الجمعة، 11 يونيو 2010

المغفلين بيشجعوا الجزيره الرياضيه و التلفزيون معااااااااهم






كل اربع سنين و انتوا طيبين


بدأت النهارده بطوله كأس العالم لكره القدم


البطوله دى انا نفسى مسدوده منها و من قبل ما تبدأ


لان كل ذكرياتها معانا حزينه من اول الصفر المونديالى الشهير


اللى خدناه بجداره و استحقاق اثناء مرحله اختيار الفيفا للبلد


المنظم


و انتهاءا بموقعه ام درمان الشهيره و تأهل الجزائر للعب فى


نهائيات كأس العالم


و على الرغم ان البطوله دى المفروض المصريين لا ليهم فيها


ناقه و لا جمل


الا انى مقابلتش حد معدى فى الشارع الا و كان عمل اشتراك فى


الجزيره الرياضيه


و كمان اشتراك ماتشات كأس العالم اللى هو مبلغ تانى غير


الاشتراك الاولانى


و بعد ما كل الناس اشتركت و الجزيره لمت على قلبها قد كده


قرر التلفزيون المصرى بكل شهامه و اخلاص و تفانى


انه يشترى حقوق بث الماتشات على القنوات الارضيه


و بعد كل الملايين اللى دفعها التلفزيون المصرى قررت قنوات


الجزيره الرياضيه


بث الماتشات كلها على قناه الجزيره الرياضيه المفتوحه لكل


الناس


طب ده بقى معناااااااااه اييييييه


انا فضلت افكر و افكر ثم افكر و افكر


و ملقيتش غير فكره واحده و عايزه رأيكم فيها يا ترى صح و لا


 غلط؟؟؟


التلفزيون المصرى ليه مأعلنش انه حيشترى حق بث الماتشات


قبل ما الناس تدفع دم قلبها فى الاشتراكات؟؟؟


هما الناس دى مش مصريين؟؟؟؟ و التلفزيون اسمه التلفزيون


المصرى يعنى فيه قرابه بينهم


ولاد عم تقريييييييييييبا


ده مالوش غير معنى واحد مالوش تانى


ان التلفزيون المصرى متواطىء مع الجزيره فى القصه دى


كلها من الاول خالص


و ان الرقم اللى دفعه التلفزيون اقل بكتير من الملايين اللى تم


الاعلان عنها


و ان الموضوع كله تمثيليه رخيصه دفع تمنها الناس العاديه


الغلابه


و فى الاخر الجزيره ضربت المصريين و التلفزيون على قفاهم و


بثت الماتشات على القناه المفتوحه


و موضوع التشويش اللى حصل فى ماتش الافتتاح النهارده كان


مقصود من النايل سات عشان ينكدوا على الجزيره


بعد ما ضربتهم على قفاهم و  طلعت منظرهم زباله قدام الناس



مش عارفه انا تصورى صح و لا غلط


بس ارجع اقول فى الاخر القانون لا يحمى المغفلييييييييييين


وعوضكم على الله يا مشتركيييييييييييين


هناك 51 تعليقًا:

Ramy يقول...

ازيك

صحيح ملناش لا ناقة ولا جمل

بس دة كاس العالم يا ناااااس
(:(:

وانت جبتى من الأخر القانون لا يحمى المغفلين

علشان نترحم على ايام ART

يلا تصبحى على خير

وكاس عالم سعيد (:(:

سلام

بسنت يقول...

السلام عليكم
شوفى التليفزيون اشترى حق بث عدد معين من الماتشات مش كلها
ودا اعلنوه فى الجرائد من فتره من ضمنها مباراه الافتتاح اما باقى اختيار الماتشات ففى علمهم هما طبعا
الاختيار ازاى
والجزيره المفتوحه هتنقطنا بكام ماتش تفاريح علشان اللى ما اشتركش يشترك
مش كل المباريات بردوا

وانا على فكره من محبين بطولات كاس العالم وامم اوربا جدا ومتابعينها من زمان بس من ساعه الاحتكار والايه ار تى
بسمع اللى بيتذاع على الدش العادى او الارضى
لانى لن اشترك فى وصلات او شراء كارت
ومن ناحيه التليفزيون متواطئ دا الطبيعى ان كان باع تراثه القديم والجديد لروتانا وايه ار تى وبقت فى ايد اليهود
وربنا كبير
البلد بقت بتنقط فساد وظلم
ربنا يرحمنا

ويكا يقول...

ههههههههههههههههه

ههههههه
هههههههه

اموت انا لما الناس تقع فى بعضها ، وكله يدى كله على قفاه.

قلــ"بـــلال"ــــــب فارس يقول...

انا ضدك تمام .....
فى نقطه الجزيرة دى
طبعا انا من محبى قناه الجزيرة كتير كتير ...لانها هى وقناتين ثلاثه بتجيب اخبار حلوة وصحيحه .......
انا ضدك قولى ليه ....
1. فيه مشاكل مابين قطر ومصر فاعمر ماهيكون فيه تناسق مابينهم .....
2. قناه الجزيرة فيها تشويش على القنوات الخاصه ومتعمد من مين الله اعلم
3. ان كاس العالم زى ماالناس بتقول عروس الكرة ...
فالناس بتسمعها زى افلام الاثارة فرحه لااكتر
...........
ومع هذا الكلام
اه انا محبى كرة القدم ولكن بالعقل ولست كالكثير من الناس
.......
ونتمنى فوز الجزائر بكاس العالم
او على الاقل تلعب حلو
لتشرف الكرة العربيه

خواطر شابة يقول...

ياعزيزتي هنا في المغرب وعلى الاقل بالنسبة لي كأنثى لن أذهب لاتفرج في المقهى نزل علي قرار البث على الجزيرة المفتوحة بردا وسلاما وتابعت من البيت مبارتي اليوم وعقبال البقية ان شاء الله
تحياتي عزيزتي

فاتيما يقول...

يا لولاّ
دا اسمه تلفزيون النوظام المصرى سعادتك
يعنى انتى بتتكلمى فى ايه بس يا علا ؟؟
مصلحة المواتن دا ايه ؟؟

ثانيا لماضة
لا فوض فوها
لخصت الحدوتة فى البوست دا

http://lamadaa.blogspot.com/2010/06/blog-post.html

يعنى مش عشان سواد عيونا
و لا تواطؤ مع الجزيرة
او ضدها حتى
دى خيابة بعيد عنك
و فلوس ف الأرض و خلاص


و الواحد ملوش نفس و الله
يشوف كورة
بعد اللى حاصل دا


بوسيلى العيال
و خلى بالك من نفسوياتك

adel يقول...

اول ماتش مش لذيذ
ياعبـ عزيز

Mark Hogan يقول...

أنا شايف إن البلد مابتحترمش الرياضة ولا الفن ولا نفسها, أقصد النظام الحاكم يعنى.
أصبحت مصر اليوم, مولد وصاحبه غايب, وهنا بقى مابقصدش ب (صاحبه) النظام, لا, باقصد المواطن المصرى.
مش عايز انكد عليكم, لكن انهاردة المواطن المصرى غايب ومتغيب, وهو المواطن الوحيد اللى بيغش ويخدع نفسه, ويكدب وينصب على نفسه.
والغريبة, ان الشعب اللى فيه كل البلاوى دى, بيرضع دين ويطفطم على دين ويفطر ويتغدى ويتعشى دين ... وفى نفس الوقت, شعب يطلع الدين.
طب قلولى بقى, الشعب ده لو مانصبش على نفسه؟ ... هاينصب على مين؟.
لو حد قال لكم, ان الكلام اللى باقولو ده غلط وزفت وطين, صدقوه, وقوموا صلوا ركعتين, وقولوا بصوت عالى, آمين ... بس للأتاوى والرشاوى والإشتركات, انتوا دافعين دافعين.

ستيتة حسب الله الحمش يقول...

انا جاية اسلم واقول ميرسي يا قمرة على السؤال
وزي ما انتي شايفة كده انا مش عارفة انام لسبب غير معلوم خاااااااااالص :)
انا لسه ما اتفرجتش على ماتشات
يعني الجمعة راح مني في الوبا
بس ان شاء الله ها تفرج
تلفزيون مصري وجزيرة
اممممممممممممممم
ومين قال ان التلفزيون كان يعرف ان الجزيرة ها تمن عليه وتسمح له بعرض 22 ماتش
وكده كده اللي بيحب الماتشات الحلوة لن يكتفي بعدد دون الأخر وها يشتري التروماي :)

سمع هوص (Abo 3li) يقول...

مفتكرش ان التلفزيون متواطئ مع الجزيرة في الحوار ده...
الليلة ان كالعادة الجزيرة مش عاوزة تبيع بسعر رخيصص للتفزيون المصري... والتلفزيون محلتوش التمن... فبيرفض...
لحد ما الكبير (الريس) يأمر بأنهم يشتروه.. بقرار سيادي سياسي الهدف منه اشغال الناس بالفرجة علي الكاس... وعلشان ميركزوووش مع البلاوي الهيعملها النظام في الفترة دي... واهو اي حاجة الناس تتلهي فيها...
بس بتوع الجزيرة طلعو صييع... وبعد ما باعو حقوق بث ال 20 ماتش دووول للتلفزيون الارضي ... قررو انهم يزيعوها ببلاش عندهم علي المفتوحة... وكده التلفزيون خسر مرتين.. لان كده المُعلنين مش هيروحو علي التلفزيون الارضي ال محدش بيستخدمو تقريبا.. وهيروحو للمفتوحة...
ودُمت..

MR.PRESIDENT يقول...

الحمد لله احنا مشتركناش ..
وحتي اللي اشترك مش مغفل
يعني حتي اي حاجة تفرح
اللي حصل ده مهزلة
يدل ان البهايم كتروا في الاماكن الادارية
يعني الحمار اللي ابرم العقد
مش يفهم خالص .
بس يله اصلا المتشات القصد منها تنيم الناس ان البلد بتتحرق دلوقتي من جوه
والناس بتغلي
وبقينا في بركان
وربنا يستر .

Wanda يقول...

لولة
الكورة ديه ممكن نعتبرها بديل البانجو و البراشيم
خليى بالك بكرة يجوا الصيدلية يسالوكى عليها :-)))
حضرى استوكات كثيرة كثيرة يا لولة
:-)))))))))))))))

تعرفى الكورة عملت فينا ايه ؟
قلبت ميدان رمسيس و الاسعاف و احمد حلمى لحد دلوقتى بسببها

خلتنا نلم الناس فى طيارات للسودان ( من زمان معملوهاش تقريبا علشان لما يضربوا و يتبهدلوا تسمع كويس و برضه)
و اتبهدلنا لمرحلة كنا حنعلن الحرب على الجزائر لكن الحمد لله محناش جنب بعض و الا كانت ولعت بجد

و لما بداؤا يقولوا المتشات محتكره تسمعى العجب العجاب
فتاوى حرام الفرجة منغير ما تدفعى انت كده حرميياية
و فتوى تبيح بانك تسرقى و تفتحى شفرة المحطات دول هما العالم المفترية
فتاوى رايحة و جاية و الدين بقى سبهلله

و لسه الناس عايزة تتوه فى الكورة و تنسى الشورى و البرادعى و البلاوى الثانية و كمان تدفع

و بعدين سؤال سخيف يعنى التلفزيون المصرى مينفعش يشترى الا من الجزيرة على متشات بتنظمها الفيفا فى جنوب افريقيا
اشمعنى ؟؟؟؟؟؟؟؟

بصى الى معاه قرش و محيره يجيب الجزيرة و المتشات و يطيره
و القلم من الجزيرة للتلفزيون المسرى للمواطن المصرى عادى ياترى بقى الناس حتدى قلم لمين ؟؟ مهو لازم يتنقل ؟؟ مش كده برضة و لا ايه ؟؟؟؟

و بعدين مش قولتلك فى عهد الرئيسة انشاء الله حتبقى المونديال عندنا و احنا بقى نغلس على العالم دول كلهم :-)))
قولى انشاء الله :-)))))))))))))))

ندى الياسمين يقول...

اه طبعا

يا بنتى اللعب من تحت الترابيزه دلوقتي بقى من فوق الترابيزه وبكل بجاحه

وبعدين احسسسسسسسسن


كل الى دفع واتاكل على قفاه احسسسسسسسسسسن

داتكم ستين نيله لكم نفس تدفعوا عشان ماتشات كاس العالم وانتم مواكيس فيها من الدرجه الاولى


صباح الخير با لوليه

يــوم جــديد يقول...

يا لولة المقولة دي اتغيرت من زماااان
بقت "القانون لا يحمي المصريين"
بجد المصريين هم الوحيدين في العالم اللي مفيش قانون يحميهم ولا يرجع لهم حقوقهم أي حقوق حتى حقوق الملكية الفكرية

أنا كل معلوماتي عن الكورة إنها مدورة وبالتالي مش عارفة أي معلومات عن أي كاسات لكن أي حد يعمل أي حاجة والمصريين يشيلوا
هو في غير المصريين يشيل!!!

صيدلانيه طالعه نازله يقول...

samy

هو فيه زى ادب و اخلاق art

هيييييييه كانوا يفضلوا يذلونا و برضه فى الاخر يخلونا نشوف الماتشات ببلاش
ايااااااااااام

صيدلانيه طالعه نازله يقول...

بسنت

اللى فهمته امبارح ان الجزيره الرياضيه التانيه المفتوحه حتذيع الماتشات كلها و الله اعلم
اصل خلاص الفلوس و اتدفعت و الاعلانات و اتعملت
يبقى خلاص الاذاعه للماتشات مش حتخليها تخسر حاجه

صيدلانيه طالعه نازله يقول...

ويكا

بتبقى متعه مش كده؟؟؟

ههههههههههههه

صيدلانيه طالعه نازله يقول...

قلــ"بـــلال"ــــــب فارس

ساعه المصلحه و دفع الفلوس المصالح حتتصالح و مش حيبقى فيه قطر و مصر حيبقى فيه سلم و استلم
سلم الفلوس و استلم المصريين اضحك عليهم براحتك

تحياتى

صيدلانيه طالعه نازله يقول...

خواطر شابة

انا برضه كان صعب انى انزل اى كافيه و اتفرج

بس ده ميمنعش اننا اضحك علينا و بعدما الناس دفعت
لقيت الماتشات لكل الناس سواء من دفع ام لم يدفع
مش كده يبقى غش و لا ايه؟

صيدلانيه طالعه نازله يقول...

adel

فعلا الماتش الاولانى جميل
لكن التانى كنت متوقعه فرنسا تلعب احسن من كده
بس مش حنحكم من اول ماتش

صيدلانيه طالعه نازله يقول...

فاتيما

البطوله دى سبحان الله جايه بالنكد من قبل معادها بعشر سنين
و الواحد فعلا ملوش نفس يتفرج

بوست لماضه زى كل البوستات اللى اتكتبت عن خالد مؤلمه و موجعه

ربنا يرحمه و يرحمنا جميعا برحمته

صيدلانيه طالعه نازله يقول...

Mark Hogan

كلام مؤلم و يوجع قوى
بس للاسف حقيقه
و مقدرش اقاوح و لا اقولك ايه اللى بتقوله ده

انت وصفت اللى بيحصل كأنك معانا

منورنى

صيدلانيه طالعه نازله يقول...

ستيتة حسب الله الحمش

يااااااادى التروماى اللى الكل اشتراه و لسه فيه حجوزات تانى عليه
ههههههههههههه


المهم انتى يارب تكونى كويسه و الثانويات العامات متكونش القت بظلالها السلبيه عليكى

ربنا معاكم يا توته يا قمر

صيدلانيه طالعه نازله يقول...

سمع هوص (Abo 3li)

انا قلت فعلا التلفزيون ميدفعش المبلغ ده كله الا بأوامر عليا
طبعا نظامنا بيحب يدلع شعبه
عندك اعتراض و لا ليك رأى تانى

قول قول و مش تتكسف

صيدلانيه طالعه نازله يقول...

MR.PRESIDENT

فعلا الناس خلاص بدأت النوم من امبارح و معاك كده شهر قدام

تصبح على خير بقى

صيدلانيه طالعه نازله يقول...

Wanda

فى عهد الريسه حيبقى شعارنا
المونديال للجميع
هههههههههههههه

طبعا مينفعش نشترى غير من الجزيره
لان الفيفا باعتله حق البث يعنى هما محتكرين المونديال فى الوطن العربى

صباحك فل

صيدلانيه طالعه نازله يقول...

ندى الياسمين

شريره انتى يا ستنا
احسسسسسسسسسن قوى كده
مش دول زمايلك المصريين و حتما و لابد نتعاطف معاهم و نتبرع و لو بجنيه
هههههههههههههههههه

صباح الفل يا ياسمينا

صيدلانيه طالعه نازله يقول...

يــوم جــديد

يييييييييييه انتى معلوماتك قديمه قوى
الكوره اتغيرت بقت مستطيله و ساعات مربعه
لكن مدوره نووووووووو كانت موضه و بطلت

و بعدين المصريين من زمان غاويين يشيلوا
و يحملوا
و غنوا من زمان اغنيه
حمال الاسيه يعنى محدش ظلمهم و لا اتجنى عليهم
ههههههههههههههه


منورانى يا قمر

بنت وولد يقول...

حاسه ان فيه حلقه مفقوده بين الموقف المصرى و موقف قناه الجزيره
و طبعا مش حتتعرف الحلقه دى غير لو اتخانق الطرفين و فضحوا بعض
ساعتها بس حتتكشف خيوط المؤامره

دعواتكم انهم يتخانقوا

زهــــراء يقول...

دكتوره علا


-*-*-*-*

هو من امتى الناس بتثق فى اى حاجه بيقولها التى فى المصرى بصى انا هاخرج من الموضوع شويه فاكره وقت موضوع الدويقه هو كان موضوع مصرى ميه فى الميه احنا بقى كنا نتابع الاخبار فى العربيه والجزيره لانه بكل بساطه الاعلام المصر فقد مصداقيته عند الناس عارفه حتى لو كانوا قالوا ان المباريات هتتذاع كان برضه الناس مش هتصدق يابنتى خلاص الثقه مفقووووووووووده

بكره كل شئ ينكشف ويبان وتعرفى انها كانت خطه مدروسه وكل حاجه كان لها سبب معروف ومتفق عليه مسبقا

انا مش ناويه اشجع اى حد

تحياتى لكى ولكل المشجعين

Mark Hogan يقول...

شكرا يا أستاذة, دا كله من نورك, لأنك بتنورى الناس,
ولأنك حقيقية, بتوصلى بسرعة لكل من عنده إحساس,
باهديلك من هنا نسمات من على نهر الدانوب,
محمولة بالأمل, اللى يشجعك ويخليكى دايما منورة وتسعدى القلوب.

كيكى عوووووو يقول...

عادى
عادى
يعنى هى جت على دى!!!!

صوت من مصر يقول...

مليش نفس اتفرج على كاس العالم

ميرا ( وومن ) يقول...

صباح الفل علي الناس الرايقة اللي بتشجع الكورة وكاس العالم واللعب اللي علي كبير

بصي يا لولو بما أني مش هاتابع غير الفاينال وهاكتفي بمعرفة النتائج

فبصراحة مش مهتمة بموضوع كاس العالم قوي

اييييييييييه فين ايام مكنت انا وماما نصحي من بدري علشان نشجع اليابان :))

المهم يا حبيبتي ان التي في المصري أشتري التروماي واتنصب عليه والناس بتتفرج علي الجزيرة برضة علشان محدش بيعبر الجهاز اللي العقيم اللي اكلة السوس ده

التليفزيون المصري صورة معبرة عن الفساد اللي بنعيشة

صباح التشجيع

momken يقول...

ازيك يا دكتور

انا مش عارف ايه دخلك صيدله بس
كنتى ادخلى سياسه علشان تنوريها و نزيد واحد

بالنسبه لموضوع الجزيره
دى الطبيعى واعادى بتعنا احنا دايما بناخد خطوة متاخره
وبنتصرف بطيبه وحسن نيه (عبط يعنى)مع الاشقاء الزفت العرب

وكل دوله من دول بتبذذل قصارى جهدها للنيل من مصر باى صوره وطريقه
والحقيقه شويه الموظفين الغريبه الى عندنا يسعدوعم بشتى الطرق وبتفانى عجيب

ودى تطور طبيعى للوظايف الى راحت للوسايط فى اوائل التمانينات
واصبح الموظفين دول للاسف مسئولين كبار
بدون علم ولا درايه
انتى اشارتى لاخفاقات كتير زى صفر المونديال وفضيحه الجزائر وتصدير الغاز لاسرائيل ببلاش واتحاد الكوره
والامم المتحده وهروب طلبه الدرسات العليه لامريكا علشان ينفعواوميتحولوش لمدرسين جامعه وموظفين
والمنح الدراسيه الى تحت الترابيزات لمتفوقين كليات علميه كبيره زى العلوم والجيلوجيا وهندسه الطاقه كل دول يبتسرسبوا زى ما اترسب فاروق الباز واحمدد زويل ومجدى يعقوب وغيرهم كتير اوى

والى هبفضل يبقى زى يحى المشد ومنعرفش نحميه او يبقى زى المسيرى ونهاجمه ونقطع لسانهلازم نفضل كده تحت حكم الموظفين والمنتفعين

كفايه كده علشان اتنرفزت

ابوست جميل وملهم وكالعاده ملتهب



تحياتى

Foxology يقول...

اهى سبوبة ومصلحة والمغفلين هم الضحايا

عليه العوض فى الملايين اللى اتصرفت

تحياتى

had-befham يقول...

ممكن يكون كلامك صح
بس انا رأيى ان فيه نداله جامدة فى الموضوع
وفى النهايه مستحيل الجزيرة تذيع اكتر من 30% بس من المباريات على القنوات المفتوحه

صيدلانيه طالعه نازله يقول...

بنت وولد

ياااااااااااااارب يتخانقوا يا اختى عشان المسروقات تبان

نورتونى فى اول زياره و يارب متكونش الاخيره

صيدلانيه طالعه نازله يقول...

زهــــراء

اسوأ حاجه اما الناس تفقد الثقه فى اعلام بلدها و تلجأ لغيره
مع انه ممكن يكون برضه مضلل بس الناس بتثق فيه

منورانى

صيدلانيه طالعه نازله يقول...

Mark Hogan

ربنا يخليك
و ميرسى على نسماتك الجميله
و على كلامك اللى بيدينى دفعه انى دايما احاول ابقى احسن و اكثرواقعيه

تحيات مبلله و معطره بماء النيل

صيدلانيه طالعه نازله يقول...

صوت من مصر

تصدق بالله
و لا انا كمان ليا نفس

صيدلانيه طالعه نازله يقول...

كيكى عوووووو

على رأيك يا كيكى يا اختى
هيا جت على دى؟؟؟

صيدلانيه طالعه نازله يقول...

ميرا ( وومن )

تخيلى فعلا يا ميرا البطولات اللى فاتت كنا منفعلين اكتر و بنشجع فرق بعينها اكتر
دلوقتى لا

التلفزيون اشترى المترو
التروماى اتلغى من زمان
بطلى جهل بقى
هههههههههههههههههه

منورانى يا سكر

صيدلانيه طالعه نازله يقول...

momken

لا يا سيدى السياسه سيبناها لاهل السياسه انا ابعد من يكون سياسى فى يوم من الايام
ههههههههههههههه

انا نفسى اعرف فعلا هيا مصر واجعاهم ليه قوى كده
هل هيا غيره فعلا
من ايه و على ايه
احنا بقينا فرجه لشعوب الارض
اقل شعب فى العالم بقى احسن مننا

و فعلا زى ما انت بتقول احنا عندنا شويه موظفين يجيبوا الضغط فى كل الاماكن و الجهات
بس المفروض جهاز سيادى حساس زى التلفزيون يبقى فيه ناس انضف من كده
بس للاسف الموظف موظف فى كل حته

شكلك موجوع و متغاظ قوى و يمكن اكتر منى كمان

ربنا يرحمنا و ينور طريق البلد دى بقى

و ميرسى على رأيك فى البوست و كويس ان مش معاك كبريت
كان البوست ولع

منورنى

صيدلانيه طالعه نازله يقول...

Foxology

كلامك قليل
بس هو صح فعلا

تحياتى

صيدلانيه طالعه نازله يقول...

had-befham

لا من جهه النداله فعااااادى
بتوع الجزيره بيحبوا مصر موووووووووت
و كل حاجه متوقعه منهم

منورنى

Anonymous يقول...

ثقافة الهزيمة .. حلوة يا بلدى

فى كتاب داخل مصر"Inside Egypt": أرض الفراعنة على شفا الثورة الذى صدر عام 2008 يقول كاتبه الصحفي الأنجليزي جون برادلي عن مستقبل مصر أنه على رغم من بعض النجاحات الاقتصادية ألا أن توزيعها تم على من أرتبطوا بالنظام فقط دون أن يصل ذلك لباقي الشعب مما أدى"زيادة الحنق" بين المصريين. ويشير الكاتب إلى رؤيته في زياراته المتكررة لمصر كيف مثلا أن عدة ملايين من الثروة المصرية تنفق لأنشاء المصارف وتقديم المياه للقرى السياحية والفنادق الفاخرة التي يستخدمها السياح الأجانب والأغنياء المصريون فقط "في حين يموت الألاف المصريين كل عام نتيجة تلوث المياه التي تصل لهم"...

باقى المقال ضمن مقالات ثقافة الهزيمة بالرابط التالى www.ouregypt.us

و لايفوتك زيارة صفحة من الشرق و الغرب فى نفس الرابط و به الكثير من المقالات الجيدة.

ELMOSTAFZ يقول...

ايه اللي بيعجب الناس في الكورة نفسي افهمممممممممم

maxbeta3zaman يقول...

يقول المثل الشعبى
ضرب القفا... شفا

Unknown يقول...

شركة تنظيف بالرياض

شركة تنظيف فلل بالرياض

شركة تنظيف شقق بالرياض

شركة تنظيف منازل بالرياض

شركة تنظيف خزانات بالرياض

شركة رش مبيدات بالرياض

شركة مكافحة حشرات بالرياض

شركة مكافحة النمل الابيض بالرياض

شركة كشف تسربات المياه بالرياض

شركة عزل خزانات بالرياض

شركة نقل اثاث بالرياض

شركة نقل اثاث

Unknown يقول...

شركة تنظيف بالرياض

شركة تنظيف فلل بالرياض

شركة تنظيف شقق بالرياض

شركة تنظيف منازل بالرياض

شركة تنظيف خزانات بالرياض

شركة رش مبيدات بالرياض

شركة مكافحة حشرات بالرياض

شركة مكافحة النمل الابيض بالرياض

شركة كشف تسربات المياه بالرياض

شركة عزل خزانات بالرياض

شركة نقل اثاث بالرياض

شركة نقل اثاث