؤية سوداء..؟
مع ان ناس كتير واخدة فكرة مختلفة تماما عن الواقع اللي انت بتحكيه...!!!

فتاه من الصعيد يقول...

بس من حق اي حد يحلم بصيدليه برضو ... والقانون ده علشان احتكار الصيدليات الكبيره بس

عموما ربنا معاكم

تحياتي

emymony يقول...

ليه هتطقى سليمها لربنا وتوكلى على الله
وكل حاجه بقت كتير وبقا الترمجى بقا دكتور والله فعلا حاجه تطق
ربنا معاكى ويقويكى واى صيدلى يورث المهنه لابنه علشان الصيدليه تفضل مفتوحه كل بقا بيدور على المكسب مش مهم اى حاجه تانيه او طرقها ايه
تحياتى

لـــولا وزهـــراء يقول...

القمراية دكتورة علا
انا زعلانة قوي وربنا عشانك وعلى كمية الاحباط اللي في سطور كلامك
ربنا يصلحلكم الاحوال ياقلبي
وفرحت لما شوفتك جايبة اسمي


انا شخصيا لولا ان الصيدليه فى بيت حمايا كان زمانى قفلت من زمان

هههه قولت ايه ده هو انا اسمي جه ازاي وسط موضوع بيتكلم عن الصيادلة اكونش سابت يا لولو كنت علمي ودخلت صيدلة مهيا مش فارقة كتير بين صيدلانية ومحاسبة فرقت 6 او 7 حروف غلطة مطبعية ممكن تحصل :d
اهم حاجة ياقمر انك تكوني بخير وتعرفي ان الرزق بيد الله سبحانه وتعالى ربنا يزود فرحك
ويبارك في رزقك
ويبعد الغم عن قلبك


لـــولا

reem يقول...

بعد الشر عليكى ياقمر من الطق والضيق

بس والله مش الصيادلة بس اللى كدا

كله زهقان وطهقان

تعرفي انا كان نفسي ادخل صيدلة وافتح صيدلية اوى

بس ايه ياقمر النيو لوك الرومانسي العسول دا

حلو اوى اوى

وكل سنة ومدونتك طيبة وانتى طيوبة ومنورة التدوين ومنورانا

معلش متأخره بس كان عندى مشكلة ومش عارفه ادخل اغلب المدونات واعلق

نهر الحب يقول...

يابنتى
اولا الوقفات الاحتجاجية والاضرابات
بقت موضة مش مجرد طلبات او محاولة للتغيير
كمان الكل بيفكر فى الثراء السريع بأى شكل مش بشكل جدى او انه يكون صاحب مكان

تسلم ايديك ياقمر

Foxology يقول...

وبعد الاضراب والاحتجاج ؟؟ فين المطلب الصح اللى المفروض نطالب بيه ؟؟

كلامك مظبوط فعلا اننا نفكر صح اوى ونطالب بحاجة ملحة وضرورية وبعدها يبقى التحرك ايجابى

تحياتى

Tamer Nabil يقول...

انا قدام البيت عندى 7 صيدليات بجد تخيلى بقى مروح لمين فيهم وياريت حد رخيص عن التانى عشان الناس تفضل الارخص لا كلة غالى زى بعضة

مع خالص تحياتى